Максимов Андрей Робертович
Кыкетӥ улон кузьмась
Удмурт Республикая Югдурез утёнъя министерствоын тыршисьёс пӧлысь 30 муртлэн валтӥсь ужзы — шаермылэсь данзэ утён дуннеысь, Европаысь но Россиысь ӵошатсконъёсын. Асьме спортсменъёс 2012-тӥ арзэс бадӟым вормонэн йылпумъязы. Россиысь кыкетӥ группае пырись улосъёсысь полицейскойёс пӧлын нырысетӥ инты басьтӥзы. Шумпотоно, спортсменъёс пӧлысь ӝыныез пала — удмуртъёс. Соос пӧлын ик Андрей Максимов. Ачиз но бызьылэ, мукетъёслы но юрттӥське тренер чот. Аслаз но дышетэм спортсменъёсызлэн вормонъёссы понна Андрей Робертович пусъемын «За заслуги перед Отечеством» орденлэн кыкетӥ степенё медаленыз.
— Шарканысь спортсменъёс трос аръёс ӵоже пӧртэм ӵошатсконъёсын нырысетӥ интыосты возё, — веранзэ мытэ Андрей Максимов. — Одӥг вакытэгес бызьылӥ Владимир Никитинэн, Олег Перевозчиковен. Нырысетӥез, Олимпиадае вуылыса, азвесь медален бертӥз, нош кыкетӥез та вакытэ Россиысь куасэн бызьылӥсь воргоронъёслэн сборноенызы кивалтэ. Нош ачим сярысь ке верано, туж жалясько, бадӟым спортэ укыр бер вуэмысьтым.
- Быдэ вуыса гинэ шат?
— 6-тӥ классын «Пионерская правда» газетлэн призэз понна ӵошатсконын нырысетӥ инты басьтӥ, отӥяз но вормонъёсы вал. Со аре ик монэ синйылтӥз Шарканысь тренер Юрий Романович Шкляев. Дорамы ветлӥз, анаеным вераськиз но Шарканэ дышетскыны ӧтиз.
- Черкогуртлэсь кыдёкын улӥды-а?
— Сокем ӧм, вордски но будӥ Кион-Липето гуртын. Гуртамы 14 оло 15 корка вал. 7-тӥ классозь Кыква школаын дышетски, нуналлы быдэ 5 иськемез солань-талань ветлӥмы. Толалтэзэ ваньмы куас вылэ султылӥмы. Гуртмы пичи вал ке но, школаын дышетскись пиналъёс котькуд семьяын куинь яке солэсь но трос люкаськылӥзы. Соин но, лэся, районын ортчись ӵошатсконъёсы школалэсь данзэ утьыны быдэс гуртэн ветлӥмы. Жаляса верано, шулдыр гуртмы 1980-тӥ аръёсы быриз. Отӥяз улыны выжимы Коньык гуртэ. Школае ветлон сюресэ коть Кыквае, коть Шарканэ одӥг кузьдагес люкаськиз — ог 5 иськем. Тренер ӧтем бере, 8-тӥ классысен, Шарканэ вамыштоно кариськи.
- Семьяяды шат куасэн бызьылӥсьёсты вал?
— Бен, агай-апайёсылэсь адӟем карыса ик, куас вылэ султӥ. Пичи дыръям ӟеч куас ӧз донгиськылы, тӥяськем куасъёссэс тупатъяса мыным сётъязы. Тужгес но синмаськылӥ Николай Батаногов агаелы. Арлыдыз шоры учкытэк, туннэ но куасэн бызьылэ, шаерамы ортчылӥсь Гурт шудонъёсы пыриськылыса, вормонъёс басьтэ. Нош Антонида апае быземез бере но спортсэ ӧз аналты, быдэс семьязэ куас вылэ султытӥз. Кузпалэныз Анатолий Хохряковен ӵош вить пинал будэтӥзы, трос аръёс ӵоже Гурт шудонъёсы пыриськылӥзы. Николай но Григорий пиоссы Россиысь куасэн бызьылӥсьёслэн сборноязы шедемын, шумпотоно, та нуналъёсы Гришамы мастерлэсь куронзэ быдэстӥз. Мукетъёсыз агай-апайёссы но спортэн эшъясько вал, но быдэ вуыса, бызьылонзэс аналтӥзы.
