Белых Светлана Альбертовна

Тулкымъёс вылын

Белых С. А.

Светлана Белых — «Мынам Удмуртие» ТРК-ысь журналист, «Кыл сярысь», «Кыл дунне», «Шара лыдӟонъёс» но мукет проектъёслэн авторзы, Удмуртиысь дано журналист, Э. Батуев нимо премилэн лауреатэз… 50 аресъем юбилеез азьын вераськиськом творчество но улон сярысь.

— Паймымон потоз, дыр, но мон понна тӥ нырысь ик кырӟась, крезьгурчи. «Мон ӧвӧл ни, мон быри…» кырӟанды али но сюлэмме сыӵе юн вырӟытэ, солэн кыӵе ке валантэм кужымез вань кадь потэ…

— Тросэз та кырӟанлэсь сюлме пырись кужымзэ пусъё: «Мон ӧвӧл ни, мон быри, / Тулыс ву луыса кошки…» Кызьы вордӥськиз со — валэктэме ик уг луы. Кылъёсыз но, крезьгурез но аслам, но соосты мон ачим ӧй кылдыты кадь потэ — Инмар кузьмаз. Угось со азьын но, собере но удмурт кылын кырӟанъёсы озьы асьсэ понна ӧз ни кылдылэ. Конечно, мон асме крезьгурчиен уг лыдъяськы, кырӟанъёсы вань ке но.

Егитгес дыръям туж яратӥсько вал ӟуч романсъёсты кырӟаны. Кельшылӥзы Грак ёросысь ӟуч кылбурчилэн, Маргарита Зиминалэн, чуръёсыз. Солэн кылбуръёсызъя трос кырӟанъёсы кылдӥзы. Нош удмурт гожъясьёс пӧлысь яратыса лыдӟылӥ Татьяна Черновалэсь, Людмила Кутяновалэсь кылбуръёссэс. Огшоры ӧй лыдӟылы, кырӟаса. Лулы озьы куре вал. Тани Л. Кутяновалэн чуръёсызъя ик: «Улон шур уг нуныя, лӧпкытъя гинэ, / Визылтӥз уг ну монэ, гочатъя гинэ…» Бӧрысь со калык пӧлы кырӟан луыса вӧлмиз.

Ноку ӧй малпалля сцена сярысь. Со гинэ ӧвӧл, сценалэсь мон пӧсь гурлэсь кадь кышкалляй. Гитараен шудылӥ эшъёсы, ӵыжы-выжыосы азьын гинэ. Калык азе кырӟасез сямен монэ нырысьсэ поттӥз тележурналист Татьяна Корнилова, бӧрысь Надежда Уткина кырӟась но пӧртэм ӝытъёсы ӧтчаны кутскиз. Потэ-а, уг-а, туж куремысьтызы, соглаш кариськылӥ.

Берло дыре гитараме шер кутылӥсько. Ас дуннеям улысал ке, оло, кылдысалзы на выль кырӟанъёс, но улон, семья, уж мыным сыӵе луонлык уг сёто. Собере, крезьгуро инструментэз нуналлы быдэ уд ке кутылӥськы, шудэмед чутыны ӧдъя.

— Быдэ вуиды Ижын, ветлӥды городысь школае. Нош выжыды кытысь?

— Шаркан ёросысь Урдогуртын вордӥськи. 4 арескам улыны выжимы Мувыре. Папае парторг вал, мамае нылпи садын пиналъёсты утиз. Бӧрысь улон интымес воштӥм, мамаелэн вордӥськем гуртаз, Якшур-Бӧдья ёросысь Кионгопе, бертӥм. 3 нылпиос пӧлысь мон бадӟымез, отӥосыз — пиос. Анае но, атае но мувӧй кыскисьёс дорын ужаны кутскизы. Мамае милемыз туж тыршиз дышетыны. Кионгопысь дышетскыны ветлӥм Мукшие, ог 5-6 километр луоз, дыр. Куддыръя пыдын, куддыръя атае валэн келялляз яке попутка шедьылӥз. 2 арзэ интернатын но улӥ.

