Ганьков Геннадий Николаевич

Кырӟан но футбол - висёнэ

Ганьков Г. Н.

Радио тулкымъёсты-а кылзӥськиськод, чагыр экран азьын-а пукиськод – отын но, татын но одӥг ымныр ворекъя. Ӵыжы-выжызэс, матысь эшъёссэс ӟечкыласа, учкисьёс ӵемысь Геннадий Ганьковлэсь кырӟанзэ куро. Тодмотэм, гуръёсыныз-а та пиосмурт ас палаз учкисьсэ берыктыны пӧрмытэ сьӧд-сьӧд мыйыкъёсыз-а ненег ныл сюлэмъёсты.

- Адями, шуо, кылбур я гур гожъян борды басьтӥське, солы урод луыку. Нош тӥляд кызьы?

- Ма, вал, дыр, секыт дыръёс. Туж умой тодӥсько на со вакытэз: ужасько Можга ёросысь Быдӟымсурд культура юртын, репертуаре туж начар. Амалтэк крезьгур гожъян сярысь малпаськыны ӧдъяй. Соку ик кылдӥз «Котьмалэсь мусогес» нырысетӥ кырӟанэ. Кылъёссэ но гурзэ ачим «пӧрай». Сӥзи вордӥськем палъёсылы - Быдӟымсурдэлы: сокем со инты мыным мусо но шулдыр йӧтылӥз. Тӥни озьы. Нырысь огез кылдӥз, собере кыкетӥез, куинетӥез…

Клубын куать арзэ кивалтӥсьын ужай. Ӵемысь ас поннам малпалляй: йӧл кыскисьлэн-а, огшоры колхозын ужасьлэн-а ужез котьку адӟиське. Нош культура юртын тыршисьлэн - уг. Соин клубе бадӟым лопатаен васькасько вал. Гуртоос ну шорам паймыса учко ук, мар карод соин, шуо. Нош мон лопатаме кыштыр пыртӥсько но ватӥсько вал. Мед, шуисько, калык тодоз – мон но ужасько!

- Нырысьсэ сцена вылэ потэмдэс тодӥськоды на-а?

- Кызьы сое вунэтод! Азьло ӵемысь смотръёс, ӵошатсконъёс радъяллязы. Монэ, ньылетӥ классын дышетскись мае ке, «У меня матроска, шашка у меня» кырӟанэз быдэстыны косӥзы. Ой, макем зол куалекъяй соку! Пыдъёсы дыр-р вазё. Та ужрад бере ик анаелы, пе, гуртоосы верало, пиды, пе, сыӵе чебер кырӟаз.

- Али но-а сценалэсь кышканды вань?

- Пыдъёс азьло кадь уг куалекъяло ни, но концерт азьын сюлэм пирсэкъя ик. Мон малпамъя котькуд кырӟась учкись азьын шугъяське: кыӵе-мар пӧрмоз, калыклы яралоз-а, уз-а… Урод, артистлэн воксё кышканэз ӧвӧл ке.

- Артистлэн ужез маиныз сокем тӥледыз кыскиз?

- Шонерзэ вераса, мон ноку ӧй малпалля кырӟась луыны. Одӥг мылкыд гинэ йырам бергаз - тӧл сьӧры уйиськон: яке машинаен, яке мотоен. Атае быдэс улонзэ шофёрын ужаз. Солэсь адӟем карыса-а, мар-а, мон но техникаез сокем гажай. Кытчы гинэ атай уг вортты, сьӧраз калъяськисько. Куддыр пичи макелы быдэс машинаез нуыны оскылӥз. Ох, лӧптӥсько вал ук соку!

Ньылетӥ классэ ветлыкум, атае арганэн вуиз. Мыным сётӥз. Шофёр луыны медӥсько вал ке но, та арберилэн жингрес куараез бордаз биниз. Урод, гуртын соку нокыӵе крезьгуръя школаос, кружокъёс ӧй вал. Соин нырысь огнам бирдыоссэ огшоры зӥбылыса пуки, бӧрысь лякыт гуръёсты шудыны дышетски. Собере йырам малпан чилектӥз. Удмуртъёс сыӵе шулдыр шулдыръясько. Соослэсь ик адӟем кароно, шуисько ас поннам. Нуны сюанъёс, солдат келянъёс дыръя коркась корка ветлыло ук. Бадӟымъёслэсь мон но бере ӧй кыльылы. Арганчиослэсь шудэмзэс, гурзэс, тапыртэмзэс йырам кельтыны тырши. Озьы ик ас поннам дыши.

