Пикулева Светлана Николаевна
Пальпотӥсь куара
Светлана Пикулевалэн куараез пальпотон мылкыд кузьма. Шаерамы улӥсьёс вераськемзэ кемалась тодмало, ноку уг сурало. Нош кӧня ке ар талэсь азьло радиопульт сьӧрын ужась Светлана Пикулева телеэкранэ но потӥз. Берло аръёсы сое ӧтчало концертъёсты но мукет ужрадъёсты нуыны. Светлана – туж дӥсьтӥсь, визьмо, йӧно удмурт нылкышно. Туэ пусъемын «Удмурт Республикаысь дано журналист» нимын.
- Светлана, тынад кык вылӥ образованиед. Нырысь ик йылпумъяд филология факультетэз, собере маке муген мынӥд на экономикая тодон-валан люканы. Нош ужаськод радиожурналист луыса.
- Мыным туж удалтӥз ӟеч дышетӥсен. Гуртамы – Пичи Пурга ёросысь Пуроын – школамы начальной гинэ, соин шор ёзо тодон-валан люканы Аксаке ветлӥмы. Толалтэзэ интернатын улӥськом вал. Аксакшур школае ужаны вуиз пинал дышетӥсь Надежда Петровна Демьянова. Со дыре ик интернатын воспитательын но тыршиз. Соин-а, мар-а ми сое туж яратӥм, апай кадь потылӥз. Надежда Петровна кылдытӥз литературно-творческой кружок, ми отчы быдэс классэн ветлӥм. Отчыозь но мон куд-ог гожъямъёсме «Дась лу!» газетэ ысъяй, нош татын эшшо бадӟым мылкыд пуромиз. Ӵапак соку ик кин луон сярысь малпаськыны кутски. Журналистлэн ужезлы синмаськи на кенаке Куликова Раиса Семёновна пыр но. Со ми доры куное вуэ но, «радиоын ужасьсы лыктэм» шуыса, бускельёсмы котыраз люкаськылӥзы.
Со вакытэ ик данэ потӥзы юристлэн, экономистлэн профессиоссы. Алгебраен геометрия но капчиен сётӥсько кадь мыным. Собере быдэс классэн кадь Ижысь гурт удысъя академие мыныны малпамы, мон но экономист луыны ӝуткаськи, подготовительной курсъёсы ветлӥ. Кытӥ ке ӧвӧл эшъёсы документъёссэс УдГУ-э нуиллям. Мон гурт удысъя академие заявление гожтӥ ни. Сэре эшъёсы сьӧры Удмурт кун университетэ но документъёсме сётӥ на. Филфаке пыро, дыр, малпай, нош экономическое – ӧйтӧд ай.
Огез эше Эстоние но ӝутканы кутскиз – отын дышетскыны мылкыд карисьёсты утчало, пе. Мамаелы верай но, эшшо кытчы, шуэ, Ижлэсь кыдёке, пе, эн ветлы. Кылзӥськи. Филология факультетэ экзаменъёс сётӥ но, экономическое мынонлэсь воксё куштӥськи, экзаменъёсы но ӧй ветлы ни.
- Удмурт радиое кызьы вуид?
- Милемыз, студентъёсты, отчы экскурсие нуизы. Удмурт радиолэн соку сяськаян вакытэз вал. Туж тунсыко веразы, ми доры ужаны лыктэ шуыса ӧтизы. Мон ӵуказеяз ик мынӥ. Ыстӥзы Валерий Тероков доры, со егитъёслы «Тулпар» программа нуиз. 30 минутъем передачалы огпол, кык пол сюжет вайисько. Сыӵе-сыӵе геройёсы вань шуыса верасько. Валера мыным «репортёрзэ» сётэ, кытчы но кызьы зӥбылыны валэктэ.
- Кинэ радиое нырысьёсыз радын гожтӥд?
- Андрей Прокопьевез. Ми «Чипчирганэ» ӵош ветлӥськом вал. Андрей Ижын будэмын, тодон-валанэз но мургес, улон шоры учконэз но йӧспӧртэм. Вылаз ик, со кунгож сьӧры но поталляз. Ӵапак кытысь ке вуиз вал. Озьы солэсь интервью басьтӥ. «Нормуль» шуиз Тероков, дунъяз ужме. Собере «Чипчирганэн» потӥмы Пермь улосысь удмуртъёс доры. Татысь егитъёслы сӥзьыса, передача дасяй, 30 минутъем пӧрмиз со. Раиса Куликова но кылзӥськиз, будӥськод шуыса дунъяз.
