Матвеева Галина Николаевна (удм. яз.)
Ваньбурез – киужъёс
Ижысь Галина Матвеевалэн киосыз зарниесь шуи ке, уг янгыша. Кияса ёросысь Карамас-Пельга гуртын вордскыса, со вань удмурт пужыосты, вурысъёсты, сям-йылолъёсты сюлэмаз утьыса будэмын. Соин но, вылды, туннэ котькыӵе киуж борды капчиен басьтӥське, котькуд ужаз удмурт шӧм пыӵатэ. Арбериосыз адӟем карымон пӧрмо но кузёезлы пӧртэм конкурсъёсын, вожвылъяськонъёсын вормонъёс вайыло.
– Галина, тон мунёен ӧд ик шудылы, дыр. Вольыт быдэстэм киужъёстэ учкыса, малпан кылдэ, пичи дыръяд ик вень-сӥньыс борды басьтӥськид шуыса.
– Пичи дыръям мон мунёосылы дӥсь вурылӥсько вал. Ачим ик соосты малпалляй но. Шуылӥ: будӥ ке, крутой дизайнер луо! Семьяямы киужен выризы мамае но, песянае но, бабае но. Мамае туж умой керттӥське. Пичи дыръям монэ быдэс керттэм дӥсен нуллӥз. Пыдвыл-пӧзь сяна, гамаши но, юбка-дэрем но пӧрмытъялляз. Аслыз но дӥсь керттыса пукылӥз на. Кызьы ваньмызлы дыр шедьтылӥз – паймисько. Монэ, агайме утялтэм сяна, эшшо пудо, бакча котырын бергалляз. Мама туж вольыт пужъятске на – гладен но, крестикен но. Пичи дыръям ялан тыбыр сьӧраз лушкем сылӥсько вал, киосыныз ужамзэ учкыса. Та ик пужъятскыны дышетскеме луиз. Мамае пудо утялтыны потэ но, мон, интыяз пуксьыса, пужъятсконзэ азьланьтӥсько, янгыш лэсьтӥсько но пегӟисько. Собере мама тышкаське вал ини: нош ик кидэ йӧттылыса вуттӥд?!
Керттӥськыны дыши бабаелэсь. Солэн одӥг чиньыез уг ужа, уг куасалляськылы вал, весь шонер улӥз. Озьы ке но солы со чик но ӧз люкетылы, туж шаплы пыдвыл-носки пӧрмытылӥз. Керттӥськыны киы воляз ини 1-тӥ классын кружоке ветлыны кутскеме бере. Дышетӥсьмы шуиз: быръе, пе, кин уксёпуйы, кин шарфик керттоз. Мон кельшытӥ нырысетӥзэ. Лемлет шорт кутыса, портманет керттӥ – трос син бичаса, дуръёстӥз вурыса, бирдыос тэчыса. Киуже аслым сыӵе кельшиз, ӵемгес но ӵемгес керттӥськыны ӧдъяй.
Школаын классной часъёсмы туж тунсыко ортчыло вал. Дышетӥсьмы милемыз нуллылӥз пересьёс дортӥ. Нош соос гуртамы огезлэсь пӧртэм мукетыз кибашлыесь вал. Кылсярысь, огез дорын дыши бадьпу ньӧрлэсь куды кутаны. Со кудые али но вань на – Паска нуналэ отчы буям курегпузъёсмес тыриськомы. Нош матысь ӵыжы-выжые Зоя Алексеевна Мазитова дорын куиськыны дыши. Вуж пу корка шорын ик сылэ вал солэн вашкала куиськон станокез. Улэм-вылэмзэ мадён висказ возьматӥз, кызьы выж лёгет пӧрме.
Школаын озьы ик яратылӥ физкультура урокез. Соин ик 9-тӥ классэ вуэме бере кошки Ижысь педучилищее. Малпай, физкультурая дышетӥсь луо. Но училищеын малпаськонэ уси: оло, нырысь художественной ёзаз экзамен сётыса утчано? Дышетӥсьёс суред суреданы косӥзы. Ужме кельшытӥзы, озьы та факультетысь студент луи. Педучилище бере вамыштӥ Удмурт кун университетысь искусствоя но дизайнъя факультетэ. Татын ини выль омырен шокчи кадь. Чиньыосылы но, йырылы но эрик кылдӥз. Валай: керттӥськон-вуриськон сяна, мукет но киужъёс дуннеын вылӥллям на – куроез пунон, роспись, металлообработка, батик... Котькудӥз сюлэмылы матын вал, но диплом ужме сӥзи азвесьлэсь я зарнилэсь пель угыос, чыртывесьёс лэсьтонлы. Син азям пуктылӥ: тани дышетсконме йылпумъяло но мастерскойме усьто, кильтыръяськон арбериос дасяло.
