Украинцева Светлана Петровна
Сисьмем пень вылын но улон пӧзе
Светлана Украинцева инкуазь адями. 27 ар ӵоже ини со тырше Удмурт Республикаысь фаунаез утёнъя управлениын пӧйшуръёсты утёнъя но чакланъя ёзлэн кивалтӥсез луыса. Та дыр ӵоже кӧня иськемъёс ортчемын, пӧйшуръёсты, нюлэсэз эскерыса! Удыссэ валаса нуэмез понна Светлана Петровна пусъемын уно дипломъёсын но таукаронъёсын.
Та гинэ мар! Шаерамы пӧйшуранэз радъям сяна, Светлана Украинцева ӧръяськись мылкыдзэ-малпанъёссэ кисьтэ кылбур чуръёсаз. Туэ, зарни юбилеезлы сӥзьыса, солэн кие кутымон бичетэз потӥз.
— Кӧня асме тодӥсько, мылкыды весь кыклы люкиське: одӥг ласянь, калык пӧлын ветлэм-кенешем потэ, мукет ласянь — адямиослэсь ватскыса, потысал кадь инкуазе, кытын йыр пороме чебер суредлэсь но ческыт омырлэсь… Тэшкыли дырысеным яратылӥ ас поннам шур кузя поръяны. Кӧня пол калги меда Нӧднюкпочинка (Кияса ёрос — авт.) гуртмы вӧзтӥ ортчись Салья шурмы котыртӥ! Вулэсь-шурлэсь зынзэ мон кыдёкысен шӧдӥсько. Ижын но тани Карлуткамы вань — со кырсёмемын ни ке но, отысь кыстӥськись омырез мон кыдёкысен шӧдӥсько.
Тодӥсько на пичи дыръям инкуазь сярысь выжыкыл лыдӟемме. Отысь геройёс — нылпиос. Киязы сӥньыс шпулька кутыса, солэн пасез пыр котыр инкуазез чаклазы. Со бадӟыматӥсь пияла выллем, ваньзэ трос поллы уноятыса, возьматылӥз. Озьы пичи будосъёс, нымы-кибыос син куспын бадӟым макеослы пӧрмылӥзы. Туж тунсыко вал кузькукъёслэн (богомол) куспазы жугиськемзы сярысь лыдӟыны. Соос мыным адямиос кадь потыны кутскизы. Ачим но, шпулька кутыса, возь вылъёсты, нюлэсъёсты котыръяй. Инкуазьысь мае гинэ ӧй адӟы солэн пасез пыр!
Та вакытэн ик герӟаськемын кылбур дуннее нырысетӥ вамыш лэсьтэме. Тулыс вал со — котыр инкуазь улӟе. Мон 1-тӥ классын дышетскисько. Возь вылтӥ калгонъям сисьмем лӥял вылэ ӝими. Ӝуйыен шобырскемын ни со, тани-тани пень кадь пурӟоз-быроз. Нош вылтӥз кыӵе гинэ нымы-кибыос уг бызьыло! Кузьылиос, бӧчыос, кутъёс… Пень сисьме, нош со вылын — шунды шорын — улон пӧзе-азинске! Ӵапак талы ик сӥземын вал нырысетӥ удмурт кылбуре. Бӧрысь ӟуч кылын гожъяськыны ӧдъяй. Мон школаын дышетскон вакытэ угось анай кылэз дышетон рос-прос радъямын ӧй вал. Юрмалай школаын мон сое куинь ар гинэ дышетӥ.
- Инкуазе, нюлэскы потаны пичи дырысеныды ик уд кышкаське вал бере, озьыен, ерпечка кадь вал, дыр, сямды?
— Кышкасьтэм вал мон. Писпуос, кенеръёс йылысь ӧй ик васькалля. Али паймисько ини: ӝужыт писпуос вылысь усьылэме ӧвӧл, нош кенер йылысь одӥг пол «лобай» ик. Тазьы вал со. Анае мыным дэремъёс ачиз вурылӥз, но таяз радэ магазинысь льӧль дэрем басьтэм. Бускель кышно лыктӥз но шуэ: ма, та дэрем, пе, мынам внучкаелы но туж кельышлы луысал. Вазиське мыным: оло, пе, сётод?! Мон ваменъяськыса выль дэремме син куспын дӥсяй но чалякгес ураме потӥ. Чебер дӥсен ушъяськем потэ ук — вань эшъёсы мед адӟозы кадь. Озьы мон кенер йылэ кечырски. Ну бергасько отын, ваньзы мед вожъяськозы шуыса. Шӧдӥсько: уллань питрасько. Валаса но ӧй вутты: ӵыжак-выль дэременым кенер йылэ ошиськи, со ӵажырак! кесиськиз. Соку валай: кӧттырмостэм луыны уг яра.
