Дмитриева Наталья Леонидовна
Наталья Дмитриева — удмурт движениысь одӥгез синмаськымон кышномурт, К. Герд нимо гимназиысь дышетӥсь, пӧртэм удмурт но фин-угор проектъёслэн авторзы, трос нылпиё анай. Кылем арын со пыртэмын удмуртлыкез тужгес ӟеч азинтӥсь 25 муртъёс пӧлы, «Удмурт Кенеш» огазеяськонлэн нимысьтыз кузьыменыз пусъемын.
— Наталья Леонидовна, тӥ Ижын вордскемын-будэмын. Но кытысь тӥляд удмуртлык, удмурт выжы борды кыстӥськон мылкыдды?
— Анае но атае — удмурт ёросъёсысь. Атае Алнаш палась Азамат гуртысь, анае Кияса ёросысь Тӥгырмен гуртысь. Тӥгырменэ ми ӵем бертылӥськом вал. Выныным кыкнамес отчы келлязы шутэтскон нуналъёсы но, гужем каникулъёслы но. Зэм, огвакытэ, школаын дышетскыкум, удмурт кылме вунэтыны кутски. Атае серекъялляз: кырыж-конгыль вераськиськод ук. Чебер уг пӧрмы шуыса, ачим но возьдаськылӥ.
Ижын мон 46 номеро школаын дышетски. Мыным отын туж кельше вал. Классамы кыӵе гинэ выжыысь нылпиос ӧз дышетске: ӟуч, удмурт, бигер, армян… Милям йырамы но ӧй вал ог-огенымы ваче вуыны, совето вакытъёсы выжыя висъян ик ӧй вал кадь. Но огпол мукет классысь пияш нылашмес «вотянка» шуиз — оло валаса, оло валатэк. Мон ӧй чида, со пияшез мыжгай. Со дырысен школаын сыӵе кылъёсты ӧй ни кылылы. О-о, мон туж чырткем вал. Активистка — пионер отрядлэн тӧроез, дружиналэн кенешезлэн ёзчиез. Дышетски но ӟеч. Туж потэ вал комсомолка луэме. Но вуизы 1990-тӥ аръёс, пионерия но комсомол быризы, куашказы.
— Йылпумъяды Ижысь экспериментальной лицеез. Маиз отын сокем кыскисез, пусйымонэз вал?
— Ижысь Гуманитарной лицей усьтӥськиз, 8-тӥ классэз йылпумъякум. Тодӥ: ӵуказеяз отчы пырон вылысь экзаменъёс кутско ни. Мынӥ, ваньзэ ӟеч сётӥ.
Али малпаса, мон туж паймисько анай-атаелы. Кызьы соос оскизы сыӵе егит директорлы? Михаил Петрович Черемныхлы соку 28 арес гинэ вал ай. Ма, лицейлэн аслаз юртэз ик ӧй вал, отын бадӟым ремонт мынӥз. Ми дышетскимы али филармонилэн юртаз. Ӝыны арзэ — нимаз-нимаз кабинетъёсын. Но 1992-тӥ арын отчы интыяськиз филармония, милемыз уллязы, шуыны луоз. Дышетским ӧсъёс сьӧрын, холлъёсын. Кабинетъёсысь кылӥсько ариос, нош ми историяя лекция кылзӥськом. Ӝыны арзэ озьы дышетским. 100-лэсь трос пинал пӧлысь соку лицеез йылпумъямы 96 кузя. Мон али но туж-туж бадӟым тау карисько анай-атаелы: соос монэ та лицейысь ӧз басьтэ, сое йылпумъяны луонлык сётӥзы.
Гуманитарной лицейын дышетскон мынӥз, историысь пӧртэм вакытъёс вылэ пыкиськыса: первобытно-общинной, феодальной, капитализм вакытъёс, социализм, коммунизм лэсьтыны вырон дыръёс… Озьы милемлы возьматыны тыршизы, кызьы азинскиз адями, со системаос пыр милемыз поттӥзы. Татын ик нырысьсэ кутскимы проектъёс бордын ужаны.
