Кузьмина Юлия: различия между версиями
Admin (обсуждение | вклад) |
Admin (обсуждение | вклад) м (1 версия импортирована) |
Версия 11:23, 9 февраля 2015
Юлия Ильинична Кузьмина (Яковлева) - удмурт кылбурчи, крезьгурчи, кырӟась.
Улон сюресэз
Кузьмина (Яковлева) Юлия Ильинична вордӥськиз 1963-тӥ арын 5-тӥ куартолэзе Алнаш ёросысь Жаггуртын. [1] 1970-тӥ арын, дырыз вуэмъя, Юля ас вордскем гуртаз ик школае дышетскыны мынӥз. Нош начальной школаез йылпумъяса, Азаматысь шор ёзо школае сюрес лёгиз. [1]
Пичи дырысеныз Юлялэн туж актриса луэмез потылӥз, ассэ театрлэн сцена вылысьтыз адӟылӥз. Но малпаз: сыӵе удысэ вамыштон понна мугорын но, ымнырын но тупась – шекъёстэм луоно. Озьы ке но, ас гуртазы но, бускельёсаз но соосыз тодо вал. Сузэр-вынъёссэ, эшъёссэ люкаса, сценка пукто, кырӟало-экто вал. [2]
Ёросын ортчылӥсь кырӟан ӵошатсконъёсы но нылаш ӵемысь пыриськылӥз. Алла Пугачёвалэсь но Валентина Толкуновалэсь кырӟанъёссэс репертуараз кутылӥз, сокем соослы синмаськемын вал. Нош нотаосты тодымтэез пумысен шугъяськылӥз ке но, ас валамъяз гитараен но, арганэн но шудыны дышетскиз. [3] 1980-тӥ арын, школазэ йылпумъямез бере, Ижысь культпросветучилищее хорлы дирижёр дасян люкетаз пырыны мылкыд кариз, тодэ вал, отын крезьгурез но мургес валаны дышетозы, нотаосын но тодматозы. Татысен «Зангари» ансамбле ветлӥз. [1]
Лулчеберет удысысь егит ӧнерчи луыса, Юля аслаз колхозаз ик ужаны бертӥз. Азамат клубын куинь ар ӵоже ужатозяз ма гинэ лэсьтыса ӧз вутты, тросэз ужъёсыз Данъян грамотаосын но дипломъёсын пусъемын вал. Элькунысь клубын егит ужасьёс пӧлын ялэм конкурсын дас укмыс аресъем нылаш соку вормисе потӥз — егитъёслэн Азербайджанысь «Гянджлик» калыккуспо центразы путёвка сётӥзы. Юлялы отын немецъёсын пумиськыны шуд усиз. Соос азьын «Котьку мед луоз анай!» тодмо кырӟанэз гитараен шудыса, немец сямен быдэстӥз. Соку ик немец кылэз ӟечгес дышетон мылкыдыз эшшо юнмаз, Юля школаын но та предметэз туж яратэ вал. Малпаз — лэсьтӥз. Клубын куинетӥ арзэ ужакуз, 1985-тӥ арын, Удмурт кун университетлэн кунгожсьӧр кылъёсъя ёзэтаз заочно дышетскыны пыриз. [3] Соин сэрен Иже лыктоно кариськиз. Солэсь азьло уго телевидение ӧтён вал ини. Семён Карповлэн выжыкылэзъя дасям «Рос-прос» передачае клубысь коллективеныз пыриськыкуз, сое Василий Михайлов но Семён Карпов синйылтӥллям. Режиссёрлэн юрттӥсез луыса ужаз. [2] Но та удыс нылашлэн сюлэмъяз ӧй вал. Мылкыдыз мукетсэ утчаз. Телевидениын арня ужаса вуиз-а, ӧз-а, «Ижмаш» культура двореце дыртӥз. Отысь «Тюрагай» хоре уж бере ветлыны луэ шуыса тодӥз. Кырӟанлэсь макем мӧзмем ни вылэм. Оло, сюлэмыз мукетсэ-а шӧдэм? Татысен лулгажанзэ, вуоно кузпалзэ Виталий Кузьминэз пумитаз. Виталий Можга ёросысь Лудзи-Шудзи (Гозег) гуртысь вылэм. Со но Юля сямен ик крезьгурлы синмаськемын. [3]
