Зернова Ольга Афанасьевна
Дӥсьтонмы мед вамыштоз азямы
Пичи Пургалась Ольга Зернова туж паймемын Полярной Ураллэн инкуазезлы. Университетэз йылпумъянэз азьын диплом уж гожтыкуз, одӥг гужемез со отын ортчытӥз. Мынӥз июнь толэзе – лымы быдэсак шунаса вуттымтэ на. Июле вань будосъёс выжыкылын кадь пурӟизы. Толэзь куспын бычыразы, сяськаяськизы, пушйизы. Та вакытэ ик нымы-кибыос улӟизы, кӧтсэс тыризы, пиоссэс поттӥзы…
Ачиз Ольга Афанасьевна туж шаплы сямо – оло, соин таӵе суред сюлэмаз йӧтӥз но пыраклы син шораз кылиз. Улоназ но озьы ик: котькытчы вуттӥське. Ёрос центрысь гимназилэн директорезлэн воштӥсез луэ, кивалтэ ёросысь биологияя дышетӥсьёслэн огазеяськонэнызы. Кылем арын дышетӥсьлэн тусбуйыз пыртэмын вал Удмуртилэн Данъян пул вылаз. Со – Россиысь огъя тодон-валан сётон удысысь отличник, Удмуртиысь сӥё-дано дышетӥсь, «Дышетон» нацпроект чотын радъяськись конкурсъёсын кык пол вормисе потылэмын.
- Кызь одӥгетӥ арзэ ужасько ни Пичи Пурга гимназиын – ӵапак сомында тырмиз та учреждение усьтӥськем дырысен. Солэсь азьло кык арлы вуылӥ Можга городысь 10 номеро школае – Удмурт кун университетэз йылпумъяме бере отчы направлениея келязы вал. Нуи химия но биология урокъёсты.
Палэнэ йыромыны ӧз сётэ гольык пыд бызьылэм интыосы. Вордски Пичи Пурга ёросысь туж чебер гуртын – Гожнялан. Семьямы бадӟым ӧй вал, мон но Славик выны. Вячеслав Афанасьевичмы но Удмуртиысь сӥё-дано дышетӥсь, Пичи Пургалась нылпи спорт школаын тренер со.
Кыкмы но ӟеч дышетским. Мон знаменосец вал, пионеръёслэн дружиназылэн советаз, комсомоллэн школаысьтымы комитетэз котьку но шедьылӥ. Пӧрмытӥськод бере, кинлэн ӟечгес удысэз быръемез уз поты? Нош ми вакытэ гуртын дышетӥсьлэсь но эмъясьлэсь даногес профессиос но ӧй вал, лэся. Мукетъёсыз сярысь малпан ик ӧй вал. Озьы огвакытэ аслым шуылӥ: эмъясь луо!
Туж яратылӥ биология урокъёсты. Урокъёсын киы котьку ӝутэмын – вань юанъёслы валэктонъёсы дасесь. Трос лыдӟиськылэме бордысь но, оло, со ӧз потылы – инкуазез зол шӧдылӥ. Уката яратылӥ сяськаосты будэтыны. Гожняямы сыӵе адями вал – Зинаида Андреевна Зайцева: бакчаез сяськаос пӧлы выемын. Со – дышетӥсь. Шораз учкыса, пумен малпалляны кутски: иське, мон но со кадь ик луо! Озьы эмъясь луон мылкыды пумен сӥяз. Школа бере вамыштӥ университетысь биология но химия факультетэ.
Но аслым ачим туж оскиськись вылӥськем-а, мар-а. Нырысетӥ араз дышетскыны пырыны ӧй быгаты. Одессае турпутёвкаен ветлӥ, экзаменъёслы воксё ӧй дасяськы. Озьы баллъёсы ӧз тырме. Студент луи кыкетӥ араз.
Университетын группамы туж зол вал. Пиосмы ваньзы сямен гитараен шудӥзы. Кытын кыӵе концертъёс ортчылӥзы – уллёен кадь ветлылӥм отчы. Дышетсконмес йылпумъяса но, кусыпъёсмес ум ыштӥське. Тросэз кылизы университетэ ик – ужея кыӵе ке юанъёс кылдо ке, соослы гинэ вазиськисько. Ма, университетэ ужаны кылемъёс пӧлын аслам дышетэм пиналъёсы но вань ини. Нылпиос будо!
- Адӟылӥсько, куд-ог дыръя тӥ «В Контактеын», «Одноклассникиын» пукылӥськоды. Егитъёслэсь чик но бере уд кылиське ай!
