Дзюина Клавдия Николаевна

Юн выжылэн емышез чебер

Клавдия Николаевна Дзюина – Удмуртиысь Кун премилэн лауреатэз, Удмуртиысь культура удысысь дано ужась, печатьысь отличник, ужысь но ожысь ветеран.

Вордӥськемын 1934-тӥ арын Вавож ёросысь Яголудын (Сюгу-Докъяын). Гурезь-Пудга школаез «витьёсын» йылпумъяса дышетскыны пыриз Можга педучилищее, собере – Ижысь пединститутэ.

Пединститутэз быдтэм бераз ужаны кутскиз УдГИЗ-ын чеберлыко литература поттон отделын. 1968-тӥ арын Москваысь Вылӥ партийной школае журналистика отделение дышетскыны мынӥз, собере ужаз партилэн Удмурт обкомаз лектор луыса, «Дась лу!» газетлэн редакторез вал, партилэн Удмурт обкомаз печатья секторен кивалтӥ.

Пенсие потэм бераз Клавдия Дзюиналы оскизы Вормонлы 50 ар тырмонлы сӥзем 9 томъем «Буре ваён» книгаосты дасяны. Озьы ик трос кужымзэ но быгатонлыксэ сётӥз «Удмурт Республика» энциклопедиез кылдытонлы. Со понна Удмуртиысь Кун премия сётӥзы.

Та книгаосты сяна, пӧртэм аръёсы Клавдия Николаевна дасяз 1917-тӥ-1934-тӥ аръёсы потэм книгаосъя «Био-библиографической справочник» (кык пол поттылӥзы), фразеологияя словарь, «Средства образного выражения в удмуртском языке» книга, «Мое Нечерноземье» альбом, Москваын куинь пол потӥз «Удмуртия» удмурто-ӟучо альбомез (огъя тиражез – 32 сюрс), «Удмуртская Республика», Ижысь Первомай ёрос но Вавож ёрос сярысь книгаос. Берло дасям книгаез потӥз 2005-тӥ арын – «Национальное книгоиздание Удмуртии».

- Клавдия Николаевна, вордӥськем гурттылэн нимыз кык: В. Яголуд но Сюгу-Докъя. Кудӥз вашкалагес?

- Яголуд сое берло шуизы ини. Отысь тросэз калык – Докъя выжыысь, Кузебай Гердлэн Бадӟым Докья гуртысьтыз потэмъёс. Мон соин туж данъяськисько но гуртэлэсь вашкала нимзэ уг вунэтӥськы. Сельсоветмы но Большедокьинской вал.

- Иське, анай-атайёсты но Кузебай Герд одӥг воршудысь вылӥллям?

- Озьы. Мамае мынам туж чебер вал: йырсиез сьӧд-сьӧд, бадӟымесь синъёсыз чагыр-чагыр. Чеберезлэсь гурт калыклэсь возьдаське вылэм. Со кема улӥз, 90 аресозь. Мамае котькыӵе ужез валаса, мылысь-кыдысь лэсьтылӥз. Тямысвыртно, дас кыквыртно ӝӧккышетъёссэ, ӝуткам шобретъёссэ учкыса, син ик палёме. Гурт калык али но шуэ: «Ой, со милям Матрон апаймы врач кадь вал. Пелляське но, висись муртлэсь кӧтсэ кыскалляз, нылпиосты но эмъялляз». Маме К. Гердлэсь кузпалзэ но адӟылэмын. Со сярысь юалляськыса мон нерад карылӥ. «Однако учкымон, визьмо вал, но тусьты-пуньы но миськыны уг быгаты вылэм». Собере керӟег будэтылӥз: «Олокинъёс сярысь но юалляськыса татын эн ул!» Со вакытэ ми палъёс ведь ваньмыз кышкатэмын вал. Нош тятя К. Гердэн пумиськылэм но. Эльбайын милям пасекамы вылэм. Отын чечыен чай юыса пукылӥллям. К. Герд тятяелэсь одӥг кырӟанзэ но гожтэм: «Сизьым арес мон луи но, геры кутод шуизы…» Мамае вералляз: «Ай кырӟамез но уг луы но, одӥгзэ кырӟам но, книгае гожтӥллям ук».

