Маркова Лидия Васильевна
Ныло-пиё коркае но...
Лидия Федотова (Маркова). Ӧжытэз тодо ини та нимез. Ас дыраз, 50-тӥ-60-тӥ аръёсы, со яркыт кизили вал. «Италмас» ансамбльлэн ӝужан вакытысьтыз огез усто кырӟась, Удмуртиысь дано артистка, ужысь ветеран, «За трудовую доблесть» медален пусъем мурт, сцена вылын пиштӥз 25 арлэсь кема. Нош Удмурт филармония борды гогыеныз бурмиз: татын огъя ужамез ӧжыт гинэ 60 ар ӧз луы. Таӵезэ шер пумиталод.
Мукабан выжы
Лидия Федотовалы ӵапак тол шорын вордскыны кылдэм: 1926-тӥ арын 15-тӥ январе, Шаркан ёросысь Мукабан гуртын. Таиз бӧрсьы эшшо 4 нылпилы улыны кылдымтэ: пичиысен арам луизы.
Песятайзы Иван Павлович (Лида сое Батя шуылӥз) ачиз юн тыпы кадь вылэм ке но, чол-чол огназ возиськиз: 7 нылпиез пӧлысь огез но мыдыз вазь кошкылӥзы улонысь. Шуисез вал: оло, пе, выжызы каргамын-а… Лида гинэ тани ваньмыз понна улэ, 85 арессэ тырмытыны медэ ни.
Пинал дыр яркыт буёлъёсын пуксе син азе, котькыӵе ӝож мед луоз. 1931-тӥ арын егит семья улэ ни вал Ижын: Лидалы вить арес, вынызлы - кык. Лидия Васильевна тодаз вае:
- Буби ужаз радиозавод вӧзысь колониын охранникын. Со монэ отчы вайылӥз йырсиме ӵышкыны. Ой, кыӵе кышкыт потэ вал мыным: ӝужыт борддоръёс туж зӧк коръёслэсь. Озьы но, ултӥз гудӥськыса, огуе отысь 14 мурт пегӟем. Бубыме соку ик кыл кутытӥзы. Улон патерысьтымы поттӥзы - Ижын улонтэм вылысь уллязы.
Нэнэмы милемды Мукабанэ нуыса кельтӥз. Тӥни соку мон валай, мар со сютэм улон, пушнерен, тӧдьыпотэн кӧттырон. Батя нюлэскысь вайылӥз сисьмем лӥял пызь, соин туж кӧш табань пыжылӥзы.
1936-тӥ арын Федотовъёс доры милиционер пыриз. Документъёс ваем: Василий Ивановичлы яра ни, пе, Ижын улыны. Вуоно араз семья шоркаре кошкиз. Лида Федотова, 28 номеро школаын дышетскись, драмая театрын артистка луыны малпалляз. Островскийлэсь, Чеховлэсь, Горькийлэсь пьесаоссэ лыдӟе, отысь героиняослэсь вераськемзэс, выросъёссэс ас вылаз эскере. Но Удмурт театре сюрес лёгыса, со ӧз вутты, кырӟан ас ӧраз кыскиз. Пастухов нимо клубе хоре ветлэмез-а юрттӥз…
Тӧдьы кызьпу вож куаро но...
1941-тӥ ар. Ижысь 28-тӥ школаез госпиталь интые каризы. 6-тӥ-8-тӥ классъёс картошка октыны келямын вал. Лида эшъёсыныз бертӥзы но - Березин баракын дышетскоды, шуо. Фанераен шуккем кык этажъем юрт со. Но дышетӥсьёс уроке ӧз лыктэ…
Нылаш малпаз вуриськон мастерское мыныны. 12 час ужано - ӧз чида. Клиникае санитаркае интыяськиз, операциос дыръя юрттӥсь луиз. Профессор Иосиф Вениаминович куре, шуом, новокаин - Лида ӝогак вае. Эмчи юа: кытысь латынь кылэз тодӥськод? Лида шуэ: немец букваосын гожтэмын ук. Лаборанткае дышетом, пе. Но нылашлы мукет сюрес пусъемын вал ни. Огпол Лидалэн анаез ужысь бертӥз но шуэ:
- Веразы: ансамбле кырӟасьёсты кутозы. Оло, мынод, нылы?
Лида трос ӧз малпаськы, Тося эшсэ но чортӥз: Русланова кадь, пе, кырӟаськод, кызьы тонэ уз кутэ. Малпамъяз ӧз луы. Лида шедиз хоре, «Руслановаез» кулэ ӧз каре.
