Ванюшев Василий Михайлович
Удалтэмын ке, удалтэ
- Василий Михайлович, литератураез эскерон удысын тӥ нырысетӥез удмурт доктор. Филология наукаын кыӵе инты басьтэмдэс улон эшшо возьматоз ай. Нош асьтэос кызьы малпаськоды, мар выльзэ усьтӥды ни тӥ удмурт литературоведение понна?
- Нырысь ик вакчияк верало одӥг учыр сярысь. Удмурт литературалы сю ар тырмонэз Москваын пусйыку, Коста Хетагуровлэн юбилей ӝытаз ветлӥм. Вис дыръя дорам кык сьӧдэсь воргоронъёс-осетинъёс лыктӥзы. Юало, кин, кытысь. Удмуртиысь, шуисько, уд тодӥське. “Расцвет и сближение”? Тодӥськом, тодӥськом, шуо. Москваын уло вылэм, академикъёс. Давай ӝоггес, пе, докторскойдэ гожты, ми ВАК-ын, аттестацияя комиссиын...
Зэм но, книгае быдэс Россиын тодмо луиз. Георгий Ломидзе, туж бадӟым тодосчи, “Литературной газетын” “Шаги в завтра” статья печатлаз, мон сярысь но гожтӥз. Россиысь, СССР-ысь писательёслэн ӧтчамъёсазы докладъёсын мынэсьтым нимме поттылӥзы. Со монэ бурдъяз, лӧпкытӥз. Аспирантураын туж шуген тема бырйимы. Басьтӥ - “Национальное и интернациональное в удмуртской и других младописьменных литературах”. Тӥни озьы, нырысь ик вылез луиз Поволжьеысь литератураез ӵошатыса, типология ласянь эскереме. Учки, мар огъяез, мар пӧртэмез. (Чувашъёслэн, поръёслэн таӵегес эскеронъёссы вал ни.) Озьы шеди Поволжьеысь аспирантъёслэн ужъёсазы, источник луыса.
Но тазьы гинэ нимы ӧй сюрысал докладъёсы. Со вакытэ - 60-тӥ аръёслэн пумазы - 80-тӥ аръёслэн кутсконазы - туж бадӟым дискуссия-эчешон вал национальной но интернациональной пумысен. Мон ӵапак со тулкым вылэ тупай. Соку кык ваче шуккиськонъёс вал. Огез, шуом, Виктор Чалмаев, ӟуч национализм понна гинэ черекъя. Мукетъёсыз, Дагестанысь Ахед Агаев кадьёс, интернациональноез национальнойтэк ас кожаз адӟо. Мон соиныз, таиныз гожтэт пыр кусып возьылӥ. Юрий Суровцев, Россиысь одӥгез валтӥсь критик но литературовед, гожтӥз: “Дэмласько та книгадэ Россиын поттыны”. Чингиз Гусейновез шедьтӥ Москваысен, со шуиз: “Юнме дырдэ эн быдты, выльзэ гожъя”. Малпасько, вылӥ верам книгаям мон утьыны быгатӥ национальной луисьсэ, мар вань литератураямы. Со бордын но, дыр, выльзэ сётэме.
- Тӥ “Расцвет и сближение” книгалэн емышъёсыз сярысь гинэ верады ай. Нош берло аръёсы, ми тодӥськом, кӧня кужымдэс сётӥды Григорий Верещагинэз поттон-ӝутон уже.
- Зэм, берло дыре мон кыдёкегес кошкись выжыосмес бугыръясько. Эшшо но пыдлогес пырыны кулэ: шуом, кин ужаз нырысетӥ удмурт грамматикаез кылдытӥсен Пуцек-Григоровичен ӵош...