Но киям диплом вуиз но... дӥсьтон сямы кытчы ке сылмиз. Ужаны интыяськи Ижысь огаз нылпи садэ. Пиналъёслы суредаськонъя урокъёс ортчытъяны нырысь туж шурдыт вал. Визьмылы но, быгатонлыкъёсылы но ӧй оскылы. Но 2 ар кызьы ке ужай ик. Собере кошки реабилитацияя центре. Сӧсыр нылпиослэсь киуж пыр киоссэс, чиньыоссэс йӧнатыны выри. Таяз сюлэмы ӧз чида – нуналысь нуналэ висись покчиосты адӟыны капчи вылымтэ.
Собере ӧтизы монэ Ижысь сяська будэтонъя огазеяськонэ. Шуизы: сяська керттэтъёс, пе, дасяллялод. О, малпасько, кыӵе тунсыко – букетъёс кылдытъяме мынам ӧй вал на. Нош зэмзэ ке, пуктӥзы касса сьӧры. Куризы на мукет городъёсы потаны, ӟеч вишняпу, улмопу утчаны. Таӵеезлы мон чик но дась ӧй вал. Мар карод на? Кошки отысь. Вуи Кузебай Герд нимо нылпи садэ.
Татын ини мон быдэсак выйи удмурт культурае, чеберлык дуннее. Отын мон воспитатель но, няня но, суреданъя дышетӥсь но вал. Туж кельшылӥз садысь залъёсты чеберъяны, удмурт шӧм пыӵатыны. Пиналъёсын ӵем суредаллямы удмурт выжыкылъёсысь геройёсты, вераськылӥмы удмурт суредаськисьёс но гожъяськисьёс сярысь. Туннэ нылпиосын ужан ласянь сомында тодон-валанъёсы люкаськемын – Ижысь педагогикая колледжын студентъёслы урокъёс нуыны ӵекто.
– Кемалась ӧвӧл «Шундыберган» этномастерскоед усьтӥськиз. Нылпиосын сяна, ужаны кутскид соослэн анай-атайёсынызы но, мылкыд карисьёсын но.
– Кузебай Герд нимо нылпи садын но, гимназиын но туж трос пӧртэм мастер-классъёс ортчытъялляй. Та бӧрсьы дорам ӵем вазиськылыны кутскизы. Огезлэн удмурт пужыосын пӧзь керттэмез, мукетызлэн уксётӥрлык дасямез потэ. Озьы йырам малпан чилектӥз: оло, ваньзэсты дышетыны мастерской усьтоно? Но нылпи садын ужакум, та борды рос-прос басьтӥськыны дыры но, кужыме но ӧз кыльылы. Малпай: садысь кошконо но та удысме азинтоно. Озьы кылдӥз «Шундыберган» мастерское. Но со, жаляса верано, Интернетын гинэ вань ай. Нимаз сэрег усьтыса ӧй на вутты. Угось со понна трос ветлоно, утчаськоно, кенешоно. Нош али вань дыры кошке киужъёсты дасянлы.
– Тросэз керттӥсько-чильпасько шутэтскон вакытазы, нош тынад ужед но, ваньмон дырыд но – киуж. Акыльтон дыръёсыд уг луыло-а?
– Киужен вырыкум, мон ужасько но, ял карисько но. Соин ик солэсь уг жадиськы. Котькыӵе куазен, котькыӵе вакытэ киуж борды басьтӥськыны дась. Угось соку, мугоры сяна, йыры но шутэтске – малпанъёсме лач-лач интыясько. Но кин ке дорын вань ке, киуже уг мыны ини. Таин сэрен тросгес ужано луэ бер ӝыт я уйин – куке дорын шыпыт, пиосы изё. Кыӵе ке кино я передача ӝуатӥсько но киужам выйисько. Дырлэсь ортчемзэ но куддыр валаса уг вуттӥськы – огпол ӵукна 4 часозь керттӥськыса пукиськем.
