Тексты песен обряда Быдӟым нунал

Акашка гуръёс

1. Армись но лыктэм, ой, Акашкаез

Арен но палэн ми возьмам, ай-кей!

Вить чиньыен пазьгем ӟизег узьым

Куатьтон гинэ куроен мед пушъёз, ай-кей!

Ой, милям но вордэм нылмы но пимы

Куатьтон гинэ куалалы мед йылоз, ай-кей!

Ӟачча (Старые Ятчи), Грахово ёрос

2. Ой, армись но лыктэм, ой,

Акашкаед, Арен гинэ палэн но ми возьмам.

Воргоронэд потоз, ой, бусые,

Валъёссэ но кыткылоз, ой, герые.

Гырылоз но аназэ, ой, сезьызэ кизёз.

Кизем гинэ анаэз вож вожектоз,

Котыр дунне бусыез, ой, шулдыртоз.

Вож-вож вожектоз возь вылын но турынэд.

Ӵуж-ӵуж усьтӥськоз италмас но сяськаед.

Котыр-котыр возь вылэз, ой, шулдыртоз.

Вань калыкъёс учкыны, ой, мынозы.

Мешер (Мещеряково), Грахово ёрос

3. Котырак султыса кырӟаломы,

Кизем юмы ву тулкым кадь мед удалтоз.

Кизем юмы ву тулкым кадь мед удалтоз,

Асьмелы октыны-бичаны, ой, мед кылдоз.

Вӧсяськем вӧсьёсмес кабыл ке но, ой, басьтылӥз,

Уз лу меда тазьы ик валче, ой, улэммы.

Уз лу меда валче, ой, улэммы,

Уз лу меда валче, ой, улэммы.

Шундыё куазьёсын нуналъёс туж шулдыр,

Улыны каньыл яратон туганъёсын.

Улын каньыл яратон туганъёсын,

Быдэсмын каньыл анаен атай вӧзын.

Анайды ке асьтэлэн, атайды ке асьтэлэн,

Кызьы ке каньыл, озьы но тӥ улэлэ.

Осто гинэ, Иньмаре, вылӥсь Иньмаре,

Талэсь гинэ бадӟымъёссэ мед сётылы(й).

Иньмысь гинэ гудыри гудыртылӥз ке,

Вал йырысь но серметьёс, ой, жингыртоз.

Тӥ туганэн ми туган огинэ ке луиськомы,

Зарниен азвесьёс жингыртыса, ой, уло.

Одӥгмес одӥгмы кур ке, ӝож ке ӧм каре,

Уз лу меда весь валче, ой, улэммы.

Тӥледын милемыз, милемын тӥледыз

Яратыса сётылэм но вылӥсь Иньмар.

Гидкуазь но шоръёсыз ӵужыса возелэ,

Азвесь зундэс куяса, ой, шудоме.

Милемлы винадэс сётыса улэлэ,

Милям гинэ сюлэмамы, ой, мед шудоз.

Ӝӧк сьӧры но пуксьылэм, ой, бере,

Уз лу меда ог ӟеч кылмес, ой, вераммы.

Котыр султэ, яратон, ой, бӧлякъёсмы,

Тау гинэ карыса, ми кошкомы.

Таулэ, таулэ сюдэмлы-сектамлы,

Талэсь гинэ бадӟымзэ шедьтыса, тӥ улэ.

Ойдолэ ми доры, ӟеч малпась туганэ,

Одӥг байлэсь ӟечъёссэ ум быдтэлэ.

Шайтангурт (Шайтаново), Алнаш ёрос

4. Вӧсям вӧсьёсмы кабыл ке луиз,

Уг лу меда весь валче улэммы.

Уг лу меда весь валче улэммы.

Валче гинэ уломы, капчи уломы,

Ум люкиське, туганэ, даурамы.

Ум люкиське, туганэ, даурамы.

Даурамы кылъёсмес ум но вералэ,

Вакыт ке но вуылӥз, люкиськом.

Вакыт ке но вуылӥз, люкиськом.

Гидкуазьёстэс ӵужыса, ой, возелэ,

Азвесь гинэ зундэсъёс мед шудоз.

Азвесь гинэ зундэсъёс мед шудоз.

Валъёсмылы сезьыдэс сётыса улэлэ,

Валъёсмылэн сюлэмазы мед шудоз.

Валъёсмылэн сюлэмазы мед шудоз.

Милемлы но винадэс сётыса улэлэ,

Милям гинэ сюлэмамы мед шудоз.

Милям гинэ сюлэмамы мед шудоз.

Улом али, туганъёсы, вылом али,

Ум улэлэ музъемъёс сисьмытозь.

Ум улэлэ музъемъёс сисьмытозь.

Музъемъёс но уз сисьмы, асьмеос сисьмомы,

Вылъёсамы бадьёс но будылоз.

Вылъёсамы бадьёс но будылоз.

Бадьпу гинэ сяськаос мамык гинэ,

Та дуннеын асьмеос куно гинэ.

Та дуннеын асьмеос куно гинэ.

Варклет-Бодья, Агрыз ёрос, Татарстан

5. Осто гинэ, Инмаре, Бадӟым Инмаре,

Вӧсям гинэ вӧсьёсмы кабыл медло.

Вӧсям гинэ вӧсьёсмы кабыл ке лусал,

Тау, Инмаре, шуысал, воршудэ.

Вай сиём но вай юом, медло шулдыр шуэлэ,

Арлы огпол лыктылэм Быдӟымнуналмы.

Чик-чик гинэ карылоз ӵуж уӵыпиосыд

Карезлы но потылон вакытаз.

Гур-гур гинэ карылоз воргоронъёсыд

Суредлы но потылон вакытаз.

Ягул, Можга ёрос.

Литература

Видео:

1. Акашка гур - в исполнении фольклорного коллектива «Гербер» д. Синяр-Бодья Кизнеского района Удмуртской Республики

2. Обрядовые песни в исполнении ансамбля «Инвожо» Ново-Канисарского сельского дома культуры Кукморского района Республики Татарстан