Ипатова Светлана Петровна

Тыл кадь пӧсь

Чырткем удмурт нылкышно Светлана Ипатова ассэ пӧртэм удысъёсын эскериз ни. «Танок» ансамбльысь артистка, егитъёсын ужась специалист, школаын директорлэн воштӥсез. Светлана Петровналэсь ужамзэ Таукаронэн дунъяз Удмуртиысь Егитъёсын ужанъя министерство, Данъян грамотаен – Ижысь дышетонъя управление. Табере Светлана Ипатова – Удмуртиысь огезлэн тодмо коллективлэн – «Таноклэн» – чеберлыкъя кивалтӥсез.

Возьдаськонэз тодытэк

– Мон вордски Алнаш черкогуртын. Пичиысен яратӥ кырӟаны. Анаелэн Галина Лаврентьевналэн но шулдыр куараез, Дарья песяе но пыр кырӟа вал. Мон будэмын ӵапак песяй вӧзын, солэсь тодэ ваёнъёссэ-кырӟанъёссэ кылзыса. Песяй Варӟылысь, но котьку милемын Алнашын улӥз. Атаелэн Пётр Михайловичлэн выжыез озьы ик Алнаш ёросысь Котнырысь. Монэ нылпи садысен ик синйылтӥз тодмо крезьгурчи Николай Постников. Соин пӧртэм смотръёсы, ӵошатсконъёсы ветлылӥ, нимаз кырӟаны луонлыке вал. Туж юрттӥз мукетыз дышетӥсе – Людмила Корнева. 9-тӥ классысен ни, дыр, со мыным валэктылӥз крезьгуръя теориез, ӧтчалляз кырӟанъя пӧртэм ӵошатсконъёсы. «Кин луоно?» юанлы одӥг гинэ малпанэ вал – кырӟась.

Школа бере пыри Ижысь культурая колледже, калык творчествоя отделение. Дышетсконме быдтӥ но «Италмас» ансамбле куриськыны лыктӥ. Кивалтӥсез Анатолий Мамонтов монэ кылзӥз, учкиз но... ӧз куты. Кин ке верась сюриз: «Танок» ансамбле, пе, удмурт кылэз тодӥсьсэ кырӟасез утчало. Озьы тупаз, кивалтӥсьлы Фёдор Ивановлы мон кельши. Сӥзьыл ужаны лыкты, шуиз. Нош гужем Алнаше «италмасъёс» концертэн вуиллям. Анатолий Мамонтов, пе, клубын ужасьёслэсь юам: кытын ни ай Сидоровады? Сидоровамес «Таноке» кутӥзы, шуиллям. Озьы «Италмасэн» кусыпъёсмы ӧз тупалэ.

– Нош «Танок» кызьы пумитаз?

– О, мон татчы бадӟым амбициосын вуи. Куриськыны пырыкум ик, юай: татын-а солистъёсты утчало? Артистъёс шорам мынязы. Уго «Танокын» валтӥсь солистка вал Фёдор Ивановлэн нылыз – Наталья. Ансамбле вуыкум, 2005-тӥ арын, солэн данэз туж вылӥын вал. Арлы быдэ «танокъёс» кунгож сьӧры гастрольёсы поталлязы. Егит артистъёс вожмаськыса «Таноке» курисько вал. Мон но ансамблен ӵош вуылӥ Сирие, ӵапак со интыосы, кытын али война мынэ, нош ми ветлӥм ай чебер но куашкатымтэ вашкала городъёстӥ. Собере Европаын концертъёсын тур вал, потамы Швейцарие но Францие.

3 ар тазьы ужай но, мылкыды пуксьыны кутскиз. Малы ке шуоно мынам нимаз кырӟаме потэ ни – мон ведь солистэ лыктэмын. Тупась кырӟан шедьтыса, сое возьматӥ «Танокысь» крезьгуръя кивалтӥсьлы Иван Вахрушевлы. Собере ини Фёдор Ивановичлы но лушкем ужаммес шараямы. Ярам, кӧня ке концертын нимаз кырӟаны лэзиз. Собере нош ик вис. Соку мон ансамбльысь кошки.

Уката ик «Танокын» дыръям заочно вылӥ образование басьтӥ Москваысь культурая но искусствоосъя университетын. Татын дышетскон удысэ мукетгес вал – социально-культурной уж, егитъёсын ужан политика. Мон удысме чутрак воштоно кариськи: Егитъёсын ужан политикая министерствое вуи. Татын сыӵе тунсыко вакыт вал. Мон егитъёсын но ужай, асме но утчай.

– Кылсярысь, 2010-тӥ арын «Чеберина» конкурсэ пыриськид.

