Ведрова Ольга
Ольга Анатольевна Ведрова (Петрова) – удмурт кылбурчи.
Улон сюресэз
Ольга Ведрова вордӥськиз 1972-тӥ арын 8-тӥ южтолэзе Дэри ёросысь Вылӥ Женвай гуртын трос нылпиё семьяын. [1]
Нырысетӥ классэ пичи Оли дышетскыны мынӥз аслаз вордскем гуртаз Женвайысь начальной школае. Собере, 1989-тӥ арын Шор Постолысь шор ёзо школае. Со аръёсы ик школаысьтызы литературно-творческой кружоклэн ужаз мыло-кыдо пыриськиз, нош бадӟым классъёсын дышетскыкуз, удмурт кылъя дышетӥсьсы ӧвӧлэн, куинь арзэ кружокен но кивалтӥз. [2]
Школаын дышетскыкуз ик Оля дневник нуыны яратӥз. Отчы пусйылӥз маин ке но вунонтэм луись нуналъёссэ. Кылсярысь, школаязы пумиськонэ (3. 02. 1989) ветлэм удмурт кылбурчи Владимир Васильевич Романов. Соин Ольга пумиськылӥз ньыль пол. Кылбурчи трос выльзэ усьтӥз нылашлы, валэктӥз но дышетӥз сое. О. Ведрова понна со эш но, дышетӥсь но вал. Поэтесса Инмарлы тау каре сыӵе пумиськонъёс кузьмамез понна. [3]
Школаез йылпумъяса, Оля одӥг арзэ ужаз «Дась лу!» газетлэн редакцияз. [1]
Нош 1990-тӥ арын Ольга Ведрова дышетскыны пыриз Удмурт кун университетлэн филологи факультетэзлэн удмурт кылъя но литературая ёзэтаз, «журналистика» специализацие. Дышетскон аръёсаз ик кылбуръёсыныз «Мон утчасько тонэ» бичетэз диплом ужез луиз. Филологи наукаосъя кандидат, кылбурчи Виктор Шибанов кивалтӥсез вал. [2]
1995-тӥ арысен ужаз Удмурт радиоын – литературая но драмая редакциысь журналист луыса. [2]
Вань быгатонлыксэ, сюлэмзэ поныса тыршиз. Кӧня тодмо адямиосын пумиськылӥз! Кызь арлэсь ятыр татын ужатозяз трос гинэ кылдытэмын шаерысьтымы тодмо адямиос сярысь литературно-драматической очеркъёс. «Арня ӵукна», «Кылбурет удысын», «Ингур» передачаосты дасяз но нуиз. Улонысь вазь кошкем шаерысьтымы тодмо адямиос сярысь «Тодад ӧд вай ни ке монэ…» передача кылдытӥз но нуиз. 2008-тӥ арын гужем О. Ведрова, Удмурт радио юрт ворсаськемен, выжиз ужаны «Моя Удмуртия» телерадиокомпание. Ужаз радиоын но, телевидениын но.
2008-тӥ арын «Данъясько тонэ, шаер!» передача кылдытӥз. «Малы кылдӥз сыӵе передача? Кылбуръёс – со эфирлэн чеберманэз, солэн марӟанъёсыз. Со сяна – удмурт поэзия финн-угор литератураос пӧлын самой золэз луэ – классика гинэ ӧвӧл, туала кылбуръёс но, уката ик нылкышно лирика. Асьме литературамы – данъяськымон. Озьыен, соин тодматэммы потэ радиоез кылзисьёсмес», – вера Ольга Ведрова. [4] 2009-тӥ арын Ольга Анатольевна Ведрова ужаны выжиз Кузебай Герд нимо гимназие нылпиосты дышетыны. Татын но со вань сюлэмзэ поныса ужа, кивалтэ литературно-творческой кружокен но мультимедийной центрен. Гимназиын пиналъёс шаерысьтымы пӧртэм ёросъёсысь люкамын бере, Ольга Анатольевна трос дырзэ но кужымзэ сётэ пиналъёслэсь улонзэс, тодон-валанзэс будэтон понна. Дышетскисьёсыныз ӵош ветло пӧртэм ужрадъёсы: театре, концертъёсы, художникъёслэн адӟытонъёсазы, писательёсын пумиськылонъёсы. Пырисько Кузебай Гердлы сизем лыдӟонъёсы («Гердовские чтения»). Асьсэос но радъязы книга поттон. Арлы быдэ пиналъёслэсь ужъёссэс, кылбуръёс, веросъёс, выжыкылъёс нимысьтыз яке огъя бичетэн печатласа потто. Нош 2012-тӥ арысен учкемын гимназиын тыршись дышетисьёслэсь но научно-методической материалзэс печатласа поттылыны.