Кыкетӥзэ таӵе валан лыктӥз ини бадӟым будэме, семья кылдытэме бере. Огпол губияны ветлӥ, 5 литр пала искалӝушгуби (сморчок) бичай. Дорам вуи гинэ но, агае куное ӧтиз, пельнянь, пе, сиёмы. Мар кароно — буш киын куное уд поты. Бичам губиме быдэс ведразэ ик нуоно ке, аслым уг кыльы ни кадь… Кутӥ но ӝыны ведразэ агаелы шуыса сумкаям понӥ, кылемзэ холодильнике интыяй. Куноысь бер вуи, кухняе ӧй ик пыра ни. Ӵукна холодильникме усьтӥсько но — отын быдэс ведра искалӝушгуби. Малпасько: йыры сураське ини. Тодам вайыны тыршисько: агае дорын куноын вал-а — вал, губи нуи-а солы — нуи. Но ведра быдэсак губиен тырмытэмын ук! Бӧрысь валатски ини: та губиос бичам бере но будо вылэм ай, холодильникын соослы туж ӟеч условиос кылдӥллям — мускыт, салкым.
Кӧберан мынам йырам ик ӧвӧл. Яратӥсько огнам нюлэскы ветлыны, пӧйшураны. Но улонам кык пол туж зол кышкаме вань ик. Но та кыкез ик учыр, инкуазен ӧвӧл, адямиосын герӟаськемын.
Нырысетӥез кемдӥз Москваын, «Лужники» стадионын. Отын вузаськон радъямын вал, шуба басьтыны мынӥ. Одӥгзэ кельшытӥ. Монэ ларёкъёс вискытӥ олокытчы нуизы — отын, пе, мертаны быгатоды. Оскыса ик сьӧразы мынӥ. Нош отын монэ нокыӵе но шуба уг возьма вылэм. Олокызьы но кышкатъяны кутскизы. Дуно шубалы люкам уксёе тыр искусственнойзэ сётыса лэзизы…
Кыкетӥез учыр тупаз Ижын. Со нуналэ ужысь вазьгес кошки. Ульчаын калык трос, но озьы ке но шӧдӥсько: бӧрсям кин ке но йыг-йыг вамышъя. Подъезд пала вуыса, мышласянь берытски но адӟисько: пилиськем ӟенеликлэсь нырзэ кияз кутыса, сьӧсь тусо воргорон дорам матэктэ. Подъездэ кызьы пыремме ӧй вала, нош со — сьӧрам! Ярам, площадкаын адямиос вал. Воргорон кышказ, лэся, соослэсь. Кӧня ке нунал ортчыса, солэсь туссэ адӟи телевизор пыр: ӝегатӥллям кышкыт йыртэмасез… Озьы тӥни: нюлэслэсь ӧвӧл, вӧзысьтыд адямиослэсь кышкалод вылэм…
- Пӧйшурасьлэн семьяяз будӥды-кыдады, дыр?
— Нэнэен дядяй улонысь кошкемын ини. Соин но, лэся, вордскем Кияса палъёсам ӵем уг вуылӥськы — сюлэмме мӧзмон басьтэ. Со интыосын герӟаськемын ук пичи дыры, тодэ ваёнъёсы. Иже вуисько но, со малпанъёс кык арня ӵоже йырысьтым уг кошкыло, ялан бергало-бергало…
Нэнэе — Васса Карповна Кибашева — пыриськемын Совето Союзысь егитъёслэн 1957-тӥ арын Москваын ортчем фестивалязы. Сое отчы ӧтиллям тылобурдо вордон удысысь усто специалистэз сямен. Анае угось йылпумъяз Асанысь техникумез, Вуж Сальяын тылобурдо вордон фабрикаын кивалтӥсь луыса тыршиз. Со пытсаськем бере кунян утялтӥз. Нэнэе пусъемын вал уно таукаронъёсын, гадьпусъёсын.
