Пинял куно

Салья гуртысь пӧртэм сэбедъёс пӧлысь тужгес но тунсыкоез – Пинял куно. Солэн кылдэмез но азинскемез сярысь вераны быгатозы та гуртын улӥсьёс. Вераны кулэ, «пинял» шуо егитъёсты. Озьыен, та егитъёсын герӟаськем сэбед.

Вашкала дырысен сальяос тодматскыны тыршизы пӧртэм гуртъёсысь егитъёсын. Гурт калыклэсь юалляськыса валай: соос палэнын улӥсь ёзъёссэс ӟеч тодо вылэм. Кылсярысь, Уддядиысь гуртысь яке Вуж но Выль Тӥгырменысь гуртоос сярысь. Милям гуртамы вань Луд вӧсь, Быдӟым куала вӧсь, Булда вӧсь, Акташ вӧсь. Та вӧсьёс вашкала дыръя син азязы сак возизы: кык вӧсьёс медаз огазеяське. Кылсярысь, Луд вӧсез утись семья ноку но кышно уг вайы вылэм Быдӟым куалае вӧсяськыны ветлӥсь семьяысь. Гуртоосмылэсь таӵе веранзэс но кылэме вань: муръётӥ потӥсь ӵын но, пе, огазе луыны кулэ ӧвӧл. Озьы тӥни вашкалаосмы висъяны тыршиллям асьсэлэсь вӧсяськон амалъёссэс но дунне шоры учкемзэс.

Мукет ласянь учконо ке, калык мед азинскоз шуыса, вашкалаос тыршо вылэм вирез выльдыны. Куд-ог кунъёсын али но сюлмасько та сярысь. Со сярысь тунсыко потӥз мыным Норвегия. Отын пӧртэм пумо луонлыкъёс вань палэнысь лыктэмъёслы та кунэ кыльыны, семья кылдытыны. Тодосчиослэн верамзыя, озьы кун сюлмаське выльдыны калыклэсь вирзэ.

Гуртысьтымы пересьёс но, мӧйыос но егит дыръязы Пинял куное ветлэмын. Паймыса ас поннам синйылтӥ, Кияса ёросысь трос гуртъёсын кусып возиллям соос: Салья, Починка, Вужгурт, Куӵос, Вуж Тӥгырмен, Выль Тӥгырмен, Уддяди. Та гуртъёсы котькуд ар ветлӥллям. Озьы ик вуылӥллям Алнаш ёросысь Лялие, Кибьяе, Татарстанысь Огырчи ёросысь Бӧдьяе, Омгае, Пельгае, Пичи Пурга ёросысь Аксакшуре. Та гуртъёсын улӥсьёс ӟеч тодо Сальяез, котькудаз ик отын вань салья кенакъёс но эмеспиос.

Егитъёслэн тодматскемзы потэ вылэм мукет гуртъёсысь чебересь нылъёсын но пиосын. Зэмзэ но, асьмеос нырысь ик синйылтӥськом чебер ымнырез, чебер дӥськутэз, шулдыр куараез, капчи мылкыдо эктӥсез. Чебер арбери маин ке мальдытэ, ас палаз кыске. Но егитъёслэн синмаськем мурт сярысь мургес тодэмзы потэ. Кыӵе семьяысь: ужасесь-а, уг жугисько-а, калык пӧлын асьсэды умой возё-а? Котьку но нырысь интые удмуртъёс пукто адямилэсь ужез яратэмзэ, синмасько кибашлыослы.

Али тодматском та сэбедлы дасяськон кенешен. Одӥг егит пияш синйылтэм, шуом, Бӧдья гуртысь чебер нылэз, аслэсьтыз малпанзэ верам эшезлы. Соиз тае шарая шулдыръяськонын. Егитъёс кенеше люкасько. – Эшъёс, олле ӧтёме кибьяосты Пинял куноен асьме доры.

Ваньзы соглаш луо, кенешо сое ортчытон сярысь.

– Кытын ортчытом та сэбедмес? Кулэ утчаны нимаз корка. (Озьы кенешо вылэм вашкала дыръя, малы ке шуоно гуртъёсын соку клубъёс вылымтэ на).

– Эшъёс, мон верасько Батыр Маняпаен. Со соглаш луоз дыр, одӥг уйлы асьмелы корказэ сётыны. Со понна ми пиосын солэсь пузэ пильылом но артанае тыром.

– Ми нылъёсын корка, корказь выжзэ миськом.

– Маин куно каромы кибьяосты?

– Пельнянь пӧрано. Ваньмы гуртысьтымы одӥг мыжык быдӟа векчи корам сӥль ваём, быдэн куинь кукей, стакан пызь. Кубисталэсь салат, сӥльын шыд, кыстыбей пӧралом. Нылъёс пыжиськем ваёзы на. Лена перепеч пӧралоз, Юля – шаньга, Катя – тоторо, Роза – кекыр-кокыр, Света – мырза бальыш.

– Олле Светаез ӝӧк выл понна кыл кутӥсе юнматоме.

– Куноосты гуртэ пырон дорын пумиталозы Петя но Вася. Соос ик ивор сётозы вуэмзы сярысь. Пумиталом вӧен-нянен, пӧсятэмен.

