Игнатьева Римма
Римма Серафимовна Игнатьева – удмурт гожъяськись, Россиысь гожъякисьёслэн огазеяськонзылэн ёзчиез, Удмурт Элькунысь дано журналист.
Улон сюресэз
Римма Игнатьева вордӥськемын 1955-тӥ арын 27-тӥ гудырикошконэ удмурт шаермылэн уйпалаз — Кез ёросысь Нюрошур гуртын. [1]
Римма семьяын бадӟымез нылпи, со сьӧрын – куинь вынъёсыз но сузэрез. Анай-атаез – музъем вылын ужасьёс. Атаез, Серафим Васильевич, быдӟым ож вакытэ еж пияш, ас вылаз шӧдӥз улонлэсь вань секытсэ, курытсэ, кезьытсэ. Пинал пияшез келязы «Ижевск – Балезино» чугун сюресэз лэсьтон уже. [2]
Тямысэтӥ классозь Римма Ю-Тольён удмурт школаын дышетскиз, нош йылпумъяз вӧзысь Выльгуртысь ӟуч школаез. Собере 1972-тӥ арын нылаш Удмурт кун университетлэн филологи ёзэтаз пыриз на, 1977-тӥ арын диплом басьтӥз. Татын со ог вакытэ дышетскиз тодмо авторъёсын но тодосчиосын – Галина Шушаковаен, Тамара Пантелееваен, Владимир Алашеевен, Сегрей Жилинэн но мукетъёсыныз.
Пинал дырысеныз дышетӥсьлэн но журналистлэн ужзылы синмаськыса будӥз. Со удысъёс сярысь малпаса, трос лыдӟиськиз, гожъяськыны йӧндырылӥз. «Дась лу!» но «Кизили» ёрос газетъёсын эшъяськиз, гожъямъёссэ отчы ӵемысь ысъялляз. Но университетэз йылпумъямез бере улонзэ соку ик журналистикаен ӧз герӟа, нырысетӥ куинь арзэ Дэри ёросысь Шаберды школаын нылпиосты удмурт кыллы но литературалы дышетӥз. Туж яратыса но мылысь-кыдысь ужаны кутскиз пинал дышетӥсь. Но висёнэз золгес шараяськемен, яратоно ужзэ кельтоно луиз. Трос дырыз эмъяськонниостӥ ветлыса быриз. Озьы курадӟемез бере, вордӥськем палъёсаз бертса улӥз. Но 1980-тӥ арын, кема висьыса улэмез бере, кулӥз атаез. Римма пичи вынъёссэ пыд вылазы султытыны анаезлы, Зинаида Александровналы, юрттоно луиз. [2]
Уж сюриз Дышетӥсьёслэсь тодон-валанзэс будэтонъя институтын. Римма Серафимовналэн школаын ужамезлы, урокъёссэ радъямезлы синмаськем институтлэн директорез Рудольф Фёдорович Березин. Соин ик, секыт ужрад кылдэмен, Римма Игнатьеваез ӧтё институтэ ужаны. 1986-тӥ арысен гинэ «Советской Удмуртия» («Удмурт дунне») газетын ужаны кутскиз. Татын но со вань лул-сюлэмзэ сётыса тыршиз, командировкаосын ортчемын трос самой кыдёкысь ёросъёсысь гуртъёс. Та газетэ Римма университетын дышетскыкуз ик гожъялляз. Нырысетӥ новеллаез но татын ик 1975-тӥ арын печатласькиз. Газетын Римма Серафимовна кылысь кылэ берыктонъя, гожтэтъёсъя отделъёсын кема аръёс ӵоже тыршиз, лыдӟисьёс сое калыклэн улон-вылонысьтыз лэчыт ужпумъёслы сӥзем статьяосызъя али но тодо на, дыр. [3]
«Советской Удмуртия» бере Римма Игнатьева «Инвожо» журналлэн редакцияз кема ужаз на. Ужзэ туж яратэ вал. Но номыр шоры учкытэк, тазалыкез лябӟемен Римма Серафимовналы ужысьтыз кошконо луиз.