Дядяе — Пётр Никитьевич — зэмос коммунист, пропагандист-агитатор. Быдэс улонзэ трактористын тыршиз ке но, мылысь-кыдысь пыриськылӥз партия уже. Куд-ог дыръя йырме тӥясько: кытысь меда потэмын Кибашевъёслэн выжызы? Тодӥсько на ӵыжы-выжыосылэсь верамзэс. Дядяйлэн песянаез Татарстанысь Чекалда черкогуртысь вылэм. Вить нылпиен огназ кылем. Бызёно кариськем ньыль нылпиен огназ кылем воргоронлы — таиз ӟуч вылэм. Озьы соос Кияса палъёсы каръяськиллям. Выжыям кинэз гинэ ӧвӧл, дыр: бигерез но, ӟучез но, удмуртэз но…
Нэнэй но дядяй гуртын вордскизы бере, инкуазез яратӥзы. Кызьы сотэк?! Соослэн таӵе мылкыдзы мыным но лякиськиз. Соос война вакытэ вордскемын вал, будӥзы атайёстэк. Оло, соин но куспазы ӵемысь керетылӥзы. Но озьы ке но нэнэе но, дядяе но валало вал: семья — со кужым, сое утёно. Нэнэе улонысь вазьгес кошкиз, дядяй со бӧрсьы тямыс ар улӥз на. Кыкетӥзэ кышнояськыса но вуттӥз. Ярато вал сое нылкышноос. Вераськыны быгатӥсь, йыг-йыг.
- Озьыен, инкуазез яратон пичи дырысеныды ик сюлмады пыӵам бере, иське, шуг-секытъёс ӧз кылдэ улон сюрестэс быръёнэн?
— Татын но мылкыды кыклы люкиськиз. Одӥг ласянь, азьланьтэме потӥз творчествоме — кылбуранме. Со понна филология факультетэ вамыштоно. Мукет ласянь, малпай, кин гинэ кылбур уг пӧра меда! Кинлы соос кулэ? Но мылкыды сокем бадӟым вал: Удмурт кун университетысь ӟуч филология факультетэ пыроно кариськи. Ваньмыз радъяське вал кадь ини, «чукай». Юазы: кинъёс, пе, со опричникъёс? Мон куалектӥ, валэктон шедьтыны шуак ӧй быгаты. Ӧй пыры… Куд-ог дыръя жалян мылкыд кылдэ, малы меда филолог ӧй луы шуыса. Лыдӟиськон, выленыз тодматскон угось пичи дырысеным вирам пыӵамын. Асме буйгатӥсько: кытысь тодод меда, кызьы улонэд радъяськысал мукет удысын? Оло, отын тыныд мӧзмыт луысал?
Озьы мон интыяськи ӝыт курсъёсы: дышетски числоосын ужась станокъёсын ужаны. Ижысь механикая заводын Калашников автоматъёслы стволъёс лэсьтылӥмы. Татын но кышкасьтэм сямме возьматытэк ӧйлась. Городын будэм шаплы нылашъёс (соослэсь, эсьмаса, пиос но кышкало вал) огпол сэргы ӝиптӥзы. Ымам кужмысь сямен тамак донгыны туртто. Мон, нокыӵе кариськытэк, шуисько: тау, нылъёс, но мон фильтрензэ гинэ кыскисько. Йыг-йыг вамышен дорысьтызы кошки. Та учыр бӧрсьы бордам ӧз тэбине ни.
Одӥг ар тазьы ужаса, пыроно кариськи УдГУ-ысь биофаке. Физикаен экзамен сётыны нырысетӥ парта сьӧры пукси но йырме тӥясько: та факультетэ пыри ке, дышетӥсьын ужано луоз ук. Нылпиосты визьнодан удысын асме син азям пуктыны ӧй быгаты. Экзаменъёсты сётытэк ик, кутӥ но ишкалски чылкак мукет улосэ: Кировысь гурт удысъя институтысь охотоведениея факультетэ. Таӵе дышетсконниос Союзын кык интыын гинэ вал — Иркутскын но Кировын. Чик шугъяськытэк, отчы дышетскыны пыри. Группаямы кытысь гинэ егитъёс ӧй вал: Украинаысь, Таджикистанысь, Белоруссиысь, Грузиысь… Пиос пӧлын ми куинь нылъёс вал. Институтын соку ик комсомол огазеяськонэ, поэзияя кружоке пыриськыны ӧдъяй.
