Кузнецов Юрий Васильевич
Радиоез али но вӧтасько
Кабинетаз пырыкум, монэ пумитаз югытгес йырсиё, пичи мыйыко, капчи мылкыдо пиосмурт. Пальышась, бордаз кыскись тусыз соку ик син шоры йӧтӥз. Книгаоссэ ӝажы вылаз сюлмо интыя. Мыным пуксён инты ӵектӥз, вераськон мытӥз:
- Тани толон куноос ветлӥзы, книгаосмес учкизы.
Конфетэн чай юон куспын вераськонмылэсь ӧраз пыремзэ ӧй шӧд. Вакчи дыр куспын эшъёс кадь луимы.
Юрий Васильевич Кузнецов Можга ёросысь Бадӟым Кибья черкогуртын вордскиз. Анаез пудо утисьын ужаз, атаез берло аръёссэ нюлэсчиын ветлӥз. Семьяязы ньыль пиналъёс будӥзы: куинь пи, одӥг сузэрзы. Юра – кыкетӥез.
Пичи дырысеныз ик пияш эшъёсызлэсь улон шоры учкеменыз висъяськиз. Сое ноку бордаз ӧз кыскы техника. Кыл удыс школаысен ик сьӧраз валтӥз.
- Тодады вайиськоды на-а нырысетӥ уждэс?
- Сизьыметӥ классын «Дась лу!»-лэн адскымон юнкоръёсыз пӧлын вал. Газетысь тросаз конкурсъёсын вормисе потылӥ. «Совет» колхозмылэн председателез Я. К. Тубылов ужысьтызы тырмымтэоссэс мон азьын шараяны но ӧз дӥсьтылы, газетэ вуоз шуыса.
«Дась лу!»-ысь нырысетӥ заметкае али ке но йырам на. Витетӥ классын дышетскыкум вал со. Гожтэмме лыдӟыса, мылкыд куашказ – одӥг чурез но асламез ӧй вал. Иське, ӧз яра – аслым йылпумъян лэсьтӥ. Фамилиме но улон интыме гинэ воштӥллямтэ. Та учыр бере кема ӧй гожъя.
- Гожъяськон удыстэс выльысь азьланьтыны кин юрттӥз?
- Литературая кружоке ветлыны кутски. Соку Ольга Александровна Тарасова кружокен кивалтӥз, юмореска малпаны дэмлаз. Гожтӥ. Дышетӥселы но эшъёсылы яраз. «Дась лу!»-э келяме бере Константин Михайловлэсь ушъян гожтэт вуиз. Бӧрысь Герман Алексеевич Ходырев мылкыдме ӝутӥз: «Юра, гожъяськы, тынад пӧрме, молодец!»
«Дась лу!» газетлэн редакцияз ньыль пол лауреат нимын пусйылӥзы. Материалъёсме Можга ёросысь «Ленинское знамя», «Удмуртская правда», «Советской Удмуртия» газетъёсын печатлало. Анай-атае гожъяськеменым ӧз тунсыкъяське. Со сярысь ӧз но тодылэ. Уйшор. Дорын чалмыт – ваньзы изё. Малпанъёсыдлы – эрик. Ужме вис карытэк, одӥг шокчемен быдэстылӥ. Тупатонэз но трос ӧз шӧдӥськылы ни. Ужъёсме тодмоосылы ӧй возьматылы. Возьдаськылӥ-а, мар-а.
- Статьяос сяна, маке гожъяды на-а?
- Юморескаос. Пьесаос но малпаны тыршылӥ. Ас вакытаз драмая кружокмы ужаз. Туннэ кадь ик син азе пуксе Михаил Петровлэсь «Батрак», Игнатий Гавриловлэсь «Кезьыт ошмес» пьесаоссэс возьматэммы. 11-тӥ классэз йылпумъяса, Ижысь Удмурт кун университетэ пырыны мылкыд кари. Со дыре журналистикая факультет но, специализация но ӧй вал на. Ӵапак со вакытэ ёрос газетмылэн редакторез Тихон Андреевич Марков азьлань сюресэ сярысь юалляське. Университетэ мыныны мылкыдме шараяме бере пумит луиз. Свердловскысь Урал кун университетэ мыныны дэмлаз. Отын, пе, бадӟым тодон-валанэн журналистъёсты дасяло. Та кылъёс вӧзы М. Горбачёвлэн выльдӥськон политикаез улонамы ватсаськиз. Угось соку журналистлэн профессиез эшшо тунсыко но туала вакытлы тупась луиз. Озьы Свердловске мыноно кариськи.
- Дышетскыны пыриды?..