- Ма, тодмоосын кусып возён понна Интернет туж ӟеч маке вылэм. Пумиськылыны ведь дыр чик уг сюры. Со сяна, Удмуртилэн палэназ но кошкем тодмоосы ӧжыт ӧвӧл. Районамы нырысетӥ компьютеръёс гимназиямы кылдӥзы, дыр, ай. Соостэк табере урокъёсты но син шоры пуктыны уг луы ни. Нылпиос уг верало ни: висим, уроке ӧм ветлэ – дорысь ужъёсты соослы Интернет пыр гинэ келяськом. Интернетлы луыса ик троссэ лабораторной ужъёсты лэсьтӥськом. Ачим книгаос-журналъёс киям уг кутӥськы ке, соку ик дунне вотэсэ выйисько. Улон туж ӝог воштӥське, наука ялан выльзэ усьтэ, вылез кылдэ. Нош дышетӥсь ваньзэ соку ик тодыны кулэ – пиналъёс азьын со, мае ке тодымтэысьтыз, возьытэ ноку медаз усьы.
- Ольга Афанасьевна, дышетӥсьёсты табере выль стандартъёсъя ужаны куро. Шӧдон вань: тӥ кемалась выль амалъёсты кутӥськоды ни.
- Вазен шуиськом вал: ой, кыӵе ӟеч дышетӥсь, темаез кушаса, пыр-поч валэктэ. Али таӵе визьнодась уг дунъяськы ни. Угось нылпиос школа бере университетэ пыро но шуге-леке вуо: отын соосты китӥзы нуллӥсьёс ӧвӧл ни, ваньзэ асьсэлы утчано-тодоно.
Мынам луылэ сыӵеез: классэ пырисько, ӝӧк вылэ гурезь ӝужда книгаос понӥсько но пиналъёслы шуисько: утчаськелэ-бугыръяськелэ, сыӵе-сыӵе юанъёслы валэктонъёс шедьтэлэ. Нылпиосы валало: Ольга Афанасьевназы ваньзэ тодэ, но соосты но ачиз кадь луыны дышетэ.
Урокъёсты нуон методикаос али пӧртэм пумоесь – кудӥз кельше, бырйы. Но нылпиослэсь но мылкыдзэс лыдэ басьтоно. Соос мед шӧдозы: дышетӥсь соосты асэныз одӥг радэ пуктэ, котьмае тодӥсь-валасьёсын музэн кенеше. Пиналъёсылы но, аслым но туж кельше сыӵе амал: кыӵе ке ужпум азямы пуктӥськом, солы валэктон ӵошен утчаськом.
Одӥгез дышетскисе алигес сюлэмзэ усьтӥз. Тодӥськоды-а, Ольга Афанасьевна, малы, пе, ми тӥледыз яратӥськом? Тодон-валан сётэм сяна, тӥ сое уже но кутыны дышетӥськоды, инкуазез яратон мылкыд пыӵатӥськоды. Соиз озьы: инкуазе ӵемысь потаськомы. Мар вань чеберез: вазь ӵукна сайкаськод, тылобурдоос чирдо, турын вылын ӧжытак гинэ лысву усемын… Зарезь дурын но мон сыӵе уг шутэтскиськы, кужым уг басьтӥськы. Кӧня ке ар талэсь азьло палаткаосын улӥм Кечур вӧзысь бусыын. Удмурт кун университетысь студентъёс сьӧры озьы калъяськылӥм. Эскерим со котырысь будосъёсты, тылобурдоосты. Нылпиос соосты тодманы дышетскизы.
Ноку но тэк ум пукиське – малпанъёсмы бадӟымесь. Али тани проект дасяськом. Санкт-Петербургысь одӥгаз школаын Пичи Пургалась гимназиез йылпумъям нылаш ужа. Биологияя кабинетазы, пе, электрон микроскопсы гинэ но вань – куд-ог университетъёсын но со ӧвӧл ай. Ваньмыз пӧрмиз ке, пиналъёсмы палэнэ поталозы.
- Тыршемды юнме уг луы: нылпиосты Россиысь олимпиадаосын вормисьёс радэ ӵемысь шедьыло…
- Олимпиадаослы дасяськон – капчи ик уж ӧвӧл. Нырысь ик дышетӥсьлы аслыз трос бугыръяськоно-утчаськоно луэ, собере со тодэмез пиналлы пыӵатоно на. Воксё катьтэммисько ке, киыным шонтыны дась: уг ни собыдӟа ныпъетэз басьты. Но тросэз дышетӥсьёс мон кадесь ик, дыр: сюлэм нош ик кыске, выйытэ уже. Эшшо нылпиос котыртӥ берганы ӧдъяло на: ку, пе, олимпиадалы дасяськыны кутском ини?
