Гужем юон

Дас кыкетӥ июле милям гуртамы улӥсьёс пусъё Гужем юон сэбедэз. Та нунал висъяське аслаз аспӧртэмлыкеныз.

Така вандон

Сэбедлы шуыса вандо така. Вандӥсь нырысь ик шуэ:

– Пересьёслэн кылдытэмзы. Тани вир сётӥськом. Мыным вождэ эн вайы. Кылемез пудо-живот мед йылоз!

Собере ини такаез вандо. Сӥлез нимаз тусьтые юдо но вӧсяськыны шуыса нимаз дасяло. Нырысь ик юрт котырысь куалае эстӥсько. Дасям сӥлез чабей кеньырен ӵош пӧзьтыны пукто. Пӧзем бераз тылало. Со тазьы лэсьтӥське: ӝукез но сӥлез омырто но тылэ кушто. Собере коркалэн кузёез вӧсяськон тусьтые ӝукез но сӥлез тыре.

Вӧсяськон

Вашкала дырысен ми палан вӧсяськонлы одно ик выль кут кутало, выль кускерттон куо. Вӧсяськыны кутскемлэсь азьло одно ик мунчое пыро, вӧсяськон тӥрлыкез чылкыт мисько, котыр ваньзэ утялто. Вӧсяськон азьын мӧйы воргорон вӧсяськон дэремзэ дӥся. Со дэралэсь вуремын, тӧдьы мед луоз шуыса, тулыс лымы вылын возё. Пыдаз кутча сурон сапег яке выль укмысо кут. Йыраз шляпа понэ но вӧсяськыны кутске:

– Осто, Инмаре! Осто вылӥсь мусо быдӟым Инмаре, Инэ-вуэ! Гужем юон понна вӧен-нянен йыбырттӥськом. Кизем ю-няньмы курег пуз быдӟа зарни тысё мед шепаськоз. Ӵыжтэм вӧй кадь шуныт зоръёстэ сёт, Инмаре. Пудо-животмы гид тыр мед йылоз. Шудо нылпиос коркаосамы тэронтэм мед вордскозы. Шуддэ-бурдэ, азинлыктэ, тазалыктэ, йӧнлыктэ, сабырлыктэ, татулыктэ сёт семьяелы, бӧлякелы, гурто калыкелы, удмуртъёслы, дунне вылысь вань адямиослы. Эн вунэты монэ но, быдӟым Инмаре! Инэ-вуэ, Воршудэ, югыт тӧдьы Кылчинэ, лёгиськоно пыд улме ӵошкыт кар, уть ӵындэмелэсь. Семьяе но бӧляке, огкылысь кариськыса, ванё-буро мед улозы. Осто, вылӥсь мусо быдӟым Инмаре, Инэ-вуэ! Вӧсяськемме кабыл басьты, мае кури ваньзэ сёт. Осто, Инмаре!

Собере вӧсясь нимаз вӧся на сурез но винаез. Вӧсяськем бере ӝукез но сӥлез корка пыртэ. Пу пуньыен нырысь ик ачиз веръя, собере семьяосыз сак эскеро: вӧсяськем ӝук но сӥль арам медаз лу.

Вӧсьнерге

Та нуналэ тыршо вал узылы яке борылы ветлыны, малы ке шуоно ӝыт пал кутскоз вӧсьнергее ветлон. Вераны кулэ сое: вӧсьнерге арлы ньыль пол ортчытӥське: Быдӟынналэ, Гужем юонэ, Сӥзьыл юонэ, Вӧйдыре. Берло вакытэ та сэбедъёс вуныны кутскизы.

Вӧсьнергее ветлон – со вӧсяськемзэс Инмар кабыл мед кароз шуыса, бӧлякысь котькуд корка пырыса, ӟеч ивор веран. Бӧляке пырись коркаос урам кузя интыяськемын. Милям гуртамы вӧсьнергее ветлӥсьёс шурлы пумит тубо. Кинлэн коркаез шур кошкемъя берпуметӥез луэ, со доры ик нырысь бӧлякъёс вӧсьнергее люкасько.

