Атаманов Михаил

Михаил Гаврилович Атаманов - тодмо удмурт тодосчи, филология наукаосъя доктор, Россиысь писательёслэн огазеяськонзылэн ёзчиез, Библиез удмурт кылэ берыктӥсь, протодьякон.

Улон сюресэз

Михаил Атаманов вордскемын Грак ёросысь Вуж Эгра (Старая Игра) гуртын 1945-тӥ арын 19-тӥ куарусёнэ крестьян семьяын.

Михаил Атаманов аслаз Ганя выныныз – кыктоос. Война бырем бере ик вордӥськизы бере, соос, тодмо ини, мае гинэ ӧз адӟе. Улон соку секыт но, куанер но, сютэм но вал. Берпум копейказэс шыръямен, нылпиослы пряник-конфет ӧз шедьылы. Анайзы огзэ гинэ куриз Инмарлэсь: нылпиоссэ медаз кушты но пыд йылазы султытыны мед юрттоз. Кӧня вал сыӵе учыръёс, куке Миша но Ганя улон но кулон куспы шедьылӥзы. Пичи дыръязы анайзы тыршылӥз пиосызлы Инмарлы оскон пыӵатыны, киросэн келяз соосты школае. Но одӥг пол соос киростэк бертӥзы: классысьтызы санитаръёс, сое адӟыса, калак ишкалтӥллям.

Ас гуртысьтыз 8 классъем школаез йылпумъяса, Михаил дышетске Алнаш ёросысь Асан совхоз-техникумын. Сое йылпумъямез бере служить каре Советской Армиын. Отысь берытскыса, ужаз ас вордскем гуртаз зоотехник луыса.

1970-1975-тӥ аръёсы дышетскиз Удмурт университетлэн кылосбур факультетаз. Студент аръёсаз ик со тодос ужъёсы пыриськылӥз, сое лыдэ басьтыса, дышетсконзэ йылпумъямез бере, сое дэмлазы аспирантурае мыныны. Эстониысь Тарту университетлэсь аспирантуразэ йылпумъяса, 1978-тӥ арын тодмо финно-угроведлэн Пауль Аристелэн кивалтэм улсаз гожтӥз кандитатской диссертация. Со нимаське вал «Этнонимы удмуртов в топонимии» (Тарту, 1978). 1978-1989-тӥ аръёсы, М. Г. Атаманов ужаз удмурт научно-исследовательской институтлэн удмурт кылъя сектораз. Аспирантураын дышетскыкуз но институтын ужан дыръяз, ӵемысь поталляз научной экспедициосы. Озьы со Удмуртилэн пӧртэм ёросъёсысьтыз, Татарстанысь, Башкортостанысь, Пермь, Киров, Екатеринбург улосвылъёсысь, Сибирьын улӥсь удмуртъёслэсь кылъя но топонимикая туж узыр материал люказ.

Соос ик инъет луизы сизьым бадӟым монографиос но куинь сюлэсь но уно статьяос гожтыны. Пӧлысьтызы тужгес но адӟем карымонэсь луо «Удмуртская ономастика» (1988), «Удмурт нимбугор. Словарь личных имён удмуртов» (1990), «История Удмуртии в географических названиях» (1997), «По следам удмуртских воршудов» (2001), «Песни и сказы ушедших эпох: Эгра кырӟа, Эгра вера» (2005), «От Дондыкара до Урсыгурта», «Из истории удмуртских регионов» (2005), «Происхождение удмуртского народа» (2010) бадӟым книгаосыз. Соос туж тунсыкоесь, лыдӟисьёслы трос тодон-валан сётозы.

«Валентин Белых» альбомлэн презентацияз

Удмурт калыклэсь кылдэм историзэ, воршуд нимъёссэ, ас нимъёссэ, инты но шур нимъёссэ эскеремен ӵош М. Г. Атаманов трос гинэ ужъёс гожтӥз на удмурт калыклэсь сям-йылолъёссэ (этнографизэ), дӥськутъёссэ, шулдыръяськон но ватӥськон сямъёссэ, осконъёссэ возьматонлы. Соос сярысь гожъямын пӧртэм статьяосаз, кылсярысь, «Обряды и поверья удмуртов, связанные с именами» (1985), «Погребальный ритуал (конец ХIХ начало XX вв.» (1985), «Костюмные комплексы в связи с этногенезом» (1987).