– Мыным асме эскерыны туж кулэ вал. «Чеберинаын» валтӥсь коронаез ӧй басьты ке но, Мусокай луи. «Чеберина» дорозь пыриськи «Музыка в стиле этно» ӵошатсконэ. Нош 2012-тӥ арын кылӥ «Элькуновидение» ӵошатскон сярысь. Малпасько, вордскем районэлэсь данзэ утьыны лэзёзы меда? Жингыртӥ Алнаш администрациысь культурая управлениезлэн кивалтӥсезлы Наталья Антоновалы.

– Эн дырты, малпаськоно ай, – мылкыдме пуксьытӥз Наталья Васильевна. Ярам, возьмай кӧня ке. Собере чидан ӧвӧл ни. Нош ик жингыртӥсько. – Ярам, кырӟа, – эрик сётӥзы Алнаш ёросын. Мон бызьыса сямен Сергей Ксенофонтович Кириллов доры мынӥ. Крезьгурчи мыным ӵектӥз Лариса Мардановалэн кылъёсызъя гожтэм «Доре сюрес» кырӟанзэ. Но «Элькуновидениын» дунъясьёслы ӧз кельше мынам номерам эктӥсь нылъёс – соос вакчи шортыен сцена вылэ потӥзы. Удмурт учкисьлы та валантэм, пе. Озьы мон финалысь пезьдӥ, куараме но, кырӟанэз быдэстэмме но ушъязы вал ке но. Но ӵапак со дырысен эшъяськи Сергей Ксенофонтовичен.

Репертуарам пырись 10-лэсь трос кырӟанъёслэн авторзы луэ Сергей Кириллов. Мыным шуыса со гожтӥз «Муар дэремен» кылбурлы крезьгур. Та кырӟан мыным туж кельше. Кылъёсыз Лидия Нянькиналэн. Пуштросэзъя романслы матын. Мукетыз яратоно кырӟанэ – «Йыгаськид ке ӧсам». Кылъёсыз Сергей Матвеевлэн. Мыным кельше Сергей Ксенофонтовичлэн бырйиськыса ужамез, солэн кырӟанъёсыз сцена вылын тэтчан понна малпамын ӧвӧл. Котькудӥзлэн пуштросэз вань. Туж паймымон пӧрме. Сямыя мон тыл кадь, пуксёнэз валасьтэм, заман ӟырдасько, пуштӥсько. Нош кырӟасько гань-гань, мур пуштросо кырӟанъёсты – соос малпаськыто, буйгато.

Шыпыт улон

– Таӵе темпераментэн нылмуртлэсь удмурт пиос кышкало вал, дыр. Кема бырйиськид-а, кинлы бызёно шуыса?

– Картэ Глазовысь. Нош нырысьсэ со монэ Алнашысен синйылтэм. Ӵапак «Таноке» кошкон азям Алнашысь культурая юртын методистын ужай. Нош 2000-тӥ аръёсы вань культурая юртъёс «вуз карон центръёс» вал. Ми доры но Ижысь вузчиос ветлӥзы. Соос пӧлын Костя но вылэм. Со мон сярысь юалляськем но, пумитаз вераллям: ӝоген, пе, Светамы Иже ужаны кошкоз. Иське, мыным, пе, мед жингыртоз, улон инты шедьтыны юртто, озьы шуыса, Костя телефонзэ кельтэм. Мон, конечно, ӧй жингырты. Сӥзьыл городэ кошки, интыяськи, патер шедьтӥ. Нош вуоно гужемаз шӧдтэк шорысь базарын пумиським. Тусыз туж тодмо кадь, нош кин шуыны уг тодӥськы. Базарысь потӥсько но, со монэ дугдытэ: – Тӥляд нимды Светлана ук? Вае келяло, мон машинаен. – Мон кыдёкын, Малиновая гора палан улӥсько, – малпасько сокеме мынэмез уз поты талэн. – Мон но сопалан ик улӥсько, – шуэ пумитам. Зэмзэ но ӧз алдаськы, одӥг палан ик улӥськомы вылэм. Со пумиськеммы дырысен Костяен ӵош луим, сюан карим. Соку мон «Танокын» ужасько на вал. Гастрольёсы ветлонмы шоры Костя кырыжгес учкылӥз. Солы валантэм вал, малы пинал кышно быдэс толэзьлы кытчы ке кошкыны быгатэ. Соин но «Танокысь» кошки. Костя кузпалы риелторын ужа. Гитараен шудэ, чебер кырӟа. 4 аресъем Вова пимы вань. Ижлы матысь гуртын музъем басьтӥм, корка пуктӥм.

Уж вискын

– Иське, лад-лад, оскымон воргорон вӧзын тон но гань-ганьгес луид?