Туж потэ, персятае (песятай) сямен ик сапег гындыны дышетскеме. Солэн киыз волямын вал, егит вакытысеныз угось та киужен вырылӥз. Пичи дыръям бордаз часъёсын сылылӥ, ужамзэ учкыса. Бадӟым ӝӧк вылаз нырысь клёнка вӧлдоз, собере – ыж гон, сое майтал вуэн коттоз... Соку ик валалляй ини: ужез керттӥськон кадь капчи ӧвӧл – кужымез кулэ каре. Озьы бере, уг быгаты аслым гын сапег лэсьтыны – будоно на. Малпасько, али кужыме люкаськиз, яралоз ини та борды басьтӥськыны. Потэ на пулэсь но вандылӥськеме! Таиз но мылкыды персятаелэсь лякиськемын, луоз. Со туж чебересь наличникъёс дасялля вал. Ма, пуэн гинэ ӧз вырылы – кортэн но кылыз тупалляз. Чорыган тӥрлык, бакча, корка котырын кутӥськись корт арбериос, кеньыр изон – ваньзэ ачиз лэсьтылӥз. Соин ик котырысьтыз гуртоос ӧз ик кошкылэ – я наличник лэсьтыны куро, я пызь изыны вуо.
– Эшъёсыдлы, тодмоосыдлы киуж дасяса, аслыд мар ке лэсьтыны дырыд кыле на-а?
– Выль арбери борды кутскыкум, нырысь-валысь сое котьку аслым лэсьтӥсько. Учкисько: маиз чебер пӧрме, нош кытӥзэ тупатоно на. Кельшисьтэм киужъёсы ӧвӧл, угось котькудзэ сюлэм пыртӥм поттӥсько, соин ик соос чебересь пӧрмо кадь потэ. Но куддыръя асме тышкаськисько, тужгес но удмурт шӧмо арбериосты дасякум. Угось соосын «пуксид но лэсьтӥд» уг пӧрмы. Йырын трос чыры-пырыосты возёно, этнографилы сӥзем уно книгаосты бугыръяно, сям-йылолъёсты тодӥсь-валась адямиосын пумиськылоно луэ.
Тани удмурт пужыос уйпал ёросъёсын одӥг, лымшорын – мукет. Сояз одӥг амалэн керттӥсько-вурисько, таяз – мукет. Зэм, та пумысен луэ Интернетысь но ивор шедьтыны. Но отын со суро-пожо, чылкыт удмуртсэ шедьтыны туж шуг. Соин ик утчаны тыршисько вашкала пыдвылъёсты, пӧзьёсты. Отын асьме калыклэн пужыосыз кылемын.
Нялтас вераса, вашкала арбериосы дорам туж трос люкаськемын – коть туннэ ик музей усьты. Маиз но отын ӧвӧл: ӟенеликъёс, ӵушконъёс, выж лёгетъёс, дӥсьёс... Соосты ӵыжы-выжыосы мыным ваё, куддыр арбериос асьсэос монэ шедьто. Огпол пиосыным дор палъёсам бертӥмы но гурт пумысьтымы шуре чорыганы мынӥмы. Нош отын ваёбыжъёс музъеме лачак каръёс лэсьтӥллям. Доразы матэктытэк ӧм чидалэ. Озьы каръёсты учкон вискамы син шорам йӧтӥзы куштӥськем зыбка, пичи дӧдьы но куиськон станокъёслэн челнокъёссы. Шедьтосэлы пичи мурт кадь шумпотӥ, ява. Ну маяллясько, зынъясько ук соосты! Вашкала арбериослэн зынзы мыным туж кельше. Амалтэк агаелы жингыртоно луи: ойдо, лык, шуисько, машинаен ватосэз доре ваёно! Мамае серекъя гинэ: тон, пе, Комаклэн араз юнме вордӥськемын ӧвӧл...
Мамае Кизнер ёросын быдэ вуэмын. Отын улӥсь ӵыжы-выжыосмы ӵем гинэ вашкала арбериосты мон доры вутто. Кемалась ӧвӧл керосин лампа пыртӥзы.
– Галина Матвеева шуо ке, мынам син азям пуксё нырысь ик тынад уксётӥрлыкъёсыд.
