Зорина Ольга

Кык диплом мыным уг тырмы

Зорина О.

Пыдэстэм инбамын вань аспӧртэм сузэръёс-кизилиос. Уно миллиард ар ӵоже соос трос миллиард иськемез ортчо, кунулскыса музэн, ог-огзэс возьыса. Огез шуак пуштэ ке, мукетыз йыроме, сюрессэ ыштэ но олокытчы луэ.

Музъем вылын но сыӵе люконтэм эшъёс вань. Асьмелэн пельёсмы кемалась дышизы ни таӵе кылъёслы: кырӟало Мефодьевна но Зоринча – Алефтина Корепанова но Ольга Зорина.

Туж пӧртэмесь соос. Зорина ваньзэ лэсьтэ йыг-йыг: басьтэ кык диплом, вае куинь нылпи, театрын шудэ уно рольёсты, луэ республикаысь дано артистка. Корепанова ӝог ӝуалске но кысэ. Театрын со вал актриса – луиз костюм дасясь. Дышетсконзэ уно пол куяз. Семьен улонзэ кема радъяны выриз.

Но соос – ог-огзылэсь люконтэм кизилиос.

- Кытын вордско таӵе уӵыос?

- Вавож палась нюлэсъёсын уӵыос трос. Мон сярысь ке юаськоды, вордски Вылӥ Кионын, Будӥ Партчиын, дышетски Гурезь-Пудгалан но Вавожын.

- Пичиысен ик сцена сярысь малпаськид, дыр.

- Озьы кадь. Вавожын дышетскыкум, интернатын улӥ. Ваньмон дыръям кожалляй музыкая школае. Монэ уг но ӧтё, уг но улляло. Вераны кулэ: вань улытозям сямен тыбырам кык ныпъет ошыса нуллӥсько: дышетскон но кырӟан, ужан но кырӟан, нылпи вордон но кырӟан. Мемие улон сюресэ пумысен ноку но ӧз индылы, ачид тодӥськод, пе.

Дас класс бере Ижысь Музыкая училищее йыгаськи… экзаменъёс ортчем бере. Пыри ни Культурая училищее. Сюри Алефтинаен одӥг группае. Зэм, со кыкетӥ курсысь кошкиз.

Хорлы дирижёре дышетскемен ӵош кужымме эскери кырӟанын, фортепьяноен но баянэн шудонын. Училищеез быдтыкум, «Италмас» утчаз выль кырӟасьёсты. Сопрано куарае Анатолий Мамонтовлы кельшем, лэся. Дасо мурт пӧлысь монэ но эшшо одӥг нылэз бырйиз.

Диплом басьтыса, Партчие бертӥ но, сьӧрам ик гожтэт вуиз: лык «Италмасэ». Нош районысь уг лэзё, одно ик куинь ар ужано, пе. Туала визьмыным ятвылтӥ ни: Вавож районысь культурая отдел но, «Италмас» ансамбль но пыро Культурая министерствое, отчы мын, кенешы но кошкы Иже. Соку нодтэм вылӥськем.

- Партчиын уж сюриз-а?

- Соку гинэ выль клуб усьтӥзы, отчы фортепьяно вуттӥзы. Монэ худруке юнматӥзы. Мар гинэ ӧм дауртэ! Мынӥсько фермае но кебитэ, школае но гараже. Адямиосты хоре лӧпкытъясько. Уно гинэ люкаськизы. Фортепьяноен шудыса возьматӥсько кык куараен нёжъяны. Куинетӥ куараез гинэ ӧмгес ворме. Ветлӥм пӧртэм концертъёсы но смотръёсы, басьям грамотаос но дипломъёс.

- Ой, шудо егит дыр! Нош бызьыны ӧд дырты-а?

- Мар тӥ? Тодам но ӧз лыктылы. Гуртоосы шоры ноку но ӧй учкылы. Пиос пӧлын эшъёсы уно вал. Но соос кузпал луонъёс кадь ӧз потылэ. Вуоно араз Партчие спектаклен лыктӥз Удмурт драмтеатр. Учкисько но – артистъёс пӧлын сэзь-сэзь шудэ Алефтина. Со но монэ тодмаз. Дышетскон вылысь кужымме эскерыны дэмлаз.