Атае, Николай Елизарович Ананьев, ӝужыт, веськрес мугоро вал. Кулаке поттӥллям. Ува ёросысь Областное тэль кораны келяллям. 1934-тӥ арын мамае дораз адӟиськыны ветлэм но мон тӥни сюриськем. Мамае монэ 46 арескын вордэм ини. 1934-тӥ арын ик тятямес лэзиллям. Ой, зол ужа вал! Киыз котьмалы мынӥз – 23 пумо специальностез вал. Кулаке поттыкузы, ыж гон тугон, етӥн шуккон машинаосмес, кебитмес, коркамес, мунчомес, мукет котырмес но трос нуиллям. Соосты тятямы НЭП кутскем бере басьтэм вылэм. Соку крестьянъёслы няньзэс, сӥль-вӧйзэс вузаны лэзиллям. Милям эшшо чечымы трос луэ вылэм. Сомында ваньбурмес басьтӥллям, соосын нокин ужаны быгатымтэ, юнме лошъяськыса кыллиллям. Областнойысь бертэм бераз тятямы ыж гон тугон машинамес тупатыны быгатэм на. Гуртысьтымы но, палэнысь но ваньмыз соин ыж гон тугыны ветлӥзы. Мушмы трос вал, колхозамы но со пасека уськытӥз. Кулэмез бере мамае мушъёсын вырыны кутскиз.

Война бере тятямы доры ӵемысь ветлӥзы ёросысьтымы кивалтӥсьёс. Герд шонер ӵошатэ вылэм крестьянъёсыз профессоръёсын. Тятелэсь соос юало вал ку кизьыны яке араны потыны. Тодӥсько на, тятяе музъемез гырпумыныз эскероз но шуоз: «Туннэ уг яра на, ӵуказе луоз ни» яке «Арня витёно на». Ой, тятяе сярысь трос вераны луоз! Архивын бугыръяськыса, со сярысь эшшо троссэ тодӥ на. 1948-тӥ арын Можга педучилищее монэ тятяе келяса ветлӥз на. Можгаысь гуртэ вуэм но шуэм: «Клава понна мон уг кышкаськы. Котькытчы пыроз но, потоз но - керпотыса уз улы».

- Агай-апайёсты но вал-а?

- Ми ваньмы 9 кузя вылӥськеммы. Витез гинэ быдэ вуэмын. Мынам нимы Любовь луыны кулэ вылэм. Мамае но тятяе куспазы туж тупаса, лачмыт улӥзы, вань тупамтэоссы мынам нимы пумысь гинэ ӝутскылӥз. Апайёсылы Вера но Надежда ним сётӥллям, нош монэ мамаелэн Люба шуэмез потэ вылэм. Тятяе монэ черке пылатыны нуэм но кыӵе ним сётыны кенешемзэс вунэтэм. Поп Клавдия сётэм: пылатон нуналлы, пе, тупа.

- Мама-тятяды ужась вылӥллям бере, тӥледлы но сюре вал, дыр?

- Ой, сюриз! Вӧзамы одӥг семья улӥз – ӟольгыриос шуиськом вал. Атайзылэн нимыз Ӟольгыри. Номыр ужамзы ӧз поты. Соос ми вылэ «Удмурт коммуна» газетэ гожтэт пӧраллям: «Милям гуртамы кулакъёс Ананьевъёс уло. Узырмон понна уен-нуналэн валъёс кадь ужало. Ӟольгыри». Соос чагиськем бере ик милемыз кулаке поттӥллям. Собере быдэс гурт калык М. Калининлы гожтэт лэзиллям: Ананьевъёс кулакъёс ӧвӧл, соос ас киынызы ужаса узырмизы, пе. Калининлэн юрттӥсьёсыз Ижысь облисполкоме гожтэт келяллям, та ужпумез выльысь эскерыны курыса.

Кулаке поттэмзы бере агай-апайёсылы трос курадӟон сюриз. Кураськыса но ветлӥллям. Мон секытэз сокем ик ӧй адӟы ни. Но весяк нянь сием потыса ветлӥ.

Ужаны мон 6 арескысен кутски. Нырысь ӟазег, собере кунян возьмай, нош уин тятяеным кабан сюрим. Мон солы культо сётъясько, со радызъя тыре. Кыӵе ужез но ум быдэсъяське вал! Трудодень понна. Ӵукна йырси сынаны но дыр ӧй вал. Огпол кутӥ но йырси пунэтъёсме вандӥ, сэрпалтӥ. Ну, сюриз ке сюриз ини! Чидамтэеным бӧрдыса мамаелы шуисько: «Тӥни Ӟольгыриослэн Ниназы весь мунёен шудыса пуке». Мамаелы мон жаль потӥсько вал, дыр, но, шуиз: «Нылы, эн бӧрды, асьмеос ужаны кылдэмын».

