Конюхова Августа Васильевна
Даурлэн визыламез
Удмурт АССР-ысь школалэн дано дышетӥсезлы Августа Васильевна Конюховалы ӵуказе тырме сю арес. Быдэс даур! «Удмуртъёслы ужасьёс», дано адямиос пӧлысь нокинлы таӵе шуд ӧз усьы на. Совето культуралэн ӝужан-пушъён вакытысеныз со азьпал радын, трос удысын тужгес адӟем карымон нылкышно. Нырысь ик А. Конюхова умой-умой эскериз удмурт кыллэсь грамматика ласянь радлыксэ. Быдӟым ожлэсь азьло ик гожтӥз вужмонлы сётскисьтэм учебникъёссэ. Соосъя туннэ нуналозь дышетскизы ни миллионлэсь уно удмурт нылпиос.
Августа Конюхова – нырысетӥез, кин сокем мур но паськыт эскериз Идна батыр выжыысь Будинъёслэсь пушъетсэс. Нырысетӥосыз пӧлысь, кин гожтӥз тодэ ваёнъёсын романлы тупась книга. Нырысетӥосыз радын, кинлы сётэмын К. Герд нимо национальной премия.
Августа Васильевна со дыре ик – вылысьтыз вылаз ултӥянэз чидам кышномурт, трос нылпи будэтэм но ыштонъёсыз адӟылэм анай. Пӧртэм висёнъёсын, вӧсь луонъёсын нюръяськыса вормись.
Артистка луысал
Дышетӥсьёсты дасясь институтысь студентъёс. 1936-тӥ ар. А. Конюхова кыкетӥ радын бурысен куинетӥез.
Та паймымон сэзь, тылсияськись синмо, cайкыт йырсазё песянаез 1980-тӥ аръёсысен тодӥсько ни. «Удмуртия» книгапоттониын ужакум, со дорамы пыралляз но Сюмси ёросысь Сюрек гуртысь пичи коркаяз дыртылӥз: отын, пе, тодэ ваёнъёсын «Шудтэм шуд» книгае бордын ужасько… Собере Ижын ас дораз котьку возьмалляз, куно карылӥз, юалляськиз, улонлэсь бере кыльымтэеныз паймытъяз. Удмурт филармоние нылкышно ӝытэ но сое ӧтчамы, тужгес мӧйыез кылбурась шуыса. Национальной библиотекаын «Ашальчи» журналэн тодматсконэ но пыриськиз, ас малпанзэ ӟырдыт кылъёсын кисьтӥз. 90 аресэз матэктыса но, дартэзъя егитъёслы адӟем карымон вал.
2000-тӥ аръёс котырын Августа Васильевна ышылӥз – Москва дорысь Люберцы карын улӥсь бадӟым пиез Валерий дорын улӥз. Сад-бакчазэс райын кадь шулдыр кариз: музъемез ачиз ик сайкиз, лӥялъёссэ порылӥз, пӧртэм емыш будэтӥз.
Кыре-буре куриськись сюлэмыз мукет аръёсаз сое вуттылӥз Алнаше племянницаез доры (бадӟым агаезлэн Иванлэн нылыз Трокай Борисовлэн братэзлэн пиезлы Владимир Павловичлы быземын вал). Отчы ветлӥз, Раиса Ивановна Гракын улӥсь Альбина нылыз доры кошкытозь.
Улонэз копак шугомиз 2004-тӥ арын сӥзьылысен. Августа Васильевна ас квартираяз ик, ӵошкыт интыын, оломар сямен усиз но макес лызэ чигтӥз. Вылаз ик, эшшо вӧсь луылӥз на. «Ой, лыосы чидантэм висё ук…». Аслыз ачиз ӝожтӥськыса но чидаса, ручказэ киысьтыз ӧз кушты. Эшшо ке, отын но татын печатласькиз ай.
