Масьярова Татьяна Ивановна
Пӧртэм ымныр, одӥг сюлэм
Тэтэ карыны кутскемезлэсь азьло ик Татьяна Масьярова эшъяськиз мунёен, фотографиосы но соостэк ӧз пуксьылы. Мунё театрын ужась эшъёсыз но шуо: мунёен вордӥськид бере, пересьмыса но шудэмысь уд дугды. Маскаръяськыны быгатӥсь Масьяровалэсь сямзэ мунёосыз но туж валало, кузёзылы выль вормонъёс вайыны юртто. «Удмурт но Вумурт» спектакльысь Вукузёез Чехословакие вуылыны сюрес усьтӥз. Телевизор учкисьёс азе но одӥг пол гинэ ӧз поталэ. Маскаос пӧртэмесь ке но, соос сьӧры ватӥськемын одӥг бадӟым сюлэм.
- Мунё театрысь артистъёсты калык ӧжытгес тодэ. Удмурт драмтеатрез ик басьтоно ке, татысь артистъёсты адямиос урамысен но тодмало. Ӝож уг поты-а?
- Милям ужмы сыӵе: асьмеды Мистер Икс но Мадам Икс шуиськом. Я возъет сьӧрын шудоно луэ, я ымныре маска дӥсяно. Шундыӝужан палась калыкъёслэн календарьзыя мон али котькуд аръя маскаос лэсьтӥсько. Кеч, Обезьян, Атас, Пуны вал ни, табере Кыр Парсьлэсь арзэ пумитаны дасяськисько. Но таиз уже мынам Мунё театрен герӟаськемын ӧвӧл. Концерт номеръёс дасясько валтӥсь ужелэсь ваньмон дыръёсам. Мукет маскаосы но вань ни. Выль ар шулдыръяськонъёсы, люкиськон ӝытъёсы нылпи садъёсы, школаосы ӧтчало. Арлыдоос понна но, нылпиос понна но пӧртэм программаос дасяны кулэ.
- Концерт номеръёсыныды яке ӝытъёсты радъян программаосыныды гуртъёсы уд потаське-а?
- Доразы ӧтем понна уксё тырыны кулэ луоз, нош тросэзлэн сыӵе луонлыкез ӧвӧл. Со сяна, гуртоос уггес тодо со номеръёсы сярысь, городын но кемалась ӧй кутскы ай та уж борды. Озьы ке но Евро-Шахерезадаеным но, Атасэн Курегеным но Операя но балетъя театрын, Удмурт кун филармониын учкисьёс азе потай ни. Кылем арын республикаямы ортчем клоунадая нырысетӥ фестивальын Атасэн Курег номере понна диплом но сётӥзы.
- Татьяна Ивановна, мар муген басьтӥськиды концерт номеръёс дасян борды?
- Мунё театрын рольёс уггес сёто вал, сюлэмын буш инты кылдӥз, мылкыд урод. Малпаськи, малпаськи но аслым ачим шуисько: ужаны луоз ук аслад удысэдъя ик. Басьтӥськи нылпи программаос дасян борды. Нылпи садъёсысь пиналъёсын, пичи классъёсын дышетскисьёсын творческой пумиськонъёс ортчытъясько. Верасько театрмы сярысь, пичияк номеръёс возьматӥсько мунёосын. Али тани, Клоун яке Пеппи Длинный чулок кариськыса, нылпиослы фокусъёс возьматыны кутски. Со фокусъёс огшорыесь, циркын выллем ӧвӧл. Киосыным ужаны дышетскисько телевизор учкон сямен. Мунёосме но ачим ик лэсьтӥсько.
- Серекъян-шулдыръяськон ӝытъёсы калык котьку но люкаське. Мунё театре туж мыло-кыдо мынысалзы, малпасько, удмурт группалэсь концерт номеръёссэс учкыны.