- Мон тодэмъя тӥ гинэ семьяяды кырӟаны-вераны быгатэменыды уд висъяськиське.

- Женя выны арганэз кысканы йӧндыре ик. Ужа со тылпу кысонъя службаын. Спортэз гажа, тужгес куасъёсты. Пӧртэм ӵошатсконъёсын Удмуртимылэсь данзэ утьылэмез вань. Ӟеч тодмо Галина Кулаковаен, Тамара Тихоноваен. Рая апае Краснодар улосэ бызиз, 22 арзэ отын улэ-вылэ ни. Гужемзэ уг чида, лэся, одно дорамы бертэ. Пичиез Коля выны Можгаын анаеным улэ. Озьы ик спортъя мастере кандидат вал. Ма мон ачим но спортэз туж гажасько. Эшшо ик футболэз. Чагыр экран пыр возьматонъёсты огзэ но уг кельтӥськы, нош ваньмыкум пырак стадионэ вамыштӥсько.

- Али ма бурдъя тӥледыз кырӟан гожтыны?

- Мон котьку кырӟанэлы улонысь учырез басьтӥсько. Соин гурез но, кылъёсыз но пыдлось сюлэмысь поттэмын луо. Асьмемын трос пумиськонъёс ортчыло, куддыр синмаськиськом ӟеч адямиослы, паймиськом шулдыр инкуазьлы. Соос ик сюлэме кыӵе ке мылкыд пыӵатыса кельто. Тани асьмеос али пукиськом. Кин тодэ, оло, кенешеммы бере мынам кырӟан кылдоз.

- «Шулдыр ӝытэн» нош кызьы меда пумиськиды?

- Гуртысьтым тодмое та ансамбльлэн концертэз бере Анатолий Ушаков доры мынэм но верам, усточи пияшмы вань шуыса. Бӧрысь ачим А. Ушаков дӥне вуи. Учкиз но, кельши кадь. Озьы «Шулдыр ӝытын» ужаны кутски.

- Собере «Лулгуре» выжиды. Озьы-а?

- Зэм. Выльзэ утчан сюлэмлы маза уг сёт уга. Аслэсьтым кужымме эскереме потӥз: пӧрмыто-а, уг-а, малпасько. Бадӟым тау шуэме потэ Анатолий Ушаковлы. Зэмос быгатӥсь воргорон со. Ансамбльын ужаме мыным туж трос сётӥз: сцена вылын ужан ласянь но, учкисен кусып тупатыны быгатон ласянь но.

- Нош ма пумысен меда Геннадий Ганьков циркысь ужасьёсын огазеяськиз?

- Зэм, милям али ӵыж-выль программамы. Пӧламы кузпалъёс-циркачъёс вуизы. Мон кырӟасько-верасько, соос учкисьёсты палёмыто: пӧртэм фокусъёс, акробат выросъёс возьмато, кӧбератэк пилиськем пияла вылтӥ ветло, ай эшшо тӧдь-тӧдь дыдыкъёссы вань на.

- Капчи-а туала эстрадаын кизили луыны?

- Сокем ик капчи ӧй шуысал. Уг кельшо мыным уксёен сцена вылэ шедемъёс. Шальтыртӥсез вань – кырӟало-верало, гастрольёсы потало. Учкиськод шоразы – ваньмыз ӟеч кадь: вылтуссы но, дӥсьсы но. Но сюлэме кырӟамзы чик уг лякиськы. Сыӵе артист шуонъёсты чагыр экранысь ӵемысь адӟиськом. Учкисез ас палазы карыны уг быгато, соин кемалы уг чидало – ышо-быро. Ӟеч тыршисьлэн ужамез, мон малпамъя, адями сюлэмлэсь ноку палэнэ уг кыль. Шонерзэ вераса, мыным малы ке но воксё кизили кыл уг кельшы. Асме но ноку кизилиен ӧй лыдъялля. Зэм, инбамын соос вань. Таин тырмыт.

Источник:

Ганьков Г. Н. Кырӟан но футбол - висёнэ / Г. Н. Ганьков ; записала О. Никитина // Удмурт дунне. - 2004. - 16 июля. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"