Беспалова Альбина
Пиосын йырин ӧвӧл. Альбина Беспаловалэн сцена вылэ нырысетӥ вамышъёсыз
Кияса ёросын арлы быдэ выль кизилиос ӝужало, кожалод. Отысь кырӟасьёс Марина Галичанина, Любовь Быкова, Николай Анисимов, «Ерпечкаос» ансамбль бӧрсьы сцена вылын воректӥз Альбина Беспалова. Выль Тӥгырмен гуртын вордскем усточилы 21 арес. Туэ йылпумъяз Ижысь гурт удысъя академиысь экономикая факультетэз.
- Альбина, ма муген кырӟаны мылкыдыд пуромиз?
— Мон пичи дыръям ноку но ӧй малпалля кырӟан сярысь. Школаын куасэн зол нискыласько вал. Шаерамы ортчылӥсь ӵошатсконъёсы пыриськылӥ. Ёросмылэн сборнояз но шедьылэме вань. 14 арескам кырӟаны кутски но, бызьылыны дыры ӧз кыльы ни. Соку тренере шуиз: бырйы — яке спорт, яке сцена. Мон кыкетӥзэ бырйи. Озьы ке но улонме крезьгур дуннеен герӟаме ӧз потылы — пичи дырысеным бухгалтерлэн ужез кельшылӥз. Собере азьвыл туганэ но весь мылкыдме лӧпкытъя вал: усьтомы, пе, асьмелэсь бизнесмес, мон кивалто, нош тон уксё лыдъялод. Озьы тӥни Ижысь гурт удысъя академие вуи.
Анаелэн но, пересь мемиелэн но куараоссы жингресэсь. Дорамы куноос вуо ке, 3 куара пуктыса, куиньнамы эх, кырӟаськом ук! Ма, мон ас поннам но весь гуръёс нёжъяса улӥсько. Академиысь эшъёсы но уг паймо ни. Огъяулонниысь кырӟам куараез кыло ке, шуо ни: Альбина шулдыртэ. Милям гуртамы трос тодмо адямиос вордскемын. Соин но куд-огез малпа, Выль Тӥгырмен туж бадӟым шуыса. Нош со — кырымпыдэсэ тэрымон, ог 100 мурт улӥсез. Сюресъёсмы, школамы, нылпи садмы ӧвӧл. Школае бускель гуртэ ветлӥськом вал.
Дышетскыкум одӥг ужрадлэсь но ӧй кыльылы. 2009-тӥ арын Кияса ёросамы ортчиз «Чеберина» конкурс. Отын вормисе потӥ. Шаплы луэмме ёросысь культура удысын ужасьёс синйылтӥллям. Трос пумиськонъёсы, концертъёсы ӧтчалляны кутскизы.
- Сцена вылэ капчи-а сюрыны?
— Мылкыд вань ке, номыр но секытэз ӧвӧл. 2009-тӥ арын Иже люкаськизы егит кырӟасьёс «Егит куара» конкурсэ. Мон отын 2 кырӟан быдэстӥ. Устоосыз пӧлы шеди. Озьы Ижысь Шор площадьын ортчем гала-концертын но кырӟай на. Кузьым сётӥзы — «Шундыкар» лагере путёвка. Отысен ини монэ синйылтӥз Надежда Уткина. Чортӥз «Ӝужась кизилиос» конкурсэ пыриськыны. Таяз радэ вормыны ӧз кылды. Собере Дэри ёросысь Подшивал гуртысь «Марӟан» ансамблен кусып тупатӥ. Татысь кырӟась-верасьёсын ӵош 2014-тӥ арын Финляндие но Швецие потай.
- Нош «Элькуновидение» пыриськыны кин мылкыддэ ӝутӥз?
— «Элькуновидение» 2-тӥзэ ортчыку, туганэ шуэ: мын ини, кырӟа отын! Нош мон кушетскисько: кин монэ отчы лэзёз? Со нош вазе: азьтэм! Собере кырӟасьёс Марина Галичанина, Иван Котельников лӧпкытъяны ӧдъязы. Озьы ке но дӥсьтонэ ӧз тырмы.
Ӵошатскон 3-тӥзэ радъяськыку, нош бордам тэбинизы. «Марӟан» ансамбльлэн кивалтӥсез но шуэ: Альбина, тон дась ини, мын, возьматы астэ. Ӵапак «Элькуновидение» азьын Дэри ёросысь Тяма гуртын «Гуртовидение» конкурс ортчиз. Мон отчы пыриськоно кариськи. Пор кырӟанэз удмурт кылэ ӝогак берыктӥ. Эше Екатерина Силина арганэн шудэ, мон кырӟасько. Озьы 2-тӥ инты басьтӥмы. Вормонозь 1 баллмы ӧз тырмы — «Элькуновидение» ӧм сюре.