Одӥг пол гуртамы партилэн райкомезлэн секретарез З. Бакиев лыктэм. Контораысь Горд пул вылысь мынэсьтым тусбуйме адӟыса юам кин луэмме, собере шуэм: «Та нылэз одно ик наградаос сётон списоке пыртэ». Соберегес ик мыным, 1948-тӥ арын, «За доблестный труд в Великой Отечественной войне» медаль сётӥзы.

Кузпалылэн но мынам кадьгес улонэз. Песятайзэ кулаке поттӥллям, собере гуртысьтызы колхоз кладовщикез Сергей Степановичез Дзюинэз но «тушмон» кариллям. Сӥзьыл кеносысь юзы пӧлы лымы сюрем но ӟырданы кутскем. «Тушмонлэсь» пизэ тюрьмае Пермь областе келяло, нош отысь 1941-тӥ арын – пырак фронтэ. Смоленск дорын ожын быре. Кузпалме мумиз огназ будэтэ но дышетэ. Куд-ог дыръя со тазьы но шуылэ: «Тынад тятяед пал суй ке но – бертӥз, мынам быриз, ӧй но адӟы сое». Мамаез ми дорын улӥз, пиналъёсмес утялтӥз. Ми сое нуналлы быдэ тодамы вайиськом. Марфа Семёновна туж лачмыт вал. Ог-огмес гажаса улӥмы.

- Педучилищее дышетӥсь луэмды потыса мынӥды-а?

- Агае врачын ужа вал ини, мединститутын сталинской стипендиат луыса дышетскиз. Монэ но врач каремез потэ вал, но Вера апае шуиз: «Педучилищеын стипендия сёто, отчы мед мыноз». Можга педучилищеез мон ӟеч йылпумъяй но дышетсконме Ижысь пединститутын азьланьтӥ.

- Агай-апайёсты, иське, ваньзы ик дышетскыны быгатӥзы, кулак нылпиос шуыса, сюрестэс ӧз пытсалэ?

- Агае военной врач луиз, Удмуртиысь дано врач ним сётӥзы. Войнае ветлэм апае, Вера, ожмаськон йылпумъяськем бере Казаньысь финансовой техникумез йылпумъяз. Мукетъёсыз вылӥ образование ӧз басьтэ ке но, ӟеч ужамзы медальёсын, данъян грамотаосын пусъемын. Школаын дышетскыкузы, агай-апайёсме ултӥяны выриллям ик, ма, монэ но огпол кулаклэн нылыз шуэмзы вань. Тятямес туж гажазы бере, дышетскыны сюресмес ӧз пытсалэ. Тятямы кулон азяз враче дышетскем агаелы шуиз: «Кышнояськыны эн дырты, Клавалы дышетскыны юртты». Агае тятяелэсь косэмзэ быдэстӥз.

- Можга педучилищеын кин ке тодмо муртъёсын ӧд дышетске-а?

- Герман Ходыревен, Михаил Покчи-Петровен. Берло Ходыревен ӵош ужам «Дась лу!» (али «Ӟечбур!») газетын. Мон валтӥсь редактор вал, со – литература отделэн кивалтӥсь. Малы ке но туж керпотӥсь, дӥсьтӥсьтэм вал. Монэ редакторе юнматӥзы П. К. Чернов бере. Вераны кулэ: редакция кужмо вал. Писательёс ик кӧня: В. Романов, Г. Ходырев, Г. Симаков, М. Иванов, А. Перевозчиков. Берлогес выль адямиосты кутӥм. Соос но усто журналистъёс, художникъёс луизы: Н. Бигбашев, В. Михайлов, М. Гарипов, А. Аникина.

- Со вакытэ газетэн кивалтыны нылкышноослы туж ик ӧз оскылэ. Коллектив кызьы пумитаз?

- Коллективысь ваньзэс тодӥсько вал, ваньзэс туж гажай, но кышкасагес мынӥ. Тужгес но зол кепырай Володя Романовлэсь. Туж усто гожъяськись, нош кылыз кыӵе лэчыт! Маке малпаз, сое ик вералоз. Лыктэм берам ик малпай: ужамы маке но вылез мед луоз, азьвыл дышем сямен медаз кошкы. Ачим спортсменка вал бере, кыӵе ке ӵошатскон радъяны малпай. Озьы ми «Дась лу!» газетлэн призэз понна нылпиосын биатлонэн ӵошатсконъёс ортчытъяны кутским. Сыӵе ӵошатсконъёс шаерамы ӧй на вал. Комсомоллэн обкомаз пумит ӧз кариське. Озьы ми нылпиослы биатлонэн ӵошатсконын туж зол будыны, ӝутскыны юрттӥм. Берло тросэз Союзын но, кунгож сьӧрын ӵошатсконъёсын вормылӥзы. Кылсярысь, Буранов, Березкин. Нош Валерий Медведцев Олимпиада ӵошатсконъёсын чемпион луиз. Юнкоръёсын пӧртэм ужъёс, конкурсъёс ортчытъям. Тросэз соос тодмо журналистъёс, суредасьёс, гожъяськисьёс луизы.