Веръямзы бере ваньзэсты корка пыртомы. Дӥськутсэс кытчы интыялом? Олексан, тыныд дӥськут тырон лэсьтоно луоз. Куноосты пумитаны кырӟан дышетоно. Собере ӧтёмы соосты ӝӧк сьӧры. Кык нылъёс куно карозы, нош мукетъёсыз ваньмыз кырӟалозы. Сиськемзы бере тодматскомы. Нырысь тодматомы асьмеды, собере кыл сётомы куноослы. Петя, Коля но Андрей – арганчиос. Соос ог-огзэс вошъялозы. Эктонъёс бере шудомы. Геня лыктэм куноосты асьме палась шудонъёсын тодматоз: «Сяська бичан», «Небыльток», «Ми таримес кизимы», «Сэреген», «Куинетӥз мултэс», «Сукыр така», «Ведӥнь». – Нылъёс, умой учке Лудкеч Сеняез, трос медаз юы. Вина веръя ке, кырым пыдэсыз лыдыны кутске. Возьытэ медам усе вал.

– Куноосмес келяны эстомы гур, пӧраломы табань. Ӝӧк сьӧры пуктом. Вань мылкыдмес сётыса кырӟаломы-вераломы. Кошкон азязы ваньмызлы чыртыязы куинь кренгель ошом, пужъятэм ныр кышет кузьмалом. Табань сием беразы гинэ келяны потомы.

– Куноос кошкытозь шулдыр кырӟанъёс кырӟано луоз, пыдъёстэс выретоно, мылкыддэс усьтоно. Ӧм ке кельше, соос асьмеды доразы куное уз ӧте. Асьмеос возьматыны кулэ быдэс гуртлэсь ымнырзэ. Возьытэ медам уськытэ сальяосты. Ваньдылы валамон-а? Озьыен, Юбер, Юрмег но Пислэг мынозы Бӧдьяла кенешыны.

Тӥни озьы кенешыса малпам уж улонэ пыӵа. Котькуд ужрад бере егитъёс эскеро: маиз пӧрмиз та ужрадын, маиз ӧз. Кинлы ке ӟеч кылъёс вералозы, нош кинлы ке пӧлы пум возьматозы: азьланяз сыӵе янгышъёс лэсьтоно ӧвӧл ни. Вашкалаосмылэсь дышетскыны али но кулэ, дыр. Вань ужъёс лэсьтӥсько ӵошен, ог-огедлы юрттыса, вань сюлэмез поныса. Сотэк сиёнэд но, юонэд но куноослы уз кельшы.

Луоно-а та сэбедэз туала улонэ пыӵатыны? Мон малпасько – луоно. Милям сыӵе ужрадмы улонэ пыӵаз ини. Школаысь дышетӥсьёсмы пумиськизы ини Пичи Пурга ёросысь Брангуртысь, Татарстан Республикаысь Огырчи ёросысь Кадряково шор ёзо школаысь коллективъёсын. Та пумиськонъёс – ог-огедлэсь дышетскон, выльзэ синйылтон, астэ возьматон. Кулэ ӧвӧл соосты вина юонлы пӧрмытыны, котьмалэн мертэтэз медло. Ортчоно ӧвӧл со мертэтэз. Удмурт адямилэн вираз пыӵамын ог-огед доры куное мынон, ог-огедлы юрттон, визь-кенеш сётон. Туала улон асьмеды нимаз кариськытэ, люке байёслы но куанеръёслы. Оскем потэ: Пинял куно сэбедлэн кулэлыкез туннэ улонамы туж дуно.

Егитъёсты пумитан кырӟан

Кызьы гинэ лыктӥды но,

Кызьы гинэ вуиды.

Кызьы гинэ ӧд уселэ

Тайвади но шурамы.

Кыӵе потӥз, кыӵе потӥз,

Эмезен чай юэме.

Кыӵе потӥз, кыӵе потӥз,

Бӧдьяосын пумиськеме.

Кема возьмам, кема возьмам,

Сьӧд сутэрлэсь кисьмамзэ.

Кема возьмам, кема возьмам,

Тӥ туганлэсь лыктэмзэ.

Тӥ уд лыктэ ми доры но,

Ми ум мынэ тӥ доры.

Ку бон адӟом, ку тодмалом

Одӥгмес но одӥгмы.

Одӥгмес но, ой, одӥгмы

Ӝож ке, кур ке ӧм каре.

Уз лу меда, уз лу меда

Весь валче но улэммы.

Ӝужыт-ӝужыт гурезь йылын

Сюэн-сюрсэн муш лоба.

Сю ар, сюрс ар ум улэлэ,

Вае валче уломе.

Куноосты келян такмакъёс

Уӵы но чирдоз али но,

Куар но куаръяськоз али.

Бадь куаръяськемез учкыса,

Сюлмыд но чигоз али.

Ой, улмоё, улмоё но,

Улмоё улмопуэ.

Улмо сад бакчаын гинэ

Будӥды-а, эшъёсы.

Гуре кисьтэм барангылэн

Октон дырыз вуиз ни,

Милям ӧтем куносмылэн

Кошкон дырзы вуиз ни.

Ог убоез гуль сяська но,

Ог убоез мак сяська.

Гуль сяськаын будӥды-а

Тӥ яратон эшъёсы.

Тӥ, уӵыпи-туганъёсы,

Лобӟоды но кошкоды.

Ми кикы сямен кылёмы

Али ке но сильыса.

Анайлэн но, ой, атайлэн

Ӟечъёсыз ке ӧй лусал.

Кытын вал бон, кытын вал бон

Асьмелы но та ӟечъёс .