Мылкыд быриз ке но, Кияса ёросысь «Ерпечкаос» ансамбльысь Юра Камашевлы жингыртоно кариськи ик. Со сыӵе шумпотӥз — ӵапак, пе, «Элькуновидение» ӵошатсконэ ик ёросысь усточиосты утчаськомы. Мон шаплы кошки Вуж Тӥгырменысь кылбурчи Юрий Атеев доры — кылбурзэ кутӥ но Марина Галичаниналы сётӥ. Со мыным шулдыр гур гожтӥз. Со кырӟанэн дыртӥ мукетыз усточи, Анатолий Эркишев, доры. Толя ӟеч аранжировка дасяз. Табере дӥсь шедьтоно. Куреньпыръем туфлиеным шонтӥ Кияса ёросысь Кибашлыослэн юртазы. Та туфлиелэн буёлэзъя ик дэрем но вуризы.
Тани сцена вылэ потон дыр вуиз. Кызьы кырӟай — али учкеме но, кылзэме но уг поты. Кышкаменым кырӟакум шокаме ик ӧз луы. Куарае рос-прос ӧз чузъяськы. Сцена вылысь кошки но зар-зар бӧрдӥсько. Пӧртэм ёросъёсысь усточиослы угось дунъясьёс трос гинэ баллъёс сётъязы. Нош мыным — ӧжыт. Берло ини баллъёсы люкаськизы. Мон нош ик бӧрдӥсько — табере ини шумпотыса. Озьы шеди ӵошатсконлэн 2-тӥ люкетаз.
«Мынам Удмуртие» каналысь конкурсэз, выж вылын пукыса, учки. Устоосыз пӧлы шеди шуыса, ивортӥзы но — прак вӧлдэтозь тэтчи, ява! Телефонэ ӟырдаз — я соиз, я таиз жингыртэ, ӟечкыла. «Элькуновидение» бере ини аслам быгатонлыкелы, кужымелы осконэ кылдӥз. Кияса ёросысь «Ерпечкаос» ансамбльысь пиосъёсын концертъёсын шаертӥмы ветлыны кутскимы. Али но сюрес вылысь ум пыраське.
- Ма, тынад ваньмыз вӧй вылтӥ кадь мынэ, дыр: куараед — жингырес, тусыд — чебер, сямыд — пыртӥ потод.
— Зэмзэ вераса, мыным ӵем дыръя уг удалты. «Элькуновидение» азьын сьӧдалэс йырсиме тӧдьыгес карыны малпай. Но парикмахере телефонэныз шудон сяменыз мон сярысь вунэтӥз — йырсие виштыё-виштыё буяськиз. Ма, дипломе пумысен но кӧня курадӟи. Эшъёсылэсь диплом ужзэс огшоры дышетӥсьёс эскеро ке, мыным сюриз кафедраен кивалтӥсь. Темаме дораз 10 пол ветлэме бӧрсьы гинэ умоен лыдъяз.
Уг яратӥськы гуртъёсысь культура юртъёсты. Отын сцена выжъёссы лукыр-лакыресь. Пичи Пурга ёросысь Уча черкогуртэ концертэн потӥмы. Кырӟан-тапыртон вискам туфлиелэн каблукез выже мертчиськиз. Кырӟанэ йылпумъяськытозь, поттыны выри.
- Тодӥсько: кырӟаны сяна, руль но бергатыны яратӥськод.
— Мынам со висёнэ. Матысь эше байкер вал. Со ик мыным кроссовой мотик кузьмаз. Возь вылэ потыса, нюкъёстӥ-гопъёстӥ эх, ширтӥ ук! Собере… лобӟи. Чиньыосме тӥяй. Но анай-атаелы номыр но ӧй вера. Бурмеме бере гинэ тодӥзы. Ма, машинаен но ворттылыны кельше. Тужгес но — отын радио пыр мынам кырӟанъёсы чузъясько ке. Машиналы правое вань, табере мотиклы басьтоно. Кузьым тузонӟыса уз сылы ук.
- Калыкын тодмо луэмед бере улонад маиз ке воштӥськиз-а?
— Туж трос эшъёсы кылдӥзы. «Вконтакте» вотэс бамын тодмоосы шуак 600 муртлы йылӥзы, ог 300 подписчикъёсы люкаськизы. Егит пиос акыляк каризы ини — ульчаын но, трамвайын но, гуртын но, городын но тодматскыны тэбинё. Но воргоронъёсын йырин ӧвӧл ай, УдГУ-ысь удмурт филологияя факультетын удмурт кылэз тодэмме волятэме потэ на.
Источник:
За предоставление материала выражаем огромную благодарность редакции газеты "Удмурт дунне"