Кемаласьгес вал ни доразы вуылэме. Августа Васильевна чорк гинэ валес дураз пукыса пумита. Пыдъяськем! Пуконэн пыкъяськыса ке но, ветлӥсько ни, шуэ. Со гинэ ма – дӥськутме но ачим, ас киыным миськисько, пе. Пырем муртлы туж шумпотӥз. Пельы туж ляб кылэмен, телефонэн но уг вераськиськы, телевизор но уг учкиськы ни, шуэ. Тани коть синъёсы, пе, вань на. Очкизэ но солы юрттӥсь пало очки пиялазэ возьматӥз. Пыдлось потӥсь зучмыт куараеныз Августа Васильевна лыдӟыны ӧдъяз али гожъяно «автобиографиысьтыз» люкетсэ: «В волшебном царстве Хозяйки Медной горы…» Лем шурлэн Чупчие усён вожаз, Дэбес ёросысь Уд. Лем гуртлы кык иськемын, Вахрин купец, пе, пужым ягез сайкыса, лэсьтэм олома ӝужда плотина, пуктэм куинь люкетэн туж бадӟым вуко. Тымет дуре пуксиллям складъёс, мастерскойёс, улон юртъёс – озьы ӝутскем посёлок. Татын ик улыно-вылыно бадӟым кирпич юртын вылӥллям кунокуа, дышетскон классъёс, комнатаос. Ӵапак татын будэм тодмо кырӟась Кузьма Ложкин но…
- Милям Вахрин купецмы сярысь нокытын гожъямын ӧвӧл на ук? – аслэсьтыз юаса кадь, азьланьтэ мадисе. – Малпаськыса кыллёнъям йырсазь «гулбечысьтым» оломаиз но потэ. Кылбуръёс, кырӟанъёс но тодэ лыкто. Некрасовез, Пушкинэз, Лермонтовез шатыр гинэ верасько ас поннам. Нуналаз дас бам ке но книга лыдӟисько. Та сизьым ар куспын кыллёнъям, ой, ма гинэ ӧй лыдӟы ни. Но йырысьтым тӧлӟе табере. Котьку, лыдӟымтэ мае ке кадь, киям кутӥсько. Ой, визьтэм удмурт ныл, о-о? – ассэ серекъя Августа Васильевна.
- Гердэз тодады вайиды-а? – юасько солэсь, книгаысьтыз та интызэ малпаса.
Бен, Кузебай Гердэн со ӵем адскылэм, Ижысь педтехникумын дыръяз ик, но вераськыны дӥсьтылымтэ. 1930-тӥ арын гинэ, удмурт писательёслэн I съездзылы дасям концерт дыръя, Герд ачиз вуэм театральной курсысь нылъёс доры. «Чилясь сьӧд йырсиез «под польку» ӵышкемын но, паллян пала висатыса, вольыт сынамын. Ымнырыз капчи мылкыдо, пальышась». (Татын но мукет интыосын – «Шудтэм шудысь» чуръёс – авт.) Катяен Гутялэсь киоссэс кутылыса ик, Кузьма Павлович соослэсь кырӟамзэс ушъям, «мон, мусоосы, тӥ понна юри кырӟан гожтӥ» шуыса, кырӟаса возьматэм: «Басьто, басьто мон, Марья… Ой, ляльчи Марьяез…» Котькуд куплет бӧрсьы «ой, визьтэм удмурт пи» кылъёсыз вылэм.
Августа Будина артистка луыны быгатысал. Пичи дыръяз ик бубыли кадь капчи поръясь, эктӥсь, кырӟась луоноез шӧдӥськем. Педтехникумын дышетскыкуз, та ласянь Малых Катя эшеныз туж тупаллям: валтӥсь рольёсты но соос шудылӥллям. Хорлэн кивалтӥсез Е. В. Молоткова та нылъёсыз пӧлысьтызы ик висъям, удмурт но ӟуч гуръёсты сяна, операын но кырӟаны дышетэм.