Анае ялан сюлмаськиз ӟеч тодон-валан сётыны, соин ик улон интымес нош ик воштӥм, городлы матэгес, Якшур-Бӧдья черкогуртэ, интыяським, отын, пе, школазы ӟечгес. Татын мон крезьгуръя школае ветлыны кутски. Ваньмыз умой гинэ мынэ ни вал, но огпол толалтэ коркаямы тылпу потӥз. Кышкыт учыр уйин изьыкумы луиз, но утиськыны ваньмы быгатӥм, кыре кин кызьы — лымы вылэ гольык пыд — потӥм. Мыным соку 13 арес вал. Бускельёсмы милемыз жаляса доразы пыртӥзы, асьсэлэн но 3 пиналзы вал, но ваньмылы инты шедьтӥзы. Озьы быдэс толэзь ӵоже 2 семья ӵош улӥмы. Собере анай-атаелэн ужысьтызы юрттӥзы: Иже 2 висъетэн квартира сётӥзы. Озьы Иже выжимы.

Нырысь вакытаз мыным туж секыт вал, туж мӧзмылӥ гуртлэсь, эшъёсылэсь, из коркаос зӥбо кадь потылӥз, трос калыклэсь жадьылӥ. Городын тон нокинлы кулэ ӧвӧл, нош гуртын тон котькытын — дорад. Ма, собере городын но улон интымес 3 пол вошъяно луим на, 3 пиналын пичи висъетын секыт вал, анай-атае квартиразэс ялан бадӟыматыны выризы.

— Ижын тӥ тодмо луиды гитараен шудэменыды, нылкышно бард луэменыды…

— Тодмо ик ӧй шуысал. Собере, палэнысен ваньмыз вольыт но чебер адӟиське.

Кырӟан борды кыстӥськеме пыӵаз анаелэсь. Егит дыръяз со, конкурс пыр потыса, республикаысь хоре шедем. Но атае соку городэ лэзьымтэ. Озьы ке но анае кырӟанъя ёрос конкурсъёсы ялан пыриськылӥз, нырысетӥ интыос басьяз. Огпол вормемез понна бадӟым мунё кузьмазы, мон сыӵе шумпотӥ!

Якшур-Бӧдьяын мон крезьгуръя школаын дышетскисько вал бере, анаелэн туж потэ вал, Ижын но та удысъя дышетсконме мед азинтом шуыса. Дышетӥсьёсы но визьмаллязы: крезьгурез туж зол шӧдӥськод, дышетскондэ эн кушты. Но яке улон инты воштэммы, яке город школаын общественной уже выеме, яке мукет мугъёс (мынам фортепьяноен шудэме потэ вал, нош анае баянэ гожтӥз — фортепьяно басьтыны коньдонмы ӧй вал), но крезьгуръя дышетсконме мон ӧй азинты ни. Та пумысен туж жалясько. Ма, крезьгуръя дышетӥсьёсы но озьы шуо вал: жалялод но, бер луоз ни… Профессионал сямен крезьгурлы дышетскон туж трос дырез басьтэ, ваньзэ ас вакытаз лэсьтоно…

14 арескам анае гитара кузьмаз. Но сое киям кутылыны дыры ик ӧй вал, школаын тодон-валан люкан сяна, пӧртэм ужрадъёс малпалляй-ортчытъяй, стенгазетаос суредалляй, эктӥ… Гитараме кутӥ университетэ пыреме бере гинэ, со дырозь соин вынъёсы шудӥзы. Университетын дыръям ик Ижысь 53-тӥ школаын ӟуч кыллы но литературалы дышетыны кутски. Ваньмаз вутскыны секыт вал, но гитараме мон ӧй ни кушты. Тодон-валанме муромытон понна дышетскыны ветлӥ Ижысь туж тодмо гитарист но крезьгурчи Виктор Русинов доры. Али солэн гитарая шудыны дышетӥсь школаосыз быдэс Россие вӧлмемын, фингерстайл амалъя гитараен шудонъя та адями быдэс дуннеысь 10 устоосыз пӧлы пыре. Виктор Русинов мыным трос сётӥз артист, педагог, аранжировщик сямен.