- Ми асьмеос но со сярысь вераськиськом, малпаськиськом. Но со концерт программаез дасян понна трос уксё кулэ. Одӥг гинэ мунё дасяно уз луы отчы. Дӥськут вуроно ваньмызлы, крезьгур бордын ужано. Чаклано ке, нимаз спектакль дасян дунтэмгес усёз нимаз концерт номеръёс сярысь. Мукетыз но вань: ойдолэ, ойдолэ шуиськом но, кинэ ке азьтэмез зӥбе, кинлэн ке фантазиез уг тырмы. Ӝуткась, вырӟытӥсь кулэ.
- Кызьы тодӥсько, Александр Перевощиков но, Алевтина Степановаен Антонида Пушина но, асьтэос но тани кун филармониысь серекъян ӝытъёсы устоесь номеръёсын калык азе потады. Соосты ик Мунё театрын возьматыны ӧй луысал-а?
- Милям режиссёрмылэн та шоры мукетгес учконэз. Эстрадая номеръёсмес уг яра, пе, профессиональной сцена вылын возьматыны. Но арлыдоос понна Мунё театрын концерт номеръёсъя нимаз программа дасямын. Со номеръёс вужесь ни, нош милесьтым асьмелэсь дасям номеръёсмес кутэмез уг поты. Озьы ке но номеръёсмы профессиональной сцена вылэ но пото. Нош али тросгес шулдыртоно луэ ресторанъёсысь калыкез.
- Со уж тӥледлы кыӵе ке но шумпотон вае-а, яке коньдон понна тыршоно луиськоды?
- Озьы но, тазьы но, шуыны луоз. Мынӥськод ни отчы театрын ужамед бере, быдэс ӝытсэ шулдыртоно луэ шутэтскыны лыктэм калыкез. Гуртэ бертыса, соку ик изьыны выдӥсько.
Таӵе ужын тросэз уг чидало, удмурт группаысьтымы мукет нылъёс но оскалтӥзы вал та амалэн ӧжыт ке но уждун поттыны. Куштӥськизы. Но ёрмон калэ вуид ке, ужась мурт котькыӵе секыт югдурысь потон амал шедьтоз. Концерт номеръёс дасямелэсь азьло мон керттӥськыса пуки. Кин мар куре вал керттыны: кофта, носки-пӧзь, изьы, сумка... Кӧня-кӧня мон керттӥськи. Нош дуныз ӧжыт. Али но курисьёс вань, но та ужлэсь куштӥськи, ас семьяелы гинэ керттӥськисько на.
- Мунё театрез ворсасалзы ке, тӥ ужтэк ӧй кыльысалды.
- Ӧй, конечно. Концерт номеръёсын вырись трос офисъёс али усьтӥськемын. Нылпиос понна но, арлыдоос понна но программаос дася, утчаськы, пиналъёсын огкыл шедьтыны, шудыны мед быгатод на. Кылыд но етӥз мед луоз. Кин ке мар ке вера ке, пумитаз серемес вазьыны мед быгатод.
- Татьяна Ивановна, мунёосын номеръёстэс «Аншлаг» яке «Кривое зеркало» телепередачаосы ыстон сярысь ӧд малпаськылэ-а?
- Туж яратыса учкисько мунёосын номеръёссэс. Шӧдӥське, котькуд выроссы бордын туж зол ужамын. Нош мон йӧндырисько ас поннам, ӧвӧл мынам режиссёре, юрттӥсе. Ужъёсме Центральной телевидение келян сярысь кемалась малпаськисько ни. Но со борды басьтӥськыны дыр кулэ, ӟеч съёмка лэсьтоно. Малпасько Атасэн Курегме, Евро-Шахерезадаме возьматыны. Али ужасько на чиган мунёен номер дасян бордын. Чиганъёсын номеръёс трос ке но вал ини, мынам мунёе мукетгес луоз.
- Пичи дырысеныды ик-а юморез валась, кыллы етӥз вал яке, артистэ дышетскыса, театрын ужаса, сыӵе быгатонлыкты кылдӥз?