2003-тӥ арысен Римма Игнатьева ужа дораз. Висись киосыз ручкаез кутыны пумит луэм тырысь, со вӧлымтэ карандашен кока печатлан машинкалэсь клавишаоссэ. Озьы огез бӧрсьы мукетыз кылдо тодмо писательмылэн статьяосыз, новеллаосыз, веросъёсыз, повестьёсыз но романъёсыз.
«Инвожо» журналын ужакуз ик, 2002-тӥ арын Римма Игнатьева Россиысь писательёслэн огазеяськоназы кутэмын вал.
Гожъямъёсыз сярысь
1968-тӥ арын, вис каремез бере, выльысь потыны кутскиз нылпиослы «Дась лу!» газет. Риммалэн атаез туж лыдӟиськыны яратэ вал. Соин ик та газетлы соку ик гожтӥськиз. Нылаш но кыстӥськиз газет, книга борды. Солы ваньмыз тунсыко потылӥз. Нылпиослэсь гожтэмзэс паймыса лыдӟылӥз. Соин сэрен юанэз но кылдӥз: нош мон уг быгаты шат? Эшшо, семьяязы усто сямзы вал: ӝытъёсы ӵош пуксьыса, кыӵе ке книгаез лыдӟыны яратылӥзы. Анаез но бабушез киуж ужаса пуко, атаез я гозы пунэ, я сапег кышъя. Риммалы книга сёто. Со ӝӧк сьӧры интыяськыса, шара лыдӟе ини, нош мукетъёсыз кылзӥсько.
«Со ӝытъёсысен кылдӥз, луоз, аспӧртэмлыко сямы: лыдӟемъёсы бере пушкам, олокыӵе но учыръёс малпаса, я тузӥ но ӟеч, я шуш но урод геройёсын тырмытыса, пӧртэм дуннеос кылдытылӥ, со дуннеостӥ калгыны яратылӥ», – пинал дырзэ тодаз вае Римма Серафимовна Игнатьева. [3]
Литература удысын Римма Игнатьева кемалась тырше ни. Та тунсыко, аспӧртэмлыко, туала вакытэз сак эскерись мурт кылдытъя веросъёс, новеллаос, озьы ик – повестьёс, романъёс. Тужгес но ӟеч пӧрмо Римма Серафимовналэн новеллаосыз. Отысь адямиос – туала вакытэз шӧдӥсь муртъёс. Гуртын но городын улӥсьёс. Писательлэн гожъямезлэн шорсюлмаз – улонлэн дуныз сярысь малпаськон. [4]
Со, одӥг кадь быгатыса, нылпиослы но, мӧйыослы но трос гожъя. Озьы ке но потэм книгаосыныз ушъяськыны уг быгаты. «Инвожо» журналын ужакуз солы гожъяськыны бадӟым сюрес усьтӥськиз. Со аръёсы ик «Кенеш», «Инвожо», «Луч» журналъёсын, «Удмурт дунне» газетын огез бӧрсьы мукетыз повестьёсыз печатласькизы: «Беромем яратон» (Кенеш, 2000), «Бубыли» (Инвожо, 2001), «Сьӧлыклэн емышез» (Кенеш, 2002), «Чилекъян-ворекъян» (Удмурт дунне, 2002), «Кион котьку сютэм» (Удмурт дунне, 2005), «Анай-атайёслэн нуналзы – среда» («Быльырам синкыли» веросъёсын дэмен бичет, 1997). Произведениосыз газет-журналъёсын гинэ печатласькемен Римма Игнатьевалэсь творчествозэ та изданиосты басьтӥсьёсгес тодо, нош со туала удмурт литератураез азинтӥсьёс пӧлысь тужгес пайдалыко ужасез луэ ук. Нырысетӥ книгаез лыдӟись доры 1995-тӥ арын гинэ вуиз, со нылпиослы веросъёсын «Ческыт зыно сяськаос» бичетэз вал. Мӧйыослы гожъямъёсыз — веросъёсыз, повестьёсыз, «Игнаш сайкемын» романэз — татчыозь газет-журналъёсын гинэ потӥзы вал ай. Но 2010-тӥ арын Римма Серафимовна «Инвожо» журнал пыр ас коньдонэныз «Сьӧлыклэн емышез» повестьсэ удмурт но ӟуч кылъёсын поттӥз. Ватсаса верано на: ӟуч кылэ ачиз ик берыктӥз. Нош печатлан понна коньдон сотэк но пичи пенсиысьтыз шыръяз. 2011-тӥ арын кык книгаез потӥзы: «Кион котьку сютэм» = «Сколько волка ни корми» удмурт но ӟуч кылын повесть но семьяын лыдӟыны веросъёсын повесть «Оксилэн сюлмаськонъёсыз».
