Богданова Вера Павловна
Эктӥсь журналист
Вера Павловна Богданова 19 арзэ Дэри ёрос радиоын ужа. Небыт куараез кема аръёс ӵоже ӵукнаосы сайкатъяз дэри калыкез. Одно тыршылӥз ӟеч иворъёсын шумпоттыны. Радиоверанъёсыз куинетӥ арзэ вӧлмо ни «Мынам Удмуртилэн» тулкымъёсаз. Вера Павловна - Россиысь журналистъёслэн огазеяськонзылэн ёзчиез. Сюлмо ужамез пусъемын Удмурт Элькунлэн Данъян грамотаеныз. «Удмурт кенеш» огазеяськонлэн ёросысь ёзаз мылысь-кыдысь ужа. Эрик Батуев нимо ёрос премиез сётонъя комиссие пыре.
- Вера Павловна, ёрос радиое сюресты кузь-а вал?
- Радиое ужаны шӧдтэк шорысь вуи. Школаын ӟуч кылъя но литературая дышетӥсь вал. Сизьым ар ужай «Знание» обществоын. Ижысь, Москваысь, мукет интыосысь лекторъёсты ӧтчаськом вал.
Журналистъёс шоры синмаськыса но гажаса учкылӥ. Дэри ёросысь газет но радио, ми сямен ик, интыяськемын вал компартилэн райкомезлэн юртаз. Вӧзысь кабинетын пукизы «Ленинец» газетын ужась кузпалъёс Анатолий Мурин но Эмма Баталова. Соос визьмо но таланто адямиос. Газетын инты кыльыку, Эмма Владимировна вазиськылӥз мыным, ивор гожтыны курыса. «Знание» общество лекциос ӵем ортчытъя вал бере, тунсыко материал люкаськылӥз. «Пӧрамъёсме» со вольыт тупатъяса поттылӥз.
1990-тӥ аръёслэн кутсконазы кунын югдур воштӥськиз, райкомъёс зол ӧз ни тырше, ужасьёссэс мозмытыны кутскизы. «Знание» но лябӟиз. Лекциосты дунын ортчытъяны ӧдъязы. Гуртоослэн уксёзы ӧй вал бере, та уж ӝог пашмиз.
Монэ ӧтизы ёрос радиое, «Ленинец» газетэ кошкем радиоредактор интые. Нырысь пыкиськи: уг быгаты. Но азьвыл кивалтӥсе Мария Ишматова юрттом, шуиз. Озьы мон райкомлэн нырысетӥ этажысьтыз вылӥе, липет улэ, туби: радиостудия куинетӥ этажын интыяськемын вал. Нырысь тросгес вераськылӥ ачим: диктофон тӥяськемын, адямиосты гожтыны быгатылӥ студиын гинэ. Плёнкаез ӝамдэлы дугдытӥськод ке, шильккетэм кылӥське.
Мыным удалтӥз дышетӥсьёсын. Удмурт радиоын техникаен тодматӥзы, гожъяськыны быгатонлыкез лэчытатӥзы. Печатья но иворъёсъя министерство басьтӥз военной корреспондентъёс понна поттэм магнитофон. Ужаны трослы капчигес луиз. Котькытчы мын, котькинэ гожты. Кезьыт дыръя со ӧз кынмылы, шуккыны но шедьтӥськод ке, ӧз сӧриськылы. Иван Аркашев, Алексей Ельцов журналистъёс котьку мылысь-кыдысь валэктылӥзы юанъёсылы. Али Сергей Касаткин зол юрттэ.
Техника но ужан амал шоры учконо ке, кызь ар куспын бадӟымесь воштӥськонъёс ортчизы. Нырысь магнитофонъёс вырӟытыны вормонтэмесь, диктофонъёс секытэсь вал. Ӝытазе передача лэсьтыса, ӵукна сое почтае лэзьяй. Нош али диктофон кикур быдӟа, гожтэмез компьютерын ик сузясько, радъясько, «Мынам Удмуртие» каналэ электрон почта пыр лэзисько.