– Семья кылдытыса, мон асме пӧртэм удысъёсын эскерыса вуттӥ. Егитъёсын ужан политикая министерствоын 7 ар тырши. Собере та структураез мукет министерство борды огазеязы, озьы ужтэк кыли. Ӧтизы 101 номеро школае директорлы воспитательной ужъя воштӥсе. Та школаын дышетско пыд-кукенызы курадӟись нылпиос. Нош ик выль удыс. Мыным ваньмыз тунсыко вал. Татын но 7 ар мында ужай. Собере нылпи вайи. Озьы ке но кусып возисько вал «Танокысь» нылъёсын. Пал пельыным кылӥ, ансамбльын воштӥськонъёс луиллям шуыса, азьвылзэ кивалтӥсез воштӥз выль мурт.

Огпол гужем концерт дыръя адӟи филармонилэсь директорзэ Алексей Фоминэз («Танок» филармонилэн бурд улаз пыре), дораз матэктӥ но верай: – Алексей Юрьевич, «Танокын» кырӟаме потэ. – Лыкты, – шуэ пумитам Алексей Юрьевич. Сӥзьыл дышетскон ар кутскиз, мон ӧй вуы ужысь кошкыса. Собере филармонилэн кивалтӥсеныз Алексей Фоминэн артэ огаз концертын тупам. – Алексей Юрьевич, басьтоды на-а? – юасько. – Ваньмыз тынад кияд. Лыкты худруке, – вазе пумитам кивалтӥсь. Мон, конечно, туж зол пайми, огласянь – бурдъяськи. Но сюлмаськи, мар шуоз картэ: куке но солы валантэм вал гастрольёсы кошкылонмы. Соин Костялэсь юасько: – Мон культура удысэ берытскыны малпай. Кызьы та шоры учкод? – Мын, улоно туннэ нуналэн. Оло, мукет дыръя сыӵе ӵектон но уз вуы ни, – вазиз картэ. Озьы кылем арын декабре выль пуконэ пукси. Табере ужан интыям сюлмыным но, йырыным но выйи.

Выль синмын

– Тросэз учкисьёс понна «Танок» ансамбль герӟаськемын 1 фамилиен. Кивалтӥсез Фёдор Иванов, валтӥсь солисткаез Наталья Иванова. Выль кивалтӥсь сямен кызьы ужаны чакласькоды?

– Али аръёс ортчемъя мон валаны кутскисько «Таноклэсь» нырысетӥ кивалтӥсьсэ. Огласянь, со уг сёты вал мукет артистъёслы усьтӥськыны. Мукет ласянь, мон валасько но кадь Фёдор Ивановичез. Кивалтӥсь возьма артистлэсь будэмзэ, юнмамзэ. Сцена вылын ваньмыз капчи но чебер луыны кулэ: куара но, тус но, астэ возён манер но. Нош егит дыръя ваньзэ ӵош соку ик возьматэм потэ. Соин али «Танокын» уз луы одӥг солистка. Милям али 5 кырӟасьмы: Екатерина Смердова, Софья Булдакова, Альфия Русских, Олеся Микрюкова но Ксения Шудегова. Куараоссы золэсь, чебересь, котькудзы нимаз мед кырӟалозы кадь потэ. Мон ачим но сценалэсь уг палэнскиськы, соин 6 кузя но кырӟаны потаськомы. Эшшо вань на эктӥсьёслэн группазы – татын 9 нылъёс но 6 пиос. Озьы ик оркестрмес возиськом. Но таяз 4 мурт гинэ нуналмысь ужа – мукетъёссэ огдырлы кутылӥськом, концертъёсы потаку.

Мынам улӟытэме потэ «Таноклэсь» азьвыл аръёсы кылдэм сямзэ – дунне котыръянзэ. Малы ке шуоно таӵе амал коллективлы азинскыны, выльзэ адӟыны юрттэ. Оло, кунгож сьӧрын тодматскем коллективен тон ноку но уд ни адскы, нош со дыръя кылдэм мылкыд котькулы тодэ кыле. Сыӵе ужрадъёсысь бурдъяськыса бертӥськод. Туэ ми чакласькомы вал Болгарие фестивале потыны. Но коронавирусэн валче малпамъя ӧз пӧрмы. Оло, ӵапак милемлы дыртытэк ужаны вис луиз. Малы ке шуоно кивалтӥсь но выль, артистъёсты но выльёссэ люкам. Милемлы ог-огенымы эшъяськоно на, рос-прос коллектив луоно. Уго кунгож сьӧры потон – со нырысь ик кыл кутон, ми Удмуртиез гинэ ум, быдэс Россиез возьматӥськомы.

– Кызьы самоизоляциын улон артистъёслэсь улонзэс но ужзэс воштӥз?