Ольга Анатольевна мылысь-кыдысь пыриське общественной уже но. Со луэ «Удмурт кенеш» но «Нылкышно кенеш» огазеяськонъёслэн ёзчизы. Та мусо нылкышно адӟем карымон анай но. Солэн кык нылпиез – ныл но пи. Ижын улыса, нылпиосыз чылкыт удмурт кылын верасько. 2006-тӥ арын Настя нылыз, соку Кузебай Герд нимо гимназиын 8 классын дышетскись, усто дышетскемез но котькыӵе ужрадэ мылысь-кыдысь пыриськемез понна Россиысь Президентэзлэсь Владимир Путинлэсь 30 сюрс манет коньдон премиен пусъемын вал. [5] Та дыре Настя – студент. Со Удмурт кун университетын удмурт филологи факультетысь удмурт но англи кылъёсты дышетон ёзэтаз дышетске. Нош Ондӥ пиез – кыкетӥ классын Кузебай Герд нимо лицейын тодон-валанзэ люка.
Гожъямез сярысь
Ольга Ведрова Шор Постол школаын дышетскыкуз, кылбуръёссэ но пичи заметкаоссэ «Дась лу!» но ёрос «Ленинец» газетъёсын поттылыны кутскиз. Солэсь ужамзэ чакласа возизы «Дась лу!» газетысь журналистъёс Герман Ходырев, Владимир Романов, Леонид Фёдоров, Надежда Лопатина но мукетъёсыз. Гожъяськыны кутскисьлэсь мылкыдзэ соос бурдъязы, быгатонэзлы оскытӥзы. [2]
Нырысетӥ кылбурез пумысен О. Ведрова шуэ: «Со вал бер ӝыт, куке пушкын кузёяськись кужым инкуазьлэн сураськем кужыменыз ваче вуэ, куке кылдэ валантэм мылкыд. Но… шӧдтэк шорысь гудыри ортчиз. Но со мыным кыӵе ке валантэм кылиз». Со гудыри ик луиз Олялы гожъяськыны мылкыд сётӥсь кужым. Соку ик пӧртэм пуштросо юанъёс кылдылӥзы, соослы валэктон кытысь утчаны ӧз валалля. Озьы со тодматскиз «Дась лу!» газетэн. Со пыр отӥяз трос эшъёс шедьтӥз но берло тросэныз ӵош университетын дышетскиз. [3]
Пумен Олялэн кылбуръёсын бичетъёсыз ӵемгес но ӵемгес пумиськыло. Солэн ужъёсыз печатласькыны кутско «Кенеш», «Инвожо» журналъёсын но «Советской Удмуртия» газетлэн бамъёсаз. [1]
1995-тӥ арын «Мон утчасько тонэ» потэм бичетаз В. Шибанов гожтэ: «Ольга Ведрова тодмо «ӧръёслэсь» палэнскыны быгатэ ни, аслэсьтыз куаразэ утча, аслэсьтыз ошмессэ кыре… Чебер чуръёсыз та книгаын но тырмыт ини, отын зэмос поэзилэн кужымез югдэ:
Изё макмырам ярдуръёс…
Пумен кузёмо вужеръёс,
Пыӵало ву вылэ лыз тылъёс.
Та кӧня ке чуръёсын огдыре шӧдӥське туала егит адямилэн аспӧртэмлыко абсурд мылкыдыз но, мифологической инъетэз но, литературамылэн традициосыныз герӟетъёс но, акылес луэм стереотипъёс но…» [6]
Удмурт нылкышно литературалэсь ӧрзэ 1990-тӥ аръёсы паськытатӥз Ольга Ведровалэн кылбуретэз но. Солэн кылбуръёсыз – яратонэз пӧртэм ласянь возьматыны тыршон, соин герзаськем мылкыдъёсты шараян. Солэн кылбуръёсаз валтӥсь инты басьто яратонлы сӥзем чуръёс, кытын шӧдисько инвариантной гуръёс: мон (лирической героиня) тонэ яратӥсько, нош тон – уд. Яке лирической героиня, яратоно картэз вӧзын луыса, кыӵе ке но мукетсэ, выжыкыло яратонэз вите на. [3]
О. Ведровалэн лирической героиняез – со вань улонэз, утчанъёсыз но шедьтонъёсыз яратонэн герӟась нылкышно. Котькыӵе учыръёсы шедьылыса но сюлэмыз уг сӥя, яратон но синмаськон котьку соин артэ ветло. Кызьы шуэ ачиз кылбурчи: «… одӥг адями пушкын огдыре ик куинь яратон улыны быгатэ. Нырысетӥез, со ноку вунонтэм, егит дыръёсы, малпанъёсы кылем – нырысь яратон: кыкетӥез – со вӧзын, артэ ветлэ, кулэ ке, шунтэ, тонэн ӵош куректэ но шумпотэ. Нош куинетӥез – со малпанъёсын улӥсь выжыкыл яратон, кудӥныз ноку но ӵош уд луы. Со кытын ке инмын, нош тон сое улӥын витиськод». [3]
Со писпу, асьмемыз герӟаса,
Аслэсьтыз чырс-гордзэ кузьмаса,
Со дыре ик пырем куспамы,
Уйвӧтад ни кутскем потаны – мылкыддэ сураны.