- Аслам дӥськутэ сцена вылэ потымон ӧй вал бере, эшъёсы мыным асьсэлэсь чебер дӥсьсэс, пыдкутсэс, буртчин чулкаоссэс сётъязы, – шуэ Августа Васильевна.
Педтехникумысь куд-ог усточиосты 1928-тӥ арын Ижын ик усьтӥськем театральной курсъёсы выжтӥзы. Катяен Гутя сяна, соос пӧлын вал Игнатий Гаврилов, Анатолий Саратов но мукетъёс. Завучсы – Михаил Николаевич. «Тимашев ялан ас пушказ улӥз. Сое кыӵе ке секыт малпанъёс, адӟонъёс курадӟытӥзы кадь. Милемын, урокъёсын сяна, ӧз пумиськылы, ӧз вераськылы». Августа Будиналэн матысь эшъёсыз луизы Клавдия но Игнатий Гавриловъёс, Афанасий Лужанин, Михаил Петров. Классик луэм писатель берло ини, 1950-тӥ аръёсы, мылкыдзэ шараям: «Эх, Гутя! Ӧд вала тон мынэсьтым мылкыдме. Егит дыръяд кӧня гожеръяй котырад – тон ӧд вазиськы. Мон ведь «Ой, усьтӥ мон, усьтӥ укноме» кылбурме но, тонэ малпаса, тыныд сӥзьыса, гожтӥ». «Озьы бере, валамонгес гожеръяно вал», – шуэм Августа Васильевна. Ма карод на, М. Петров Удгизын (книгапоттонниын) директор дыръяз, ӵош ужакузы но, та сярысь поттылымтэ бере…
Театральной курсъёсын, озьы ик Удмурт клубен кивалтӥз Александр Сугатов. ӟеч кивалтӥсь вылэ олокӧня но чагиськонъёс вуиллям, солы оскем ужез куашкатэ, кулак нылпиосты бурд улаз возе, Будинаен кузпалъяськыны малпа шуыса. Семьяё пиосмуртлэсь сыӵе мылкыдъёссэ Августа ӧз шӧдылы. «Кулак ныл» но «кулакъёслы ужасьёс» луыса Новосибирскын ужакузы гинэ (Будина соку Турксиб чугун сюресэз лэсьтӥсьёсты грамоталы дышетӥз), Александр Васильевичен одӥг коркан улыны тупаса, солэн мерскемезлэсь куалектӥз но – пыраклы люкиськизы…
«Кулак ныл» шуыса газетэ гожъямзы бере Августа Будина театральной курсъёсысь уллямын ке но вал, яркыт буёлъёсын ворекъясь дуннезэ кысыны ӧз быгатэ. Институтын дышетскон сяменыз Удмурт радиолэн хораз кырӟаз. Алнаш ёросэ вуыса, нылпиосыз но крезьгураны, суредаськыны дышетӥз. Ачиз гитараен, мандолинаен шудэ вал. Сцена вылын ӵемысь огназ кырӟалляз. А. Тельнов музыкантлэн кивалтоно оркестраз пыриськылӥз. Ялан концертъёс пуктылӥзы.
Дышетӥсь луиз
Выльысь сюрес быръёно ке, кин луысал? Та юанлы Августа Васильевна, чик малпаськытэк, вера: дышетӥсь ик. Пичи дырысеныз дышетӥсьлэсь визьмоез, мусоез, умоез дунне вылын нокин ӧвӧл кадь потылӥз. Улытозяз сыӵеен син азяз пуктылӥз Уд.Лемысь дышетӥсьёссэ Скворцовъёсты.
Тани со, 14 аресъем нылмурт, тӧдьы бинялтонэн кут кутчаз, кияз уродос пурысь сукман пальтозэ кутӥз, пуйызэ тыбыраз ныпъяз но асьсэ гурт пиос сьӧры олокытчы кыдёке, кылылымтэ-адӟылымтэ шаере потӥз… Ижысь педтехникуме мынэмзэ тазьы син азяз пуктэ Августа Васильевна.