5-тӥ курсэ выжи вал ни, ялӥзы: «Ингур» радио, пе, усьтӥське, отчы ведущийёс кулэ. Валериан Исламгареев одӥг курслы пичигес вал. Дорам лыктӥз но «ойдо, Света, ветлом» шуэ. Ойдо, шуисько. Кылзӥзы. Ортчиды, пе. Конкурсэ пыриськемме Раиса Семёновна тодытэк но кылем. Озьы ужаны кутски. Ӟуч но удмурт кылъёсын эфирез нуиськом вал. Кытӥ пӧрме, кытӥ уггес. Милемын туж трос ужаз Милитина Гаврилова-Решитько. Со занятиос ортчытъялляз: ӝог веранъёс, шонер шоканы дышетскон, кыӵе сӥзёнэн кылзӥсьлы вазиськоно. Тодмо артист Александр Мустаев ӟуч кылмес волятыны юрттылӥз, «бык тупогуб, тупогубенький бычок» шуыса кал быре вал. Ушъясь гинэ ӧй вал. Удмурт радиолэн директорез Роза Горбушина куаретэ, куараед пуксем мылкыддэ возьматэ шуыса. Тани кылзы ай, пе, Татьяна Гусеваез, солэн куараяз пальпотон шӧдӥське. Асме кылзӥсько но, аслым но ярамысь дугдэ.
- Нош ужаны мылкыддэ ӝутӥсьёс вал-а?
- Тау кареме потэ журналистлы (али Президентлэн но Правительстволэн пресс-службазылэн кивалтӥсезлэн воштӥсез, авт.) Иван Лебедевлы. Со, радиоочеркме ушъяса, жингыртӥз но сыӵе аслым осконме бурдъяз.
Озьы луиз: «Ингуре» эфирез нуыны Надежда Тероковаез кутӥзы. Мон удыстэк кылисько кадь. Со дыре ик корреспондентъёс, пе, кулэ. Шаплы эштэ вай на, шуизы мыным. Озьы Надя Боброваен иворчиос луимы. Таяз удысын сыӵе тунсыко вылэм. Выль адямиос, командировкаос, дась текстъёсты гинэ лыдӟыса пуконо ӧвӧл.
Нырысетӥзэ очеркме сӥзи Киясаын улӥсь 101 аресъем песянайлы. Нош тужгес но зол сюлэмам кылиз Николай Князев сярысь радиоочерке. Со Балезиноысь литейно-механической заводлэн кивалтӥсез вал, али Ижысь техникая университетын ужа. Со радиоочерке бере ушъяса жингыртӥз со аръёсы «Удмурт дуннеысь» валтӥсь редакторлэн воштӥсез Иван Лебедев. Соин но та уже аслым вунонтэм кылиз, дыр.
- Иське, ужед кельшымон, нош мар муген тодад вайид экономист луон мылкыддэ?
- Студент дырысеным радио котырын бергай но аслым кема ужам мурт кадь потӥ-а, мар-а. Ар мында ужай но, Нина Малых, соку со «Удмурт Кенешлэн» вице-президентэз вал, ӵектӥз Эстоние журналистикая докторантурае мыныны. Со вакытэгес ик тодӥ, удмурт егитъёсты экономистэ дышетскыны люкаллям шуыса. Пӧлазы тодмоосы – Фёдор Миннигараев но Алексей Слесарев. Куке-соку экономист луон мылкыды выльысь бурдъяськиз ук! Ар ортчыса, эшшо, пе, группа люкалозы. Соин Эстоние мыныны мыр-мыр пыкиськи.
Экономической тодон-валан люкан сыӵе кельшиз. Группаосты люкасьмы но, куратормы но вал тодмо учёной Юрий Перевощиков. Огполаз докладъёс дасямы «Концепция современного естествознания» предметъя. Мыным электромагнитной индукция сярысь, пе, доклад дасяно. Гожтӥ, кытӥ валай, кытӥ ӧй – физика кемалась вунэмын ни ук. Докладзэ кин удмурт кылын, кин ӟучен лыдӟе. Юрий Семёнович ушъя шенгыль-пенгыль ке но удмурт верасьёсты, ӟуч кылын доклад лыдӟисьёслы ватсаса юанъёс сётъя. Нош мынам докладэ ӟуч кылын. Малпасько, ма, уг быгаты шат мон сое удмурт сямен вераны. Потӥ, удмурт сямен мадисько, физикаысь кыӵе ке законъёсты шуак берыктыны шугъяськисько, озьы ик ӟуч кылын лыдӟисько, вождэс эн вае, шуисько. Адӟисько ни, Юрий Семёновичлэн синъёсыз ӝуало, сюлэм вылэ шунтэм вӧй кисьтӥд, шуэ. Вае, пе, докладдэс, Кун Думаысь депутатмылы Светлана Смирновалы возьмато, удмурт кылын таӵе доклад дасяны луэ шуыса. Мон татын но ӧй ыштӥськы: докладэ ӟуч сямен гожтэмын, шуисько. Дышетӥсе уката паймиз. Бӧрысь ӵектэ вал аспирантурае мыныны, али но со пумысен пыкылэ на.