Быдӟым ож кекатыны выриз Удмурт кун хорез, озьы ик эктонъя ансамблез но (нырысь-валысь таос озьы нимаськизы, ас понназыгес ужазы.) Лидия Федотова хоре лыктыку, отын чылкак нылкышноос гинэ кылемын вылэм. (Ож кутскемлэсь азьвыл ай коллективын 50-лэсь трос мурт лыдъяськем ни.) Фронт мышкы концертъёсы потасьёсын ӵош вал Лидия Федотова но. Киев, Мариуполь но мукет городъёс, гуртъёс, пуштытэм бервылъёс сюлэмзэ вӧсь каризы. Тодаз лыктӥзы ожын бырем агайёсыз…
Сӧсыр луыса берытскизы ансамбле куд-ог пиоссы. Син азяз пуксе Петя Малых: быдэс ымныраз дары пуштэм пырыос пыӵамын. Андрей Щёчевлы номыр луымтэ кадь: кема аръёс со эктӥз ансамбльын, кивалтӥз «Ижмаш» дворецысь балетъя калык театрен но. Мукет ласянь, ансамбльлэн ӝутсконэзлы юрттӥзы, эвакуацие сюрыса Иже вуэм музыкантъёс. Но тросэз самодеятельностьысь лыктэмъёс вал. Вакчи дыр куспын дышетоно луизы нотаосын грамотаез. Лидия Федотовалы сольфеджио капчиен сётскиз, нотаосыз кутыса кырӟаны ӝог дышиз. Та удыс уго лулызъя-сюлмызъя вал.
Хор пумен-пумен узырмиз пӧртэм тусо-буё, ворекъясь куараосын. Репертуаразы пыризы операысь люкетъёс, кантатаос, ож вакытысь кырӟанъёс, озьы ик удмурт композиторъёслэн Михаил Коробовлэн, Герман Корепановлэн крезьгуръёссы. Хормейстеръёс вошъязы ог-огзэс: Михаил Ложкин, Розита Анкудинова, Анатолий Бабанкин.
Нош куаразы тупам эшъёс кема аръёс ӵоже ӧз люкиськылэ ни. Мӧйы муртъёс тодо на радио борды ик кариськемзэс, шуо ке: кырӟало Анна Рыбакова но Анна Широбокова. Мукет дыръя яло: кырӟало Татьяна Волкова, Августа Матвеева но Лидия Федотова. Кык пӧртэм альт куараосын пӧлэстӥське Лидалэн лирической сопраноез:
Ӵуж бабылес йырсие,
Тӧдьы басма дэреме.
Лыз инмын ке лобасько,
Тонэ ялан малпасько…
«Тӧдьы кызьпу вож куаро но», «Вож бадяр, ой, кадь ик», «Со урамтӥ васькид-а но», озьы ик мукет гуръёсты быдэсъяз трио. Серемес ӟуч кырӟанзы но вал («Кукушка»). Федотова кырӟаз Матвееваен дуэтэн но, берлогес - Нина Талановаен. Огъя вераса, Лидия Васильевна будӥз но юнмаз ансамбльлэн ӝутсконэныз ӵош. Улонысьтыз 25 арез тужгес но шудо аръёс луизы. 1960-тӥ аръёслэн шоразы со УАССР-ысь дано артистка ним басьтӥз. Ансамблен соку кивалтэ ни вал Анатолий Мамонтов.
Яратон туган туж мусо но...
Тӥледыз туж чебер шуылӥзы-а шуыса юамелы Лидия Васильевна лопырскиз:
- Чебер - ӧйтӧд, но ортчыт мусо шуисез вал. Зэмзэ но, лэся, нылъёс пӧлын висъяськылӥ, мыным синмаськисез трос вал. Но мон асме туж зӥбыт вози, возьдаськылӥ.
Аслыз пар Лидия Васильевна шедьтӥз коллективысьтызы ик. Война бере ас ёзъёсыз-пиос ичигес кылемын вал ке но, солы кылдэмез вылэм. Сыӵе учыр тупаз 28 аресаз. Лидия Федотова луиз Маркова.
Пыдкутчан вурон фабрикае пырыса, заказзэс басьтыны лыктэм артистъёс кыло: баянэн кин ке туж шулдыр гуръёс кисьтэ. Ма, ӵапак ансамбльын шудӥсьёссы уг тырмо. Вазиськизы воргоронлы, ӧтизы доразы. Аркадий Иванович ӧз пыкиськы. Бускель Киров улосысь вылэм, фронтовик, ож сюресэз Берлинозь ортчемын.