Чаклано ке, дышетӥсь луон вамышъёсыз тубат бӧрсьы тубат кадь син азе пуксё. Киров улосысь Святица гуртын но Алнаш ёросысь школаосын пичиосыз дышетон. Учительской институтын дышетскон сяменыз вузэ пырыны дасяськисьёсты визьнодан. Та институт бӧрсьы ик комвузын (ВКСХШ-ын) кивалтӥсьёсты удмурт кыллы дышетон. Тӥни озьы нырысетӥ вамышъёсысен ик пичиос азьын куалекъянэз но, мӧйыос азьын ӵыжектонэз но вал.
1938-тӥ арын Дышетӥсь-ёслэсь тодон-валанзэс будэтонъя институтын (ИУУ) ужаны кутскемез бере дышетӥсез-кылчиез, методистэз зол-зол кыткизы удмурт пиналъёслы учебникъёс дасянэ. Кышкатскиз, аслыз ӧз оскы. Киыныз-пыдыныз пыкиськиз ке но, малпаз: та партилэн нырысетӥез мыным оскем ужез. Озьыен, быгатоно!
Чик ӝегатскытэк, 3-тӥ класслы грамматика борды кутскиз. Нунал но нунал ӧвӧл, уй но уй ӧвӧл. «Нылпиосме чередьыны но дыры уг тырмы ни. Вань удмурт нылпи литератураез сэзъясько-сӥсъясько… Коть бӧрд, озьы но материалэ тырмыт уг люкаськы… Гужем вуиз. Нылпиосты эскерыны лагере но ветлоно, мемилы но юрттоно. Дыр ӧжыт кыле…»
Рукописьсэ дунъямзы бӧрсьы но трос тупатъяно луиз ай. Визьмо редакторен Августа Галичанинаен ӵош пукылӥзы на, котькуд правилозэ, упражненизэ эскерыса, кылзэ радъяса. Озьы тыршыса-тыршыса, сюлэм вылазы усем ужзы выль дышетскон арлы дась луиз. Со вал 1939-тӥ арын.
«Нош ик жадёнэз валатэк ужан: нуназе – институтын, ӝытъёсы – библиотекаын, бер ӝытъёсы но ӵукъёсы – дорын. Петяез (картсэ – авт.) мемилы юрттыны, пиосмес чакланы курисько.
- Ойдо, ачид ик юртты но чакла, тон – «партийной, научной ужась», – мыскылляса выллем шуэ мыным.
Номыр вераме уг луы пумитаз. ӝожомеменым гуньдыса, нош ик уж борды кутскисько. Пӧртэм примеръёс вылын удмурт кылъёслэсь предложениын радъяськемзэс эскерисько, выль правилоос малпасько, учебнике чылкак выль люкетъёс пыртӥсько».
Кык ар но ӧз ортчы – озьы ик, уно курадӟон пыр потыса, пӧрмиз мукетыз учебник. Со вал 6-тӥ-7-тӥ классъёслы синтаксис.
Та ужез бордын уй-нуналэз валатэк пукыса ужан висказ, Августа Васильевна бадӟым ыштонэз адӟиз: пичи нуныез висьыны усьыса, эмчиос сое катьяны ӧз быгатэ ни.
Учебник гожъян – туж секыт уж, ваньмызлы со уг сётӥськы. Нош Августа Конюхова та удыслы вань лул кужымзэ понӥз, вань быгатонозэ лэсьтӥз. Соин ик солэн учебникъёсыз татчыозь уло, шокало на. Журналист Милитина Гаврилова «Медло котьку шуныт» статьяяз тазьы вера: «Мон 1939-тӥ арын потэм учебникезъя дышетски. Юн трос пол со потылэм. Тани 16-тӥ изданиез 1971-тӥ арын печатламын. Отын 192 бам. Чаклано ке, кӧня отын ужез. Ма гинэ кулэ вылымтэ! Огъя улон-вылонэз тодон гинэ ӧвӧл, шонер гожъян ужъёс. Ваньзэ вакчи, валамон но паськыт возьматоно. Тодонэз юнматыны быръемын пӧртэм книгаосысь люкетъёс…»
Синтаксис сярысь ке верано, таиз ялан выльдӥське. 1971-тӥ арысен та учебниклэн кык авторез луиз: А. В. Конюхова но Р. И. Яшина. Собере но мукет дышетӥсьёс, тодосчиос пыриськизы ни та уже. 2003-тӥ арын учебник Г. А. Ушаков кивалтэм улсын потӥз. Сое дасяку но, мӧйы эшсылэн трос дэмланъёсыз лыдэ басьтэмын.