Ачиз но кылбурчи вера: «Мылкыды бугыръяськыкугес кылбуръёсы ӵемысь кылдо: синмаськон яке кинлы ке оскон сияку. Нош кинлэн ке куремезъя гожтыны туж секыт потэ…» [2]
«Удмуртия» книгапоттонниын Ольга Ведровалэн дасяське «Усьты ӧстэ» нимо кылбур бичетэз.
Наградаосыз но премиосыз
Матиас Кастрен нимо огазеяськонлэн дипломез радио но тележурналистика удысын, 1999.
«ГТРК Удмуртия»-лэн данъян грамотаез, 2000.
Удмурт Элькунлэн Данъян грамотаез, 2000.
«Удмурт кенешлэн» Ижкарысь Индустриальной ёросысьтыз ёзэтэзлэсь Данъян грамота, 2001.
Удмурт Элькунысь печатья но иворъёсъя министерстволэн данъян грамотаез, 2007.
Библиография
Книгаосыз
Мон утчасько тонэ : стихи. – Ижкар : Тодон, 1995. – 80 с.
Усьты ӧстэ : кылбуръёс / Ольга Ведрова. - Ижевск : Удмуртия, 2012. - 79 с.
Статьяосыз
"Мон утчасько тонэ" бичетысь : кылбуръёс // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 305–314.
"Ньыль бездытэсь борддоръёсы азям..." = "On neli luitund seina minu ees..." ; "Секыт, маке сюлэм вылын секыт..." = "On raskus raske mingi hinge peal... ; "Йыромыса кылем ланга выллем..." = "Kui ära eksind helin mingi ju..." ; "Тыл кысӥз, кузё луиз пеймыт..." = On valgus kustunudja öö taas peremees... // Kuum ӧӧ : suome-ugri ranvaste tanapaeva luulet. – Tallinn, 2006. – С. 474–477. – На удмурт. и эст. яз.
Ӟечыран выллем улон : кылбуръёс // Кенеш. – 2007. – № 3. – С. 3–8.
Женвай : кылбур // Удмурт дунне. – 2011. – 22 марта. – С. 6.
Мӧзмись кызьпуэ : кылбур // Удмурт дунне. – 2007. – 17 июля. – С. 7.
Палэзьпу но мӧзме... ; "Зор улын кынмыса сылӥсько..." : кылбуръёс // Удмурт дунне. – 2007. – 2 февр. – С. 11.
Тау тӥледлы... : кылбуръёс // Кенеш. – 2010. – № 1. – С. 33–36.
Тӧдьы тылы усиз : кылбур // Удмурт дунне. – 2007. – 14 февр. – С. 7.
Тон... мон ; Сяськая люгы ; Ӟардӥсь ӵукна... : кылбуръёс // Удмурт дунне. – 2006. – 21 июля. – С. 14.
Кырӟанъёсыз
Возняков В. Коӵышпи-шырась : "Кин ай отын, ӧс сьӧрын..." // Кенеш. – 1999. – № 7/8. – С. 113. – (Жингырты, удмурт кырӟан).
Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.
Уже кутэм литература
- ↑ 1,0 1,1 1,2 Зверева Т. Ольга Ведрова (1972) // Писатели и литературоведы Удмуртии. – 2006. – С. 139.
- ↑ 2,0 2,1 2,2 2,3 2,4 Романова Г. Кылбурчиен кенешон // Кенеш. – 2007. – № 3. – С. 6-8.
- ↑ 3,0 3,1 3,2 3,3 Фёдорова Л. Ольга Ведрова (1972) // Удмурт нылкышно кылбуретлэн тулкымъёсыз. – 2007. – С. 304-305.
- ↑ «Моя Удмуртия» www.myudm.ru
- ↑ Малых Л. Пӧзёно ке, мед уртчоз! // Удмурт дунне. – 2007. – 28 февр. – С. 4.
- ↑ Шибанов В. «Чиньыостэ уян бурдлы мон пормыто…» // Мон утчасько тонэ: Кылбуръёс / О. Ведрова. – Ижевск. – 1995. – С. 75-77.