- Вань экзаменъёсты умой сётӥ, пыри. Нырысетӥ курсэз йылпумъяса, армие басьтӥзы. Кӧня ке дыр ортчыса, дивизимылэн «Боевая слава» нимо газетаз ужай ни. Огвакытэ толэзьлэсь ятыр газетэз огнам поттоно луи. Шуг-секыт пыр тодон-валанэ муромиз, юнмаз. 1989-тӥ арын студентъёсты чакламлэсь вазь службалэсь мозмытон сярысь Постановление потӥз. Редактормы монэ лэзьыны пумит луиз, 17-тӥ сентябрёзь ӝегатӥз. Мон вылын ворттылыны яратӥз угось. Материалме тупатъям каре но, ас нимзэ пуктыса, сое мукет газетъёсы ыстэ. Озьы ӟеч гонорар басьтэ. Ярам, йыртэмамез дыраз ву вылэ лӧптӥз.
Служба бере Свердловске ик дышетскыны мынӥ. Кыкетӥ курсысен малпамтэ шорысь атае бырыны шеде. Мар кароно? Дышетскон сяменым ужай. Пряник но пыжи, ресторанъёсын, кафеосын дӥсь но ошылӥ, похоронной бюроын но возьмасьын ужай… Озьы ке но университетэз ӟеч йылпумъяй, Удмурт радиое ужаны вуи.
- Малы одно радиое мыноно кариськиды?
- Пичи дырысеным ик та удысэн монэ одӥг учыр герӟаз. Дышетӥсе Ольга Александровна Семён Самсоновлэн «Дыдыкъёс бус пӧлы уг йыромо» произведениеныз тодматскон ӝыт сярысь ивортӥз. Соин ик котькудмылы романэз пыр-поч лыдӟоно луиз. Книгалы черод кылдӥз. Дыр ичи кылемын. Уй куспын ӝынызэ лыдӟыса вуи ик. Ӵуказеяз Удмурт радиоысь корреспондент роман сярысь малпанъёсмес юа. Со вал Милитина Васильевна Гаврилова – тодмо радиожурналист. Керпотэменым эшъёсы сьӧры пыдлогес ватӥськи. Мурт мышкын кема шумпотыны ӧз кылды – шӧдтэк шорысь ныр улам микрофон вуиз. Могӟи. Тӥни озьы радиожурналистика улонам шуак-дуак мерскиз. Берлогес нош кыкетӥ практикаме Удмурт радиоын ортчи. Тау соку Удмурт радиолэн кивалтӥсезлы Евгений Осиповлы. Ужаны отчы ик кыли. «Визыл», «Сандал», «Тӥ понна но тӥледын» передачаос лэсьтылӥ.
- Малы нош радиожурналистикалэсь мозмытсконо кариськиды?
- Одӥг интыын вить арлэсь кема ӝегатскыны уг яра. Американецъёс озьы лыдъяло. Мон соосын соглаш. Одӥг интыын пукыса, ву но зынме. Шӧдтэк шорысь Удмурт Правительствое ӧтизы. Мыноно кариськи. Политика удысын выль тодон-валанъёсме будэтыса, нош ик журналистика удысам берытско, малпай. Но сюресэ мукет пала кожытӥз, «Удмуртия» издательствоен кивалтонэ вуттӥз.
Радиоез, шергес ке но, вӧтасько на. Котьма ке но журналистика мон понна нырысетӥез но валтӥсез удыс кылиз. Книга поттонын но солэсь уно амалъёссэ уже басьтоно луэ. Ма, собере возьдаськон, могаса улон манерме но вормиз – флегматикысь сангвинике пӧрмытӥз.
- Кызьы?
- Трос бызьылоно луэ, спонсоръёс утчано.
- Спонсоръёсын ужаменыды издательстводэс ӝыныё коммерция огазеяськонэн лыдъяло ни кадь.
- Ми быдэсак государстволэн огазеяськонэз. Нош «коммерция» нимамзылы шумпотӥсько гинэ. Иське, улон ӧрлы пумит жомбылляськеммес адӟо ик. Сыӵе амалэн гинэ туала издательство возиськыны быгатэ. Туннэ продукцимылэн 85 процентэз утчаськыса поттэмын, 15 процентлы гинэ элькунмы коньдон сётэ. Ӵошатоно ке, ог дас ар талэсь азьвыл 7 процентэз гинэ книгаос спонсорлэн коньдонэныз поттэмын вылэм. Ас вакытаз со паймымон трос ни вал. Палэнысь шедьтэм коньдонэн ми басьтӥськомы издательстволы кулэ луись арбериос. Кылемзэ бюджет киултэ. Серемес луыса кошке: табышенымы пукон басьтӥськом ке, сое вузаммы уг луы ни. Луонлыкмы (правомы), пе, ӧвӧл.
- Мон тодӥсько, тӥ дорын 40 пала рукописьёс книга луыса потэмзэс витё. Коньдон ӧвӧл. Коммерция амалды уг юртты шат югдурез умоятыны?
- Нырысь ик, кыллё сыӵе рукописьёс, кудъёсызлэсь туннэ пайдаез уз луы, туала лыдӟисьёс сое кулэ уз каре. Малы нош ми поттыны кулэ издательстволы ыштон ваись продукциез? Собере, соосты ваньзэ вылӥын пукисьёс эскеро, дунъет сёто.