ИУУ-ын Августа Васильевна куинь пол кутскыса ужаз. Пенсие потонзэ татысен пумитаса но, ӧз буйга. Дышетӥсьёслы курсъёс радъялляз, соосты пособиосын узырмытыны сюлмаськиз. 1950-тӥ аръёсы ик тодмоесь вал ни солэн орфографияя но пунктуацияя книгаосыз. Нош синтаксисъя ужъёсыз войналэсь азьло ик УдНИИ-лэн сборникъёсаз пыремын.
Нырысь-валысь, егитгес дыръяз, Августа Васильевна огшоры дышетӥсь вылэм ке, Быдӟым ож кутскыса, Алнаш ёросын солы кивалтон ужез оскылӥзы: Кучыран гуртысь пичи школаен, ёрос центрысь агитпунктэн, райгазетэн, райкомысь пропагандая но агитацияя отделэн кивалтӥз. Собереяз, 1947-тӥ-1949-тӥ аръёсы совпартшколаын дышетскемез бере, воксё но кивалтон уже выжыны быгатысал. Но со Удгизэ, книга поттон борды, кариськиз. Дышетон ужзэ азьланьтӥз 1957-тӥ арысен Республиканской заочной школалэн директорез луыса. Ужез сямызъя ик тупаз: котькытчы вутскись, пазьырес кышномурт вить заочной школаез син азяз возиз. Вить-куать ар куспын Ижын гинэ дышетскисьёслэн лыдзы 400-ысен 10 сюрсозь будӥз. Ӵапак соку, 1961-тӥ арын, А. Конюховаез шаерысьтымы дано дышетӥсь шуыса данъязы. Нош калыкез югдытонысь отличник нимыз, Удгизын ужакуз, 1950-тӥ аръёсы ик вал ни. Нялтас вералом: со вакытэ А. Золотарёв тодосчиен кыкназы ВДНХ-лэсь бадӟым азвесь но туй медальёссэ басьтӥзы. Таос сётэмын вал гуртъёсын азинлыко амалъёсты пыӵатӥсьёс сярысь нимаз сериосын трос брошюра поттылэмзы понна.
Та бӧрсьы ик, ог вие, нош ик сьӧд кайгу сое сутӥз. Улонзэ югдытӥсь кизилиез, котьмарлы усточи, 18 аресъем чебер Юра пиез улонэныз люкиськиз… Кышномурт уй куспын юг-юг пурысьтаз.
Писатель луоно вал
Кыӵе вакыттэс тужгес шудоен лыдъяськоды? Таизлы юанэлы Августа Васильевна вераз: издательствоын ужан дырме, пе.
1949-тӥ арын 1-тӥ сентябре со выль удысэ вамыштӥз. Нырысь огшоры редактор, собере валтӥсь редактор луыса сизьым арлэсь кема тыршиз. «Визьмо, мур малпаськыса, улонлэсь бергамзэ тодыса-валаса» дасяллязы планъёс. Нылкышно кивалтӥсь сюлмаськиз золэсь, кужмоесь редакторъёсты будэтон сярысь. Со понна МГУ-э дышетскыны лэзиз А. Ермолаевез, В. Ванюшевез, П. Черновез. Ачиз но Москваын тодон-валанзэ будэтӥз. Берло, туспуктэмзы шоры учкыса, пальпотыса тодаз вае: курсамы 18 валтӥсь редакторъёс-пиосмуртъёс пӧлын огнам, пе, вал.