М. Г. Атамановлэн кӧня ке ужъёсыз озьы ик сӥземын удмурт вераськетъёсты эскеронлы. Соос сярысь гожъямын «Образцы речи сибирских удмуртов» (1982), «Граховские говоры южноудмуртского наречия» (1982), «Песни и сказы ушедших эпох: Эгра поёт, Эгра сказывает» (2005), «Удмурт нимъёс но сямъёс» (1985) но мукет.

1989-тӥ арлэн пумаз М. Г. Атаманов Удмурт научно-исследовательской институтысь кошкыса, черкын протодьякон луыса ужаны кутскиз. 1991-тӥ арысен кутскыса, со трос библейской пуштросо книгаос поттӥз, удмурт кылэ берыктӥз Библиез. Со сяна, печатлаз на вӧсяськон текстъёс. Михаил Гаврилович Атаманов трос ужа удмурт калыклэсь асваланзэ ӝутон но юнматон, удмуртъёсты черке кыскон бордын: удмурт радио, телевидение пыр ӵемысь вераськылэ, 2000-тӥ арысен «Удмурт дунне» газетын толэзьлы быдэ «Оскон, Оскиськон, Яратон» огъя липет улын статьяос гожъя. Калыкез со дышетэ ӟеч мылкыдо, пӧяськытэк, ог-огдэ гажаса, нокыӵе сьӧлыкъёс лэсьтытэк улыны но ужаны, анай-атайдэ, Инмарез данъяны но сӥё-буро карыса возьыны.

Черкын бадӟым уж ортчытыса но, М.Г. Атаманов дыр шедьтэ удмурт кылъя научной ужъёс нуыны. Берло дасо аръёсы гинэ со печатлаз кие кутымон монографиос но статьяос. Со оппонировать кариз 3 докторской, 7 кандидатской диссертациосты. Дасо аръёслэсь кема ни со ужа УдГУ-лэн удмурт кылосбур но история факультетъёсысьтыз доктор но кандидат диссертациосты утёнъя Советъёсын. Аслаз лякыт сямыныз диссертацизэс утисьёслы трос ӟеч кылъёс вералля, кутскем ужзэс азинтон понна жадёнэз валатэк ужаны мылкыд каре, тазалык сӥзе.

Гожъямъёсыз сярысь

Берло аръёсы М.Г. Атаманов, со ик Эграпи Микаль, со ик протодиакон Михаил, тодмо луиз чеберлыко литература удысэ сюрес лёгеменыз: гожъям ужъёсызлы Москваын писательёслэн эштосазы вылӥ дунъет басьтыса, 2006-тӥ арын со Россиысь писательёслэн союззылэн ёзчиез луиз.

Протодиакон Михаил – Атаманов-Эграпи Микаль – удмурт литератураын нырысьсэ туж мур но шонер ӝутэ черк улонэн, удмурт калыклэн духовной улонэныз герӟаськем ужпумъёсты. 1994-тӥ арын со СНГ-ысь православной осконысь паломникъёсын ӵош вуылӥз христиан осконлэн святой интыосаз – Израиле, Кипре, Грецие, Константинополе (туала Стамбулэ), Синай гурезе (Египет). Кузь сюрес вылын гожъям дневниксэ «Ньыль зарезь пыр Иерусалиме» шуыса нимаз но сое печатлаз «Инвожо» журналын, со аре ик – нимысьтыз книгаен (1994).