2005-тӥ арын тулыс Удмурт кун университетысь удмурт литературая кафедраын ужасьёс быдэсак одӥг кенешонзэс Римма Игнатьевалэн творчествоезлы сӥзизы но ужъёсызлы вылӥ дунъет сётӥзы. [5]
Римма Серафимовналэн рос-прос, быгатыса гожъяськыны тыршемз син шоры йӧтэ. «Ческыт зыно сяськаос» бичетэ огазеям нылпи веросъёсыз лыдӟисьёслы ӟеч мылкыд кельто. Автор нылпилэсь пуш дуннезэ шӧдыса-тодыса гожъям. Бичетэ покчи дышетскисьёслы сӥзем дас веросъёсыз люкамын. Бадӟымесь ӧвӧл соос, пичиослы лыдӟымон гинэ. Котькудӥз верос пичи муртлэн улонысьтыз кыӵе ке учыр яке кӧня ке учыръёс вылын пӧрамын: пиналлэсь эшъёсыныз но мӧйыосын кусыпъёссэ возьматэ. Котькудаз автор мӧйыослы но вазиське: малы меда асьмеос нылпиослэсь чебер но аспӧртэмлыко дуннезэс куддыръя ум валаське яке валаны но ум тыршиське, соин сэрен пинал сюлэмез вӧсь кариськом, ултӥяськом. Озьы тӥни веросчи произведениосыныз покчи нылпиосты но, соосты будэтыны сюлмаськись мӧйыосты но визьма, индылэ. [6]
Нылпиослы гожъясьёс пӧлысь Римма Игнатьеваез висъя критик, литературовед Татьяна Зайцева но. Р. Игнатьева нылпи веросъёсаз ӝожез сярысь гинэ уг вера, со туж быгатыса яркытсэ пурысен, шулдырзэ мӧзмытэн, серекъянозэ бӧрдоноеныз пӧлэстэ. Та мадёсчи нылпи литератураын кылдэм огвыллемгес аресо нылпиос сярысь гожъян манерлэсь инвисъёссэ паськытатэ, веросъёсаз пӧртэм аресо геройёсты пыртэ. Иське, лыдӟись нылпиос но аресъёссыя пӧртэмгес луыны кутскизы. [7]
Лыдӟисьёс Римма Серафимовнаез ӟуч кылысь берыктэмъёсызъя но ӟеч тодо. Сыӵе ужъёсыз пӧлысь тужгес бадӟымез но син шоры йӧтымонэз — Александр Пушкинлэсь «Барышня-крестьянка» повестьсэ берыктэмез. «Узыр нылмурт-крестьянка» нимын со «Инвожо» журналын дано ӟуч писательлэн вордӥськемез дырысеь 200 ар тырмон азяз печатламын вал.
Аслаз но авторлэн веросъёсыз но повестьёсыз мукет кылъёсы берыктылэмын: ӟуче сяна, мордва но чуваш кылъёсы. Со гинэ ӧвӧл Римма Игнатьева Чувашиысь Алексей Талвир нимо литература премилэн лауреатэз но луэ. [6]
Наградаосыз но премиосыз
Чувашиысь Алексей Талвир нимо литература премилэн лауреатэз.
Нырысетӥ инты «Кенеш» журналын поттэм выль произведениослы ялэм конкурсын, 2008.
Библиография
Книгаосыз
Кион котьку сютэм = Сколько волка ни корми : повесть. – Ижевск : Инвожо, 2011. – 89 с : ил.