– Туэ асьме республикаямы 50 мында концертъёс ортчыны кулэ вал. Коронавирусэн сэрен гастрольёсы ӧм поталэ. Озьы ик гужемлы бадӟым концерт дасяськомы – сое но учкисьлы ӧм на возьматэ. Дорын пукон артистъёслы туж секытэн сётӥськиз. Ваньмыз сямен ик шуо: жуммим ини. Мынам мукетгес югдуре: нимаз коркан улӥсько бере, музъеме ӧжыт ӧвӧл – 15 сотка. Соин быдэс тулысэз бакчаын ортчытӥ: гудӥськи, мерттӥськи. Ужан сямен выль малпанъёс йыре лыкто, тазэ кырӟанэз тодэ вайиськод, мукетсэ. Собере нош ик огнам кырӟаме потыны кутскиз. Самоизоляциын выль ужъёсты быдэстыны дыр сюриз.

– Туэ «Таноклы» 30 ар тырме. Кызьы малпаськоды та юбилейдэс пусйыны?

– Ми кутским ни та уж борды. Тани оркестрысь ударникмы Валерий Хитрин соцсетьёсын группамес нуэ. Отчы со архивысь видеоужъёсты пуктылэ. Нош съёмкаос туж трос люкаськемын, мукет нокытысь соосты уд адӟы. Малы ке «Танок» ворсаськемынгес вылэм та ласянь. Али югдурез воштӥськом, туала улонъя тупатскиськом. Соин учкисьёсмылы но мӧзмыны ум сётӥське. Дасяськиськом сӥзьыл концертлы, луозы выль кырӟанъёс но эктонъёс. 30 ар – ансамбль понна со туж йӧно лыдпус. Но кыл кутон но зол.

Улэп крезьгур

– «Танок» сылэ Удмуртиысь дано «Италмас» но «Айкай» коллективъёсын артэ. Озьы ке но маин кысконо учкисез туала вакытэ?

– Учкись понна нюръяськон асьме республикаын туж зол. Азьло «Танок», «Италмас», «Айкай» кылъёсын но калыкез концертэ люканы луэ вал ке, та дырлы трос зол коллективъёс но кырӟасьёс районъёсын вань. Со сяна, Удмуртие ӵем вуыло бускель улосъёсысь коллективъёс. Соин артистъёсылы шуисько: – Асьмелы 200 процентлы ужано! Сыӵе концерт сётоно, учкисьёс вуонозэ мед возьмалозы, лыктэмзы мед потоз. Артистъёс понна вылӥ дунъет – учкисьёс султыса ик чабо ке. Сыӵе дыръя вань жадён быре, мылкыд кырӟа но лопыръяське. Али оглом капчи югдур крезьгуро техника ласянь. Котькуд культурая юртын быгато фонограмма лэзьыны. Нош ми тыршиськом концертъёсы улэп оркестрен потаны. Малы ке шуоно Удмурт филармонилэн девизэз – крезьгур кулэ луыны улэп.

– Филармонилэн бурд улаз пырон творчествоя коллективлы мар вае?

– Кылдэм дырысеныз «Танок» быгатӥз ас понназ улыны. Соку со эркын коллектив вал, табере – филармонилэн оглюкетэз. Ӟеч палъёсты верано ке, милям табере вань сценамы. Учкисьёс быгато, абонемент басьтыса, концертъёсы ветлыны. Филармония милемлы котыр ласянь юрттэ: кусыпъёс тупатыны, рекламаен ужаны. Афишаосмы гинэ но яркытэсьгес, бордазы кыскисесь луизы.

– Тырмыт-а «Таноке» куриськись эктӥсьёс но кырӟасьёс? Кельшо-а туала егитъёслы калык кырӟанъёс?

– «Таноке» кырӟаны лыкто Ижысь крезьгуръя колледжын дышетскем егитъёс. Колледжын быгато утьыны аръёсын кылдэм сямъёсты, отын возиське кырӟан стилистика. Тужгес устоез – дышетӥсьёс егитъёслы пыӵато калык кырӟанэз яратон мылкыд. Кылсярысь, огез сыӵе дышетӥсь, Удмуртиысь калык артистка Елена Васильевна Овчинникова, со «Танокын» кырӟамын, табере студентъёсты визьнода. Матысь дыре ансамбльлэн репертуараз тросгес пыртыны чакласько ӟуч калыклы тодмо кырӟанъёсты, соку учкисьёс но милемын ӵош кырӟаны быгатозы. Эктӥсьёсмы тросгес вуо Удмуртилэн палэнысьтыз. Али ансамбльын тросгес ӟуч эктонъёс. «Танокын» котьку трос кузя эктон, ӵош кырӟан номеръёс вал, али малпасько парен тапыртонъёс, нимаз кырӟанъёс но эктонъёс мед луозы шуыса.