- Татын но асьтэды кышкасьтэмен возьматӥды, дыр?
— Охотоведъёс — пыдесъясь-кисьтэм-кылзӥськисьтэм адямиос. Мар малпамы — озьы ик лэсьтомы. Быдэс группамы сыӵе вал. Соин но, лэся, институтлэн ректореныз валамтэос кылдыны ӧдъязы. Ма, зэмзэ вераса, милям факультетмы солы мултэс йырвисён выллем вал: гурт удыс борды итэм маке. Оло, соин но ми азе чурытэсьгес куронъёс пуктылӥзы. Шуизы: общежитиын нокыӵе пӧйшуръёсты-пудоосты возьыны уг яра. Нош отын мурӝолын милям — ой-ой-ой! — кинмы но ӧй вал! Дрессировать кариськомы вал пуныосты, эсьмаса, ӵӧжъёсты но вордӥмы…
Группаысьтымы одӥгез пияш 1-тӥ Майлы сӥзем демонстрацие ӧз поты: анаез висьыны усем, дораз куриськиз. Со понна сое 3-тӥ курсысь отчислить карыны малпазы. Ми ӧм чидалэ, быдэс группаен забастовкае потӥмы. Эшмес утимы, солы дышетсконзэ азьланьтыны лэзизы. Но общежитиын улон интыосмес ваньмылы воштоно луиз. Озьы дышетӥсьёсмы сюлмаськиллям, нырысетӥ курсысь студентъёсын медам пумиськылэ, соослэсь йырзэс медам берыктэ но асьмеос кадь дӥсьтӥсь медам каре шуыса. Та учыр сярысь, эсьмаса, быдэс Союзысь студентъёслы чаклам «Студенческий меридиан» журналын гожъязы. Тӥни сыӵеесь вал ми — кызьы шуо, активной улон позициен. Группаысьтым эшъёсыным али ке но кусып возисько. Таня эше доры Финляндие но куное вуылӥ ни.
- Удмуртилэсь палэнын дышетскыса но, вордскем палъёсты бордазы кыскиллям — татчы ик берытскиды?
— Диплом утён азьын практикаме ортчи Карелиысь нюлэсъёсын. Кыр пӧйшуръёслэсь кытчы каръяськемзэс, лыдзэс чаклай. Ӵем поталляй пӧйшураны. Кутэм пӧйшуръёсылэсь кузэс вузаса, кӧня ке уксё но поттыны быгатылӥ. Институтын вал предметмы «Техника добычи». Та удысъя нодъяз туж тунсыко дышетӥсь — ми сое вакчияк «дядя Саша» нимаськомы вал. Лекцизэ лыдӟыкуз мукет факультетъёсысь но студентъёс люкаськылӥзы. Солэн верамъёсыз али ке но тодам — мадемзэ нокыӵе книгаосысь уд шедьты, ваньмыз ас вылаз эскеремын.
Зэмзэ вераса, пӧйшураны мон яратӥсько чылкак огнам. Киям пыӵал кутӥсько но нюлэскы кошкисько. Отын дырлэсь ортчемзэ уг ик валаськы ни. Мыло-кыдо пыриськисько шаерысьтымы нылкышно пӧйшурасьёслэн клубазы.
Ленинградын практикае йылпумъяськиз но Кирове берытски. 11-тӥ мае дипломме ути, арня ортчыса, сюан шудӥмы.
- Нюлэскытӥ ветлыса, туган туж ик уд шедьты, дыр…
— Ми Сергей Васильевиченым одӥг группаын дышетскимы. Кема дыр ӵоже сое адӟем ик ӧй карылы. Нош со тодаз возе на монэ нырысьсэ эктыны ӧтемзэ. Нош мон тазэ уг тодӥськы ни, синъёсы угось мукетыз борды чукамын вал ай. Сюлэмме ас палаз берыктыны турттыса, Сергей Васильевиче 4 ар ӵоже сьӧрам ветлӥз. Со Брянск улосысь. Тодам кылиз тани ма: Карелиын практикаын дыръям льӧмпу уг сяськаяськы вал на, Кирове сюан шудыны вуи но — отын пуштыр-пуштыр сяськаяське ни, сюан бӧрсьы картэным Брянске кошкимы но — льӧмпу кемалась тӧлӟем ини… Брянскен улонэ монэ зол герӟаз — кенэ но со палъёсысь. Сюанмы тупаз «кӧс закон» кузёяськон вакытэ. Люкам уксёенымы сое шудӥмы Кировысь тужгес дуно но шулдыр кафеын. Тодӥсько на: атае ымнырзэ кисыръяса ик пукиз — ма, мар сюан луоз та, шапык но курытсэ веръятэк?
