Степанова Алевтина Афанасьевна
Пичи-бадӟым тэшкыли
Семьяязы со шумес-пыдэс нылпи. Куръяса сямен поттэмысьтызы ик, оло, мугорыз но тэшкылилэн кадь гинэ. Свердловскысь театръя училищеез йылпумъям артистлы Мунё театрын но тэшкыли геройёсын удалтӥз: я со Тютю Макси, Я Мальчиш-Кибальчиш, я Пичи Мук. Трос мукет пичи пияшъёсты лулъяз но лулъя театрлэн сцена вылаз. Нош Удмурт радиоысь «Чагыр, чагыр, дыдыке» передачаез кылзӥсь покчи эшъёсыз макем синмаськемын Тэшкылилы! Вань со маскаос сьӧры ватӥськемын Удмурт Республикаысь калык артистка, Удмурт Республикаысь кун премиослэн лауреатсы Алевтина Афанасьевна Степанова.
- Удалтэм Дэбес ёросысь Четкер гуртысь пиналъёслы дышетӥсен. Дано артистъёс луизы Александр Перевозчиков, Николай Кардапольцев. Юрий Егорович Шкляев верамъя, Алевтина Галичанина парта сьӧрысьтыз ик уг, пе, адӟиськы вал. Юаськод ке, гордэктэ, бӧрдонэз ымпумаз вуэ. Кызьы сыӵе востэм мурт артистозь будӥз?
- Туж яратӥсько вал кырӟаны. Нырысетӥ классысен ик ваньмызлы шуылӥ: мон артист луо. Начальной школамы кык этажъем вал, ми дышетскимы вылӥяз. Юрий Егорович пение урок нуыны лыктэ но, нырысетӥ этажысен ик баянэныз: «Ко-ко-ри-ко!» каре. Ми бызьыса васькиськом вал пумитаз. Мылкыд бурдъяськемын. Юрий Егорович ик пыӵатӥз мыным искусствоез яратон мылкыд. Сцена вылысь ӧй васькалля. Со кошкем бере сыӵе кивалтӥсьмы ӧй вал ни. Мамае но вера, Юрий Егорович дыръя школамы но, колхозмы но художественной самодеятельностен районын нырысетӥ интыын улӥз. Бен со кошкем бере но ми, нылъёс, асьме понна мар но со дауртӥськом вал. Али серем потэ ни, кызьы украинской эктон асьме понна дасямы.
Быдэс улонме жаляй Юрий Егоровичлэсь школаысьтымы кошкемзэ. Али тани гуртъёсысь усточи пиналъёсты искусствоосъя школаын дышето, нош ми дыръя со ӧй вал. Одӥг аре «Яблонька» кырӟанэным зональной смотре потӥ, нылъёс но акробатической номеренызы ӵошатсконэ пыриськыны кулэ вал. Колхозмы милемды нуыны машина ӧз шедьты. Быгатонлыкъёс вань ке но, бадӟымъёс валаны уггес тыршо пиналъёсты.
- Нош малы одно ик Мунё театр бордаз кыскиз?
- Александр Фёдорович Перевозчиков татын ужа. Но Мунё театр сярысь малпанэ ик ӧй вал. Куарае жингрес бере, улонме кырӟанэн ик герӟаме потӥз, школаын но котьку солистка вал.
Культпросветучилищеын дышетскыкуз, Саша гуртамы практикаын вал, концерт дасяз. «Кот в сапогах» мунёеным потыса, сцена вылын кык кырӟан кырӟай. Али но син азям пуксе на: дотово чабо учкисьёс. Саша шуэ: мын, пе, пот на, эшшо мыкырскы. Со вал мунёен нырысетӥ шудэме.
Мунё театрын ужакуз ини, отпускын дыръяз, Саша милемын мунё спектакль дасяз. Ачиз ик мунёос лэсьтӥз. Шудӥмы «Эктытӥсь пастухез», мыным чутӥсь солдат сюриз. Сыӵе роль шедемысь нокыӵе кайф ӧй басьты ке но, шудоно кариськи ик.
Школа бере Крезьгуръя училищее пырыны малпай, ӧз кутэ, куарае лябгес шуыса. Кытчы кариськоно? Нош артист луэме потэ. Культпросветучилищеын конкурс, пе, туж бадӟым, отчы пырыны ӧй но оскалты ни - туж дӥсьтӥсьтэм вал. Кытын ке но дышетсконо шуыса, Геннадий Хазанов сямен кулинарной училищее пыри. Но кӧня ке толэзь гинэ дышетскыса вуттӥ отын. Пегӟи.