— Нош кызьы журналистикае сюрес лёгиды?

— Университетын ик ӵош дышетскем эшъёсы ӝутказы. Мон удмурт кылэз лябгес тодӥсько вал, выжые гуртысь ке но, ӟуч школаын, ӟуч эшъёс пӧлын туж ӝог ӟучоми. Ярам ай, шуген ке но, кӧня ке вераськисько вал, нош вынъёсы вераськыны но уг ни быгато, валало гинэ. Семьяямы но суро вераським. Малпалляй, школа бере дышетскыны мыно кунсьӧр кылъёсъя факультетэ, немец кылэз ӟеч тодӥсько вал, собере бордазы кыскизы на история, ӟуч литература. Литератураез гажаме вормиз, УдГУ-ысь ӟуч филологияя факультетэ пыри. Огпол но ӧй жаля, угось со вакытэ та факультет туж кужмо вал, отын зол дышетӥсьёс ужазы, тросэз — учебникъёслэн авторъёссы, куд-огезлэн кылъя асьсэ школаоссы вал.

Удмурт радиолы удмурт кылын вераськись диктор утчало шуыса, эшъёсы веразы. Но мон нырысь кылэм но ӧй кары. Ӟуч сямен малпаськисько вал бере, удмурт кылын вераськонэ выжыны, ас малпанъёсме тыро-пыдо вераны капчи уз луы шуыса. Но эшъёсы дэмлало: ма, тон астэ эскеры гинэ. Тӥни озьы, пыэдэн висьыса но, мынӥ. Конкурслэн кыкетӥ турез ортче ни вылэм, но монэ басьтӥзы, дась удмурт текстэз умой лыдӟисько вал. Ачим но валаса ӧй вутты, 1991-тӥ арын радиое шеди.

— Тӥледлы шуд усиз удмурт радиожурналистикаысь зэмос кизилиос вӧзын ужаны: Пимен Касаткин, Раиса Куликова, Милитина Гаврилова-Решитько…

— Эшшо — Виктор Ивашкин, Иван Аркашев, Леонид Гусев но трос мукетъёс. Удмурт радиоын дикторлэн ужез мыным туж кельше вал. Ужалляй ӟуч эфирын но. Быгатэмме волятӥ Москваын дикторъёслэсь тодон-валанзэс будэтонъя институтын. 1990-тӥ аръёсы ГТРК-лэн радиоез бордын ужаз на Ижкарлэн «Столица» радиоез. Отын мон нырысьсэ асме радиоверанъёсты нуись луыса эскери, диктор гинэ луыны, мукетъёсыныз гожтэм иворъёсты гинэ лыдӟыны мыным ӝог акыльтӥз. Соку ик асме журналист сямен эскери. 1 час ӵоже ӟуч кылын мынӥсь иворъёсты дасясь-нуисьёс пӧлысь огез луи. Ӟуч но удмурт кылъёсын радиоочеркъёс, интервьюос гожъяны кутски. Со вакытэ трос тунсыко адямиосын пумиськылонъёсы ик радиожурналистика борды сюлэмме бурмытӥзы. Бен, малпалляй: оло быдэсак ӟуч радиое выжоно, оло отын мукет сямен усьтӥсько на, но удмурт арлыдо журналистъёс удмурт редакцие ик кыльыны туж бурдъязы, юрттыны тыршизы, аслым оскон пыӵатӥзы. Удмурт кылы удмурт ӧвӧл шуыса трос тышкаськемез кылоно луиз ке но, кошкыны умой ӧз ни поты. Оскизы бере, ужано, малпай. Зэмзэ вераса, меӵак эфирын удмурт сямен ужаны али но секыт потэ, пасьтана кошкись малпанъёсме ӝот-ӝот вераме уг луы, кылъёсы уг тырмо. Со понна асме туж куаретӥсько.