Берло ог 15 аръёс ӵоже ни сюрылӥськом Россиын экологияя но биологияя олимпиадаослэн финалазы. Куинь мурт биологиен нырысетӥ интые потылӥз. Экологилы сӥзем конкурсын вормисьёсмы ӧжыт ӧвӧл. Дорам дышетскемъёс пӧлысь тросэз азьлань улонзэс но эмъян удысэн герӟало, пыро университетысь биология но химия факультетэ но мукет.
Али гимназиысь одӥгез нылаш гижысь-пиньысь басьтӥськиз котырысьтымы шуръёсты эскерон борды. Яганэтӥ бызись Иж шурлэсь чылкытлыксэ, отын улӥсь нымы-кибыосты, будосъёсты тодӥз-чаклаз ни. Мылкыдыз вань Постолка шурез но эскерыны. Дышетскисьмылэн уженыз табере тунсыкъяськыны кутскизы Удмурт кун университетысь куд-ог профессоръёс но. Оскисько, та нылашмы кыдёке вамыштоз ай. Но ватонэз ӧвӧл, бадӟым вормонъёс басьтон понна али вузъёсын тодмоос мед луозы. Олимпиадаосы пыриськисьёслэн ужъёссы арысь аре кужмоесьгес луо – студентъёслы тупамонэсь ни. Ваньмыз сямен ик соос эскеремын наукая кандидатъёсын, докторъёсын – соос рецензия гожто. Милемлы но трос потано луэ Иже. Асьмелэн лабораторимы ӧвӧл бере, сюресъёс утчано луэ университетэ. Арнялы быдэ ик вуылӥськом республикаысьтымы экологъёслэн но биологъёслэн центразы, УдГУ-лэн ботаникая садаз.
Мылкыд медло – туала вакытэ гурезьёсты берыктыны луоз. Но, жаляса верано, котьмалы уксё кулэ. Городэ рейсовой автобусэн но потаськом – билет дунэз пиналъёс асьсэос тыро. Собере профессоръёс но ялан дунтэк уз ужалэ ук. Тросэз анай-атайёс тае уг валало, пиналзэс отӥ-татӥ лэзьян интые, чебергес дӥсь басьтыса, умойгес лэсьтӥськом кожало. Туж шонертэм со. Пиналэз нырысь ик ужаны дышетоно.
- Тӥ трос нылпиё анай, озьыен, ас пиналъёстылэсь но, дышетскисьёслэсь но сюлмаськонъёссэс ӟеч валаськоды.
- Пичи пимылэн, Сашимылэн, вордскемез самой бадӟым шудэ кадь потэ. Бадӟымъёсыз, Анимы но Колимы, озьы ик яратоноесь, мусоесь, дуноесь. Но соослэсь пичи вакытсэс валаса ӧй вутты кадь. Бер ӝытозь школаысь ӧй вуылы, ӧжытак ваньмон дыр кылдэ – гурт котырын бергано.
Огзылэн но возьытэ уськытъямзы, кӧтме ӝож каремзы ӧвӧл. Ваньзы ик туж эшъясько спортэн. Нылмы али но арлы быдэ пыриське гурт шудонъёсы. Со атаезлэн сюресэз кузя вамыштӥз – врач-инфекционист. Кыкетӥез пимы, Коля, Ижысь медициная кун академиын куатетӥ курсын дышетске. Студентъёсын вошъяськон программая туэ потаз Финляндие, отын быдэс ар ӵоже визь-нод басьтӥз – молекулярной биолог со. Сашамы 11-тӥ классын дышетске. Кытчы мыныны уг вала на – отчы но сюлмыз кыске кадь, татчы но. Ачиз тодоз – нылпиосмес кужмысь ноку ӧм карылэ, асьсэлэн йырзылы оскылӥм.
Куд-ог дыръя жаляллясько ик: пиналъёсылы дырме тырмыт висъяны ӧй быгатылы. Но мукет ласянь, соос асьсэлы оскиськисесь, котьмалы дышыса, будӥзы. Кузпалы ёрос больницаын эндоскопист, рентгенолог луыса ужа. Спортэн туж эшъяське.
- Асьтэос эмъясь ӧд луэ шуыса, уд жаляське-а?