Нуизы пекарняе. Туж бадӟымесь гуръёс, чидантэм пӧсь. Кышкатски со гуръёслэсь: «Кызьы мон татын ужало? Мынӥ директор доры, гуртам кошко, шуисько. Кыед пӧлын-а, пе, бугыръяськод? Кинлы ке но отын ужаны кулэ ук, пӧй.
Гуртысьтымы клубын кӧня ке ужаны вуттӥ ик. Сашалэн мамаез шуэ, Свердловскысь училищее группа, пе, люкало. Шеди отчы, Александр Фёдоровичлэн но мынам быгатонэлы оскытонэз юрттӥз, дыр.
Свердловскын дышетскыкумы, туж зол мӧзмисько вал гуртэлэсь. Тоня Охотникова (Пушина) али но вера: кошко шуыса весь улӥськод вал, пе, бӧрдӥськод. Милям удмурт группаямы Тоня ярой комсомолка вал: дышетскы, дышетскы шуыса улӥз. Огнам кылемлэсь кышкасько вал, пе. 1981-тӥ арын ми берытскимы Мунё театре, вуоно арын татын ужаммылы 25 ар луоз ни.
- Котькыӵе ролез шудоно мед луоз, артистлы сюлэмзэ сётытэк уг луы. Озьы ке но та дыр куспын тужгес но вунонтэм рольёс но вал, дыр.
- Тужгес но яркыт ужан вакытэ вал 1984-тӥ-1985-тӥ аръёсы, рольёс но вунонтэмесь кылизы. Ми соку гинэ Свердловскысь вуэмын, мунёен ужаны ум быгатӥське на. Режиссёрмы соку вал Владимир Сергеевич Сергеичев. Кема ужам артистъёс но, дано нимен пусъемъёс, милемын ӵош упражнениос лэсьтӥзы. Егитэсь, мылкыдмы ӝутӥськемын. Гастрольёсын Москвае но, Украинаысь Ровно городэ но вуылӥмы.
Нош рольёс сярысь ке верано, пӧртэмесь вал соос. Но мон тросгес шудӥсько пичи пияшъёсты. Тужгес яратоно, вунэтонтэм рольёсы пӧлын «Жуткий господин Ау» спектакльысь Мико нимо пичи пияш, «Волшебная лампа Аладдинаысь» – прицесса Будур, мӧйыослы «Тень» спектакльысь – Анунфиата.
- Спектакльын шудыку, секыт мылкыдэз мунё сьӧры ватыны луэ-а?
- Сцена вылэ потон понна котьку ӝутскем мылкыд луыны кулэ. Висиськод-а, кыӵе ке куректон-а сюлэмдэ зӥбе – экты, кырӟа, серекъя. Мунё театрын ужаськом шуыса, мылкыддэ учкисьлэсь ватыны уд быгаты. Драмая театрысь артистъёсын ӵошатыса, мунёосын ужаны секытгес но, дыр. Отын ваньзэ ас пыртӥд возьматӥськод, ортчытӥськод, нош милемлы ас пыртӥмы поттэм мылкыдэз мунёлы сётыны кулэ на – улӟытоно сое.
Мунёосын ужан понна пинал мылкыд кулэ на, пиналлэсь психологизэ валано. Театрамы выль режиссёр лыктӥз но юа: Аля, ку-о, пе, тон бадӟым луод ни. Туж пайми вал соку сыӵе юанлы. Бӧрысь малпасько: пинал мылкыды ортчиз ке, кызьы соку ужало мунё театрын?
- Нош мар юрттэ секыт мылкыдэз вормыны?
- Пересез-а, шузи муртэ-а возьматӥськод – тон быдэсак ас роляд выйыны кулэ.
- Востэм сямез но палэнтыса?
- Сцена вылын востэм луыны уг яра. Со сямы дышетскыны но люкетэ вал. Урокын мар ке юало ке, керпотэменым кытчы кариськыны ик уг валаськы ни. Тодӥсько ке но, киме ӝутыны уг дӥсьтӥськы. Театрын но, улонын но монэн артэ ветлэ со сямы. Секыт тэтчыны со вамен. Тани театрамы выль режиссёр вуэ ке, востэменымы роль но курыны ум дӥсьтӥське. Нош вань сыӵеосыз, кудъёсыз асьсэос вазисько. Режиссёръёслы со кельше.