— Тӥляд телевидениын но радиоын трос гинэ проектъёсты. Ойдолэ кӧнязэ ке вераломы.

Тужгес яркытъёсыз, дыр, «Кыл сярысь» но «Кыл дунне» передачаосы. Соос удмурт но фин-угор кылъёслы сӥземын, удмурт кылосбуръя тодосчиосын валче лэсьтэмын. Мон ачим но соослэсь дышетски, кылзӥсьёслы но анай кылмы сярысь трос тунсыкозэ усьтӥ кадь потэ. Бадӟым люкетэз та передачаос нимаз дискен поттэмын, республикаысь школаосы келямын, соосты удмурт урокъёсын куто. Кыллы сӥзем передачаосы 10 арлэсь кема мыно ни. Яратӥсько «Шара лыдӟонъёс» проектме. Таяз передачаын кылзӥсьёсты тодматӥсько тодмо но воксё выль потэм удмурт книгаосын, авторъёсын.

Ӟуч кылын «Точка на карте» проектме пыӵатыны тырши, со Удмурт Элькунлэн историезлы сӥземын вал. Светлана Пикулева журналистэн ӵош милемлы оскизы «День Республики» ӟуч телепроект бордын ужаны. Таиз Удмуртилэн кунлык басьтэмез дырысен 100 ар тырмонлы сӥземын, тодматэ ёросъёсын, каръёсын, отысь тунсыко интыосын, яркыт но аспӧртэм адямиосын.

Радиоэфирамы шаердэ, Атыкай музъемдэ яратон пыӵатӥсь, геройлыко адямиосмес данъясь кырӟанъёс туж ӧжыт шуыса, 2015-тӥ арын Вормон Нунал азьын сыӵе пуштросъем кырӟанъёслы конкурс радъяны ӵектӥ, ачим ик сое ортчытон борды басьтӥськи. Нош 2017-тӥ арын эшшо одӥг крезьгуро проект ӵектӥ. Таиз вунэм но вунӥсь кырӟанъёсты выльысен улӟытонлы, крезьгурлэн вылӥ куронъёсызлы тупась, академической амалэн быдэстэм кырӟанъёсты радиоэфире поттонлы сӥземын вал. Тазэ но конкурсэз радъян борды ачим ик басьтӥськи. Ӵектонлы дурбасьтӥзы шаерысьтымы Крезьгурчиослэн огазеяськонзы, солэн тӧроез Марина Ходырева но культурая министр Владимир Соловьёв, ужрадэз ортчытыны юрттӥз Удмурт кун филармония.

Проектъёс вискын тыршисько на удмурт но ӟуч кылъёсын радиоочеркъёс дасяны, пыриськисько компанимылэн проектъёсаз. Нимысьтыз верасал «Светӥ дорын куноын» передачамы сярысь. Со ог 8-9 ар талэсь азьло радиоын кылдӥз, собере выжиз телевидение. Нош огпол милемлы вазиськиз удмурт концертъёсты радъясь Геннадий Семёнович Корепанов, концерт радъяны но нуыны курыса. Ми басьтӥським. Асьмеос кырӟаны ум малпаське вал. Но калыклы мылкыд сётон понна ужрадэз кырӟаса мытӥм. Тӥни озьы куиньнамы — Светлана Пикулеваен но Светлана Кибардинаен ӵош — кырӟаны кутским. «Удмуртия» ГТРК-ын ужакумы ай (1990-тӥ аръёсы), Светлана Кибардинаен ӵош дуэтмы но, клипъёсмы но вал бере, мыным эстрадаын кырӟаны секыт ӧй вал ни. Телевидение сярысь верано на ке, монэ отчы 1995-тӥ арын ӧтиз журналист Татьяна Корнилова. Солэн соку «Такъян» передачаез мынэ вал. Кӧня ке ар ӵоже сое ӵошен дасямы но нуимы.