Нош Верещагин борды кутскыса, со ӵошатон ужме азьланьтӥ: мар сётӥз та адями асьме культурамылы, кыӵе муртъёс мынӥзы соин артэ Урал но Волга вискын. Шуом, комиослэн Иван Куратовзы, Калистрат Жаковзы, мордваослэн Макар Евсевьевзы, чувашъёслэн Иван Яковлевзы - ваньзы огкадесь, но маин ке но пӧртэмесь. Быдэстоно ужпумзы одӥг вал: ӟуч географической общество пыр, Ильминскийлэсь, Пуцек-Григоровичлэсь кутскем сюрессэс азьланьтыса, та пал калыкъёсты ас кылынызы дышетон, ас шаерзы сярысь тодонъёс люкан. Озьыен, таосын артэ асьме Григорий Верещагинэн пуктыса, Урало-Поволжьеысь лыдӟисьёслы усьтӥ солэсь значенизэ, аспӧртэмлыксэ. Мар чотын, кыӵе амалъёсын кылдэ чеберлыко литература. Фольклорез вератэк...
- Тӥ вераськоды печатьын потӥсь литература сярысь. Нош мар чотын со кылдӥз?
- Григорий Верещагинъя со умой адӟиське. Солэсь этнографияя очеркъёссэ синкретичной текстъёсты сямен учкиськом: татын ваньмыз ӵош мынэ, прозалэн но, драматургилэн но, поэзилэн но инъетсы кылдэ. Нош мукет ласянь, вӧсяськон книгаос, берыктэмъёс литературалы ӝужаны луонлык сёто. Расим Юсуфов, философ но литературовед, та ужме трослы ӝутӥз, Верещагинэз, солэсь интызэ адӟиз быдэс дуннеысь историлэн, литературалэн “карта” вылысьтызы.
- Нырысетӥ удмурт писательлэн, тодосчилэн, югдытӥсьлэн вордскемез дырысен туэ 150 ар тырмонэз пусйиськом. Солэсь кельтэм ужъёссэ калыке вуттон, печатлан кызьы радъямын?
- Куать том ялӥм вал: “Вотяки... (дилогия 2 том), этнографияя статьяосыз, фольклоръя бичетэз, литературая сочинениосыз но лингвистикая ужъёсыз. Уж вылын ке, малпаммы трослы паськытаз. Ваньмыз люкаське дас книга. Ньылез со потӥз, туэ эшшо куиньзэ печатласьком, 2002-тӥ арын йылпумъян вылысь.
Шонерзэ ке верано, ми, учёнойёс но, Верещагинэз ӧм усьтэ на. Солэн рукописьёсыз, асьме дорын сяна, кыллё на Санкт-Петербургын, Кировын, Архангельскын, Казаньын - та архивъёсы ветлоно ай.
Тодмо ужъёсыз пӧлын - “Вуж мыж” (“Ранее обещанная жертва”) повесть. Тазэ печатламы ни куинетӥ томлэн кыкетӥ книгаяз, этнографияя очеркъёсыз пӧлын. Верещагин асьмелы кельтӥз ньыль поэма (кыкез удмурт, кыкез ӟуч кылын), куать пьеса (ӟуч кылэ берыктэмъёсыз вань), кылбуръёс, веросъёс. Та берлоосыз - фольклор но литература вискын - информантъёс вылэ пыкиськыса гожъямын, удмурт кылын оригиналъёсыз кыльымтэ. Шонерзэ ке, котькуд верась мурт - аспӧртэм автор, сое ас кожаз печатланы луоно. Та вылын но тӥни адӟиське, кызьы кылдэ художественной литература.
- Василий Михайлович, ойдолэ мукет удыстэс эскером. “Кенеш” журналлэн кылем арын потэм берпум номеръёсаз печатламын тӥляд но Михаил Худяковлэн “Дорвыжы” эпосты. Тӥляд но - шуыны луэ: удмурт лыдӟись доры нырысь ик тӥ вуттӥды. Удмурт кылэ туж чебер берыктэмдылэсь азьло та эпослэсь кылдон мугъёссэ, выжыоссэ эскериды...