- Экономика бусыез гырыны мар люкетӥз?
- Выль уж. Ӵапак «Мынам Удмуртие» радио кылдон сярысь вераськон потӥз. Монэ отчы ӝутказы.
- Телеканалэ ужаны ӧтемзы – со вылӥ дунъет-а?
- Малы меда ваньмыз озьы малпало? Тодмоосы «Ӟечкыласьком!» передачаысь адӟиллям но туж шумпотӥллям: тонэ, пе, дунъяллям, вылӥе ӝутӥллям. Нош мыным радиоын ужан секытгес но, тунсыкогес но потэ.
Телевидениын удмурт кылын иворъёсын программа кутскыку, ӧтизы эфир нуыны. Эскеризы, ярам, тупаськод, пе. Нош радиоысь кивалтӥсьмы малы ке телевидениен вожвылъяськиз: бырйы, пе, радио яке экран. Мынам радиоез яратон мылкыды бадӟымгес вал. Собере озьы тупаз: «Ӟечкыласьком!» передачаез нуись Светлана Добрякова нылпиен пукыны кошкиз. Пикулева, ойдо, шуизы. Текст сётӥзы, лыдӟи, ярам, пе.
- Астэ экранысь адӟыса, кыӵе мылкыдыд кыле?
- Кытӥ кельшисько, куддыръя уггес.
- Малы? Ӟуч кылын но туж чебер, вольыт вераськиськод.
- Ачим озьы ик воксё уг малпаськы. Но вольыт вераськон ласянь мыным трос юрттӥське коллегае Александр Кузнецов. Со индылэ, мон солы котьку тау карисько.
Экранэ потонлэн сомында сюлмаськонэз дӥсь ласянь. «Ӟечкыласьком!» передачаез нуыку, гардеробысьтым вань дэремъёсме возьматӥ. Ӧз тырмы. Бускелелэсь но, сузэрелэсь но дӥсялляй ни. Быриз. Мар кароно? Огез тодмое ӵектӥз – магазинысь, пе, юаса утча ай. Озьы ачим вазиськи вуз карон центре. Соослы асьсэлы тунсыко вал ужаны, таиз кемагес кылле ни, ойдо сое возьматом, тазьы умойгес шуыса ӵектылӥзы.
- Нош «Светӥ дорын куноын» программа кызьы вордскиз?
- Нырысь со программа радиоын кылдӥз. Уго ужан жанрмы воштӥськиз – эфирын, пе, тросгес вераськоно. Ми нуналлы быдэ куно ӧтчаськом вал. Табере, пе, часлы быдэ эфирын вераськон мед луоз. Азьло эфире сётъяны быгатӥмы диктофонэ гожтыса кельтэм адямиосын кенешонъёсты. Удмурт кылын ӟеч вераськись муртэ шедьтыны, кыӵе ке мур темаез бугыръяны – со туж секыт ужпум. Радиоочеркъёс табере ум лэсьтӥське, нош усто, паймымон адямиосты кызьы ке возьматоно ук. Соос асьмелэн ӧжыт ӧвӧл.
Кылсярысь, удмурт кивалтӥсьёсты мон «Тӧр шор» программаям но ӧтчаллясько вал. Студие куноосты, соосын матысьгес тодматскон понна ӧтчан мыдкыдме ӵош ужась эшъёсылы верай. Кивалтӥсьёсмылы но кельшиз. Но вань корреспондентъёсты графике пуктӥд ке, огъя малпан ыше кадь. Иське, кӧня ке муртлы та борды басьтӥськоно. Света Белых психологиен тунсыкъяське, адями пушкын копаськыны быгатэ кадь. Кивалтӥсьмы Сергей Касаткин ӵектӥз бордамы Света Кибардинаез – таизлэн, пе, удмурт кылын вераськись тодмоосыз быдэс республика тыр. Сэре нимъёсмы но огкадь – озьы ик Светӥос луимы. Отӥяз та программалы телеверсия лэсьтоно кариським, «Кык Олёшъёсты» воштӥм.