Ӟуч лыдӟисьёслэн куремзыя, паломниклэсь дневниксэ ӟуч кылэ ачиз ик берыктӥз но «За четыре моря – в Иерусалим» нимын печатлаз «Православная Удмуртия» газетын, 1999-тӥ арын со та ужзэ пыртӥз «Мой путь в Библию» книгаяз (1999), нош 2010-тӥ арын нимысьтыз книгаен поттӥз. Таяз книгаяз пыртэмын на Библиез удмурт кылэ берыктонэн герӟаськем ужпумъёс, книгалэн авторезлэн пичи дырыз, быдэ вуонэз, оскон пала берытскон сюресъёсыз сярысь веранъёс-мадёнъёс; бадӟым инты басьтэ юанъёс-валэктонъёс люкетэз. «Мой путь в Библию» книгазэ финн кылэ берыктӥзы но 2003-тӥ арын со «Tieni Raamattuun» нимын Хельсинкиын печатламын вал. . Та книгаезлы вылӥ дунъет сётӥз филологи наукаосъя доктор Анна Сергеевна Зуева-Измайлова. . Михаил Атаманов печатлаз «Инмаре, жаля монэ сьӧлыкоез» тодытонъёсын пичигес гинэ аспӧртэмлыко книгазэ (1995).

М. Г. Атаманов трос лэсьтэ но юрттэ удмурт чеберлыко литератураез выль произведениосын – веросъёсын, очеркъёсын но повестьёсын узырмытыны. Сыӵе ужъёсыз пӧлысь пусйытэк уг луы солэсь «Кылё тодэм калыкъёс» (2004) - Инмарлы оскись удмуртъёс сярысь художественно-документальной очеркъёсын книгазэ но «Тангыра» нимо кузьвероссэ (эпоссэ), кудзэ со печатлаз 2008-тӥ арын Эграпи Гавир Микаль нимын.

«Дунне вылын улон вань но, кулон вань» – шуэ автор анаезлэсь верам кылъёссэ тодаз вайыса (Кылё тодэм калыкъёс...). Туж тунсыко соиз но: котькуд веросын, очеркын одно ик пыртэмын индылонъёсыз, кылсярысь: «Дунне вылын майбыр, каньыл улыкумы, кулон сярысь тодамы ум ваиське; Инмарез данъяса, тау карыса ум улӥське. Нош кулон сьӧрысьтымы кыльытэк ветлэ. Одӥгез но вордскем мурт кулытэк уг кыльы…» Та вужмисьтэм-бырисьтэм – улон но кулон – темалы М. Атаманов-Эграпи Микаль кык очерксэ сӥзе: «Мыным вӧсь. Тятя» но «Люкиськон».

Улонлэсь бергамзэ валась, шонерлыкез, чылкытлыкез яратӥсь, улон дуннелэсь бырон пала мынӥсь тодметъёссэ адӟись, черкын ужась-тыршись берло гожъям очеркъёсаз шуэ: «Мыным вӧсь». Со вӧсь луэ яратоно калыкезлэсь курадӟемзэ, сое ултӥямзэс шӧдыса, инкуазьлэсь, адями, калык кусыпъёслэсь сӧриськемзэс адӟыса. Та темалы сӥземын «Пеньки. Мыным вӧсь», «Карлуд шур дурын малпаськон. Мыным вӧсь», «Удмурт черк. Малы мыным вӧсь» но куд-ог мукет очеркъёсыз. .

Map выльзэ усьтэ, вае, сётэ та автор асьме удмурт литературалы шуиськомы ке, нырысь ик верано: солэн творчествоез одӥг удмурт писательлэн но творчествоезлы уг тупа. Библиез берыктэм сяна, со аслыз выль ӧр шедьтӥз – христианство но удмурт адями вискысь кусыпъёсты тодыса, валаса суредан; кыкетӥез: оскон понна, ас калыкедлэсь данлыксэ утён понна кышкатэк статьяос-тодытонъёс, очеркъёс гожъяса нюръяськон.