Ез радио вань дыръя передачаосы арняяз куинь пол потазы. Субботаосы мыным эрик усьтӥськылӥз. Почта кивалтӥсьёс улӥзы Ижкарын, монэ эскерись ӧй вал, соин ик, ӟечкыланъёс трос люкаськыку, передачае ӝыны часозь но кыстӥськылӥз. 2005-тӥ арын ез радиоез быдтӥзы.
Дэри ёрослы нимысьтыз тулкым ӧз сётэ, соин ик ӟуч но удмурт кылын передачаосы республика тулкым вылын пото. Тыршисько, веранъёсылэн ӟечлыксы медаз висъяськы элькун журналистъёслэсь. Но дыр ӧжыт сётэмын - кызь минут, со но иворъёс гинэ. Ӝыныез - ӟуч кылын, ӝыныез - удмурт сямен. Ёросысь троссэ кылзӥськисьёсме ыштӥ кадь потӥсько: кудӥзлэн приёмникез ӧвӧл, крезьгуро центрез но котьку уд ӝуаты. Но монэ табере кыло быдэс республикаын но, палэназ но. Туэ ёросысь радиосты огазеязы «Мынам Удмуртие» компаниен. Соин валче уждунмы трослы кулэсмиз, нош майысен ужан дырмы вакчиёмиз. Кема аръёс ӵоже тыршеммы но уг шӧдӥськы ни уждун вылын. Соизлы сюлэм бӧрдэ.
Калыкен одӥг кыл шедьтыны секыт ӧвӧл. Сюлэмдэ сётыса тыршиськод ке, котькуд ужлэн секытэз но шумпотонэз вань. Ӟуч кылын чузъяськись радиоверанъёсам тросгес пыртӥсько политикаен но кивалтонэн герӟаськем материалъёсты, нош удмуртаз сётыны тыршисько ужась калыклэн улэмез-вылэмез, удмурт культура сярысь ивортонъёсты.
Кылем арын радиоын тыршеме пусъемын вал Удмурт Республикалэн Данъян грамотаеныз.
- Тӥ лыктытозь, Дэри ёросысь радио ӟуч кылын гинэ вераськиз. Шуг-а вал удмурт радиоверанъёсын кылзӥсьёс доры потыны?
- Районын удмурт радио кылдыку, ёросэн кивалтӥз Владимир Гусев. Удмуртлыкез ӝутон понна со, ӟуч адями, трос лэсьтӥз. Вордскем кылмы радио пыр чузъяськоз шуыса, шум гинэ потӥз. Шугъяськон вал мукетыз бордын: пичи дыръям дорын кылэм удмуртэз гинэ тодӥ, школаын ӧй дышеты. Нырысетӥ передачаосын шенгыль-пенгыль вераськи кадь потӥсько. Ёрос радио анай кылын но вераськыны кулэ шуыса, юн оскылӥ, соин ик шугъяськонъёсты ворми. Зол юрттӥзы удмурт газетчиос Мария Ишматова но Анатолий Волков. Чеберлыко литератураез лыдӟыны ӧдъяй, озьы вераськонме волятӥ, кыл шыкысме узырмытӥ. Ас поннам усьтӥ тунсыко дуннеез - удмурт писательёсты но кылбурчиосты.
- Кинлэсь адӟем кариськоды?
- Райкомын ужакум, Эмма Владимировна Баталовалэн гожъямъёсыз сюлэме пыро вал, кызьы сыӵе чебер гожтыны быгатэ шуыса, паймылӥ. «Мынам Удмуртие» радиоысь Светлана Пикулевалэн ужамез кельше. Интервьюосыз лад-лад лэсьтэмын, юанъёсыз визьмоесь. Нырысетӥ каналысь Екатерина Андреева адӟем карымон потылӥз - йыгмыт, дӥсяське чебер, вераське ӝот-ӝот. Али ярамысь дугдӥз: дыр ортче, нош со нокӧня уг воштӥськы, одӥг интыяз лёгаськыса сылэ кадь.