- Шуг-а вал Уфаысь Искусствоосъя институтэ пырыны?

- Ужаны ӧз лэзе бере, дышетскемлэсь уз алэ, малпасько. Ширтӥ Иже. Куинь тур ортчоно. Сокем ӧй куалекъя, малы ке шуоно кӧня ке дышетскеме но калык азьын сцена вылэ потаме вань. Нош сомында калыкез адӟыса шальтрай. Но дас кык шудоос пӧлы сюри.

Уфае лоби самолётэн – улытозям нырысьсэ. Искусствоосъя институтын вань театръя факультет, музыкая факультет. Драмая артистэ дышетскемен ӵош весь бергасько кырӟасьёс, оркестрын шудӥсьёс, композиторъёс котырын. Бератаз йыгаськи кырӟанъя педагог доры:

- Дорады но дышетскеме потэ.

Амал шедьтӥз – вылӥ курсысь кырӟаны дышетскись нылэз бордам юнматӥз: кыкнадылы пайда медло, пе. Чебер башкир ныл монэ чик дун басьтытэк тодматылӥз пӧртэм ариосын, ваокализэн.

Удмурт группа умой вал. Со уката юнмаз, кыкетӥ курсын армиысь Геннадий Бекманов вуэм бере. Кырӟан но эктон медло милемлы – арганчимы вань.

- Вуоно артистъёс кунсьӧр кылэз дышето-а?

- Кызьы сотэк? Школаын но, институтын но немец кылэз яратӥ. Спектакльысь люкетъёсты немец кылын шудылӥм. Егит нылашлэсь рользэ кырӟаса возьматӥ. Пушкам ик кылиз ни кунгож сьӧрын ужан сярысь малпанэ.

- Чеберъяськиськод, дыр, театръя талантэд пичи шуыса?

- Чик уг. Капчи мюзикл но водевиль мыным кельшо, секыт драмаос уггес. Уфаысен ик сое педагогмы шӧдӥз: тыныд тупало сямо (характерной) яке гуро (вокальной) геройёс, эскеры астэ отын.

Отысь али гинэ бертӥм кадь – кызь ар ортчиз ни.

- Кӧня роль шудӥд та дыр куспын?

- Огпол но чакламе ӧвӧл. Лыдъяны но шуг: я пичи роль шудӥськод, я кыкетӥ-куинетӥ составе шедиськод. Тужгес шудоно вакытам бызьыны сюриськиз ук. Куинь нылпи вордӥ.

- Кудӥз ролед кемалы сюлэмад кылиз?

- Варфоломеевлэн «Сюрес вожын» спектакляз шудӥ Светалэсь рользэ. Режиссёр Василий Ушаков оске артистлы. Огъя сюрес возьматэ но, чыры-пырызэ ачид йылаз-пумаз вуттӥськод ни. Быгатонмес волятыны туж юрттӥз на Василий Перевощиков. Катя Новиковаен ӵош дасям Светалэсь рользэ. Премьерае мон потӥ. Аслам визьмыным, аслам лулыным лэсьтӥ образме. Спектакль кема ӧз ке но мыны, роле уг вуны.

«Улӥськом-вылӥськом, шу» спектакльын Александр Вершинин одӥг ролез сётӥз Катя Яковлевалы но мыным. Премьерае Катя потӥз, бӧрысь мон ачим сямен шудӥ ни.

- Куддыръя одӥг ролез куинь кышномурт дася. Репетициосын режиссёр ӵемгес ужа нырысетӥ составысь артистэн. Кыкез учкыса пуко. Кыкетӥ-куинетӥ составын дыръяд уд кышкаськы-а, нырысети составысь актрисалы пышкылод шуыса?

- Уг. Одӥг ролез ик пӧртэм актёръёс копак асьсэ сямен адӟо.

- Кызьы уд? Чужановалы режиссёр бур пыдыныд вамыштыны шуиз ке, Зорина паллян пыдыныз лёгиськоз шат?

- Ха-ха! Режиссёр схемазэ гинэ пусъе. Артистлэн психофизика шуонэз аслаз кыле. Сое нокинэн уд сура.