- Уг! Кыӵе ужез врачлэн – али умой адӟисько ини. Нылмы доре вуэ но соку ик атаез борды тэбиньыны кутске. Папа, шуэ, сыӵе-сыӵе висисе вань, диагноз пуктыны шугъяськисько. Ялан тунсыкъяське: кызьы, маин умойгес эмъяно созэ я тазэ висисез. Туж секыт ужзы.
Ма, ужаны кутскыкум, мон но малпасько вал: кызьы адямиос быдэс улонзэс школаын ортчыто? Можгалан ужаны кутскыкум, уката секыт йӧтылӥз. Аслам мугоры пичи гинэ – бадӟым классъёсын дышетскисьёслэсь лапеггес но, ӟызыгес но. Завуч вань урокъёсам пуке, планъёсме эскере. Аслым дыры чик ӧз кыльылы ни – бер ӝытозь пукылӥ, урокъёслы дасяськыса. Али вакытъёс луысалзы ке, оло, дышетон удысысь кошкысал. Но соку сыӵе малпан вал: дышетӥсьлэсь дипломзэ басьтӥд ке, иське, школаын ик ужано.
Табере трослы капчигес. Дисциплинаез возён ласянь но шугъяськонъёс уг кылдо. Пиналъёс шоры учкиськод, соос шорам учко – ог-огмес валаськом.
- Тӥ кык пол пыриськиды но вормисе потӥды ни «Дышетон» нацпроект чотын радъяськись ӵошатсконын.
- Нырысетӥзэ со 2006-тӥ арын ортчиз. Мар со сыӵе, ма кулэ со понна – тросэз дышетӥсьёс валаса но ӧз вуттэ ай соку. Районысьтымы дышетонъя управление но, гимназимылэн администрациез но туж чурыт веразы мыным: пыриськы! Документъёсыным Иже куинь пол солань-талань ветлӥ. Соку курон пуктӥзы вал: вить ар ортчыса, конкурсын вормисьёс выльысь ӵошатсконэ пыриськыны быгатозы. Озьы туэ нош ик мыным кужымме мертаны дэмлазы. Но алӥзы: конкурслы дасяськыны 2 арня кылемын на. Малпаськытозям 3 нунал кылиз. Малпай: ужъёсы вань, малы соосты возьматонтэмез? Документъёсты бичанэ быдэс семьяе кыскемын вал, ява: кузпалы папкаос люказ, Анямы графикъёс лэсьяз, Сашамы печатлаз. Ачим – командир, ужез радъясь.
Жаляса верано, тросэз визьмо, быгатӥсь дышетӥсьёс таӵе конкурсэ уг пырисько, вужере кылё. Но туала арын дӥсьтонтэк уг луы ни, вашкала сямъёслэсь куштӥськоно!
- Кыӵе сямъёсты асьтэлы кельшо яке уг кельшо?
- Мон котькыӵе ужлы туж ӝог ӝуатскисько. Мар кельше – со уж борды чаляк басьтӥськисько. Но куддыр мултэс керӟегъяськисько. Мар ке уг кельшы ке, тусам ик адӟиське. Та сямылэсь мозмытскыны турттыса, катьы быре. Ярано, кузпалы гань-гань, пуштӥсь мылкыдме кытӥ-отӥ дыраз зӥбломытыны быгатэ.
Тодмоосылэн куддыръя верамзы потэ: шутэтскыны, пе, воксё уд быгатӥськы. Озьы но, дыр. Выль ар праздникез сяна, мукет шулдыръяськонъёсты чик уг яратӥськы. Тодӥсько ук: туннэ шутэтскод, нош ӵуказелы ужъёсыд быдэс воз тыр люкаськозы.
- Ольга Афанасьевна, кызьы асьтэлы потэ: улонын тӥледлы ӵем-а удалтылэ?
- Инкуазьын кыӵе ке но вылӥ кужымъёс вань – талы мон туж оскисько. Малпасько, инмар-кылчинэ монэ уте мыдлань вамыштонъёслэсь. Но тодӥсько созэ но: адями аслэсьтыз улонзэ ачиз лэсьтэ. Тыршисько-пӧсясько ке, соку шумпотонъёсы-удалтонъёсы но луо.
Мон шудо адями. Яратоно адямиосылы, яратоно нылпиосылы, дышетскисьёсылы оскыса, кужмогес луисько кадь.
Источник:
За предоставление материала выражаем огромную благодарность редакции газеты "Удмурт дунне"