Артэ ужась эшъёслэсь но тросэзлы дышетскыны луэ. Республикаямы радиожурналистъёсын кусыпмы умой радъямын. Арлы огпол ке но пумиськиськом, дышетскиськом. Ог-огмылэсь передачаосмес кылзӥськом. Веранъёссы котьку тунсыкоесь луо воткаослэн, глазовъёслэн, балезиноослэн, якшур-бӧдьяослэн. Огшоры адямиос кадь тыршо отын, но ужзэс адӟиськод но син азьын ӝутско. Якшур-Бӧдьялась Надежда Березинаен эшъёс луимы ни.
Адямиос борды тэбинеменым, синазькыль но потӥсько. Кивалтӥсьёс пӧлын удмуртъёс ӧжыт, соин ик весяк одӥгъёсыз доры вазиськоно луэ. Ужрадъёс ортчыку, Вера Павловна, лемтэй кадь, опеть лякиськоз ни шуыса, серекъяло.
- Интервьюос, очеркъёс, тунсыко радиоверанъёс - ваньмыз та вал ёрос радиоын. Яркыт адямиосын пумиськылыны тӥледлы удалтӥз.
- Финляндиысь Мария Картанолы туж пайми. Со визьмо нылкышно, тунсыко тодосчи, милемын чылк-чылк удмурт кылын вераськиз. Эрик Батуевлэсь ёрос редакцие ветлыкуз вераськемзэ али но кассета вылын возисько. Анаез доры бертэмын вылэм, газетысь редактормы сое Дэриысь пумитам но редакцие ӧтем. Быдэс коллектив азьын вераз ужез, Москваын улэмез сярысь. Мадиз, кызьы Россиысь Кун Думаын ужась корреспондент луиз, Чечняе, Италие вуылӥз. Ачиз востэм, куараез шыпыт, ноку но ӧй малпасал, со Россиысь вылӥ политикъёсын пумиськылэ, интервью басьтэ шуыса. Трос тодӥсь, бадӟым таланто, вылтӥяськисьтэм адями вал. Жаль, улон сюсьтылэз вазь кысӥз.
Дэри калыклэн историез пунӥськыса кошке Ижысь ож тӥрлык поттон заводэн. Валля арын Иж пыӵаллы 200 ар тырмиз. Дэри черкогуртысь Раиса Исупова шаерчиен быдэс сузьет дасямы. Удмуртъёслы завод уно курадӟон вайиз. Ас кужыменызы валъёсты сюдӥзы, юртъерзэс адӟылытэк, одӥг адямилы сётэм планэз быдэстон понна семьяенызы ужазы. Нош мукет ласянь, гуртысь нылпиослы дышетскыны луонлык усьтӥськиз. Удмурт ужбергатӥсьёс (купецъёс) потӥзы.
- Наркоманъёс сярысь сюжет лэсьтыкуды, шуге-леке вуэмъёслэн улонзы сюлэмдэс зол позыртӥз, дыр? Та радиоверандэс республикаын вылӥ дунъязы.
- Дэри вӧзысь бырем гуртын наркоманъёсты эмъян центр усьтэм бере отчы ветлоно кариськи. Лек висёнлэсь йӧнатскисьёс отын бакча сиён будэто, асьсэлы юртъёс пукто вал. Кивалтӥсенызы вераськи. Со азьвыл наркоман вылэм, вынзэ но гылыт сюресэ кыскем, собере, Инмарлы оскон вылэ пыкиськыса, ӵошен эмъяськиллям. Анайзылы кӧня куректон вайизы шуыса, туж кайгыриз. Танӥськытэк, мылысь-кыдысь вераськиз, соин ик радиоверан кылзӥсьёслэн сюлэмазы йӧтӥз, мылкыдзэс вераса жингыртӥсьёс трос вал.
- Кыӵе семьяын тӥ будэмын?
- Вордӥськи но улӥсько Дэри черкогуртын. Семьямы бадӟым вал. Огвакытэ сизьым кузя улӥмы: анай, атай, нэнэ, одӥг пи, куинь ныл. Анае Лидия Кирилловна Созонова покчи ёзо школаын ужаз. Ньыль нылпиез будэтон понна тросгес уксё поттыны тыршиз, аслэсьтыз урокъёссэ нуэм сяна, висись дышетӥсьёсты ӵемысь вошъяз. Ваньмыкуз но воз мында эскероно тетрадь сьӧраз вайылӥз. Атае Павел Тимофеевич Урсегов комхозын тыршиз, берло аръёссэ - колхозын. Нэнэмы кадь ик, лачмыт но шуныт адями вал.