1989–1994-тӥ аръёсы Юлия Ильинична 47 номеро школаын ужаз немец кылъя но кырӟанъя дышетӥсь луыса. Со вакытэ ик эктонъя кружокын занятиос нуиз. Калыкез огазеяны быгатонлыкез но золгес шараяськиз. Дышетӥсь пиналъёсты калык искусствоен тодматӥз: удмурт композиторъёсты, писательёсты, кылбурчиосты но элькунысьтымы мукет тодмо адямиосты пумиськонъёсы ӧтьылӥз. [4] Школаын ужан пинал кышномуртлы туж кельше вал. Но выльдӥськон кутскем бере, огыр-бугыр вакытэ, уж интызэ воштоно луиз. Сценалэсь мӧзмемзэ шӧдыса, кузпалэз но пумит ӧз кариськы. [2] Озьы кызь вить ар талэсь азьло Кузьминъёслэн дуэтсы кылдӥз. Семьязы йылэмен (нылъёссы вордӥськизы на, крезьгуро коллективзы но паськытаз: кузпалъёс соослы но крезьгур дуннее сюрес возьматӥзы). Соос самодеятельной крезьгурчиослэн нырысетӥ фестивалязы но пыриськизы. Ӵапак соку нырысьсэ бадӟым сцена вылысен чузъяськизы Юлия Кузьминалэн бӧрысь туж тодмо луэм «Анаелы», «Шуд», «Ум ни яратэ ӵошен» кырӟанъёсыз. Нош 1995-тӥ арын А. Шкляевлэн «Дор» пьесаезъя пуктэм спектакльлы эшшо но чебересьгес кырӟанъёс кылдытӥз. [3]
Кузьминъёслэн ансамбльзы шаермылэн пӧртэм сэрегъёсаз концертъёсын вуылӥз ни, гастрольёсын Марий Элэ но Татарстанэ потазы, 1998-тӥ арысен арлы быдэ сямен Ижкарын бадӟымесь концертьёс сётъяло. Репертуаразы — Удмурт Элькунысь лулчеберет удысысь дано ужасьлэн Юлия Кузьминалэн кырӟанъёсыз, кылбуръёсыз, сценкаосыз. Map веранэз, та нылкышнолэн быгатонлыкъёсыз пумтэм. Кырӟам, эктэм, гожъяськем сяна, со котькуд концертсылы ачиз дӥсьёс вуре. [3] 2003-тӥ арысен Юлия Ильинична «Удмурт дунне» газетын рекламая менеджер луыса ужа. [5]
Гожъямъёсыз сярысь
Азамат школаын ньылетӥ классын дышетскыкуз, Юля хорын кырӟаны кутскиз, эктонъёсъя конкурсъёсы пыриськылӥз, нош сизьыметӥысен ачиз дышетскисьёсын концертъёс дасялляз ни. «Эктытӥсь пастух», «Золушка» тодмо выжыкылъёсты, озьы ик асьсэ малпам сценкаоссэс учкисьёс туж шуныт пумиталлязы. [3] Юля телевидениын ужакуз кылбуръёс, сценарийёс, кырӟанъёс гожъяны кутскиз. Выль «пӧрамъёссэ» сцена вылын ӵемысь Виталиеныз кырӟаллязы ини. [3]
1989-тӥ арысен Юлялэн кылбуръёсыз, кырӟанъёсыз, сценарийёсыз, выжыкылъёсыз но дано адямиос сярысь материалъёсыз «Удмурт дунне» газетлэн бамъёсаз печатласько ини. Палэнэ ӧз кыле «Кенеш», «Инвожо», «Вордскем кыл» журналъёс но «Ӟечбур!», «Алнаш куара», «Пригородные вести» но мукет ёросъёсысь газетъёс. [5] Map бордысен кутскиз Юлиялэн крезьгурен эшъяськонэз? Ог вакыт ас эрказы кадь вордскизы нырысетӥ кылбуръёс, нош соос веттаськизы крезьгур кӧкыын. Нош калыке потон сюресэз таӵе вал. 1989-тӥ арын крезьгурчи Виталий Шоркин "Октябрь" культура двореце нырысьсэ удмурт кырӟан гожъясьёсыз люказ. Татын Юлия кузпалэныз "Шуд", "Ум ни яратэ ӵошен" но "Анаелы" кырӟанъёссэс быдэстӥзы. Соос пыраклы калык сюлэме пыӵазы. Нош "Анаелы" кырӟан Удмурт радиолэн зарни фондаз сюриз ни.
Тон эн мӧзмы, анай, ми кошким шуыса
Дорысьтыд кыдёке-кыдёке.
Со бадӟым шумпотон, тон озьы малпалля,
Нылпиед ке шедьтэ ас шудзэ.