Сьӧлыклэн емышез = Плод греха : повесть. – Ижевск : Инвожо, 2010. – 134 с. : ил.
Статьяосыз
Атя-ававлан кечы – выргечы : шайыштмаш / на горномарийс. яз. пер. М. Кудряшов // Симсы шыргышты : финн-угр писательвлан сылны шаяшты. – Йошкар-Ола, 2007. – С. 86–92. – Пер. загл.: Родительский день – среда : рассказ. – Пер. назв. источника: В синем залесье : творчество финно-угорских писателей.
Берланес : верос // Кенеш. – 2010. – № 8. – С. 51–58.
Вургече – ача-аван кечыже : ойлымаш / пер. З. Глушковой // Марий Эл. – 2007. – 29 сент. – С. 7. – Пер. загл.: Среда – родительский день.
Горько ; Покаяние : рассказы // Луч. – 2011. – № 9/10. – С. 45-52.
Иворчи : верос // Удмурт дунне. – 2010. – 30 марта. – С. 7. – (Быдӟым Вормонлы – 65 ар).
Игнаш сайкемын : романысь оглюкетэз // На переломе эпох : Союзу писателей Удмуртии 70 лет, 1934-2004 : ст., стихотворения, прозаич. произведения, док. – Ижевск, 2006. – С. 148–150.
Курыт : новелла // Кенеш. – 2005. – № 8. – С. 11–16.
Кытын улэ выжыкыл : верос // Ӟечбур! – 2005. – 19 янв. – С. 8.
Недоносок : рассказ / авториз. пер. с удмурт. // Италмас. – 2011. – № 1. – С. 39–42.
Нюлэс - пелё : верос // Инвожо = Альманах удмуртского ПЕН-клуба. – 2011. – № 5/6. – С. 88-90.
Паньтэмъёс : верос / иллюстрациосыз М. Водикинуслэн // Кизили. – 2005. – № 7. – С. 8–9.
Пегась ката : верос // Кизили. – 2008. – № 4. – С. 8–9.
Плод греха / пер. с удмурт. авт. // Луч. – 2008. – № 7/8. – С. 6–23.
Сиськонниын : верос // Кизили. – 2006. – № 4. – С. 6–7.
Тю-тю, бай-бай : верос // Кизили. – 2009. – № 5/6. – С. 4–5.
Ӵуж нэнэ : верос / иллюстрациез В. Мустаевлэн // Кизили. – 2010. – № 8. – С. 6–7 : цв. ил.
Ческыт зыно сяськаос // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 50.
Чимали ; Ныр-ныр буба // Кенеш. – 2009. – № 11/12. – С. 53–60.
Чорыгаку : верос / иллюстрациосыз М. Гузаевалэн // Кизили. – 2010. – № 11/12. – С. 6–7 : цв. ил.
Ыртӧл : верос / иллюстрациез Е. Каракуловалэн // Кизили. – 2009. – № 10. – С. 4–5 : цв. ил.
Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.
Уже кутэм литература
- ↑ Уваров А. Римма Игнатьева (1955) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 56.
- ↑ 2,0 2,1 Ар-Серги В. «Я приняла вызов судьбы…» // Известия Удмуртской Республики. – 2010. – 12 февр.
- ↑ 3,0 3,1 Игнатьева Р. Малпам дуннее – зэмлыко // Удмурт дунне. – 2005. – 9 сент. – С. 6, 11. – (Удмурт кизилиос).
- ↑ Пантелеева Т. Пичи прозаын – бадӟым ним // Удмурт дунне. – 2005. – 26 авг. – С. 12.
- ↑ Тыршемезлэн емышъёсыз – син азьын : Римма Игнатьевалы (Лаптевалы) – 50 // Кенеш. – 2005. – № 8. – С. 85–94.
- ↑ 6,0 6,1 Фёдоров Л. Покчиос но, мӧйыос но ярато : Римма Игнатьевалы (Лаптевалы) – 55 // Кенеш. – 2010. – № 8. – С. 92–94.
- ↑ Зайцева Т. Туала нылпи проза сярысь кӧня ке малпанъёс // Кенеш. – 2000. – № 8. – С. 58–61.