- Зэм. Студентъёс али шуо: та дырозь ум тодӥське вал, эпосмы оло вань, оло ӧвӧл... Худяков та эпоссэ удмурт источникъёсъя гожтӥз, миссионеръёс - Герд, Верещагин, Мункачи, Первухин вылэ инъяськыса. Мынам ужпуме вал: сюжетъёсыз капчиенгес лыдӟисьёс доры вуттыны, яркыт карыны. Эпосын калык сямъёсъя улон-вылон возьматӥське ке, татын, чеберлыко эпосын, адямиослэн кусыпъёссы, ваче вуонъёссы но усьтӥсько. Эскере ай Эбгаез ик, кыӵе кужмоен, сямын но тусын-буен оскымон возьматэ сое Худяков. Но мадись мурт солэсь выросъёссэ, ассэ воземзэ умойтэмен лыдъя. Нош кыӵе бадӟым урок сётэ мадись мурт удмуртъёс книгазэс сутэм пумысен... Удмуртъёс асьсэос ик бӧрдӥзы. Кылдысинлэн туж вожез потӥз: удмуртъёс сётскизы уга. Зэмен но, кыӵе бадӟым урок...
- Асьтэос оскиськоды ик-а, туж вашкала удмуртъёслэн книгазы вылэм шуыса?
- Талы оскыны луэ но, уг но. Археологъёс туй вылэ гожъяськемез шедьтыны осконэн улӥзы. Но та дырозь ӧз шедьтэ на. Мон сямен, пусъёсын валэктонъёс вал ик, дыр. Сыӵе “книгалы” оскыны быгатӥсько.
- Василий Ванюшев - тодмо удмурт кылбурчи но. Кызьы соос тупало - наука но поэзия?
- Наука - нуналмысь сьӧд уж, няне. Поэзия - шумпотон. Куддыр “запой” луэ, асме кутэме уг луы ни, наукаез “сэрпалтӥсько”. Гожъяськон, творчество пыр аслыд шумпотон басьтӥськод, аслыд ачид сое кылдытӥськод. Мукет дуннее пырыса улӥськод кадь. Сӥзьыл - тулыс сярысь, толалтэ гужем сярысь гожтӥське. Кылбуръёс ас сяменызы, капчиен лыкто, бурдъёс кылдыто. Тема сёто ке, кырӟанлы кылъёс но шуг ӧвӧл гожтыны. Дась гуръя - секытгес. Та ласянь ми эшъяськиськом Евгения Копысоваен. Пӧрмиз кадь потэ хорлы “Инмаре-кылчинэ” кырӟанмы-куриськонмы, “Азбука любви”, “Удмурт кыл”, “Пумиськон”, “Италмас”...
Поэма бордын ӝот-ӝот пуконо луэ. “Меми гожтэт” поэмаме Малеевкаын писательёслэн творчествоя юртазы гожъяй. Со зэмос учыръя кылдытэмын. Мемие, война вакытэ ньыль пиналъёсыныз кыльыса, атаймылы ивор ысъян понна, керосин лампа ӵындэмъя, печатной букваосын гожъяны дышетскиз. Та поэмаме редакторе Михаил Федотов учкиз но визькенешъёс сётӥз, тау солы.
- Котькинлэн сямен ик, синмаськон бордысен но вордско, дыр, кылбуръёсты? Ӵем-а синмаськылӥськоды? Кыӵе нылкышноос кельшо?
- Ӵем синмаськисько. Тросэзлы со сярысь уг но вераськы. Тани одӥг пол автобусысен одӥг нылкышно бордысь синме воштэме ӧз луы ни. Картэз сторож кадь вал. Со кышномурт тодыса но ӧз вутты, мон сое кылбурам кельтӥ ни шуыса.
Лек нылкышноосыз уг яратӥськы. Лэчыт кусыпъёсы вуонтэм понна, соослэсь палэнскисько. Мон Водолей уга. Водолей урод адямиослэсь пегӟыса утиське.
- Кызьы учкиськоды ушъямзы шоры?
- Ушъян кылъёсыз серем улсы басьтӥсько. Виктор Туганаев профессор мыным шуылэ: “Тон туж ӟеч адями но, одӥг тырмымтэед вань: Алнаш районысь ӧвӧл”. Ачим но маке серемессэ утчасько.
- Тӥледлы ӵем дыръя верало, егит адскиськоды шуыса. Кыӵе “секретты”?