- Кыӵе кусыпъёссы Светӥослэн? Соос экранын но, улонын но эшъяськыса уло-а?
- Туж тупаськом. Куке но Алексей Ложкин кышкатӥз: одӥг программаын куинь нылкышноос – со катастрофа. Ог-огдэс зӥбоды, усьтӥськыны уд сётэ, шуиз. Тьфу-тьфу, озьы ӧз луы. Быгатӥськом ӵош ужаны. Кудӥз ке Светӥмы лишной визьмо, мукетыз укыр капчи мылкыдо. Собере со сямъёс ог-огмылы паласькыны кутско. Тани Кибардинамы укыр серекъясь. Белыхлэн вунэтылон сямыз поталля. Пикулева укыр малпаськись тусо. Улэмъя-вылэмъя учкиськом но, Пикулева мае ке вунэтъяны кутскиз, Кибардина дырын-дырын малпаськон дуннее усьылэ, Белых пальпотэ.
- Милям лыдӟисьмы Римма Рылова гожтэт ыстэм. Сюлмаське: съёмка лэсьтон интыды туж мӧзмыт – тӧдьы борддор но тӧдьы креслоос гинэ. Удмурт корка пуш, пе, мед луысал. Светӥослы удмурт дэрем но мед вурысалзы, шуэ, сотэк, пе, ӟучъёслэсь маин висъясько соос?
- Ой, макем удмуртлык шоры сыӵе учкон акыльтэмын ни. Одно ик пужыятэм ӵушконъёс, ӝӧккышет. Милемлы али образмес ӵектӥз телерадиокомпаниысьтымы валтӥсь редактормы Влада Одинцова. Нырысь малпамы вал, арнялы быдэ дэремъёсмес вошъяломы шуыса. Но татын ӟеч малпанэз вал стилистлэн: дэрем – со база. Адямиез дэрем гинэ чебер уг кары. Малпан, визь, кенешон кыре мед потозы. Нош удмурт дэремъёсмы табере вань. «Шаркан-трикотаж» кузьмаз, ми дырын-дырын вошъяськом дӥсьмес.
- Калык пӧлын тодмало ке, кельше-а?
- Концертъёсын потаны кутским но, кытӥяз автограф куро. Нырысь паймисько вал, сэре сереме но потылӥз, марлы мынэсьтым куро, кин мон сыӵе? Огаз командировкаын кыӵе ке шулдыръяськонэ тупай, мон ужасько, нош котырысьтым адямиос шорам учко. Огез дӥсьтӥсезгес лыктӥз но юа: тон ук со. Бон, мон. Собере котыртӥзы, маке юаллясько. Мон асме кызьы возьыны но уг валаськы. Озьы тодмакузы, туж шугектӥсько.
- Тон укыр кужмо шуыса верасьёс трос-а? Квартира но машина басьтӥд, огнад нылпи будэтӥськод?
- Шара верасьёс ӧвӧл. «Сыӵе потэ ляб кышномурт кариськеме, кинлэн ке но чыртыяз ошиськеме» кылъёсын сӥзёнэз ӵош ужась эшъёсы ӝӧк вылам понӥллям. Но сыӵе мылкыд дыръя, ӟучъёс верамъя кадь, «то избы горят, то кони скачут» луэ. Адямиос шуо: кескичгес луоно. Кызьы? Солы дышетскыны дыр ӧй вал. Ужъёс сотэк но тачак. Квартира басьтыны ӝуткамез пумысен тау карисько Раиса Семёновналы ик. Со ужаны кутскеме дырысен индылӥз: уксёдэ тус-тас эн кары, люка. Кема выри, мурт патеръёсын улӥ. Тани 2000-тӥ арын 1 комнатаен квартира 100 сюрс манет котыр вал. Мынам уждунэ 5 сюрс манет, ӝынызэ улон инты понна тыроно. Собере квартиралы дунъёс толэзьлы быдэ сямен будыны кутскизы. Тау карисько ӵыжы-выжыосылы но – соос пунэмен сётӥзы. Эшшо кредит басьтӥ на, озьы аслым улон инты кылдытӥ.
- Ӵыжы-выжыед, иське, Кавказысь калык кадь туж шырыт сямо ук!