Дышетсконмес йылпумъяса, кузпалэным ӵош ик ужаны интыяськимы Кизнерысь лесничествое. Сергей Васильевиче тыршиз егерь луыса, мыным оскизы ёросысь валтӥсь охотоведлэсь удыссэ. Нюлэсъёстӥ ветлыны, пӧйшуръёсты чакланы мыным секыт йӧтӥз ни соку — пинал возьмасько вал ни угось. Кузпалме армие басьтӥзы, огнам кыли. Декрет отпуске бӧрсьы монэ ужаны ӧтизы Госохотинспекцие. Отысь специалистъёсын угось кусып тупатӥ вал ини, Кировын дышетскыкум ик — практика ортчылӥ. Озьы быдэс семьяен улыны выжимы Иже. Бадӟымезлы Владислав пимылы 6 арес вал, милемлы улон инты висъязы. Ньыль ар ортчыса, вордскиз Василий пимы. Озьы тӥни шаерысьтымы охотуправлениын тыршисько ни 27 ар: татысь декрет отпускъёсы гинэ кошкылэме вань. Пиосмы но бырйизы кузпалыным мытэм удысмес. Бадӟымез йылпумъяз Ижысь гурт удысъя академиез, нюлэс хозяйствоысь инженер луиз. Пичиез пимы дышетске Удмурт кун университетысь географияя факультетлэн магистратураяз, тырше проектированиея одӥгаз огазеяськонын. Со ялан командировкаосын, кытчы гинэ ӧз вуылы ни! Кузпалы Сергей Васильевич «Удмуртохота» огазеяськонлэн Пичи Пурга ёросысь «Курчумский» ёзэныз кивалтэ. Нюлэскысь уг ик пыра, шуыны луоз. Мылкыд карисьёслы пӧйшуран радъя. Сюлмыз Брянск палъёсаз уг ик кыскы кадь. Туж капчиен дышиз Удмурт шаерлы. Аспалъёсаз кема уг чида. Татын сое гажало, ярато. Озьы ми семьяен, но ваньмы нимаз улӥськомы.
- Шаерамы макем ӟеч радъямын пӧйшуръёсты чаклан, утён?
— Котькуд ар чакласькомы пӧйшуръёслэсь лыдзэс. Со понна нимысьтыз маршрутъёс радъяськомы, нюлэскысь ум пыраське. Та нуналлы шаерамы 29 пӧртэм кыр пӧйшуръёс но 33 пӧртэм кыр тылобурдоос лыдъясько. Соосъя нимысьтыз реестр нуиськомы. Кыр пӧйшуръёслэсь лыдзэс чакласа ини решение кутӥськомы — кӧнязэ кутыны-ыбыны лэзёно. Тунсыко: пӧйшуръёс сярысь ивор утиське 75 ар ӵоже. Тани басьтом ӟичыез. Тодӥськомы: соос пыр шаерамы вӧлмыны быгатоз урмон висён. Соин ик соослы укыр аляны лэзёно ӧвӧл. 5 но ӝыны сюрс ӟичы — республикамы понна туж трос, соин лыдзэс 3 но ӝыны сюрс вылын возёно. Туж сак чакласькомы кионъёслэсь лыдзэс. Соос туж чаляк вӧлмо, тушмонъёссы угось асьме нюлэсъёсын ӧвӧл. Та нуналлы шаерамы 58 пала арлыдо кионъёс — уллёоссэс валтӥсьёс. Нялтас вераса, азьвыл аръёсы соос 225 пала лыдъяськизы. Та вакытэ лыдзэс 60 йыр вылын возьыны тыршиськомы, кылемзэ ыбылыны лэзиськомы. Шаерамы пӧйшурасьёс 22 сюрс пала. Туала куронъёсъя котькудзы пӧйшурасьлэсь удостоверенизэ басьтыны кулэ.
Источник:
За предоставление материала выражаем огромную благодарность редакции газеты "Удмурт дунне"
