Парамонова Нина Аркадьевна
Боевик Нина
Дано спортсменлэсь нимтулзэ верало ке, соку ик син азе пуксе солэн тусбуйыз. Нош тросэз-а меда маке вераны быгатоз Нина Парамонова сярысь? Нина Парамонова – шаерысьтымы одӥгез кужмоез спортсменка, куасэн бызьылонъя калыккуспо классъем мастер, дуннелэн но СССР-лэн куинь пол чемпионэз. 5-тӥ июле со 60 арес тырмонзэ пусйиз. Со азьын Нина Аркадьевнаен матысьгес тодматскыны кылдӥз.
- Мон сярысь гожъянэз но ӧвӧл ни: ӵошатсконъёсы уг пыриськиськы, Олимпиадаозь ӝутскыны ӧз кылды, – киыныз шонтыса ик, пыкъяськыны выриз Нина Аркадьевна. – Туала спортсменъёс сярысь гожъялэ, туж данъяськисько шаерысьтымы куасэн бызьылӥсьёсын, вань кужымзэс сётыса, быдэс Россимес вылӥе ӝуто. Нош мон кадьёслэн дырзы ортчиз ни.
- Адямиен тодматскыны ноку бер ӧвӧл.
- Соиз но зэм. Дорамы лыктэмды юнме медаз луы шуыса, юалляськоды ни-а, мар-а. Вордскемын но быдэ вуэмын мон Можга ёросысь Зудногуртын (Зубнино). Анай-атае вань улонзэс колхозын ужазы. Анае – фермаын, бӧрысьгес бухгалтериын, атае колхоз пасекаын тыршиз. Гуртмы сярысь ке верано, со чылкак удмурт вал, ог 30 корка. Школа, нылпи сад яке клуб сярысь веранэз ик ӧвӧл ни. Тодон-валан люканы ветлӥмы артысь Кибъя гуртэ. Нуналлы быдэ 4 иськемез солань-талань вамышъямы. Кезьыт куазь, кыдырась зор, пелляськись тӧл тэшкылиослэсь сямзэс юнгес каризы. Классмы бадӟым но котыр ласянь кужмо вал: дышетсконын но спортын ялан вормонъёс басьтылӥмы. Классамы ик тодон-валан люказ, нош отӥяз Кун Кенешлэн депутатэз, Тӧроез луиз Игорь Николаевич Семёнов.
- Озьыен, пичи дыръяды ик котькытчы вуиськоды вылэм.
- Мон огинтыям тэк сылонэз тодӥсьтэм адями – боевик – вал. Нырмес олокытчы но чуртнамы, парта вылтӥ бызьылӥмы. Физкультурая урокъёсыз ке басьтоно, нырысетӥ вормонъёсы шӧдскыны кутскизы, 6-тӥ-7-тӥ классъёсын дышетскыкум. Бадӟым классъёсысь пиналъёсты пыдын но куасэн бызьылонъя ӵошатсконъёсын кельтылӥ, нош кузьдалае тэтчанъя школалэсь рекордзэ выльдӥ. Отӥяз ёросысь пиналъёс пӧлын но тужгес кужмоез луи. Соин но, дыр, школаысьтымы физкультураен дышетӥсь ыстэ вал Можгаысь ветеринарияя училищее – шаерысьтымы но СССР-ысь тужгес кужмоез тренер Сергей Плеханов доры. Озьы ке но, 8-тӥ классэз йылпумъятозям, спортлы сокем трос саклык ӧй висъя. Ми вакытэ пиналъёс дышетӥсь, эмъясь, кырӟась луон сярысь малпаськылӥзы.
- Нош кыӵе сюресэз тӥ бырйиды?
- 8-тӥ класс бере тросэз эшъёсы Можга педучилищее ӝутӥськизы, мынам но соослэсь бере кылеме ӧз поты. Документъёсме кутыса, педучилищее вамыштӥ. Озьы ке но дышетӥсь луыны ӧз кылды. Кытысь ке ӧвӧл монэ шедьтӥз Сергей Плеханов, шуэ: мон тонэ кемалась утчасько ни, лык дорамы дышетскыны. Уд но оске, документъёсы «педын» вал ке но, экзаменъёсме «ветын» сётӥ. Озьы малпамтэ шорысь пудо першаллэн удысаз вуи. Ветеринарияя училищеын трос саклык висъязы мугор кыдатонлы. Школаын дышетскыкум, нокыӵе тренировкаостэк вормонъёс дорам лыктылӥзы, нош студентъёс чупресэсьгес вылӥллям. Монэн ӵош дышетскыны пыриз на мукетыз кужмо спортсмен – Дэри ёросысь Нина Пестерова. Нуналлы быдэ тренировкаос ортчытъямы, дорамы кӧланы сяна ӧм вуылэ.