Семьямы сярысь ке верано, Екатерина Митрофановна Батаногова анаймы милемыз — куать нылпиез — огназ будэтӥз. Агайёсыным фамилимы пӧртэм ке но, ог-огмес ноку ӧм ултӥялэ. Мон витетӥез пинал луисько. Анаймылэн чиданлыкезлы паймисько, данъяськисько соин, секыт улонэз ортчиз ке но, одӥг пол но милемыз куаретэмез ӧвӧл. Бадӟым агаелы 7 арес, нош ньылетӥезлы 2 но ӝыны толэзь дыръя кузпалыз кулэм. 26 аресъем кышномурт суй-пыдзэ ӧз юскы, нош кӧня ке ар ортчыса, гуртысьтызы ик воргоронлы синмаськем. Дӥсьтӥсь кышномурт эшшо кык пинал вордӥз, но атаенымы туннэ ке но ӧз кузпалъяське. Дорамы юрттӥськыны вуылӥз, нош улыны лыктыны ӧз дӥсьты-а, мар-а. Гуртмы бырем бере атаймы Шарканэ улыны кошкиз, милемыз но ӧте вылэм дораз, нош анаймы Коньык гуртэзлэсь ӧз ӵыды. Кышказ, лэся, пересьёсмес огназэс кельтыны. Митрофан дедмы бордамы улӥз, ньыль оже пыриськемын, солэн кылыз котькинлы закон выллем вал.
- Спортэз гажась нылпиос школазы бере ваньзы сямен спортфаке дышетскыны пыро…
— Соиз зэм, мон но Удмурт кун университетысь мугорез кыдатон культурая но спортъя факультетэ йыгаськылӥ, ӝыны баллэ ӧз тырмы. Дышетскыны азьтэмгес вал уго (серекъя — авт.). Ма карыны паймемысьтым, Ижысь механикая заводэ ужаны интыяськи. Отысен спортъя «Металлист» коллективе ветлыны кутски, пӧртэм ӵошатсконъёсы пыриськылӥ. Ас вакытаз татын ик мугорзэ кыдатӥз мукетыз шаркан пи — Владимир Никитин. Соин ӵош Олег Попов тренер дорын кужыммес кыдатӥмы, кыкнамы ик будӥмы.
Тужгес но бурдъяськылӥ Володяен ӵош соревнованиосы ветлыкумы. Со мыным юрттылӥз инвентарь ласянь, аслэсьтыз куасъёссэ бызьылыны сётылӥз. Лыдпусъёсы умояны кутскем бере Удмуртилэн сборнояз кутӥзы. Юниор дыръям ик воргоронъёс пӧлын вормонъёс басьтылӥ. Заводын куинь ар ужаме бере (озьы шуыны луоз ке, угось туж ӵем ӵошатсконъёсы ветлӥ), 1985-тӥ арын, армие мынӥ. Службаме Кировын спортротаын ортчытӥ.
Кык ар ортчем бере службаме контракт амалъя азинтӥ. Вить арзэ спортъя «Динамо» клуб понна бызьылӥ. Ӵошатсконъёс вискын Чайковский городысь физкультурая институтэ дышетскыны пыри вал. Пӧртэм интыосын ужаменым валче дышетсконме но пӧртэм интыосын ортчытоно луиз. Чайковский, Волгоград, Ижевск но Набережные Челны городъёсы вуылӥ. «Динамо» клублэн ёзъёсыз пӧлысь со вакытэ тужгес кужмо спортсменъёс возиськизы Курган но Москва городъёсын. Монэ но отчы улыны ӧтьылӥзы. Вордскем палъёслэсь мӧзмон Удмуртие ик вуттӥз. Вылаз ик 1990-тӥ аръёсы ваньмыз куашказ, ачим но шальтрай.
- ???
— Улонам ваньмыз радъяськемын ни вал, шуыны луоз, спортын вормонъёсы лыдъяса быдтонтэм, службае мынэ… Ӵапак со вакытэ ӵужектонэн висьыны уси. Эмъясьёс бызьылон сярысь вунэтыны косӥзы. Ар но ӝыны ортчыса, куасъёс вылэ султӥ. Кыкетӥ сезоназ фамилие нош ик спортсменъёс пӧлын чузъяськыны кутскиз. Уже интыяськи Ижысь 4 номеро тылпу кысонъя часте. Азьвыл аръёсы Югдурез утёнъя министерстволэн пӧртэм ёзъёсаз спортсменъёсты ньӧмыз понна уже интыяллязы ке, тылпу кысон удысын озьы ӧй вал. Ньыль ар отын тыршеме кужмогес луыны дышетӥз.