- Татын Ижевскын, ми дорысь кыдёкын ӧвӧл, улэ классэнымы кивалтӥсьмы. Алигес пумиськыкумы вераз: ноку но, пе, ӧй малпалля, артист луод шуыса, быгатонлыкъёсыд но, пе, нокыӵе ӧй вал кадь. Мон ведь туж востэм, чалмыт вал. Урокын верамме кылон понна дышетӥсьёс парта дорам лыктылӥзы. Но одӥг пол эшеным художественной самодеятельносте пыриськи ик. Индийской эктон дасямы, со - пиосмурт, мон - нылмурт. Костюм вуримы. Аслам кырӟаме улсын ик эктӥсько. Нош мар кырӟасько, ачим но уг тодӥськы: мар кыл улам сюре, сое ик верасько, гурез индийской. Номермес адӟыса, дышетӥсьёс шуизы: Завьяловое, пе, мыноды. Кышкаменым уйёсме уг изиськы ни: нош юазы ке, мар мон кырӟасько шуыса? Ӧй мыны со фестивале. Тышкаськизы ик бен: тон, пе, пионер ук. 6-тӥ яке 7-тӥ классын соку дышетскисько вал. Шабердыос али но тодазы ваё на со номермы сярысь.
9-тӥ-10-тӥ классэз мон йылпумъяй ни Люк школаын. Интернатын улыкум, куарае но потӥз, асме сэзьгес возьыны кутски. Уг тодӥськы вераны, мар луиз отын монэн. Дышетскыны но умойгес кутски.
- Артист луон сярысь малпаськылӥды-а?
- Ӧй. 10-тӥ классэз йылпумъясько ни, нош кин луоно - уг тодӥськы. Ӵыжы-выжыосы ӵекто: агрономе яке бухгалтере, пе, дышетскы, собере гуртэ ик ужаны бертод. Нош мынам агроном но, бухгалтер но луэме уг поты. Поваре но дышетскыны ӵектылӥзы. Мар мыным кулэ - уг тодӥськы. Но туж яратӥсько вал суреданы, пӧртэм этюдъёс лэсьтыны. Аттестат басьтон нуналэ газетысь ялон адӟи: Удмурт драмтеатр но Мунё театр удмурт нылъёсты но пиосты Свердловскысь театральной училищее дышетскыны келяло. Мар со драмтеатр - тодӥсько. Мунё театрлэн ялонысьтыз «этюд» кыл син шорам йӧтӥз. Малпасько, ветло ай татчы. Крезьгурез валамме эскеризы, пудо-живот сямен кесяськыны косӥзы, шоканы быгатэмме чаклазы на. Собере шуизы, лыктод, пе, экзаменъёсы. Гуртэ бертӥ но мамаелы шуисько: Мунё театре ӧтё, эскерозы эктыны, кырӟаны быгатэмме, кылбур, басня, проза дышетоно на. Библиотекае ветлыса, мар но со аслым шедьтӥ, пластинкая «Сапожки русские» кырӟанэз дышетӥ, пумен эктӥсько. Экзаменъёсын ваньзэ сое лэсьтӥ, пуныез но, коӵышез но возьматӥ, кунян но сюдӥ. Шуо: ми, пе, ӟучъёс, удмурт сямен ум валаське, «Лымы тӧдьыез» валэктыса кырӟа на. Киосыным мар ке со возьматъяй. Ваньмыз ортчем бере Азалия Всеволодовна Блинова потӥз но мон шоры возьматыса шуэ: тӥ, пе, Стеклова, кыле. Эшшо одӥгзэ нылэз собеседование кыльыны косӥз на. Ох, воже потӥз ук: второгодникез сямен кельто, шонерак вералэ вал ӧй пыры шуыса!