Тыршеммы токма ӧз луы – кыкетӥ курсысен Совето Союзысь кужмо спортсменъёс пӧлы шеди, спортъя мастерлэсь куронзэ быдэстӥ, СССР-ысь куасэн бызьылӥсьёслэн командаенызы ӵош егит нылъёс пӧлын Калгариын ортчем «Олимпиадалэн осконэз» ӵошатсконэ пыриськи. Вормисьёс пӧлы шедьылӥ яке сизьым кужмоез пӧлын вал. Со аре ик Можга веттехникумысь нылъёслэн командазы Совето Союзысь училищеосын но техникумъёсын дышетскисьёс пӧлын нырысетӥ инты басьтӥз.
- Ялан ӵошатсконъёсы потаса, дышетскондылэсь ортчемзэ ик ӧд шӧдэ, дыр?
- Уд но оске, эшъёсы техникумез 3 но ӝыны ар куспын йылпумъязы, нош мыным – «тужгес устоез» студенткалы – быдэс арлы кемагес дышетсконо луиз.
- Кызьы?
- Азьвыл аръёсы но, туала вакытэ но куд-ог тренеръёс кужмо но быгатӥсь студентъёссэс ас доразы кемагес возьыны тыршо. Пӧлазы Олимп гурезёзь ӝутскыны быгатӥсьёсыз но луо. Мынам но отчы шедьыны луонлыкъёсы кылдӥзы вал ни кадь… Адӟон, пе, пыд улысь потэ. Одӥг вакытэ бордам няняськизы сьӧд пилемъёс. Европаын ортчоно ӵошатскон азьын Лениногорске бызьылыны мынӥмы. Ӵошатсконлэн берпуметӥ нуналаз мылкыд лӧптэмын. Эстафетаын вормон шоры гинэ мертаськисько… Гурезетӥ васькыкум, пумитам шедизы чорыгамысь бертӥсьёс. Адямиос вылэ пыремелэсь кышкаса, уськытски но кыз борды шуккиськи. Туж вӧсь луи ке но, эшъёсылэсь бере кылеме ӧз поты, чутыса но нюжтӥськыса кадь финишозь вуи, нош эмъясьёс доры мыныны кышкай, мурт городысь больницае огнаме кельтозы шуыса. Можгае вуыса, врачъёс доры вамыштӥ. Монэ эскеризы, спортэн эшъяськонме пыраклы вунэтыны куризы. Соку мон толэзьлэсь ятыр валесын кылли, эшшо сомындагес больничнойын вал. Собере кӧня ке нунал веттехникуме ветлӥ, но парта сьӧрын пукыны шугъяськи. Ваньмыз вылэ киыным шонтӥ но дорам кошки. Но куасъёс шоры лушкемен учкылӥ. 1980-тӥ аръёсы, кыкетӥзэ вордскем мурт кадь, спортын выль вормонъёс басьтыны кутски.
- Дышетӥсь луон сярысь малпанъёстэс улонын быдэстыны кылдӥз-а?
- Веттехникумез йылпумъяме бере шаерысьтымы спортъя «Урожай» огазеяськонын ужай. Ачим но бызьылӥ, егит спортсменъёсыз но визьнодай. Ӵапак соос шоры учкыса, вылӥ образование басьтон сярысь малпанэ кылдӥз. Удмурт кун университетысь спортъя факультетэ капчиен пыри. Студентъёс пӧлын мынам гинэ нимаз улон интые вал, уждун но, стипендия но сётӥзы.
Студент аръёсам дорам куное вуылӥз тодмо спортсменка Раиса Сметанина. Улон интыелы чылкак паймиз: кызьы, пе, тон дорын уд улы, зарезь шоры учкыса… Горький урамысь «Подарки» магазинлэн вылӥязгес улӥ, укноосы Иж ӵыпет шоры учкизы.
Университетын эшшо но бурдъяськи кадь. Россиысь вузъёс куспын ӵошатсконъёсын нош ик вормонъёс басьтыны кутски. Испаниын Совето Союзысь нылъёслэн командазы эстафетаын кыкетӥ инты басьтӥз. Нимаз стартъёсын но куинь кужмоез пӧлы шедьылӥ. Зарни медаль дорозь сузьтӥськыны ӧзгес удалты. Универсиадае мынӥсьёс мугорзэс кыдатыны кулэ вал гурезё интыын. Та ӵошатсконэ монэ нырысь лэземзы ӧз поты. Сюрес вылэ потон дыр вуиз но, документъёсыд, пе, дась, чемодандэ бича. Нимысьтыз дасяськытэк но, СССР-лэсь командазэ бере ӧй кельты.
- Шуо на, СССР-ысь чемпионъёслэн ӵошатсконъёсазы но вормонъёс басьтылӥды.
- Котькуд аре странаысь кужмо спортсменъёс сезонзэс Заполярьеын йылпумъяллязы. 1981-тӥ арын мыным но со ӵошатсконэ пыриськыны кылдӥз. Валамон, бадӟым ужрадэз учкыны люкаськемъёс туж витизы Галина Кулаковалэсь вормон басьтэмзэ. 30 иськем сюрес вылэ 70 пала спортсменъёс потӥзы. Со нуналэ Галина Алексеевналэн тазалыкез чутӥзгес, стартэ потонлэсь но алӥсько вал, ӧз кылзӥськы.