Ужан вискам мугорме кыдатӥ, нош ик Удмуртиысь куасэн бызьылӥсьёслэн командаязы шеди. Спортын вормонъёс басьтэмме шӧдыса, мукет интые ужаны ӧтьылӥзы, бӧрысь мургес выжыяськи ведомствое пырисьтэм охранае. Та вакытэ бадӟым кивалтӥсьёс дорозь но «будӥ» (серекъя — авт.). Куд-ог дыръя Пенсиосъя фондын, Правительствоын я Президентлэн резиденцияз ужасько, ӵемгес сылӥсько Кун Кенешын.
- Зэм ик-а, Кун Кенеше лыктӥсьёсын удмурт кылын но вераськиськоды?
— Депутатъёслэсь удмурт луэмзэс ке тодӥськомы, анай кылынымы вазьылӥськомы. Кемалась ик ӧвӧл Кун Кенешлэн депутатъёсыз выльдӥськизы, али ваньзэс тодманы тыршиськомы. Ӵем дыръя дӥнямы вуыло гуртысь лыктэмъёс. Юрттэт курыса вазиськисьёс пӧлын тросгес луо арлыдоос. Соослы рос-прос валэктӥсь ӧвӧлэн, адямиос, котькыӵе кивалтӥсь доры пырыса, кӧтӝожзэс вераны дась. Пайдалыкез мед луоз шуыса, шонер интые мед вазиськозы кадь потэ. Гуртысь лыктэмзэс валаса, удмурт сямен вераськисько, быгатэмея визь-кенеш сётӥсько, соиз я таиз кивалтӥсь доры но жингыртыны юрттӥсько. Удмурт сямен вераськемелы паймыса, лэся, адямиослэн урод мылкыдзы ик небӟе.
- Нош ньӧмыз понна ужась полицейскойёс шоры эшъёссы кызьы учко?
— Ма ватонэз, туала вакытэ Россиысь но Удмуртиысь кужмо спортсменъёс ваньзы сямен МВД-лэн ёзъёсаз ужасьёс луо. Туннэ нуналлы Удмурт Республиякая МВД-лэн сборнояз пырисьёс пӧлысь 30-эз — спортсменъёс. Соос огъя ужлэсь мозмытэмын, нош Россилэн сборнояз кутэмъёс вордскем палъёсазы ик шер вуыло. Соос понна мукет полицейскойёслы кык поллы тросгес ужано луэ. Спортсменъёсты но валаны луэ, соос тэк уг пуко, вылӥ результатъёс возьматӥсьтэмъёссэ соку ик мукет уже выжто. Удмуртилэн сборнояз кутэмъёс сокем трос уг потало сборъёсы, ӵошатсконъёсыгес гинэ ветло, соин ик быгатэммыя ужан интыямы вуылыны тыршиськомы. Удмуртиысь МВД-лэн министрез но ми азе бадӟым куронъёс пуктэ: МВД-лэн котькуд ӵошатсконъёсаз пыриськыса, вылӥ лыдпус возьматоно но ӵош ужась эшъёсмылы кулэ дыръяз юрттэт сётоно.
- Туэ февраль толэзе Удмуртиын нырысьсэ ортчоз Россиысь МВД-лэн тол чемпионатэз, та ужрадлы дасяськиськоды ни-а?
— Тол ӵошатсконъёс — мынам удысэ. Асьме дорын ортчись ӵошатсконлы кык поллы золгес дасяськоно луэ. Та вакытэ ужан интые — спортзал но куас сюресъёс. Нуналлы быдэ тренировкаосы потаськомы. Спортсменлэн ужез сыӵе: лымыя коть зоре — бызьылоно. Вылаз ик министрмы Александр Первухин шуэ: нырысетӥ инты басьтыны капчи, секытгес сое утьыны. Удмуртиысь спортсменъёс-полицейскойёс азе бадӟым ужпум пуктэмын: нырысетӥ интылэсь улӥе лэзькыны уг яра.