Книга поттон ужзы ӟырдыт пӧзьыса улӥз. Удмурт кылэ туж уно берыкъязы пӧртэм удысъя литератураез. 9-тӥ классозь вань учебникъёсты но косэмын вал удмурт кылын поттыны. Школаосын тазьы дышетыны кутскыса, пӧртэм шугадӟонъёс кылдэмен, солэсь куштӥськизы.
Нылпиослы туж уг тырмо вал лыдӟон книгаос. Валтӥсь редактор ачиз но берыкъяз, мукетъёслы но ӟучысь удмуртэ берыкъяны сётылӥз. Озьы гуртысь пиналъёс доры «лыктӥзы» Л. Воронкова но В. Осеева, Н. Жданов но В. Бианки…
Удгизын ужакуз, Августа Конюховалэн выльысь усьтӥськиз ошмесэз. Зэм, 1953-тӥ арын «Кизили» альманахлэн 11-тӥ номераз печатламын солэн «Нырысетӥ вамыш» нимам прозаен ужез. Со «Ошмес син» романлэн кутсконэз шуыса пусъемын. Отын чеберлыко амалъёсын, быгатыса суредамын егит дышетӥсьлэн педтехникум бере гуртэ вуэмез. «Олялэн син азяз пуксиз школа, ошмес вулэн пӧзьыса поръямез солы школаысь нылпиослэн ширъяса шудэмзы кадь потӥз. «Школа но таӵе ик ошмес син ӧвӧл-а меда?.. Школа… Кӧня нылпиосты со улон сюрес вылэ султытэ, кӧня улонэз тодыны тыршись егит нылъёсты но пиосты лӥятэ, соослы улонысь самой умойзэ, самой ӟечсэ сётэ. Школа – улыны, нюръяськыны кужым сётӥсь ошмес син…» Та бадӟым кутскем ужзэ автор азинтоз шуыса, сое редактор сямен лыдӟыны оске вылэм Михаил Петров но. Жаляса верано, озьы ӧз луы. Берло гинэ, 1980-тӥ аръёсы, А. Конюхова проза борды басьтӥськиз на: «Шудтэм шуд» книгазэ гожтӥз. Но таиз воксё мукет – тодэ ваёнъёс гинэ, шуиз.
Нош кылбуранзэ Августа Будина дыръяз ай, Авакон кушем нимын, кутскиз. 1930-тӥ аръёсы газетъёсын печатласькиз ни. «Мыным яра Конюховалэн «Азбарын» поэмаез, – шуэ М. Гаврилова. – Со гожтэмын 1936-тӥ арын. Сое лыдӟыкум, К. Чуковскийлэн кылбуръёсыныз, поэмаосыныз ӵошатэме потэ…» Конюховалэн нылпиослы гожъян мылкыдыз ӧз кысы. 1965-тӥ арын «Тон эн кышка, пие» книгаез потӥз. Отчы пыризы таӵе ик нимоез но «ӝуко мильым» кылбурез. Берло та мылкыдзэ ӧз араты ни: кылбуръёсы укыр визьнодасесь пӧрмо, дышетӥсь луэме шӧдӥське, лэся, малпаз.