7 но ӝыны иськем кругъёсты 4 пол ортчоно вал. Куинь кругез куинь кузя мынӥмы, берпуметӥ люкетаз кыкетӥ интыын возиськись нылаш пӧлысьтымы палдӥз. Галяен кык кузя азьлань бызиськом. Шӧдӥсько, кужымез бырыны кутске. Кӧня ке иськемзэ ог-огмылы юрттыса мынӥмы, собере Галя монэ улляса кадь вераз: мын, кошкы, сотэк кыкнамес ик мукетъёсыз кельтозы. Со ӵошатсконын мон нырысетӥ луи. Г. Кулакова понна но шумпотӥ, со кыкетӥ инты басьтӥз. Нокинлы тодмотэм Парамонова сярысь трос вераськонъёс ветлӥзы, нош «Советский спорт» газетэ куинь кылын статья печатлазы.
Озьы ке но та ӵошатскон бере мылкыды урод луиз. Куд-огезлэн пыкылэмез потӥз: Г. Кулакова, пе, юри сётскиз. Спорт – со спорт, кужмоезлы гинэ вормон лыктэ. 1983-тӥ-1985-тӥ аръёс куспын эшшо одӥг пол СССР-лэн чемпионэз луыны удалтӥз, трос пол кыкетӥ, куинетӥ интыосы ӝутскылӥ, сизьыметӥ интылэсь улӥе ӧй лэзькылы.
- Бадӟым спортэн эшъяськемысь дугдэмды бере но ӵошатсконъёслэсь ӧд мозме.
- 20 арлэсь кема бызьылэме бере шыпыт интыын улыны малпай вал. Городысь квартираме вузаса, Дэри ёросысь Италмас посёлоке юрт басьтӥ, ачим сельсоветэ ужаны интыяськи. Спортлэсь мозмытски гинэ кадь, монэ кысканы кутскизы шаерамы ортчылӥсь Гурт шудонъёсы. Пумитъяськыны ӧй дӥсьты, таяз учыре куасэн бызьылоно, суй кужымме мертано, ыбылӥськоно луиз. Полиатлонистъёс пӧлын вормонъёс басьтылӥ. Со вакытъёсы ик мынам юртэ вӧзы усьтӥзы Галина Кулаковалэсь музей-юртсэ. Отчы ик ужаны кошки.
Табере Галина Алексеевнаен 18 ар валче улӥськомы. Бакчамы, юртъер котырмы огинын бере, котьма ужез кенешыса быдэстӥськомы. Нырысь аръёсаз гид тыр пудо вордӥмы, нош та вакытэ курегъёсмы гинэ вань.
5 ар ӵоже «Восточный» совхоз понна бызьылӥмы, полиатлонъя ӵошатсконъёсы пыриськимы. Районысь гинэ ӧвӧл, шаерысьтымы но ас ёзо эшъёсмес кельтыны ӟигармы тырмылӥз. Вормон басьтон понна нуналлы быдэ мугормес кыдатӥмы. Нырысетӥ интыосыз ялан ми басьтылӥськомы шуыса, куд-ог кивалтӥсьёслэн вожзы но потылӥз. Одӥг пол нимо-дано тренер дорамы лыктӥз но ымнырамы ик вераз: туннэ, пе, сётске ни милемлы, тӥляд вормонъёсты сотэк но лыдъяса быдтонтэм. Таӵе кылъёс бере мылкыдмы куашказ: милемыз вормыны ӟигарзы уг тырмы ке, нуналлы быдэ мугорзэс мед кыдатозы. Берло вакытэ Гурт шудонъёсы ӧтем куноос чотын гинэ ветлӥськомы на. Бызьылыны мылкыд вань ке но, тазалык уг тырмы ни. Спортлэсь чылкак куштӥськонтэм вылысь нуналлы кык пол, ӵукна но ӝыт, юртмы, бакчамы котыртӥ ог 2 иськем пала вамышъяса ортчиськомы. Сьӧрамы пунымес кутӥськомы.
- Ваньмон дыръяды али ма карыны яратӥськоды?
- Сборъёсын ма карыны ӟудэмысьтым, киужлы дышетски. Аслым дӥсь керттӥ, вуисько вал командаысь эшъёсылы но кузьмаськыны. Галина Кулаковен ӵош улыны кутскеммы бере но ӝытъёсы керттӥськыса пукимы, носки, пӧзьыос котьку кулэ. Аръёс ортчемъя мылкыд воштӥське вылэм, та вакытэ керттӥськон веньёсме пыдло ватӥ. Ма, уг но ваньмиськы киужен вырыны – бакчамы бадӟым.
Источник:
За предоставление материала выражаем огромную благодарность редакции газеты "Удмурт дунне"