Соберегес Юлия Кузьминалэн кылдо лирической визыл гуръёсыз: "Нырысетӥ яратон", "Сирень", "Вордӥськем палэ". Мукет кылбурчиослэн кылъёссыя но гуръёс гожтыса утчаз: "Малы кикы силе" (Г. Романова), "Толэзь" (В. Ванюшев). Нылпиослы сӥзиз "Пичи гуртэ", "Гужем ӝытэ" но мукет кырӟанъёссэ.
Бератаз ни Юлия Кузьмина вылэ погыльскиз "куинетӥез тулкым" - улон сярысь малпаськытӥсь кырӟанъёсыз кылдӥзы: "Вордӥськи мон кырӟанэн", "Сэрттысал", "Ӧз пушйы мынам гинэ"... Со сяна, серемесъёсыз - "Шур дурын", "Одӥгаз пичи гуртын". Ас семьяенызы Кузьминъёс трос интыосын, гуртъёсын пуктылӥзы ни. Озьы кырӟанъёссэс калыке вӧлмыто. Нош кельшемъёссэ гуръёссэс кырӟаны яратӥсьёс ас репертуаразы басьто. [6] Та авторлэн-исполнительлэн творчествояз бадӟым инты басьтэ улон тема: вылӥе пуктӥське пинал даур, шудо егит дыр. Ас мылкыдызлы автор быдэсак эрик сётэ, соин ик кылбур но, крезьгур но кык бурдъёс кадь тупаса кошко. Эшшо солэсь лулысь-сюлмысь потэм гуръёссэ ӵошатыны луэ калык кырӟанъёсын – соос удмурт шӧмоесь. 1996-тӥ арын Юля поттыны быгатӥз «Вордӥськи мон кырӟанэн», собере «Яратон ке сюлэмын» (2009) кырӟанъёсыныз бичетъёссэ но нылпиослы «Выжыкыл апай дорын» (2011) вакчиесь выжыкылъёсын книга. Юля Кузьмина «Сам себе режиссёр» передачаын витьтонлэсь трос аслаз вурем сценической дӥсьёсыныз но мукет пӧртэм чебересь киужъёсыныз «Слабо» конкурсаз вормисе потӥз. Юлия Кузьминалэн крезьгуро дуннеез зэмен но паськыта. Со ялан утча выльзэ, туннэ нуналлы тупасьсэ. [6]
Премиосыз
Удмуртъёслэсь но мукет калыкъёслэсь искусствозэс вӧлмытон понна но художественной самодеятельносте мылысь-кыдысь пыриськон понна грамота, 1981
«За честь своего диплома» Элькун конкурсын вормисез, 1984
Удмурт Элькунысь лулчеберет удысысь сӥё-дано ужась, 2002
Удмурт Элькунысь журналистъёслэн огазеяськонзылэн ёзчиез, 2006
Библиография
Книгаосыз
Вордӥськи мон кырӟанэн. – Ижевск, 1996. – 64 с.
Выжыкыл апай дорын. – Ижевск : Удмурт. ун-т, 2011. – 74 с.
Яратон ке сюлмын. – Глазов, 2009. – 111 с.
Статьяосыз
Кырӟанъёсыз
Кузьмина Ю. Анаймылы : "Тон эн мӧзмы, анай, ми кошким шуыса..." / крезьгурез но кылъёсыз Ю. Кузьминалэн // Байгурезь (Дебесы). – 2005. – 18 марта.
Кузьмина Ю. Одӥгаз пичи гуртын : "Одӥгаз пичи гуртын..." / крезьгурез но кылъёсыз Ю. Кузьминалэн // Инвис (Шаркан). – 2005. – 30 сент.
Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.
Уже кутэм литература
- ↑ 1,0 1,1 1,2 Зверева Т. Юлия Кузьмина (1963) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 157.
- ↑ 2,0 2,1 2,2 Ионина А. Вордскоз нунал, вордскоз кырӟан // Удмурт кизилиос : очерки, зарисовки, интервью (2001-2007). – Ижевск, 2007. – С. 80-81.
- ↑ 3,0 3,1 3,2 3,3 3,4 3,5 3,6 Бородина О. Юлия Кузьмина «Шуд инбамысь уг усьы» // Кенеш. – 2011. – № 10. – С. 103-104.
- ↑ Ломагин К. От маленькой сказки до большой любви // Яратон ке сюлмын / Юлия Кузьмина. – Глазов, 2009. – С. 3-6.
- ↑ 5,0 5,1 Кузьмина Ю. Лемлет малпанъёсы быдэсмизы // Удмурт дунне. – 2010. – 5 февр. – С. 12.
- ↑ 6,0 6,1 Шабалин Н.Инву гур утчасьёс пӧлысь // Удмурт дунне. – 1998. – 28 апр. – С. 2.