- Алевтина Афанасьевна, артист луон мылкыдды шоры семьяяды кызьы учкизы?
- Семьяямы ми кык ныл но кык пи. Ваньмылэн ик кырӟан-веран быгатонлыкъёсмы вань. Сузэрелэн но артистка луэмез потэ вал, весь кырӟаса улэмын хорын. Мамае Евдокия Степановна Галичанина дышетӥсьын ужамын. Монэ со ноку кутыса ӧз возьы, кытчы мынэме потӥз, соя ик кариськоз. Али со ми бордын улэ. 86 арес тырмиз ке но ини, урамъёстӥ но калге, бакчае но сьӧрамы ветлэ.
Папамы войнаысь сӧсырмыса бертӥз. Туберкулёзэн висемысьтыз но олокыӵе но пӧртэм эмъюмъёс юылӥз. Пичи дыръям мон туж керӟег вал, тазалыке ляб, соин но ӟеч ӧй дышетскы. Но туж тыршись вал. Малпасько, пинал дыръям со шуг-секытъёс пыр ортчеме но сцена вылын юрттэ мыным. Улонын котьмае адӟыны кулэ, пыжем шаньги кадь пыш-пыш гинэ улӥд ке, геройёсыдлэсь пушмылкыдзэс усьтыны трослы секытгес луоз.
Школамылэн юбилеяз бертылыкум, математикая дышетӥсьмы Галина Аркадьевна Шкляева шуиз мыным: «Вот ведь, Аля, кыӵе молодец тон. Школаын ляб ке но дышетскид, аслэсьтыд малпандэ быдэстӥз. Нош кинэ школаын ки вылазы нуллыны дась вал, соос улонын ыштӥськизы. Тонэ тани быдэс республикаысьтымы калык тодэ».
- Сыӵе кылъёслэсь йырды вылэгес уг ӝутӥськы-а?
- Уг, но шумпотон мылкыды кылдэ ик: та улонын тон мар ке но лэсьтыны быгатӥськод. Нош дано ним сётэмысьтызы мон кепыр ваисько. Уката ик рольёс ке ӧвӧл, мылкыд секыт луэ. Но театрын мынам эшъёсы вань, соосын ӵош капчи.
Ми, удмурт группаын дышетскемъёс, ог-огенымы туж тупаса, эшъяськыса улӥськом. Чыры-пыры керетон потэ ке но, со ӝог ортче, училище дырысен ог-огмытэк улыны ум быгатӥське. Мунё театре вуэммы бере ӟуч группаосысь но тросэз артистъёс ми пӧлы кариськизы вал, соку куинь группалы люкиськыса ужамы.
- Тӥледыз дасязы удмурт спектакльёсты возьматыны, нош ӟучаз выжыса, шуг-секытъёс ӧз кылдэ-а вераськон ласянь?
- Удмурт луэммы шӧдӥськытэк уг кыльы. Удмуртлыкмы кымесамы но гожтэмын, сямамы но, вирамы но пыӵамын. Мон тани дорын но удмурт сямен вераськисько, эшъёсыным но. Сцена вылэ потыку чакласьконо луэ ни, вераськемед удмурт шӧмо медаз луы. Мон сыӵе адями: асме ачим палэнэ султыса сямен чакласько. Шуом, кинэн ке супыльтӥсько, супыльтӥсько но, собере малпасько ини: вот шузи, малы меда мон сое верай.
- Алевтина Афанасьевна, Мунё тетрлы 70 ар тырмон юбилеез кыӵе мылкыдын пумитаськоды? Вӧсез-а, шумпотымонэз-а тросгес?
- Таяз юбилейлы тросгес вӧсез люкаськемын – ужатозям куинетӥ юбилеез пумитасько ни. Нырысетӥяз сцена вылын сюлэм дырекъяса пукимы, пиналэсь вал ай соку. Кыкетӥез юбилей ортчиз Венгрие ветлэммы бере. Мылкыд ӝутӥськемын. Кызьы уз - нырысьсэ кунгож сьӧры потамы.
Нош таяз учыре мылкыд секыт. Театрын воштӥськонъёс ужасез вӧсь медаз каре вылэм. Ужмы милям мылкыд бордын возиське, сотэк кызьы потод сцена вылэ?
Источник:
Степанова А. А. Тэшкыли / А. А. Степанова ; записала Лия Малых // Удмурт дунне. - 2005. - 29 апр. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