Берло ог 15 арзэ А. Конюхова мылысь-кыдысь ужаз нылпи веросъёс бордын но. Соосты адӟиськом газет-журналъёсын печатласькемезъя. Тани соос: «Пӧет», «Пинал пӧйшурасьёс», «Гордань но кый», «Фредкаос», «Сяла курег», «Уӵыпи», «Коштан ӵӧжпиос». Адӟиське: сюжетъёс лэсьтэмын котырысь, инкуазьысь чаклам суредъёсъя. Нош «Дышетӥсь» веросэз тодэ ваёнъёсъя пӧрмем (солы инъет луиз «Нырысетӥ вамыш» гожтосэз). Пинал геройёсызлэн прототипъёссы – берло тодмо луэм муртъёс: Георгий Векшин суредась, Семён Шихарев писатель, Анна Колесникова артистка но мукетъёс. Соосты Августа Васильевна дышетӥз, Алнашын ужакуз. «Алнаш кен» статьяяз Александр Лаптев гожтэ: «Гордань но кый» веросысь событиос ортчо Алнаш ёросын ик… Паймымон но осконтэм кадь учырез маде А. Конюхова. Вылаз ик, та верос пиналъёслы чаклам детективлы укша. Нош «Гордань но кый» соин валче гинэ сюлмам пыдло ӧз пыры, отын суредамын мар ке мында мур нюко, ӝужыт вырйыло но нюр интыё, пичильтык нюлэсэн котыртэм Куашкам гуртэ».
Августа Васильевна кемалась вералляз, Кировын Николай агаезлэн пиез Лев Будин улэ но, соос Алексей пиеныз ӵошен «Трудное счастье» книгазэ дасяло шуыса. Поттыны уксё шедьымтэен, лэся, чылк-чылк дасям уж гожтӥсез кие берытскиз но, сое автор «Удмуртия» книгапоттонние сётӥз. Котьма ке но «Трудное счастье» шуонэз бордын Августа Васильевна, койка борды думиськыса но, ялан ужаз на. Озьы выльдэм-ватсам тодэ ваёнъёс али гинэ печатламын «Жизнь прожить – не поле перейти» нимын, со пыриз Дышетон удысысь национальной ужпумъёсты тодон-эскеронъя институтлэн (кивалтӥсез Н. И. Ураськина) сю аресъем юбилярлы шуыса печатлам «Живой голос века» книгаяз.
Синмаськымон гожтэм книгалэсь пуштроссэ ас кылъёсыныд сыӵе ик чебер вераны нокызьы уд пӧрмыты. Озьы ик – А. Конюховалэн «Шудтэм шудэз» сярысь. Отын адямилэн кузь даурез но ортчем ХХ даурысь тэшкет гожъёслэн сюлэм пыр потэмзы адӟиське. Гожтӥсь муртлэн улоназ бугыръяськыса, валчеяськизы пӧртэм ӧръёс: вордскем дырысен сётэм дарт но чеберлык, артистлэн гомась мылкыдыз, писательлэн мур малпаськон визылэз, дышетӥсьлэн-методистлэн, учебникъёс кылдытӥсьлэн ӝикытлыкез но чиданэз, озьы ик кивалтӥсьлэн ӝабырес сямыз. Со дыре ик анай, кузпал луэмез огласянь солэсь улонзэ шунтыса но ӟырдатыса возиз, мукет ласянь – лул-сюлэмзэ пыжыса, азьлань мынонзэ могӟытыса улӥз.
«Шудтэм шудэз» печатлам дырысен 15 арлэсь кема ортчиз ни. Со 1 сюрс экземплярен гинэ потэм вылэм, шедьтыны уг лу ни. Дыр вуэмын сое, зэмос бестселлерез сямен, бадӟым тиражен выльысь печатланы. Автор сярысь Роза Яшиналэн кылъёсыныз верам потэ: «Дунне адями со. Та сярысь мед тодозы вань удмуртъёс».
Иж карысь Совето ураметӥ мынӥсь-ветлӥсьёс «Рубин» магазинэ пыро зарни-азвесь учкыны. Соослэн йыразы но ӧвӧл, та юртлэн вылӥ этажаз зарни песянай улэ шуыса. Отын со улэ-вылэ дырызлэсь вазь кошкем Светлана нылызлэн Даниил пиеныз но визь пог нунокъёсыныз ӵош. дауръем улонэзлэсь визылъёссэ пыдэстэм лул-сюлэм кожъёсаз бергатыса.
Источник:
За предоставление материала выражаем огромную благодарность редакции газеты "Удмурт дунне"
