Ермолаева Нина Георгиевна
Мынам интые — картэным артэ!
Нина Георгиевна Ермолаева — Удмуртиысь дано журналист, Россиысь Писательёслэн огазеяськонзылэн ёзчиез. Пероез лэчыт вал, котькыӵе удысъёсын ужакуз. Соин трос данъянлы Нина Георгиевна дышемын ӧвӧл, сое ӵемгес тышкаськылӥзы, улыны дышетылӥзы. 80 арессэ ортчем кышномурт туннэ но тэк уг пукы. Печатлан машинказэ со воштӥз компьютерен, озьы котькуд нунал сямен кылдо выль чуръёсыз — я нылпиослы веросъёс, я тодэ ваёнъёсыз, я газет-журналъёсы статьяос. «Натӥ, Пави но мон» нылпиослы книгаез кылем арын пусъемын Удмуртиысь Правительстволэн Литературая премиеныз.
Шушмара
— Мынам выжые Иваново улосысь Шуя городын. Вань ӵыжы-выжые басма куон-поттон удысын ужамын, — шуэ Н. Ермолаева. Нош анаен атай вань улонзэс тыршизы торф предприятиын. Пичи дыры, мукетъёслэн сямен ик, войнаен герӟаськемын. Ож кутскыку, мыным 7 арес вал. Атае фронтэ кошкыса, ми мамаен кыкнамы кылим. Со 3 уже ветлӥз соку. Монэ сяна, мукет ӵыжы-выжыосмес но сюдыны-вордыны сюлмаськиз. Коркамы 2 семьялы люкемын вал. Огпалаз милям семьямы улӥз, мукет палаз — мамалэн сузэрез, соосын ӵош ик — Марфа песянае. Война вакыт сием потонэн тодэ кылемын. Анай мыным котькуд ӵукна вӧйын но сырен нянь кельтылӥз. Мон сое ӧй сиылы — котькуд ӵукна Марфа песянаелы поттылӥ.
Нош кӧт неномыртэм сюма. Тодэ лыктэ 1944-тӥ ар. Милемыз, 10 аресъем тэшкылиосты, гордкушман бусые уриськыны ыстӥзы. Мон валасько вал ни бакча ужез. Нош татын уката кельшиз. Уриськон сямен кушманэз шератӥськом, сое сиыны яра шуыса. Нош миськыны тодын но ӧвӧл. Доре, валамон ни, наштаськыса бертӥ — мама тышказ монэ. Малы ке киыз чурыт вал солэн — ужаса жаде вал, дыр, картсэ ожысь возьмаса жуммемын вал, луоз.
Атай ожысь бертыса, улон соку ик ӧз тупатскы. Но мынам выль уже кылдӥз — атаез пыд йылаз султытон понна анай скал басьтӥз. Сое сюдыны-утялтыны мыным оскизы. Кельше вал кыскем йӧлме ӵыжы-выжыосылы сётыны — аслым сюдӥсь кадь потылӥ.
Мыным 12 арес вал ни. Ми дорын патерын улӥз военной воргорон Ефим Исаакович Цейтлин. Со доры гужем куное вуыло вал кышноез но нылыз — кыкназы патретын кадь чебересь. Соослэн висъетсы кухнямылэсь векчи борддорен бӧлемын вал. Гулбече картофкалы пырыкум, вераськемзэс кылӥ.
— Кыӵе та Нина усто нылаш, — шуэ Цейтлинлэн кышноез.
— Зэм, умой нылаш. Но туж огшоры. Кин меда сыӵе шушмараез кышно басьтоз, — пумитаз вера Ефим Исаакович.
Тае кылыса, мон пырак гулбече питрай, вань пагӟаосты чотай, дыр. Картофка вылэ пуксьыса, кӧня бӧрдӥ, аслым ачим шуш но шудтэм потыса. Таӵе сюлэм висёнэ кема аръёслы пушкам каръяськиз.
Дышетсконын гинэ та куректонэ зӥбломылӥз. Озьы школаез зарни медален йылпумъяй — мынам гинэ таӵе вормонэ вал. Кытчы дышетскыны пыроно — только Москвае, МГУ-э, журналистикая факультетэ. Собеседование бере приёмной комиссилэн тӧроез Сергей Стыкалин коридоре потӥз, юаз:
— Нина Сибриналэн ӵыжы-выжыосыз вань-а?