Семьяямы книгаез гажамы. Ӝажыосын соос трос сылӥзы. Анае-атае уно журнал-газетъёс басьязы. Библиотекае тужгес ӵем вуылӥсьёс пӧлы пырылӥм. Али но соин ум люкиськиське. Книгалы луыса ик, дунне шоры учконмы паськытаз, со дышетӥз милемыз секыт юанъёслы валэктонъёс шедьтыны.
Мае басьтӥ анай-атаелэсь семьяысьтыз, асламаз но пыӵатыны выри. Наталья нылы туэ Ижысь гурт удысъя академиез йылпумъялоз, экономистлэсь дипломзэ басьтоз. Ужа «Россия» колхозын бухгалтерын. Математикаез гажамез нырысетӥ классъёсысен ик шӧдӥськиз. Александр пие, школазэ йылпумъятозь, шонаськиз: вань удысъёс кельшо кадь, нош кудӥз тужгес сюлмызъя - уг вала. Дышетскиз сиён пӧрасе, собере электромонтёре. Али быдэс ёросэтӥ ветлэ. Куддыр пайме, шуэ: тодӥськод-а, сыӵе-сыӵе гуртын сюрессы, магазинзы гинэ но ӧвӧл, кызьы отын уло?! Кызьы ачим котыръясько быдэс ёросэз, озьы ик пие но ужезъя тодматске пӧртэм гуртъёсын. Кузпалы Анатолий Витальевич лэсьтӥськисьын ужамын. Солэсь юрттэмзэ ӧй шӧдысал ке, быгатысал меда радиоын ужаны? Тросэз ужрадъёс ортчо ӝытазе яке шутэтскон нуналъёсы. Радиоверанэ тунсыко мед луоз шуыса, котькытчы вутскыны тыршисько. Одӥг пол но пыкылэмез ӧвӧл, гуртэ уд сюрылӥськы шуыса. Нылпиос пичи дыръя сюдэ, садэ, школае келя вал.
- «Удмурт кенеш» огазеяськонлэн ёросысь ёзэзлэн ужаз но пыриськыны луонлык шедьтӥськоды.
- Отчы монэ Мария Ишматова кыскиз. Удмурт движение калыклэсь лулпушсэ, культуразэ валаны юрттӥз. Удмурт кылын мон нэнэен гинэ вераськылӥ. Анае но, атае но ӟуч сямен дышетӥзы бере, вордскем кылмес улӥегес пуктылӥм. Пересьёслэн, туала улонлэсь бере кылем муртъёслэн кылзы кадь потылӥз со милемлы. Дырыз сыӵе вал, вылды. Нош данэ потэм удмурт тодосчиослэн верамъёсынызы, малпанъёсынызы тодматскыса, мур малпаськыны кутски культураез, кылэз утён сярысь. Семья но школа та ужын ӵош луыны кулэ. Пинал школаын гинэ дышетӥз ке анай кылэз, ӧз кылы ке сое семьяын яке семья пушкын вераськыса, школаын ӧз дышеты ке, толыкез одӥг кадь луоз: ылё-кырсё удмуртъёс будозы. Анай кылэз, вераськыны кутскытозяз ик, вираз пыӵатоно шуыса, табере умой тодӥсько. Соин ик пиналъёсылы верасько: внукъёсме удмурт кыллы ачим дышето, валамды потӥз ке нуныостэс, сьӧразы дышетоды. Соос уг пумитъясько.
- Мае ӧд лэсьтэ на ужады?
- Иворъёс сяна, адямиос сярысь сюжетъёс дасясал. Соосын вераськисько пӧртэм темаослы - лулпушсэс усьтӥсько, нош трос тунсыкоез палэнэ кыле. Автор программаосын ужасал. Оскисько, куке но быдэсмоз та малпанэ.
Источник:
За предоставление материала выражаем огромную благодарность редакции газеты
"Удмурт дунне"