- Тӥ Совето Союзысь спортсменъёс пӧлын вылӥ азинсконъёс басьтылэмын, нош Олимп гурезёзь ӝутскыны кылдымтэысь, уд жаляське-а?
— Шумпотӥсько, 1985-тӥ арын Италиын ортчем калыккуспо ӵошатсконын 3-тӥ инты басьтӥ, нош мукет стартъёсын — 5-тӥ но 8-тӥ интыос. Нош тужгес бадӟым вормонэ — 1989-тӥ арын дуннеысь полицейскойёслэн ӵошатсконазы медальёс басьтэме. Та ужрадэз Олимпиадаен ӵошатыны луоз, организациез ласянь ваньмыз выжыкылын выллем вал. «Динамиада» вожвылъяськонысь зарни но туй медальёсын бертӥ. Олимп гурезе тубыны ӧй быгаты шуыса, пичи но уг куректӥськы, со понна мынэсьтым малпанъёсме быдэстӥз, шуыны луоз, дышетэм спортсменэ Владимир Кононов. 2010-тӥ арын Ванкуверын ортчем Паралимпиадаын туй медаль басьтӥз.
- Иське, шаерысьтымы инвалид спортсменъёсын но ужаськоды?
— Удмуртиын параспорт азинскыны кутскем бере Виктор Кузнецов, али со кыл кутэ ни та удыс понна, куасэн бызьылӥсьёслы тренер утчаз. Ужысьтызы но эркынэн мед лэзьысалзы, ачиз но кужмо спортсмен, пе, мед луысал. Пӧртэм тренеръёсын вераськыса, 2009-тӥ арын мон вылэ вуизы. Потэ вылэм аслам но Паралимпиадае ветлэме, кин тодэ, оло, Сочие вуылыны кылдоз. Синмаськисько Владимир Кононов кадь спортсменъёслы. Шумпотӥсько, нырысь мынэмаз ик медаль дорозь сузьтӥськыны быгатӥз.
Мынам малпамея, 2014-тӥ арын Сочиын ортчоно Паралимпиадае одно ик пыриськыны кулэ мукетыз дышетэм спортсменэ — Алнашысь Владислав Лекомцев. Егит спортсменлэн мылкыдыз дурыныз пӧзе. Ӧжытак буйгатытэк уг луы, кык-куинь кеч сьӧры уйиськонъяз одӥгзэ но кутытэк кыльыны быгатоз. Одӥг ар куспын вань кужымез быдтоно ӧвӧл, уката ик инвалидъёслы.
Шумпотӥсько, та спортсменъёс шоры учкыса, шаерысьтымы мукет инвалидъёс но интыысьтызы вырӟизы шуыса. Ёросъёсысь тренеръёс но спортэн эшъяськыны мылкыд карисьёсты синйылто. Инвалидъёслы спорт кыкетӥ улон кузьма.
Куасэн бызьылонъя секциям али куинь пиос ветлӥзы. Солэсь троссэ тренировать карыны шуг, вормонъёс дорозь сузьтӥськыны ум быгатэ. Вотка ёросысь Черновское каргуртысь 14 аресъем Михаил Тукмачёвлэн но Ижысь 13 аресъем Константин Котовлэн быгатонлыкъёссы шӧдӥсько ни, Костя конькиен но умой нискыла. Та пиналъёс бадӟым спортын нырысьсэ асьсэлэсь кужымзэс эскерозы туэ толалтэ Ижын ортчоно Россиысь инвалид спортсменъёслэн нырысетӥ тол спартакиадаязы. Арлыдзыя ӧжытак егитэсьгес ке но, палэнысь эшъёссы пӧлын но асьсэлэсь быгатонлыкъёссэс мед волятозы.
Куинетӥ спортсменэ Можга ёросысь вал. Миша но Костя вордскем дырысенызы инвалид луо ке, таиз 2-3 арес дыръяз сӧсыр кылемын, вирсэраз укол пуктыкузы, эмъясьёс янгышамен. Со дырысен ог дасо аръёс ортчиз. Пияш нырысетӥ вамышъёс лэсьтыны ӧдъяз бадӟым спортын. Нуналлы быдэ мугорзэ кыдатэмез юрттӥз тазалыксэ ӧжытак юнматыны. Озьы ке но таза пиналъёсын артэ пуктыны вазь на. Бадӟым ӵошатсконэ потыны дась луиз гинэ но, пияшлэсь инвалидностьсэ куштӥзы. Озьы тӥни, улонын котьма луэ.
