Тексты пчеловодческих песен

1. Жингыр-жингыр карыса лыктӥд-а, попонэ,

Льӧмоке, сюсьтоке, бурдоке,

Бубыеныд, попонэ,

Та шоры, попонэ!

Нуназеен вискын-ӝытазеен вискын кузёдэ иземе кельтыса,

Попонэ, та шоры!

Дуно-дано ыродняосыныд данъялляськымон мед луод,

Попонэ, та шоры!

Ӝужыт-паськыт гурезь йылъёстӥд,

Шулдыр-чебер писпу йылъёстӥд

Жингыр-жангыр карыса ветлӥд-а?

Попонэ, та шоры!

Иткулат, Селта ёрос ИРЛИ:ФАП-29:№ 81

2. Ожонэн-пиричаен шор-шор карод ке — та шоры,

Вазь ке вачылъёсыд гажалод ке — та шоры!

Зарезь ке тупалъёсыз кушкод-быръёд ке — та шоры!

Камӟоз ке борддоръёсты кушкод-быръёд ке — та шоры!

Дукъя ке коткан мувыръёстӥд кушкод-быръёд ке — та шоры!

Коньы ке бызён вугалъёстӥд кушкод-быръёд ке — та шоры!

Кызьпу ке сурд улъёстӥд кушкод-быръёд ке — та шоры!

Беризь, дай, зангаръёстэ кушкод-быръёд ке — та шоры!

Лемо ке бурдоеныд лыктод ке — та шоры!

Сюсьто ке бубыеныд лыктод ке — та шоры!

Айы ке пусъем сиропуэд — та шоры!

Бушен мынон дыръя тыроен бертыны карод меда?

Ньыль эро но ӝӧк вылэ пуктыны чечыдэ сётод меда?

Ӟеч калыкен сиымон-юымон сётод меда?

Юмга-Омга, Малмыж у., Вятка губ. БМ, 1887:317-318

3. Дун-дун, дун-дун, дун-дун.

Пужымам тубисько, подманы тубисько мон.

Подманы тубисько мон.

Мушъёсы, лыктэ али татчы, жингыр-жингыр карыса.

Ува ёрос ПП, 1960:43

4. Донӥе, донӥе, дон папае, дон папае.

Шундые-Куазе, шундыё куазьдэ сёт.

Пилем кадь карса потысалыд ке. Донӥе, донӥе.

Азвесь бурдыныды, зарни пубыеныды

Лобӟыса-лобӟыса потысалды ке.

Донӥёсы, донӥёсы.

Кик-кик кароз зарпапаосы*,

Кик-кик кароз, кок-кок кароз.

Торникен-четверникен соосыз кутэммы луысал ке.

Донӥе, донӥе.

Кыз йылысь кыз йылэ лобӟозы соосыд.

Кыз йылысь кыз йылэ лобӟемзэ кутэме луысал ке соосыз.

Донӥе, донӥе.

Вордымтэ нуныёсы кыре потӥзы ини табере.

Вордымтэ нуныёсыз кутэме луысал ке.

Позыртӥсьса-позыртӥсьса потысалды ке, милям но возьманъёсмы.

Донӥе, донӥе.

Гуӵин-Бодъя (Гучин-Бодья), Кизнер ёрос РФ УИИЯЛ, 447(1):96

5. Быз-быз гинэ карылоз мушъёсыд,

Лыс ултӥ, куар ултӥ чечызэс утчаку.

Ми, соослы шумпотыса, юиськом кырӟаса.

Лобыло ук, лобыло ук мушъёсыд,

Бурдъёссэс но уг жаляло.

Сизьым иськеме но мыно,

Ческыт гинэ чечыоссэс утчаса.

Жингырто ук, жингырто ук муш мумыосыд,

Ас гинэ нылпиоссэ яна поттыкуз.

Бадым Сибы (Большие Сибы), Можга ёрос ФЭШУ-75, т. 12:30

6. Гур-гур гинэ куара ук, ой, мар куара?

Сяська вылэ пуксем но(й) муш куара(й),

Сяська вылэ пуксем но(й) муш куара(й).

Гур- гур гинэ куара ук, ой, мар куара?

Туннэ мынам ӟеч калыклэн куараез,

Туннэ мынам ӟеч калыклэн куараез.

Тӥ но эрки, эшъёсы, ми но эрки,

Вордӥсь анай-атайёс вань ӵоже,

Вордӥсь анай-атайёс вань ӵоже.

Тӥ но коштан, эшъёсы, ми но коштан,

Кисыямы ваньбуръёс вань ӵоже,

Кисыямы ваньбуръёс вань ӵоже.

Возьпум (Аравазь-Пельга), Кuзнер ёрос .