— Татын, — шуак луиз буби.
Тау карыса но монэ ушъяса, атайлэсь кизэ кырмиз Стыкалин. Буби туж-туж данъяськиз та учырен. Жаль, мукет дыръя мон солы таӵе луонлык ӧй ни кылдытъя.
Мон вӧзад луи ке…
— Уг тодӥськы, кызьы улонэ луысал, оло, ныры урдскысал, монэ чебер шуись луысал ке.
2-тӥ курсэз йылпумъятозям, Шуя городысь ик пияшен эшъяським. Со медакадемиысь студент, операциос лэсьтэ ни. Но милям шудмылы вожъяськисьёс вылӥллям, мыным ивортӥзы, Юралэсь однокурсницаез пинал вайиз шуыса. Всё! Ӵуказе нуналлы осконме чигизы. Юра маке муген номыр валэктыны ӧз туртты, мон солэсь палэнскыны ӧдъяй. Озьы ноку но ӧм тодэ ни ог-огмылэсь мылкыдмес. Берло веразы, Юра сярысь вераськон огшоры кыл вӧлдон вылэм шуыса. Но улонысьтым таӵе ӝож сюрес монэ вуттӥз мукет воргорон доры.
Алексей Ермолаевен артэ группаосын дышетским. Мон сое ӧй но адӟылы кадь. 3-тӥ курсын Китайысь эше шуэ:
— Артэ группаысь пияш тыныд кемалась синмаськемын. Картэлы со сярысь вераз ни. Нош тыныд вераны уг дӥсьты. Учкы со шоры — дӥсяськемын туж начар, но вань лул-сюлмыз ымныраз гожтэмын.
Мон табере ӧй ни малпа соку ик вань сюлэмме усьтыны. Алексеез ӝыны ар пала эскери. Ачим соку чутыса ветлӥ, алдай: лыосам туберкулёз луиз. Алексейлы верай, эмъяны луонтэм черлай шуыса. Ермолаев шуиз:
— Нина, мон вӧзад луи ке, оло, тыныд кӧня ке капчиялоз?
3-тӥ курсэз йылпумъяса, Ермолаевен ӵош мынам ӵыжы-выжыосы доры бертӥм, татын милемлы дэрем но костюм вурытӥзы, сюан ортчытӥзы.
Нош 4-тӥ курс бере Алексей монэ Удмуртие практикае нуиз. Солэн дышетсконзэ йылпумъяса Иже гинэ бертыны мылкыдыз вал.
Соку сюрес милемыз нырысь вуттӥз Ермолаевлэн вордскем палъёсаз — Татариысь Кукмор ёросысь Киня гуртэ. Татын Алексейлэн мумиз но песянаез улӥзы. Туж шуныт пумитазы. Нош макем паймытӥзы: лапас улэ пыртӥзы но, кӧня ке сандыксэс усьтыса, ваньбурзэс возьматӥзы. Кӧня-кӧня куэм дэремъёс но айшетъёс, чалмаос но ӵушконъёс, кышетъёс, чыртывесь. Мынам таӵе чеберлыкез улытозям адӟылэме ӧй вал.
— Табере ваньмыз та тынад. Басьтод-а? Кулэ карод-а?
Мон мар вазьыны но пайми. Кызьы «уг» шуод? Мон шокчыны дӥсьтытэк та узырлык шоры учкисько. Конечно, мыным ваньмыз кельше, но нуыны та кузьымез нокытчы ай. Берло но ӧй дырты аслым карыны. Нырысь кулӥз Алексейлэн песянаез, сэре анаез. Нош ватӥськон нуналаз вань та «пирдан» чиптэм-чаптэм ышиз.
Удмуртие сюрес
— «Удмуртия» издательствоын милемыз, егит кузпалъёсты, туж ӟеч пумитазы. Практикае вуэм студентъёслы татын ик улыны но лэзизы — уйлы редакторлэн кабинетаз диванэз бадӟыматъязы. Издательствоын ужасьёс ик сюлмаськизы сиён-юон пумысен но, валес котырмес но черодэн арнялы быдэ вошъязы.
