Самарова Мира Анатольевна

Ним - быдэс дунне

Самарова М.А.

Мира Анатольевна Самарова – кылосбур наукаосъя кандидат, УдГУ-ысь Удмурт кылосбуръя, финно-угроведениея но журналистикая институтысь огъя но фин-угор кылтодонъя кафедралэн кивалтӥсез. Инты нимъёсты эскере, учебной пособиос лэсьтэ, кылосбур наукае компьютерной технологиосты пыртэ. 50 арессэ пусъёнэз азьын вераськиськом удмурт наука но вормонъёсыз сярысь.

Мира Анатольевна Самарова вордӥськиз Шаркан ёросысь Вортча гуртын 1990-тӥ арын Историяя, кылъя но литературая Удмурт институтэ ужаны пыриз. 1990-тӥ арын инты нимъёслы сӥзем «Микротопонимия Верхней Чепцы» диссертацизэ уте, Удмурт кун университетэ ужаны выже. Та дырлы поттӥз 2 монографизэ, берпуметӥзэ – «Удмуртская онимия I. Онимы реальной действительности» – гожтӥз Л. Кирилловаен ӵош. 4 учебник поттӥз – фин, коми, удмурт кылъёсты дышетонъя но филология удысын компьютерной технологиосты кутонъя.

Кыл доры сюрес

– Кызьы филологие сюресты кутскиз?

– Мынам атае покчи классъёсын дышетӥсь вал. Но улонам бадӟым пытьы кельтӥз англи кылъя дышетӥсьмы. Жаляса верано, 6-тӥ классын гинэ сыӵе тунсыко урокъёс вал, собере дышетӥсьмы кошкиз, урокъёсмы но мукетэсь луизы, но соку басьтэм материал татчыозь тодам улэ на. Та дышетӥсьлы синмаськыса ик, иностранной кылэз дышетэм потыны кутскиз.

– Университетэз йылпумъямды бере школаын кема ик ужаса ӧд вуттэ. Тӥледыз берен университетэ ӧтизы. Озьыен, студент вакытъёсады ик чырмыт луэмдэс синйылтӥзы?

– Татын, мынам малпамея, тодосчилэн Валей Кельмаковлэн туж бадӟым интыез. Дышетскыны пырем бере ик дышетӥсьёслэсь кыӵе луэмзэс ымысь ыме бадӟым курсъёсысь студентъёслэсь тодыны луэ ук. Кельмаков, пе, студентъёс азе чурыт куронъёс пуктэ, соин ик куд-огез нылъёсмы-пиосмы кышкатскизы, курсовой гожтыны со доры ум мынэ, шуизы. Нош мон йырам понӥ: научной ужме Валей Кельмакович дорын гожто. Со ик мыным дэмлаз инты нимъёсын вырыны, аслым но та тема тунсыко потӥз. Дипломной ужме дасякум ик, гуртъёстӥ ветлӥ, материал люкай.

Школаын ужакум ни (дышетӥз Ижысь 10 номеро школаын – авт.), Валей Кельмакович гуртам гожтэт ыстэм, монэ Историяя, кылъя но литературая Удмурт институтэ ужаны ӧтьыса, отын ӵапак топонимикаен вырисьёс, пе, кулэ. Мон пумит ӧй кариськы. 4 ар ортчыса, пыри Валей Кельмаков доры аспирантурае, вуоно араз фин кылэз дышетыны кутски. Соку университетэ кунгож сьӧрысь дышетӥсьёс Сара Хянникяйнен но Иштван Козмач лыктӥзы. Соос нуизы фин но венгер кылъёсты. Кудзэ быръёно: фин кылэз яке мадьярзэ? Малпай, сояз но таяз ветло, кудӥз кельшоз. Нырысь лыктӥ Сара доры фин кылэз утчаны, мукет нуналаз – Иштван доры. Иштван юа: тон Сара доры ветлӥд-а ни? Ветлӥ, шуисько, но мынам венгер кылэз но тодэме потэ. Озьы уз пӧрмы, шуэ, кутскид ке, дышеты фин кылэз. Озьы монэ вуттӥзы фин кылэ.

Будӥ мон Таклё гуртын. Атае отчы интернатэ ужаны интыяськиз. Но берло школаез но, интернатэз но пытсазы. Соин ик школаме Кыкваын йылпумъяй ни.

Дышетсконме азьланьтэме потэ вал, но гурт удысын мон асме ноку ӧй адӟылы, соин ик сюрес одӥг вал – дышетӥсе мыныны. Гуртын улӥсьёс шуылӥзы: малы тон удмурт кылэз бырйид, удмурт кыл быроз ни. Соку ик озьы малпало ни вал. Шуи: удмурт кылэз яратӥсько бере, малы мон мукетсэ бырйыны кулэ.

Котькуд кыл ас сяменыз тунсыко. Но фин кыл, Финляндие ветлон дунне шоры учконме воштӥзы. Нырысь Финляндия льӧль очкиос пыр адӟиськиз. Кыкетӥзэ мыныкум, ваньзэ визь пыр поттӥ ни. Соку мон валай, шӧдӥ, 3 кылэз тодӥсько шуыса. Япониысь эшъёсы шуизы: тыныд умой, тон 3 кылэз тодӥськод. Паймыса юасько: кӧнязэ? Удмуртсэ, финзэ, ӟучсэ, пе. Зэм но, удмурт кыл мон азьын соку выль сямен усьтӥськиз.

– Иське, иностранной кылын дышетӥсь луыны малпанды быдэсмиз? Али тӥ университетын фин кыллы дышетӥськоды, азьвыл комизэ но сётӥськоды вал.

– Озьы, лэся. 1996-тӥ арысен УдГУ-ын фин кылэз нуыны сётӥзы. Нырысь, конечно, туж секыт вал, малы ке шуоно ачим но со кылэз туж ӟеч уг тодӥськы. Студентъёслы валэктӥсько-валэктӥсько но собере ачим но валасько. Таӵеез но вал. Огдыре ик ужаса, диссертация гожъяны секытгес потӥз. Тае шӧдыса, монэ 1999-тӥ арын келязы Финляндие. Вань материалэ люкамын вал ни, ӝыны ар куспын диссертациме научной ужъёслэн куронъёссыя радъяй. Со сяна, фин кылме но волятӥ на.

– Инты нимъёсын выриськоды но, асьтэлэн но нимды туж тунсыко – Мира.

– Мама вера вал: атайме сельсоветэ ыстэм, Марина гожты шуыса. Папалы мынонъяз та ним кельшымтэ но, Мира гожтэм. Оло, со «мир» кылэн герӟаськемын, уг тодӥськы, но ми палан таӵе нимъёс ӧй вал. Та ним туж ик ӵем уг пумиськылы, соин ик пӧртэм учыръёс луыло. 1-тӥ курсын дышетскыкум, паспортэ ышиз, мынӥ милицие, документъёсты лэсьтыкузы, юало: нош малы нимды «Война Анатольевна» ӧвӧл?

Источник:

Самарова, М. А. Ним - быдэс дунне : [беседа] / Мира Самарова ; записала Мария Векшина // Удмурт дунне. - 2017. - 21 дек. - С. 10, 15 : фот. - (Тӧр шорын).].

За предоставление материала выражаем огромную благодарность редакции газеты "Удмурт дунне"