— Крезьгуръя школаез ӧд ке но йылпумъялэ, крезьгур котьку сюлмады вал. Уката ик та удысъя сюрестэс нылды азинтӥз.

— Ксюшае понна туж шумпотӥсько. Крезьгуръя занятиосы сое нырысьсэ 5 аресказ нуи, но малы ке соку мылкыдыз ӧй вал. Мон кужмысь ӧй кары. 9 арес котыраз ини мынӥськомы искусствоосъя школа вӧзтӥ, нылы крезьгур чузъяськемез кылӥз но шуэ: мынам скрипкаен шудэме потэ. Ярам, шуисько. Малпам, кемалы ӧвӧл, скрипка но вужзэгес гинэ басьтӥм. Но нылы ӝытлы быдэ шудылӥз, занятиослы умой-умой дасяськылӥз. Ар ортчыса, выль скрипка басьтӥм ни. Ксюшамы крезьгуръя школаез йылпумъяз. Университетын со, удмуртсэ сяна, англи но венгер кылъёсты дышетӥз, али та кылъёсты тодэмзэ Венгриын муромытэ, отын ужбергатон удысын тырше. Но улыны Удмурт шаере ик берто шуэ, котьма ке но, пе, отын асме муртэн шӧдӥсько. Со ачим кадь: туж мӧзмись. Нылме кыдёке лэзьыны, ас бордысьтым ишкалтыны мыным туж секыт вал.

Нош пие сямызъя воксё мукет. Со 7-тӥ классын дышетске, 5 арескысен каратеен выре, республикаямы но Россиын ӵошатсконъёсын вормылэмын, сьӧд кускерттонэз ни. Кемалась ӧвӧл кутскиз на самбоен вырыны. Дышетске ӟеч, инженер, пе, луо.

— Кузпалды Сергей Касаткин — «Мынам Удмуртие» телерадиокомпаниысь анай кылъя передачаос понна кыл кутӥсь. Вордскыны но тӥледлы одӥг нуналэ удалтэм, ужаськоды но одӥг интыын. Секыт ӧвӧл-а?

— Капчи ӧвӧл, картэд уж дурад тынад кивалтӥсед луэ ке… Мукет ласянь, картэ вала мынэсьтым ужме, шутэтскон нуналъёсы ужано луэ ке, семьяез ас вылаз басьтэ. Картэным ми, «Удмуртия» ГТРК-ын ужакумы, тодматским. Мон радиоын ӧраз пырем журналист вал ни, со сокугес гинэ вуэмын, аспирантураын дышетске на вал. Вордскем нуналмес ӵош пусйыкумы, со пичи кузьым сётӥз. Мыным со визьмо, лякыт потӥз, озьы матысьгес тодматским но кызьы ке валатэк ик огазеяським. Тэрымтэос, конечно, луо. Но сыӵе дыръя валаны тыршоно, дыр, малы озьы пӧрме. Собере утчано огкылэ вуон амалъёс. Адямиез дунъяно сыӵеен, кыӵе со вань, воштыны тыршоно ӧвӧл ни.

— Мынам тодэмея, тӥ туж тунсыкъяськиськоды астрологиен. Луэ шат кизилиослы оскыны, улонэз соосъя радъяны?