Соин Москваысь ужаны ӧтёнъёсты ми пелямы но ӧм ни понэ. Шоркарысь «Учпедгизлэн» издательствояз но чорто вал — квартира, пе, соку ик сётыны ум быгатэ, но общежитиын комната тӥледыз возьма. Ивановоысь издательствое но мыныны луысал.
1958-тӥ арын ми воксёлы Иже бертӥм. Татын улон интымы ӧй вал — уйёссэ нош ик редакторлэн кабинетаз каръяськылӥм. Собере гинэ кыӵе ке гулбеч нерге патер шедьтӥм. Нылпиосмы вордскытозь, отын улӥмы. Вакытэз сыӵе вал-а, мар-а, номыр понна ӧм куректылэ: дипломмы кисыын, ужмы кельше. Уждунмы быдэн 88 манет. Мынам анае-атае толэзьлы быдэ 100 манет ыстылӥзы — номырлы медам ёрме шуыса. Мон почтаын та переводэз басьтӥсько но Алексейлы сётӥсько. Ермолаеве уксёез аслаз анаезлы Татарие келя вал. Ӵем бертылыны но юрттӥськыны ми ӧм быгатылэ, соин таӵе пайда коть сётӥськом вал.
Издательствоын ужме кутски гурт удыс литературалы сӥзем отделын. Тунсыко вал татын. Но нырысетӥ ар ужаме бере секыт учыре ӝими. Соку ай егит гожъяськись Пётр Чернов Камбарка районысь Раиса Сомова доярка сярысь «Добрый пример» очерк гожтӥз. Мон книгалэн редакторез вал. Но лыдӟись доры со ӧз вуы. Кӧня ке сюрсъем тиражез быдтыны косӥзы — очерклэн темаез, пе, кырыж. Раиса киын скал кыске, 12 пудоезлэсь тросгес йӧл поттэ — эшъёсыз аппаратэн 25 скаллэсь тамында ик кыско. Но книга потон азьын республикаын вераськон кутскиз ни «Ёлочка» аппаратэн скалъёсты кысконо шуыса. Озьы милям быдэстэм ужмылэн нокыӵе азинлыкез ӧй вал. Вылаз ик, монэ обкоме бюрое ӧтизы. Вань улытозямлы со учыр тодам кылиз.
Мон бадӟым кӧтын, 8 толэзь секытэн ни, сылӥсько кузь ӝӧклэн пумаз. Мукет палаз 11 воргоронъёс монэ сизьдо, тышкасько, ӝӧк борды мыжгало. Монэ «визьмасьёсын» одӥг радын — издательстволэн директорез Пётр Яшин. Но мон янгыш ке, малы со мыным дур уг басьты — со кивалтӥсь ук. Со авторлэсь текстсэ кутӥз, мыным уж сётӥз, тупатъяме бере лыдӟиз, печате келян пумысен кинюртэмзэ пуктӥз. Оло, кык час монэ бюроын миськизы. Та муген ик дырызлэсь вазь нуны вайыны кутски.
3 нунал роддомын кыллисько ни, нокызьы пияме уг луы. Нуныед берытскыны вуттымтэ, шуэ мыным акушер. Номыр уг каро. Ярам, шудэ вылэм. Мукетыз пиясь нылкышно доры валтӥсь врачез Васильковаез ӧтиллям. Монэ адӟыса, эмъясь кушетскиз. Тани тазэ ӝогак вандылоно, шуэ. Поттӥзы кыктоосме — мон понна та витьымтэ шорысь 2 полэс шумпотон вал. Пие 2 кило 200 грамм вал ке, нылы 1 кило 600 грамм гинэ кыскиз. Берло тодӥ ни, ӧжыт гинэ улэп кылиськеммы.