– Соосын ог 10 ар талэсь азьло вырыны кутски. Кузебай Герд нимо гимназиын ужрад ортчыны кулэ вал. Удмурт дэреммы вань, нош уксётӥрлыкмы – ӧвӧл. Бызьыса магазинэ мынӥ, копейкаос басьтӥ. Соосты пыдкук тупатъян сэрегын пасяны кури. Озьы уксётӥрлыкез тыпыр-тапыр вури. Ӧй ик малпалля, со калыклэн сюлэмаз сокем пыӵалоз шуыса. 10 ар куспын 300-лэсь ятыр мониста дасяй ини. Шаерамы сяна, Казань, Москва, Питер, Пермь, Екатеринбург городъёсы, Чехия, Германия, Финляндия, Эстония кунъёсы соосты келяме вань. Но выльёссэ гинэ мон уг дасялляськы, вужъёссэ но улӟытъясько. Вашкала уксётӥрлык киям шеде ке, шумпотэменым куддыр йыры ик поромыны кутске. Мон сое нырысь кырмасько, зынъясько, котькуд миллиметрзэ эскерыса потӥсько: кыӵе басмаез, сӥньысэз, вурысэз, манетъёсыз. Собере... кесясько, туж жаль пото ке но. Угось куддыръя басмаез я ӝыжомемын, я курмемын луэ. Котькуд манетсэ нимаз сузясько. Радзэ, формазэ но вурисько озьы ик, кызьы азьвыл вал. Сыӵе дыръя куд-ог реставраторъёс 1 уксётӥрлыкысь 2-сэ потто. Мыным озьы уг кельшы. Тыршисько вашкалаослэсь пытьыоссэс кельтыны. Куд-ог дыръя гинэ уксётӥрлыкез вакчиятӥсько яке сюбегатӥсько, копейкаосыз ишкамын-ыштэмын ке. Угось соос ӧжыт ке, уксётӥрлык чебер уг адӟиськы. Нош вашкала манетъёсты шедьтыны туж шуг, соос туж дуноесь но. Уксётӥрлык бордысь валаны луэ солэсь кузёзэ. Кылсярысь, бай кышномуртлэн монистаяз трос бадӟым корт манетъёсыз. Отысь адӟыны луэ Екатерина II, Елизавета II, Николай I эксэйёслэсь тусбуйёссэс. Начар кышномуртлэн манетъёсыз ӧжыт но пичиесь. Аслам но вашкала монистаосы вань. Одӥгъёсыз – бай, мукетъёсыз – начар. Соосыз но, таосыз но мыным туж дуноесь. Миськи, утялтӥ соосты. Табере синчеберме кадь утьыса возисько.
– Киужъёсыныд пӧртэм конкурсъёсы пыриськиськод. Шаерамы ортчем «Учке мынэсьтым дэремме» фестивальын, пыдвыл керттонъя Россиысь чемпионатын 1-тӥ луид. Вормисьёс пӧлы шедид кунамы радъям «Турсувенир» ӵошатсконын но.
– Конкурсъёсы пыриськыны мыным туж кельше. Угось отын 4 лудкечез кутыны луэ. Нырысь ик, мукетъёсызлы возьматӥськод сое, мае усто лэсьтӥськод. Кыкетӥез, бускельёсыдлэсь ужъёссэс учкиськод но ӵошатӥськод: тон озьы быгатӥськод-а? Куинетӥез, конкурсъёсын трос выль эшъёс шедьтӥськод, соос тон сямен ик висё киужен. Ньылетӥез, отын пуньыен кадь омыръяны луэ выль идеяосты. Киужъёс ласянь выль малпанъёсы йырам малы ке уйин лыкто. Соосты сыӵе зол йырам бергатӥсько, изён уме ик ортче. Ӵуказеяз ик, дыры луэ ке, соосты улонэ пыӵатон борды басьтӥськисько.
– Кузпалыд но, нылпиосыд но, луоз, тынэсьтыд адӟем каро – киуж котыре кыстӥсько.
– Вова картэ киуж дуннелэсь туж кыдёкын. Соин чик уг выры, уг но тунсыкъяськы. Тодматскимы Алнаш палъёсын удмурт сюанын. Шуэ, отын мон, пе, тонэ кыдёкысен ик синйылтӥ: лапег эшъёсыд пӧлын ӝужыт адскид. Сюан 2-3 нунал кыстӥськиз, та дыр куспын ог-огенымы рос-прос тодматскимы но собере поръяны кутскимы. Нырысь вордӥськиз Ильямы. Таиз ачим кадь ик творчествоен вырыны яратэ: киуж лэсьтэ, суредаське, графикая дизайнэн тунсыкъяське. Пичиезлэн, Макармылэн, та ласянь инкуазен сётэмез вань, но чиданэз ӧвӧл. Ӟырдыт мылкыдзэ сӥятӥськомы, бассейнэ, футболэ нуллыса. Ачим но ӵем гинэ волейболэн шудыны, Ижысь Берш нимо ульчаысь бусые поръяны поталлясько. Азьланезлы аслым бадӟым ужпум пуктӥсько. Пересьёс туннэ вань, ӵуказе ӧвӧл. Сьӧразы тодэм-валамзэс нуо. Соин ик экспедициос радъялляно, пичи гуртъёсы поталляно.
Источник:
Матвеева, Галина Николаевна. Ваньбурез - киужъёс / Галина Матвеева ; Ольга Корепанова // Удмурт дунне. - 2021. - 30 дек. - С. 10, 23 : фот. - (Тӧр шорын).
За предоставление материала выражаем огромную благодарность редакции газеты "Удмурт дунне"