Кызьы бен уд синйылты кисьмам улмо кадь нылмуртэ? Кылзы тупаз. Озьы бере, нылпиостэк уг луы. 1955-тӥ арын пизы вордскиз, Вася нимазы - ӵужатаезъя но пересь ӵужатаезъя. Куать ар ортчыса, нылзы но вордскиз, тазэ Нелли шуизы.
Утиськисьсы но бордазы улӥз, Лидалэн нэнэез Дарья Васильевна. Сотэк уг луы вал: артистъёслэн улонзы ялан сюрес вылын. Кыӵе ке ёросэ пото ке, нӧд, нюк-гоп шоры уг учко. Огполаз озьы сюрес урдсы но бекмылязы. Со понна калык - Гырон быдтон-а, мукет шулдыръяськон-а - кыӵе шумпотылӥз концертэн лыктӥсьёслы. Совето Союзэтӥ ке ветлоно, «италмасъёс» кык-куинь толэзьлы но ышылӥзы. Нош сюрес вылын мар но уг луы - малпамтэ юмок учыръёс. Лидия Васильевна нош тодаз вае:
- Поездын мынӥськом. Пусъем интые вуим но, гыжом-калом вань чемоданъёсынымы ог 50 мурт потӥм. Команда кылӥськиз: «Ӝоггес берен пыре! Поезд одӥг минут гинэ сылэ». Мыдлань, пе, васькиськеммы. Донгаськыса но мар пыриськом. Шок-пуль вуэ администратормы, черекъя: «Али ик ваське», татын ужаськом!» Ачиз бабыса кылем но милемды пумитамтэ. Соин озьы сураським.
Нылпиоссэ тыро-пыдо будэтон-утялтон понна Лидия Васильевна ансамльысь кошконо кариськиз. 1968-тӥ арын ансамбль «Италмас» нимаськыны кутскиз. Кивалтӥсез Анатолий Мамонтов егит, уж ласянь малпанъёсыз пачыласа пото. Туж жаляз со, огез быгатӥсь кырӟасьсы кошке шуыса.
1970-тӥ аръёсысен «Италмас» кытчы гинэ ӧз вуылы: Чехословакие, Финляндие, Германие, Кореяе, Японие, США-е… Лидия Васильевналэн сюлэмыз чутырак луылӥз ик но, со табере - билет вӧлмытӥсь, концертъёсты радъяны юрттӥсь. Та уже кутскемез уг поты вал: мон, пе, лыдъян-чотанэз уг валаськы. Филармонилэн директорез шуиз: дышод. 20 ар куспын Лидия Васильевна дышиз ик. Зэм, шырыт сямыныз но адямиослы оскеменыз тырмымтэ коньдонзэ трос пол ас кисыысьтыз поттоно луылӥз. Но калыкен ужан ас сямызъя тупаз. Кинэ но ӧз тоды, кинэн но ӧз пумиськылы та чупрес кышномурт. Странаысьтымы туж тодмо ансамбльёс, кырӟасьёс, музыкантъёс вуылӥзы Удмурт филармоние: «Песняры», «Весёлые ребята», «Самоцветы»… Вераса уд быдты. Озьы Лидия Васильевналэн 20 арез черс сямен бергаса ортчиз. 1990-тӥ арын, 64 аресэз тырмыса но, ӧз буйгатскы, эшшо дас ар ужаз на. Кассире но, контролёре но сое пуктылӥзы. Нелли нылыз но филармоние администраторе кариськылӥз, Ӟуч кун театрын но ужаз. Берло арзэ со Сьӧлта ёросэ шонтӥськиз, инкуазен тупаса, пе, улоно. Лидия Васильевнаез одно ик сьӧраз чортӥз: чылкыт омырен, пе, шокалод. Гужембыт бакча убоос вадьсын тыршизы, кӧс гужемен кӧня ке но кушман, каляга, огреч, помидор но мукетсэ будэтон вылысь. Нюлэс но сое ас вотэсаз кыске, губиятэк улэмез уг луы. Куддыр кык-куинь губиен гинэ бертэ ке но, мылкыдыз каньыл: ӧз жадьы, шутэтскиз кадь потэ.
Нош Ижысь квартираяз возьмало яратоно телефильмъёсысьтыз геройёс. Соос пенсионерлэсь улонзэ шулдырто, ас пӧлазы, ас улон ӧразы кыско кадь потэ. Озьы ик та мусо бабуш юн бурмемын нылызлэн нылыз борды.
Источник:
За предоставление материала выражаем огромную благодарность редакции газеты "Удмурт дунне"