1960-тӥ аръёсы мон удмурт произведениосты ӟуче берыкъяны кутски. Нырысь ӵектӥзы Пётр Блиновлэсь «Улэм потэ» романзэ: 2 пол, пе, ӟуче берыктыны выризы ни — ӧз пишмы. Таӵе ужен выреме ӧй вал ке но, мыным тунсыко потӥз. Озьы нырысь словарен кылъёсты утчай, удмурт сямен предложениос кылдытыны но йӧспортэм потэ вал. Отӥяз уже ӟеч азинскиз, уго вӧзам вал эше но визьмасе — Алексей Афанасьевич. Собере В. Садовниковлэсь «Туганай но Зара» выжыкылзэ, М. Петровлэсь «Ӟардон азьын» повестьсэ, Е. Самсоновлэсь веросъёссэ берыктӥ. Озьы ке но яратоно интыям — издательствоын — ужаны люкетӥзы.
ӵап со вакытэ Радиовещаниея но телевещаниея комитетлэн тӧроез Александр Потапов ӧтьыны кутскиз. Ӵапак, пе, литературно-драматической редакциын инты вань. Кивалтӥсь «На арене Гоша» книгалы телесценарийме лыдӟем. Озьы выль интые выжи.
Шыкыс устӥське
— Мукет нуналаз ик эфире потӥ — нуи Гоша гондыр но Иван Кудрявцев дрессировщик сярысь передача. Таӵе фурор телевидениын ӧй вал на — мон дорозь передачаосты нуыны дикторъёслы гинэ оскылӥзы.
Телевидениын витё аръёс ужаса вуттӥ. Туж узыр но пайдаё вакыт вал со мон понна. Уката ик огпол, командировкае ветлыкум, калык киужез тодӥсьёс сярысь передача лэсьтӥ. Собере та удысэ выйи — ковёр куисьёсты, пу но из вӧлӥсьёсты, корт дурисьёсты шедьтылӥ. Та передачаосысь сюжетъёс центральной телевидениын но мынӥзы. Кибашлыослы сӥзем адӟытонъёсы но геройёсме ӧтчалляй — соос Москваын но Ижын ортчылӥзы. Мар ӧз тэры телеэфире — книгае куриськиз на. Та аръёсы печатласькизы «Ложится на душу узор» но «Разноцветные встречи» сборникъёсы.
Кутски выль передачаос борды — 1970-тӥ арын «Здравствуйте, я Лӧпшо Педунь» цикл потӥз. Эшшо 6 телесценарие дась вал на. Калык кибашлыос сярысь передачаелы Москваын но синмаськизы — мыным татчы но сюрес усьтӥське вал. Но коллективын таӵе вормонъёсылы шумпотӥсьёс ичи вал, пыд пуктыны тросгес выризы. Озьы мон больницае учырай — 2 толэзьлы отчы ӝими. Эмъяськонниысь потыса, телевидениысь кошки.
Йӧл котырын зэмлык ӧвӧл
— Выль уже соку ик интыяськи — гурт удысъя министерствое но опытной станцие отделэн кивалтӥсь кулэ луиз. Первомайской посёлокысь станцилэн кивалтӥсеныз Валентин Соколовен кемаласьгес тодмо вал ни. Станциын пропагандая выль отделэн кивалтӥсьсы ӧй вал — тӥ кадь, пе, журналист кулэ, шуэ Соколов. Озьы улонэ 180 градуслы воштӥськиз — гурт удыс темае вуи.
19 ар татын ужай. Ваньмыз сюлмыя вал, кӧня адямиен эшъяськи — учёнойёсын, дояркаосын, пудо сюдӥсьёсын, механизаторъёсын. Трос гожъяськи, фотоаппаратэ киысьтым ик ӧз усьылы — тросэз туспуктэмъёсы ВДНХ-лэн павильонъёсаз ошылэмын вал.
Кӧня плакатъёс, брошюраос печатлаллямы. Издательствоын люкам тодон-валанэ выль ужын уката пайдаё вал — ӝыны ар куспын гинэ кӧня пумо литература печатланы дасяй. Ужась калыкен пумиськонъёсы бӧрысь нимаз книгаен потӥзы. Мичурин нимо колхозысь агроном Валентина Ушакова сярысь — «Притяжение земли». Скал кыскисьлы Нина Комарковалы сӥземын «Биография успеха» но мукет. 1984-тӥ арын потӥз «Ваш сад и огород». Та сборниклэн данэз туж бадӟым вал — сое «Алфавит» издательство эшшо печатлаз на 1993-тӥ арын.