- Издательствоын ужакуды, кыӵе книгаез дасямды тужгес но тодады кылиз?

- Мон ки пыр 1000-лэсь трос книга потӥз. Котькудысьтыз мазэ ке но тунсыкозэ басьтӥськод вал. Тужгес но тодам кылиз Г. Красильниковлэн «Вуж юрт» повестез. Ӟеч мылкыд кельтӥз Ижевск горкомлэн нырысетӥ секретарезлэн М. Зыковлэн «Соратники» книгаез. Нош берлоосыз пӧлысь нимысьтыз висъяме потэ Россиысь Кун Думаысь депутатлэн Светлана Смирновалэн кивалтэмез улсын поттэм «Феномен Удмуртии» трос томен книга. Нырысь-валысь со мыным сокем ик ӧз яра – кыӵе ке огшоры документъёс. 9 книгаез ваньзэ учкеме бере валай: документъёс Удмуртилэсь историзэ быдэсак син азе пукто. Книгаез дасянэ пыриськизы тодмо тодосчиос, архивъёсын трос бугыръяськемын соос.

- Партилэн обкомаз ужамды ӟеч тодэ ваёнъёс кельтӥзы-а?

- Куд-ог дыръя отын ужъёс мыдланьгес ӧръяськылӥзы. Со милям гинэ янгышмы ӧй вал, вылӥысен озьы мынӥз. Но обкомын сыӵе визьмо, тыршись муртъёс ужазы! Соосын артэ мон аслым туж трос басьтӥ. Совето власть вакытэ улонысь ваньзэ курланы гинэ кулэ ӧй вал, отысь ӟечсэ но басьтыны тыршоно. Мон сямен, соку кадръёсын ужан умой радъямын вал: адямилэсь дунъязы визьзэ, быгатонлыксэ. Нош али тодмозыя, коньдон тырыса но мар шуныт пукон вылэ пуксё. Со мыным туж уг яра. Соин ик ёрос газетъёсысь редакторъёсыз адӟисько ке, сюлмы шумпотонэн тырме. Соос ваньмыз сямен ми дыръя юнматэмын вал, али но ӟеч ужаны быгато. Мынам чик но азьвыл улонэз берыктэме уг поты, но тросгес саклык висъяно вылэм культуралы, дисциплиналы. Телевидениын али йырвандӥсьёсты, катастрофаосты, инкуазьлэсь шукыръяськемзэ возьмато. Магазин ӝажыос вылын котьма вань. Сое ведь кин ке но тыршыса будэтэ, поттэ. Нош ужась калык вунэтэмын. Шумпотӥсько: асьме газетъёс, телевидение возьматэ ик ай гуртын тыршисьёсты.

- Кунгож сьӧры трос-а ветлӥды?

- Ӧй. Совето вакытэ Югославие, ГДР-е вуылӥ. Монэ отчы мынӥсь группаосын кивалтыны пуктӥзы но шуизы: калыктэ магазин витринаос дортӥ трос эн нуллы. Зэмзэ но ведь асьме дорын магазинъёс бушесь вал, нош отын – синъёс ик палёмо. Вузъёс шоры паймыса учкиськод но кошкиськод. Сьӧрамы кунгож сьӧры поттыны уксё ӧжыт сётылӥзы. Нылылы созэ но, тазэ но басьты вылэм но – уг луы.

- Тӥ спортсменка но вылӥллямды, данъян грамотаосты трос гинэ.

- Пединститутын дышетскыкум, капчи атлетикаен выри. Ми отын ньыль нылъёс эшъяським: Мира Васильевна Иванова (30 ар ӵоже издательствоын ужамын), Нина Васильевна Перевощикова - философия наукаосъя кандидат, Ижысь механической институтысь доцент, Анна Яковлевна Евсеева – Удмурт театрлэн литературая люкетэзлэн кивалтӥсез. Ньыльнамы ик Удмуртиысь культура удысысь дано ужасьёс луим. Али ке но ог-огмытэк улэммы уг луы. Кызьы шуо: шумпотонмы но, куректонмы но ӵош ортче. Пединститутэз быдтэммы дырысен туэ 50 ар тырмоз ни. Эшъёсы спортсменкаос ӧй вал. Мон спорт дӥсен бызисько, нош Мираен Нина сюрес кузя сьӧрам дӥськутме нуыса бызё. Али ке но серекъяса шуо: «Ӧйтӧд ай, кин тросгес бызьылӥз: тон-а яке ми-а?»