Кылеммы бере шуэ: мукет дыръя ӝыт 5 часлы, пе, лыктоно. Пумитаз йыркуро вазисько: бертыны уг вутты, автобус кошкоз. Ярам, пе, нуназе котыр лыктод. Бертыса мамаелы ӝожтӥськисько: малы ке нош ик ӧтизы, нош этюдъёсме уг куро. Берло гинэ йырам шуккиз: мон 2-тӥ туре потӥ ук! Шумпотэменым отӥяз мар возьматэмме но уг тодӥськы ни. Культпросветучилищее ӧтчазы на экзаменэ. Собере ини шуизы: мыноды, пе, Свердловске дышетскыны, лобӟоды самолётэн.
- Мӧзмыт вал-а?
- Йырам туж ӵем лыктылӥз малпан: кошконо, та мынам удысэ ӧвӧл. Ваньмылэн ик бен сыӵе мылкыдъёсмы вал. Ваньмы ик школа бере вуэмын училищее, нокытчы потамын ӧвӧл. Лыктэммы бере ӝыны ар пала улӥмы Шарташ нимо шутэтскон интыысь кык этажъем пу юртын. Артэ ик тымет, туж ӝужытэсь пужымъёс. Училищеозь ветлыны туж кыдёкын вал, тэлетӥ потыны кӧшкемано. Вазь ӵукна пеймыт на, ӝытазе нош ик пеймытэн бертӥськом. Ваньмы ӵош ветлӥм. Соин но, лэся, ми ог-огенымы туж эшъяським, али но ог-огмытэк улыны ум быгатӥське. Мунё театрын ужаммылы туэ тани 25 ар тырмиз.
- Юбилейдэс ӝутскем мылкыдын пумитады-а?
- Малпанъёсмы но осконъёсмы бадӟымесьгес вал, но соос ӧз быдэсме. Одӥгезлы мон шумпотӥсько: ужам аръёсыя туэ пенсие потӥ. Нош удмурт студиысь эшъёсылы, егит пенсионер луытозь, одӥг но ӝыны ар пала ужано на. Кылем арын мыным сётӥзы Удмурт Республикаысь культура удысысь дано ужась ним. Пенсионной книжка сётыкузы сямен, мон соку сокем зол шум ӧй поты.
- Малы?
- Сыӵе книжкаен ватсаса уксё басьтод, городысь транспортын но дунтэмен ветлыны луонлык вань. Собере 55 арес тырмытозь кыдёкын ай, ужлэсь тонэ нокин уг алы. Азьланезлы малпанъёс но бадӟымесь. Мынам туж дасяме потэ провинциысь актрисалэсь улонзэ возьматӥсь моноспектакль. Сюлэм висе палэнысь гуртъёсын улӥсь пиналъёс понна.
Театре лыктэммы бере араз куинь пол толэзен-толэзен шаерысьтымы гуртъёстӥ ветлӥськом вал. Али но потасалмы - уксё ӧвӧл. Тани туэ Нылпиосты утён нуналлы «Жил-был цыплёнок» спектакленымы Вавоже потамы. Культура юртэ автобусъёсын вайиллям вань гуртъёсысь нылпиосты. Пиналъёс понна шумпотыса, сюлэм ик пачылаз. Кин тодэ, оло, азьланяз кин ке но соос пӧлысь Мунё театрамы ужаны лыктоз.
- Татьяна Ивановна, мар тӥледлы юрттэ улонысьтыды шуг-секытъёсты вормыны?
- Та улонын мыным туж юртто Настя но Ирина нылъёсы. Куамын вить арескам мон огнам кыли, Миша картэ секыт висьыса кулӥз. Нылъёсмы соку школаын дышетско вал ай. Соосын ог-огмес ми туж умой валаськом. Ноку но мултэссэ уз куре, кильтро дӥськутъёс сьӧры уз уйиське. Уксёлэсь дунзэ соос тодо. Секыт югдуре шедеммы бере, мамае доры бертыса, губи, емыш бичаса вузаськом вал.