Гурт удыс сярысь гожъямъёсы республикаысь Журналистъёслэн но Писательёслэн огазеяськонъёсынызы тужгес усто шуыса 2 пол премиосын пусъемын вал. Нош кӧня командировкаосы поталляй — асьме шаермес сяна, быдэс СССР-ез котыртӥ.
Нуналмысь уже тэрисьтэм малпанъёсме кисьтылӥ статьяосы, печатласькылӥ «Урал», «Уральский следопыт», «Уральские нивы», «Дружба народов» изданиосын. Ӵемысь монэ ӧтчаллязы радиопередачаосын вераськыны. Кема аръёс ӵоже синйылтэм-адӟем учыръёсты гожтӥ «Вокруг молока» книгае. Со печатласькемын ӧй вал на — но татысь очеркъёс пумысен радиое ӧтчаллязы. Книга югыт дуннее 1987-тӥ арын потӥз но — опытной станциысь кивалтӥсеным тушмонъёс луим.
Мар сярысь книга вал? Критикъёс сое М. Дудинцевлэн «Белые одежды» романэныз ӵошатъязы. Опытной станция мар понна кылдытэмын вал? Республикаысь мукет хозяйствоослы адӟем карыны, опыт люкан но дышетскон понна. Зэмзэ ке, кӧня отчы государство уксё кисьтӥз — пайда поттэмез лыдэ ӧз басьтылэ. Огзэ гинэ вераме потэ: документъёсын одӥг скал уллё «суредазы», нош улонын кык уллёлэсь йӧлзэ люкало вал. Соин лыдпусъёс но чебересь кылдылӥзы.
Семья ке вань
— Котькыӵе куректонъёсты вормыны капчигес, тонэ валась адями дунне вылын вань ке. Алексей Ермолаевез ваньмыз тодо ӟеч критикез сямен. Со туж трос лэсьтӥз удмурт литератураез эскерон, писательёслэсь произведениоссэс, огазе люкаса, поттон понна. Алексей Афанасьевичен ӝыны даурлэсь кема ӵош улӥм. Солэн оскымон пельпумъёсыз ке ӧй луысалзы, мон, дыр, ӧй чидасал сомында шуг-секытъёсты. Кузпалы улонысь кошкиз 2006-тӥ арын. Со дырысен мон пал кыли, ӧвӧл мынам ӝыные. Со дырысен бӧрдэ лулы. Кӧня кужыме вань, кӧня уксёме люканы быгатӥсько, турттӥсько А. Ермолаевлэсь статьяоссэ радъяса поттыны. 4 томен сборник луыны кулэ со. Но коньдонэн юрттӥсь уг шедьтӥськы. Туала вакытэ спонсоръёстэк та ужез вырӟытыны секыт, нош мон кураськыны дышыса ӧй вуы.
Мар шунтэ сюлэмме — нылпиосы. Андрей пие — техника наукаосъя кандидат, улэ Москваын, солэн 5 пиосыз. Ирина нылы дизайнере дышетскиз. Таизлэн 3 пиналыз. Нылыным одӥг юртын улӥськом. Озьы котькуд нунал адскиськом. Табере мынам 5 правнуке вань ни. Шумпотӥсько, Алексеен внукъёсмылы трос ӟечсэ пыӵатыны вуттӥмы шуыса. Соос, оло, ноку узыресь уз луэ. Но мон тодӥсько, соос шорем няньзэс ёрмись муртэн шори карозы. Ульчае куштэм кучапиез-коӵышпиез вӧсь уз каре, шунтозы, маялтозы, сюдозы.
Куддыръя квартираям телефон жингыртэ:
— Нина Георгиевна, Москваысь кунояны бертӥды-а?
Паймисько таӵе малпанъёссылы, монэ Москвае улыны келямзылы. Мынам интые Алексей Ермолаев улэп дыръя соин артэ вал. Табере инты монэ возьма соин артэ шайвылын. Мукет номыр кулэ ӧвӧл. Алексей Афанасьевич улонысь кошкем бере Удмурт шаерен эшшо матысьгес ӵыжы-выжы луи кадь.
Источник:
За предоставление материала выражаем огромную благодарность редакции газеты "Удмурт дунне"