- Соиз озьы, туж удалтэмын. Тятяме, Николай Ильичез, Пуроын Колинка гинэ шуо вал. Котьмалы киыз мынӥз: гур но шуккоз, мотоблок но лэсьтоз, кыӵе ке транспортёр но малпалоз. Гармошкаен но гитараен шудэ вал. Бадӟым семьяысьтызы нылпиоссы ваньмыз сямен гуртэ кылемын вал, Юляпаймы гинэ вылӥ образование басьтэмын. Туж куректӥ тятяе, шудтэм учыре шедьыса, 54 аресказ улонысь кошкемен валче. Квартираям но котырак учкы ай – солэн ужам ки бервылыз, выжме но выльдыны со валэктӥз. Кӧня улӥсько ни – выж пулъёсы уг ӟукырто.
Мамае, Зоя Васильевна, зоотехнике дышетскемын, вань улонзэ фермаен кивалтӥз. Мамаелэн семьяяз ваньмыз сямен вылӥ образованиен. Огез агаез – Николай Васильевич – Вылӥ судын судья луыса ужаз. Пётр Васильевич – «Кенеш» журналлэн валтӥсь редакторез, Семён Васильевич кема аръёс ӵоже Кияса ёросысь «Рассвет» хозяйствоен кивалтӥз, Виктор Васильевич Юкаменск ёросын колхоз тӧро вал. Нэнэзы-дядяйзы вазь кулэмен валче бадӟымъёсыз агайёссы сюлмаськиллям пичиоссэ дышетыны. Соослэн сыӵе юрттӥськон сямзы али но вунэтэмын ӧвӧл. Тани машинаме воштоно шуыса верай но, нокыӵе кредит, пе, эн утча, ми тыныд ваньмы пунэмен сётом, ку быгатод – берыктод. Милям семьяямы куинь пинал. Мон шоретӥез. Агае но выны Пуроын уло.
- Тон чебер, лякыт, визьмо. Синмаськисьёсыд трос, дыр. Укыр бырйиськиськод шат?
- Мыным ваньмыз огвакытэ кулэ – мед но кылзӥськоз, кужмо но мед луоз. Но со огдыре озьы уг луы. Кужмо ке, сьӧраз мыноно, дугдӥз ке, мон уг чида – азяз пото но сюрес возьмато.
- Малы сыӵе учконэд пиосъёс шоры? Яратон ӵуштаз-а?
- Кинэ туж зол яратӥ – со монэ матаз ӧз кары. Со бадӟымгес вал, визьмогес, котьма ласянь быгатӥсь, али но сыӵе ик. Со я вань, я ыше. Солы пумитъяськыса, выль тодматскон, выль синмаськон ӝужа ни кадь. Нош кырӟамтэ кырӟан кадь яратонэ нош ик кытысь ке вуэ, ваньзэ сура-пожа, собере ачиз но ыше. Озьы ик луиз кадь. Табере валасько, мыным кыкетӥзэ, монэ туж зол яратӥсьсэ, быръёно вылэм шуыса, нош соку сюлэмелы оски.
- Созэ но, мукетсэ но ӧд бырйы, аслыд шуыса нылпи вайид.
- Со малпаса лэсьтэм вамыш вал ни. Нырысь пи медло шуыса малпалляй. Нош собере куалектӥ: кызьы мон пиез будэтом? Вазьгес ик тодӥ, ныл луоз шуыса, шумпотӥ.
- Маши туж чебер вераське удмурт кылын.
- Нылылы арес дыръя ик ужаны потӥ, мамае соин пукиз, собере гужемзэ гуртын улӥз. Ӟуч кылэз чик тодытэк, будӥз. Сӥзьылаз нылпи садэ нуи но – толэзь пала шугъяськиз кызьы вераськыны. Садазы удмурт кылэз уг дышето. Нош Маши удмуртсэ ӧз ни вунэты. Монэ но куддыръя куаретэ, монэн ӟуч вераськиськод шуыса. Табере куинетӥез кылмы но – англи кылэз дышетӥськом – туж капчиен сётӥське.
- Мар кулэ кышномуртлы шудо луон понна? Тани тынад улэп сяськаосыд корка тыр. Иське, дунъясьёсыд, кузьмасьёсыд котьку вань?
- Нылкышнолы кулэ дунъясьёс. Тон сярысь тодазы мед ваёзы. Тыныд жингырто, ӟечкылало ке, со самой бадӟымез кузьым.
Источник:
За предоставление материала выражаем огромную благодарность редакции газеты "Удмурт дунне"