Газет, журнал бамын-а печатлаське, радио, телевидение пыр-а вераське, очеркъёс, веросъёс, научной ужъёс-а гожтэ Атаманов-Эграпи Микаль, солэн кылыз туж чебер но узыр, жильыртӥсь ошмес ву кадь жингыртэ. Нош кыӵе шунытэсь, небытэсь, ас интыязы кулэ луись кылъёс со шедьтэ удмурт кылмылэн шыкысысьтыз бадӟымесь, мур пуштросъем малпанъёсты-веранъёсты усьтон понна?! П. К. Поздеев М. Атаманов-Эграпилэн «Песни и сказы ушедших эпох. Эгра кырӟа, Эгра вера» (2005) научной книгаезлы рецензияз шуэ: «Кин лыдӟиз та книгаез, со одно ик азяз пуктоз аслэсьтыз вордскем гуртсэ..., дор калыкез, дор музъемез сярысь одно ик тросгес тодыны сюлмаськоз. Оло нош, Михаил Атаманов-Эграпи выллемгес ик лирик но луоз. Бен, бен. Книга уго интыен-интыен зэмзэ ик лирика гожъясь кылбурчилэн сюлмысьтыз поттыса ӧръям прозалы кельше».

«Тангыра» (2008) эпосэн книгаез потэмезлы шумпотонлэн пумыз ӧй вал», – таӵе кылъёсын кутске аслэсьтыз статьязэ тодосчи В. М. Ванюшев. Со бадӟым дунъет сётэ М. Атамановлэн кузьмадёсэзлы.

Та журналын ик Р. И. Яшина шуэ: «Выжы калыклэн аслаз кузьмадёсэз (эпосэз) вань ке, со калыклэсь быдэ вуэмзэ возьматэ. Удмурт эпослэн кылдон сюресэз кузь вал. Со вера, удмуртлэсь асваланэз туж ӝегаса-могаса азинскиз шуса». Михаил Гаврилович Атамановлэн «Тангыра» кузьмдёсэз потӥз. Со зэмос история, калык мадёс, кылан-буранъёс вылэ пыкиськыса гожтэмын, жиль-жиль чебер удмурт кылын чузъяське.

Наградаосыз но премиосыз

Орден Святого равноапостольного князя Владамира III степени, 1994.

Медали ордена «За заслуги перед Отечеством» II степени, 2000.

Орден РПЦ преподобного Серафима Саровского чудотворца, 2005.

Россиысь писательёслэн огазеяськонзылэн ёзчиез, 2006.

Библиография

Книгаосыз

Кылё тодэм калыкъёс : (о благочестивых христианах Удмуртии). –Ижевск, 2004. – 148 с.

Тангыра : кузьмадёс / суредъёсыз В. Белыхлэн. – Ижкар : Удмуртия, 2008. – 319 c.

Статьяосыз

Бадӟым калык кенеш : "Тангыра" кузьмадёс-веранысь дас кыкетӥ мадь // Герд. – 2008. – № 9 (сент.). – С. 3.

Пештырскем улмопу дорын вераськон : верос // Кенеш. – 2005. – № 1. – С. 63–73.

Разговор у сожженной яблони : рассказ // Луч. – 2005. – № 11/12. – С. 77–80. – (Острая тема).

Свадьба Гуръи, сына батыра Донды : отрывок из эпоса "Тангыра" / пер. с удмурт. Н. Ермолаевой // Италмас. – 2011. – № 6. – С. 88–93.

Тангыра : витетӥ кырӟан-веран: Калмез музъемын: пинал калыклэн шудон, кырӟан-веран, куриськон сямъёсыз // Вордскем кыл. – 2008. – № 8. – С. 37–38.

Тангыра : восьмое сказание. Богатыри Прикамского края : печальная песнь о славном граде Тоймакаре / пер. с удмурт. Н. Ермолаевой // Инвожо. – 2011. – № 1/2 . – С. 56–57 : ил. – (Поэзия).

Тангыра : кузьмадёс / суредаз В. Белых // Инвожо. – 2008. – № 5/6. – С. 41–48.

Тангыра : эпос удмурт. народа / пер. с удмурт. Н. Ермолаевой // Инвожо. – 2011. – № 11/12. – С. 68–71 ; 2012. – № 1. – С. 46–48.

Тангыра. Богатыри Прикамского края : эпос удмурт. народа / пер. с удмурт. Н. Ермолаевой // Инвожо = Альманах удмуртского ПЕН-клуба. – 2011. – № 5/6. – С. 25–37 ; Инвожо. – 2011. – № 7/8. – С. 53–54.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.