Кыкетӥез, со 40 рукописьёслэн авторъёссы тодо: книгаез ӝоггес печатлан понна авторлы, спонсор утчаса, трос пӧсяны кулэ.
Та куронъёс пӧлы уг пыро улонысь кошкем гожъясьёслэн ужъёссы. Соосты печатланы элькунмы коньдон висъя. Национальной библиотекаен ӵош «Память Удмуртии» сузьет поттӥськом.
Троссэ литературамес заказной шуиськомы: кыӵе ке ёрослэн юбилеезлы сӥзьыса, дано адямиос сярысь, шаертодонъя книгаос. Соос ваньмыз сямен ӟуч кылын. Кылсярысь, куинь ар талэсь азьло ӟуч кылын «Удмуртская Республика» брошюра 5 сюрс экземпляр потӥз. Со ми понна туж бадӟым лыдпус. Кык ар ортчыса, лыдӟисьёслэн куремзыя, эшшо 2 сюрссэ поттӥмы на. Со сяна, открыткаосты, туристъёслы справочникъёсты тужгес кулэ каро, издательстволы но пайда луэ. Удмурт кылын лыдӟисьёс ӧжыт, соин ик асьме кылын печатлам продукцимы басьтӥсьёссэ уг шедьты.
«Удмуртия» издательстволэсь ужзэ пайдаен берыктон понна уно бызьылоно луэ. Бюджет уксё, жаляса верано, книга печатланы уг тырмы, коньдон ыштонъёсты ӧжытак гинэ ворса. Угось книгалэн асдуныз вузан дунызлэсь кӧня ке поллы тросгес. Табыш поттон понна нош ик спонсоръёс утчано, соосын кенешоно. Татын бадӟым юрттэт сётэ Правительствоын ужаме. Со вакытэ трос тодмоосы кылдӥзы. Эшъяськон герӟетъёсы али но емышсэс сёто на.
- Быдэсмымтэ малпанъёсты кылизы на-а?
- Луонлык ке кылдысал, шаермес мургес тодонъя книгаос поттысал. Бен, соос вань, но туж ичи. Асьмеос школа парта сьӧрысен ик тодӥськомы Греция но Египет сярысь, нош куд-огез вордскем палъёсысьтыз сӥё-дано интыоссэ но уг тоды. Мар веранэз ни калыкмылэн выжыез, гуртэзлэн кылдэмез но тодмо адямиосыз сярысь. Сыӵе адямилэн коть дас машинаез мед луоз, но узыр меда со?
Кыкетӥез сюлэмшуго малпанэ: Удмуртимылэсь ортчем сюрессэ рос-прос дышетыса, кунгож сьӧрысь улӥсьёсты тодматоно асьме шаерен. Со понна книгаосты пӧртэм кылъёсы берыктоно. Мед отын но тодозы удмурт писательёсмес, суредасьёсмес, учёнойёсмес но трос мукет дано адямиосмес.
Куинетӥез сюлэмшуге: республикаямы пиналъёслы удмурт книгаос ӧжыт пото. Компьютер книгаез палэнтэ ни, шуозы. Озьы ке но ворпоё, яркыт буёло, тунсыко пуштросо книгаез учкытэк, лыдӟытэк, одӥг пинал но уз чида. Лыдӟоз, мукетызлы мадёз – пельысь пеле кошкоз.
- Нош удмурт кылын выль повестьёсын, романъёсын книгаос шоры кызьы учкиськоды?
- Оскисько, элькунамы кылъёс сярысь закон ужаны кутскем бере та уж но ӧръяськоз. Вакчи юан-веран
- Оскиськоды-а Инмарлы?
- Сюлэмам мае ке шӧдӥсько. Коркаям но уж дурам обросъёсы вань, нылъёсы но пылатэмын. Туала улон Инмарлы оскыны дыр чик уг висъя. Пырак вераса, аслым ачим гинэ оскисько. Нокин тон понна уждэ дась лэсьтыса уз сёт.
- Шумпотэмдэс кинлы нырысь ик вераськоды?
- Вӧзам луись адямилы.
- Кыӵе ӧтёнъя улӥськоды?
- Нырысь ас кужымедлы оскиськы.
- Асьтэды кизилиен лыдъяськоды-а?
- Мон музъем вылтӥ ветлӥсько.
М. В. Гаврилова:
Радиое ужаны шунды кадь пальпотӥсь вуиз. Ужасьёсмы пӧлысь кин ке шуиз: «Ай пальпотэ на». Туннэ ке но мыня – улон сое куасалтыны ӧз быгаты.
М. В. Гавриловалэн Ю. В. Кузнецовен вераськемысьтызы:
- Паллян бамы маке лыдэ. Малы меда со? – тодметъёсты тодаз вайыны тырше Милитина Васильевна. Юрий Васильевич - ас сяменыз:
- Чибинь куртчиз, дыр, Милитина Васильевна.
Источник:
Кузнецов Ю. В. Радиоез али но вӧтасько / Ю. В. Кузнецов ; записала Оксана Москова // Удмурт дунне. - 2004. - 8 окт. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