Вӧсьнергее мынэмлэсь азьло одно ик ивор сётыны кулэ. Ужлэсь ваньмыса, ӝыт пал, вӧсьнерге кутске. Та сэбедлы котькуд коркан пӧрасько: зыретэн табань, чабей ӝук, кыстыбей, пельнянь, йӧлпыд, вӧен картошка, пилем кукей, боры яке узы, сутэр. Вуэм киярез вандылыса пукто, аръян, вӧй, сӥль, выль сӥлен лым. Гужем юонлы котькудӥз кузё кышно нимысьтыз вина пӧзьтэ. Виназэ кужмо карыны тырше. Ӝӧк пуме одно ик лянэсэн сур пукто. Вӧсьнергее лыктэм муртъёс корка пырыкузы ӟечбуръясько, Инмарлэсь маке но куро. Та семьяын висись адямизы вань ке, солы тазалык куро, Инмар, пе, мед кылоз вал милесьтым куреммес. Армиын пизы вань ке, солы ӟеч эшъёс, тазалык куро, Инмар бур палась бурд улаз мед возёз, шуо. Лыктэм бӧлякез ӝӧк сьӧры пукто. Одно ик пичиен веръяно сӥлез, сӥль лымез, пӧраськемъёсты, сурез. Шуныт кылъёс верало пӧрасьёслы.

– Осто, макем ческыт пӧрамын ук та кукеен пирожкиды.

– Кенды сыӵе быгатыса пӧраз-а?

– Осто тазалыкез мед луоз! Туж ческыт!

Лыктэм бӧляклы кузё кышно вина лэзе. Собере ваньзы ӵош султыса шукко. Кузё кыл вера:

– Осто, Инмаре! Бӧлякъёслэсь, ёросъёслэсь, ӟеч калыклэсь эн люкы! Тазьы ик ӵош огазьын ог-огмес гажаса но юрттыса мед уломы. Ойдолэ со понна юоме!

Нимысьтыз вераме потэ сое: вашкалаос винаез быдтытозь уг юо вылэм, веръяло но пукто. Туала арын таӵе сэбедъёсты вина юонлы пӧрмытоно ӧй вал. Мертэтсэ тодыса, вашкалаослэсь дышетскыса умой луысал.

Вӧсьнерге гур

Вӧсьнергелэн аспӧртэмлыкез со бордын: бӧлякъёс вӧсьнерге гур кырӟало. Котькуд бӧляклэн со аслаз. Салья гуртамы дас витьлэсь ятыр бӧлякъёс. Котькуд бӧляклэн аслаз нимыз но аслаз вӧсьнерге гурез. Кутсконъёсыз огвыллемесь, нош пуштросэз котькудӥзлэн аслаз. Вӧсьнерге гуръёс, мон сямен, тужгес но вашкалаосыз пӧлы пыро. Одӥг пол кылыса, сое уд дышы. Та кырӟанъёсыз олокызьы но поръятыса кырӟало.

Котькуд бӧляклэсь вӧсьнерге гурзэ гожтыса кельтоно вылэм, со ноку но медаз вуны, туала будӥсь нылпиосмылы но мед кылёз. Сётиськом Вуж Салья гуртысь гожтэм кык бӧляклэсь вӧсьнерге гурзэ. Соос туж тунсыкоесь.

Вахит бӧляклэсь вӧсьнерге гурзэ кырӟаз Ирина Пудовна Пудова, вордскемын Кияса ёросысь Вуж Салья гуртын.

Армись гинэ лыктэм

Гужем но, ой, юонмы,

Ваелэ али

Шулдыртыса, ой, кырӟалом

Малпаса, малпаса пыжылэм

Асьмелэн но, ой, шыд-няньмы

Кабыл мед кароз

Вылӥсь но, ой, Инмармы.

Сяська вылэ лэзьылэм

Асьмелэн но, ой, воршудмы.

Вожъяськыса медаз улы,

Азьлань мед кароз со.

Игонька бӧляклэсь вӧсьнерге гурзэ кырӟаз Аграфена Игнатьевна Атеева, вордскемын Кияса ёросысь Вуж Салья гуртын.

Армиысь гинэ лыктэм

Лык гужем гинэ юонъёсмы.

Чалелэ али, ой, быратъёсы,

Гур гурлатом.

Одӥгмес но одӥгмес ук

Кема кур ке но ӧм каре

Уз лу бон меда

Весь валче, ой, улыны.

Валче ук гинэ, ой, улэмъёсмы

Малы гинэ уз луы?

Анай-атай нылпиос,

Маос бон ӧвӧл-а?

Озьы, капчи мылкыдын коркась корка вань бӧлякез орчытыса но тау карыса, юмшасьёс доразы бертылӥзы.

Вӧсьнерге бере кыкетӥ но куинетӥ нуналъёсаз ӵош турнась эшъёссэс куно карылӥзы, ньылетӥ нуналаз быдэс гуртэн веник тӥяны ветлӥзы.

Азьло дыръя староста вань коркаосты люкылэ вал пусъёсъя, кинлы кытын веник бичано. Витетӥ нуналаз вань калык турнаны потэ ини .