Табере нылъёсы бадӟымесь ни, со секыт югдурысь но потыны быгатӥм. Бадӟымез ужа ни, вуриське, керттӥське, пужыятске, но мылкыдыз вань Ижысь механикая кун университетэ пырыны. Пичиез но отын дышетске, папазылэсь адӟем карыса, математикаен эшласькыны малпазы. Нылъёсы - мынам нырысетӥ учкисьёсы но. Концерт номеръёсме мон нырысь ик соослы возьматӥсько. Репетициосы но бен гуртын ик ортчо. Настяе мунёосылы дӥськутъёс но вурыны юрттэ. Нош Выль аре мон нылъёсылы но соослэн эшъёссылы концерт номеръёсме возьматӥсько. Эшъёссы вожъяськыса шуо, пе: тӥляд мамады сыӵе классной!
- Бызьыны уг косо-а?
- Косо. Пичиез огдыре газетъёсысь ялонъёсты но учкылэ вал. Тодматскон клубе но ветлыны косо. Али соос асьсэос бызёно нылъёс ни. Нош пичигес дыръязы улонме кинэн ке огазеяны ӧй дӥсьты, нылъёсы жаль потӥзы.
- Нош Масьяровез кытысь шедьтӥды вал? Удмуртлы со чик но уг кельшы.
- Студент дыръям но, школаын дышетскыкум но ужалляй Шабердыысь столовойын, ӵыжы-выжымы Етим Маня бордын. Нош Миша со вакытэ ужаз Ижысь механикая заводын. Колхозамы юрттӥськыны ыстӥллям но, столовойысен со монэ синйылтэм. Нырысь ик лыктэ но самой берло кошке. Весь йӧл куре вал. Нош вераськыны ӧз дӥсьты. Кыкетӥ толэзьзэ ужакуз ини, келяны куриськиз, мон соку кенер вылтӥ пегӟыса кошки. Ӝытазе укно улам вуиз. Озьы пумиськылыны кутским. Котькуд аре быдэс гужемзэ ужаны вуылӥз. Студент дыръям ик бызьыны косэ вал. Пумитаз шуисько: мон актриса ук, кызьы тыныд бызём? Пельпумтӥм кутыса, Миша монэ зуркак кариз но шуэ: мар, пе, отын сыӵеез? Но дышетсконме возьманы соглаш луиз ик. Со ужа вал бере, коньдонэн но юрттӥз.
Мунё театрын ужакум ини семья кылдытоно кариським. Гожтӥськыса ӧм вуттэ - керетӥм. Кӧто дыръя керӟег луоно, секыт кыл вераны шедьтӥ. Огнам кыли ке но, нылпиме вайи. Настяелы укмыс толэзь дыръя ужаны потӥ. Сое утялтӥзы мамаен папа, но мон котькуд нунал гуртэ бертылӥ. Кык но ӝыны арес тырмемез бере Вавоже гастроле потай, туспуктэмзэ возьматыны ӟуч песянаез доры Какможе кожай. Кӧня ке улыса, Миша жингыртэ: нылынымы ӵош лыкты, пе, Тюмене. Ӧй мыны, ачиз вуиз. Настяе сое адӟиз гинэ, «папа» шуыса пумитаз бызиз. Весь возьматӥсько вал туспуктэмзэ: та папаед. Нокытчы ӧз кошкы ни дорысьтымы, соку ик гожтӥським. Ачиз но, анай-атайёсыз но монэ ноку ӧз пыкылэ, удмурт шуыса.
- Мунёослы сяна, малы синмаськиськоды на?
- Туж кельшо сюй посудаос. Огвакытэ соосты бичай. Собере синмаськи хохломалы. Нош али кутам арбериос дортӥ ортчеме уг луы.
Источник:
Масьярова Т. И. Пӧртэм ымныр, одӥг сюлэм / Т. И. Масьярова ; записала Лия Малых // Удмурт дунне. - 2006. - 16 июня. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