- Клавдия Николаевна, тӥ сыӵе бадӟым интыосын ужады, эшшо куинь пинал будэтӥды на.

- Куинетӥзэ, Света нылме, ньыльдон арес котырын ваи ини. Куиньназы ик институтъёссэс горд дипломен йылпумъязы. Пие - техника наукаосъя кандидат, бадӟым нылы – биология наукаосъя кандидат. Светае Удмурт кун университетысь романо-германской филологияя факультетэз йылпумъяз, 5 кылын умой вераське: ӟуч, немец, англи, испан, голландской.

- Анай кылзэ уг тоды шат?

- Уг. Нокудзы но уг тодо. Городын удмурт нылпи садъёс ӧй вал. Пичи нылылы шуылӥ: удмурт кылэз тодысалыд ке, ужан инты но умойгес, оло, шедьтысалыд. «Ма, сое мон толэзьскын дышетыны быгато, но кулэзэ уг адӟиськы», - шуиз. Адӟе ук со: кин ке кивалтӥсьёс, политикъёс удмурт кылын верасько-а? Светае, школаын дышетскыкуз ик, ас азяз ужпум пуктӥз: калыккуспо кылъёсты тросгес тодоно. Университетын дышетскыкуз Ельцинлэн указэз потӥз: Россиысь но Америкаысь студентъёс куспазы мед вошъяськозы. Конкурс бадӟым вылэм, одӥг интые даслэсь уно. Светае пырпотӥз но арзэ Флоридаын дышетскиз. Отын егит пиен, голландецен, тодматскем. Милемлы шуэ: со, пе, монэ кышнолы кура. Кузпалъяськон сярысь вераськыны нейтральной странаын пумиськыны малпазы – Испаниын. Озьы ик уло ини отын. Ужез но яра, квартира но басьтӥзы.

Бадӟым нылылэн картэзлэн атаез узбек, анаез репрессие улэ шедем удмуртъёс пӧлысь вал, дыр. Башкириысь Киргизие келяллям, удмурт луэмзэ умой-умой уг тоды ни. Пиелэн кышноез ӟуч. Тӥни сыӵе суро-пожо луимы.

- Ма, тӥ кузпалэныды асьтэос но удмурт тусоесь ӧвӧл.

- Бигерлыгес кельшиськомы кадь.

- Кытын-о ог-огдэс шедьтӥды?

- Мон – весяк комсомолын азьветлӥсь вал, со – комсомол обкомлэн секретарез. Комсомолын одӥг ужасьлэсь вордӥськем нуналзэ пусйыкумы, ог-огмес синйылтӥм. Ми соин огтусъемесь, шуылӥзы. Инженер со, партилэн обкомаз но ужаз, собере – быдэс улонзэ мотозаводын отделэн кивалтӥз. Али выльысь отчы ужаны ӧтё сое.

- Асьтэос но тэк пукыны уд чидаське кадь.

- Ой, ужъёс мында номыр ӧвӧл! Вуоно арын тани журналистъёслэн огазеяськонзылы 50 ар тырме. Книга поттыны юрттоно вылэм. Мон ведь ас вакытаз солэн кивалтӥсез вал. Материалъёс трос люкаськемын, но книгаез быдэссэ гожтыны огнам уг вормы, дыр.

- Мыным тӥ, Клавдия Николаевна, туж шудо потӥськоды. 70 арескын но тӥ весяк калык пӧлын на.

- Улонэлы ӝожтӥськыны сьӧлык луоз, дыр – ваньмыз малпамея ортчиз. Гуртысь кошкыкум мамае шуиз вал: «Нокинэ но вӧсь эн кары, адями синмысь эн усьы, трос уксё утчаса, ужысь уже эн тэтча». Та кылъёсъя ик улыны тырши. Эшшо мамае шуиз: «Эн сюлмаськы, нылы, мон вань улонме тон понна вӧсяськи. Кин тынэсьтыд сюлэмдэ вӧсь кариз, аслыз берытскоз».

Али улон нылпиосъя радъяське. Соос шудо ке, тынад но мылкыдыд каньыл. Нылпиос уг вунэто. Ма кулэ на?

Источник:

Дзюина К. Н. Юн выжылэн емышез чебер / К. Н. Дзюина ; записала Г. Романова // Удмурт дунне. - 2006. - 18 авг. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"