Шаерысьтымы параспортэз азинтонлы тросгес саклык висъяны кутскемын шуиськомы ке но, ёросъёсын улӥсь инвалидъёс гуртсылэсь палэнэ потыны уг дӥсьто на. Коляскаен ветлӥсьёс понна пандусъёс тырмыт ӧвӧл. Спортэн эшъяськыны мылкыдзы карись пиналъёсты котыр ласянь бурдъяны кулэ, нош куд-ог дыръя анай-атайёслэн кыре-буре потаны луонлыксы уг тырмы яке моӵсы уг сузьы.
- Инвалид спортсменъёсын я огшоры пиналъёсын ужаны капчигес?
— Городысь спортъя нылпи школаын куинь толэзь сяна ужаны ӧз кылды. Спортъя секцие лыктэмъёс пӧлын азьтэмъёсыз но шедизы. Валамон, сыӵеосыз дорамы кема ӧз возиськылэ. Нош инвалидъёслэн улон шоры учконзы мукетгес, соос валало кытчы вамыштэмзэс. Куинь мурт понна нимысьтыз сборъёс ортчыло. Каникулъёссы дыръя Г. Кулаковалэн куасэн бызьылонъя спорткомплексаз мугор кыдато, сӥзьыл бызьыло роликъёсын, толалтэ — куасэн. Инвалид нылпиослэн, огшоры пиналъёсын ӵошатыса, чиданлыксы кык поллы бадӟымгес, шуысал. Азязы пуктэм ужзэс котьку быдэстозы: 2 час но бызьылозы, огкутскемен 20 иськем но ортчозы. Пыдъёсазы яраос кылдӥзы ке но, бызёнзэс куспетӥ уз куштэ.
- Андрей Робертович, нош улонын тӥ кыӵе адями? Огдышемен семьяяды но кивалтыны уд кутскиське-а?
— Доре вуыса, уж сярысь вунэтыны тыршисько. Насира кузпалы но югдурез утён удысын ужа. Ӵошатсконъёсы ветлон сямен ик ог-огенымы тодматскимы, кыкнамы но куасэн бызьылонъя спортъя мастеръёс луиськомы. Марсель пимы Санкт-Петербургысь одӥгаз университетын дышетске. Кузпалэным ӵош котькуд шутэтскон нуналъёсы куасэн бызьылыны потаськомы, пимы но пичи дыръяз сьӧрамы ветлылӥз.
- Гур котырын берганы усточи, пе, зэм ик-а?
— Анаймы огназ будэтӥз, апаймы но одӥг гинэ вал, соин ик пичиысен ик, котьма ужлы дышыса, будӥмы. Кызьы верай ни, пичи дыръям дорамы пересьёсмы улӥзы бере, соос котьма ужлы дышетӥзы, кулэ дыръяз индылӥзы но, быдэстэм ужмес но сак эскерылӥзы. Яратӥсько ӝикытлыкез. Уж борды басьтӥськемелэсь азьло ваньзэ рос-прос малпасько, котыр ласянь чакласькеме бере гинэ тӥрлык борды кутскисько. Уг ваты, пичиысен ик сиён пӧзьтыны, вуриськыны дышетски. Суткаен ужасько бере, дорын пукыны дыры кыле. Сыӵе дыръя ужысь бертӥсь кузпалме котьку но сиёнэн пумитасько.
Яратӥсько на пӧйшураны. Эшъёсын ӵош кариськыса ӵемгес, Шаркан сикъёсы ветлӥськомы, куд-ог дыръя Грак палъёсы но вуылыны кылдэ. Удалтыкуз кырпарсь, койык, гондыр погыртылӥськомы, буш киын но бертылон учыръёс луо. Азьвыл аръёсы шаерамы ортчытъяло вал пӧйшуранъя биатлон. Котькуд ӵошатсконэз чидатэк витьылӥ, вормонъёс басьтылэме но вань. Жаляса верано, берло куинь арзэ сое уг ортчытъяло ни.
Источник:
За предоставление материала выражаем огромную благодарность редакции газеты "Удмурт дунне"