Астрология — со инкуазьлэн кылыз. Бен, «кизилиос туннэ тазьы ӵекто» шуонъёслы мон уг оскиськы. Яке, шуом, «тани та толэзе вордскемъёс ваньзы таӵеесь, соосыз — сыӵеесь». Озьы уг луы. Но котькуд адями вордӥськыку, инмын кизилиослэн кыӵе ке суредзы вал, Музъемлэн но та дырлы но та вакытлы тупась кыӵе ке кужымез вал. Мон оскисько, со кужымъёс вордӥськись адямилы пыӵало, со кужымъёс бӧрысь солэн улон шоры учконаз, сямъёсаз шӧдӥськыны быгато. Асьмеос сое (озьыен, инкуазез) шӧдыны гинэ кулэ. Туж тросэз потэ адямилэн кытын, кыӵе семьяын, будэмез бордысь но.

Кизилиосъя мон Чорыг. Чорыгъёс, пе, яке гань-гань тыметын уло, яке ялан шур вулы пумит уяло. Мон капчи сюресэз уг утчаськы, та сямы куддыръя аслым ик люкетэ. Али малпасько ни: кулэ но ӧвӧл, дыр, выль велосипед кылдытыны, кытын ке отын со вань ни. Но мынам котьку аслэсьтымзэ, мукетызлы кельшисьтэмзэ кылдытэм потэ.

Со дыре ик мон мур, зыл-зыл вуосын улыны яратӥсь чорыг, нош уяно луэ дыртыса ӧръяськись паськыт шур вуосын, ог-огзэс азьпалтыны тыршись тулкымъёс вылын. Асме пыкылӥсько, трос пӧртэм ужъёс борды огдыре кутскисько шуыса. Таин сэрен ик ас вакытаз ӧй йылпумъя крезьгуръя школаез, умой-умой крезьгурчи, кырӟась ӧй луы…

— Оло, бер ӧвӧл на?..

— Крезьгурен профессионал сямен вырыны бер ни. Собере, крезьгурен мур выроно ке но, сцена вылэ потан вылысь ӧвӧл. Сямыя мон поннамгес улыны яратӥсь. Радио но тележурналистика монэ ас дуннеысьтым поттӥзы, дӥсьтӥсьгес каризы. Ог 10 ар талэсь азьло валай: улонын ноку уз ни луы озьы, кызьы тон малпад вал 20 арес дыръяд. Соин ик улоно, котькуд нуналлы шумпотыса, курадӟонъёс пыр потоно луэ ке но. Инмар вормонтэмзэ уг сёты. Но… Анае котькуд вамышсэ лэсьтон азяз чаклалляз: мар калык шуоз, кышкалляз вӧсь каремзылэсь. Мынам озьы улэме уг поты, ялан калык син азьын ке но.

Куддыръя калыклэсь ватӥськеме, киужен гинэ выреме потэ. Туж яратӥсько корка пушез чеберъяны, дизайнэн вырыны. Тодам вайисько гуртын пастуке ветлэмме, ас дуннеям лыдӟиськыса пукемъёсме. Городын ваньмыз бызьылыса лэсьтӥське, улон но озьы ик бызьыса ортче. Уд оске, но егит дыръям но мон туж шумпотӥсько вал огнам кылемелы. Быземелэсь азьвыл ай трос пол Выль арез но огнам пумиталляй. Мамаелы шуылӥ: эшъёсы дорын пумитало, эшъёсылы — анай-атае дорын. Огнад дыръя тынад астэ кылыны, валаны луонлыкед кылдэ, тон Инмарен, инсьӧрен кусып тупатӥськод кадь.

Астэ кылыны луэ, огдырлы дугдыса гинэ. Нош туала вакытэ ми ум быгатӥське дугдыны, соин ик вунэтӥськом: нош зэмзэ но кыӵеесь меда ми? Дыртытэк улыны дырмы ӧвӧл…

Источник:

Белых С. А. Тулкымъёс вылын / Светлана Белых ; вераськиз Елена Миннигараева // Удмурт дунне. - 2019. - 7 марта. - С. 10, 15. - (Тӧр шорын).

За предоставление материала выражаем огромную благодарность редакции газеты "Удмурт дунне"