Крестьян пи но узыр мурт

Одӥг крестьян пи базартӥ, пе, поръя. Тани со узыр мурт доры лыктэм но юа, пе:

— Тыныд ужась кулэ-а?

— Кулэ, — шуэм узыр мурт.

— Map ужано тон дорын?

— Пудо возьмано, — вера, пе, соиз.

— Нош пудоед кылзӥське-а пастухлэсь? — выжыятъя, пе, крестьян пи. — Уг кылзӥськы ке, уг мыны.

— Кылзӥське, кылзӥське, — вераны дыртэ узыр мурт. Со пудо возисьлы ёрмыса улэ вылэм ини.

— Ӧз кылзӥськы ке, мон янгыш уг луы, — вера крестьян.

— Ярам, ярам, — шумпотэм узыр мурт. Отын ик дун сярысь но вераськем нерге кариллям.

Та кузёлэн уно скалэз, парсез вылэм. Крестьян пиез скал возьманы косӥллям. Возьма, пе, со скалъёссэ нюлэс дурын. Ӵапак отӥ мукет барин, пе, тройкаен кошке.

— Йӧло-а скалъёсыд? — юа со.

— Туж йӧло, — шуэм крестьян пи.

— Соку вуза мыным, нокызьы но йӧло скал выжы уськытэме ӧз луы ни, — сюлворем барин.

— Вузаны луоз, — шуэм пияш. — Только быжзэ вандыса кельтоно.

— Малы озьы, — паймем барин.

— Озьы ӧд кары ке, скалъёслэн йӧлзы кулэсмоз, — валэктэ, пе, крестьян.

Барин соглаш луэм. Сюрс манет сётэм но скалъёссэ нуэм. Нош пастух куинь вандэм быжъёсыз писпуос борды думылэм.

Собере бертэм кузёез доры. Соиз, пе, юа ини:

— Кытын скалъёсы?

— Верамме ӧз кылзӥське, нюлэскы пегӟизы, — шуэм пияш. — Уд ке оскиськы, мыныса учкы.

Узыр мурт мынэм но адӟе, пе: скалъёсызлэн быжъёссы гинэ писпуос борды шедьыса кылиллям на. Map карод, шонер верам пастухез. Ӵуказеяз со пияшез парсь возьманы лэзем. Возьма, пе, крестьян пи кузёезлэсь парсьёссэ нюр дурын. Ӵапак отӥ нош ик барин, пе, ортче.

— Скалъёсыд ӟечесь вылӥллям, — шуэм барин. — Вуза на мыным парсьёстэ.

Крестьян пи кема малпаськымтэ, озьы ик куинь парсьлэсь быжъёссэс вандыса кельтыны косэм, сюрс манет кисыяз понэм но келям парсьёссэ.

Парсь быжъёссэ нюре куштэм, ачиз огназ бертэм кузёез доры. Соиз нош ик паймыса, пе, юа:

— Кытын парсьёсы?

— Таосыз но мынэсьтым ӧз кылзӥське, — жалямъяськыса вера, пе, крестьян. — Ваньзы нюре выиллям. Уд ке оскиськы, мыныса учкы.

Узыр мурт мынэм но адӟе, пе: нюрын парсьёсызлэн быжъёссы гинэ адӟисько на. Со ӟудэм мар карыны ужасеныз, но вераськемлэсь уд ортчы ук — мар карод, пудоез кылзӥськисьтэм вылэм бере. Пастухезлы кык нунал ужамез понна уксё тыроно луэм на, собере улляса лэзем сое. Крестьян пилы со ик кулэ вылэм.