- Ӵукна вазьгес султыса, бызисько тэле. Иж шур дурын, пужымо ягын 40-50 минут зарядка лэсьтӥсько, турникын ӝуткаськисько. Кезьыт вуэз яратӥсько. Москваын докторской диссертациме гожъян дыръя, одӥг ар морж вал. Азьлогес Ижысен люкмесэ пырай. Куасэн нырысетӥ разрядэ вань. Коньки амалэн тымет вылтӥ ветлыкум, моржъёсыз синйылтӥ но эшъяськи.
Йогъёслэн упражнениосынызы вырисько. Шунды ӝужан пал религия, кришна тунсыко потэ. Хатха-йога адямиез дышетэ инмар дорозь ӝутскыны. Тон сузя мугордэ: макем чылкыт мугорыд, сокем вылын лулыд.
Самовнушение пыр, асме аслым оскытыса, эмъяськыны быгатӥ. Кылын. Педучилищеын дышетскыкум, сюлэм висёнме шедьтӥзы вал. Гадь дорозь вуын чорыг кутылыса ветлылӥм угось. “Сюлэмлы но тренировка кулэ” шуэмысьтызы, мугорме кыдатон борды кутски.
- Со ик юрттӥз, дыр, тӥледлы секыт висёнъёстэс вормыны...
- Озьы, дыр. 1970-тӥ арын ог сю лемтэй бичай бордысьтым. Куртчиськемез пӧлысь огез висён кузьмаз. Ӝыны ар погылляськи. Ворми. Со дырозь кезьыт вуэн пыласькылӥ ни вал. Берлогес шыр висён кутӥ. Толэзь мында кылли... Ньыль полэс мынам вордскем нуналы. Святой Василий вылэм, Вуж Выль аре нуналзэ пусъё. Туж дышетскем адями, философ.
- Выльысь вордсконо луысал ке, та сюресэз ик бырйсалды-а?
- Та сюресэз ик, дыр... “Комсомолец Удмуртии” газетлэн редакторез луыса вуёми. Флор Васильев та газетлэн удмурт вариантэныз кивалтӥз соку, Герд, Петров сямен ик, туж сюлмаське вал будӥсь адями сярысь. Тынад, пе, очеркъёсыд исследовательлэн кадесь пӧрмо. Тӥни озьы мон Москвае МГУ-е мынӥ... - Бадӟым сюрес ортчемын. Табере тӥ наукаосъя доктор, научно-исследовательской институтын директорлэн наукая воштӥсез, университетын литературая бадӟым кафедралэн кивалтӥсез. Кызьы вуттӥськоды со быдӟа ужъёсыз нуыны?
- Одно ик планъёс пусйылӥсько: быдэс арлы, арнялы, нуналлы. Асме чаклан дневнике но вань: кытӥы ке висе-а, маин эмъяськи, кыӵе кӧлӥ... Туж трос малпанъёсме ӧй быдэсты на. Али университетын уно дыр быре.
- Яратонтэм ужды?
- Бюрократ сямен бумагаос гожъян. Октябрьысен январёзь - куинь полэс отчёт...
- Озьы ке но, тӥ туж удалтэм адями, мон шуысал. Сыӵе муртлэн ужъёсыз но удалтыны кулэ. Нош табере - газет бамын тӥледлы, зэмос джентльменлы, шуд усе асьме нылкышноосыз ӟечкыланы. Кыӵе чуръёс кузьмаськоды?
- Яратэ, нылъёс,
Яратон мурттэс -
Яратон сӥньыс
Мед вуттоз артэ.
Яраты, меми,
Вордэм нылпидэ,
Яраты, нылпи,
Юн уть мемидэ!
Яратэ ваньды, -
Ваньды, котькудӥз!
Яратон бордысь
Та дунне кылдӥз.
- Тау!
Источник:
Ванюшев В. М. Удалтэмын ке, удалтэ / В. М. Ванюшев ; записала Т. Чернова // Удмурт дунне. - 2001. - 10 марта. - С. 6, 11. - (Удмурт кизилиос).
За предоставление материала выражаем огромную благодарность редакции газеты
"Удмурт дунне"