- Ой, таиз мыным укыр валантэм.

- Котьма шуэлэ, нош мукетсэ юри пышкылэмед потӥз ке но, уд пишмыты. Сыӵе быгатонлык – искусстволэн музон удысэз – пародия.

- Табере выжо яратоно удысад – кырӟанад.

- Секыт юан – секыт ныпъет. Ас поннам нукыртонэ вал кемалась. Огвакытэ шӧдӥ: астэ возьматэмед потэ ке, маид ке аслад гинэ медло. Тодам ваи: куараме ушъяло. Зэм, соин нокинэ уд абдраты. Кылбуръёсты ас поннам лыдӟыны яратӥсько. Но соослы аспӧртэм шӧм пыртыны кулэ. Аслэсьтым гожтэм кылбуръёсме радъяны ӧй дисьты. Мукет кышноослэсь чуръёссэс учкисько, ӵошатӥсько. Татьяна Черновалэн кылбурезъя кыӵе ке гур кылдӥз кадь. Пичи Вероникае пуке картэлэн мемеез дорын. Соослы маке-маке нёжтӥ но, мама абдраз:

- Ма, кен, туж умой пӧрме ук та! Выль кырӟан-а, мар-а? Кытысь та? Ноку но кылылэме ӧвӧл.

- Ачим малпай.

Огез бӧрсьы мукетыз кырӟанъёсы вордӥсько. Аслым ачим ик пайми. Али гинэ кадь театрын уж ӧз пӧрмылы, дорысь фортепьяноме вузай, уже нылпи садэ кошкыны дасяськи. Нош табере?

Валентина Бекмановалэн «Мон кышномурт, мон анай» спектакленыз ӵош артистъёс гуртъёсы концерт но поттыны дасясько. Куд-ог кырӟанъёсме дэмлай Геннадий Бекмановлы. Оскалтом, пе. Юрттӥз. Иван Григорьевых дасяз фонограммаос. Дун но йӧн-йӧн ӧй тыры кадь.

- Кызьы вуид та шаркан дыды дӥне?

- Весь огнын секыт ук. Кыкен чебергес пӧрме. Сцена вылын номеръёсты но озьы радъяны капчигем. Малы Аляен эшъяським? Ачиз мед вералоз. Гастрольёс бере, сӥзьыл, дорам Аля вуэ: Ольга, мон кырӟан гожтӥ. Копак дэйми: мар луэм таин? «Капи-кап» вылэм. «По долинам и по взгорьям» кадь потӥз. Алла Кузнецовалэн кырныж сярысь чуръёсыз но ӧзгес кельше. Шуисько: яке кылъёссэ вошты, яке гурдэ тупатъя. Иван Григорьевых фонограмма гожтӥз но, кырӟан чылкак мукет луиз. Кырныж сярысь кылъёсыз Алефтиналы кельшизы ке но, мон куштытӥ.

- Сцена вылэ кызьы потыны, отысь кызьы кошкыны кин дышетэ? Артистэ дышетскемды юрттэ-а?

- Юри ум дышетскиське. Котькуд кырӟаммес нимаз пичи спектакльлы пӧрмытоно вал. Ум вуиське.

- Операе потыны малпан быдэсмытэк ик кылиз-а?

- Вань на мылкыды. Романсъёсъя концерт дасяме потэ. Сыӵе удмурт кырӟанъёс но кӧня ук. Фортепьяно но гитара шудэм улсын соосты быдэстысал. Калыкез но сокем трос медаз лу. Романсэз туж-туж яратӥсьёс гинэ мед люкаськозы. Радъяло, дыр, куке-соку. Мылкыдме шара верай но, син медаз усьы вал.

- Мон уродзэ малпаса уг юаськы, син уз усьы. Мед быдэсмоз чебер малпанды.

Первая часть интервью - в разделе "Удмуртские звезды", Алефтина Корепанова.

Источник:

Зорина О. Зоринча но Мефодьевна. Кыкетӥ веран: "Кык диплом мыным уг тырмы" / А. Корепанова, О. Зорина ; записал А. П. Шкляев // Удмурт дунне. - 2002. - 7 март. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"