Крылова Татьяна Георгиевна

Пушнер уг визьма

Татчыозь рос-прос эскеремын ӧй вал на, шуыны луоз, кызьы будэтоно карпъёсты, маин соосты сюдоно, кызьы толйытоно. Вань та ужез радъян-гожъян борды басьтӥськиз 1983-тӥ арын Сарапул ёросысь Сигаево гуртын вордӥськем Татьяна Георгиевна Крылова. Со уженыз нылмурт луиз биология наукаосъя кандидат. Али дышетэ Ижысь гурт удысъя академиын, доцент. Пусъемын чорыг вордон удысысь лауреат нимын.

- Татьяна Георгиевна, атайды тӥляд Удмуртиын но, солэн палэназ но туж тодмо – гурт удыс наукаосъя кандидат, Вотка ёросысь «Пихтовка» хозяйствоен кивалтӥсь Георгий Степанович Крылов. Секыт-а вал сыӵе атай вӧзын будыны?

- Атае мынам туж ӟеч, котьку юрттыны дась. Зэм, чурытгес луылэ ик. Кылзэ огпол вераз ке, пумит мыныны уд дӥсьты. Кылсярысь, Пихтовкаын ми, куинь сузэр-апайёс, воксё ӧм тодылэ, мар со сыӵе дискотека. Со меӵак ноку ӧз шуылы: отчы ветлыны уг яра. Но ми тодӥськом: егит дыръяз ачиз но сыӵе шулдыръяськон интыослэсь пегалляз. Валэктылӥз: дискотекаын адями сӧриське гинэ. Ог-огзылэсь адӟем карыса, егитъёс тамак кыскыны, вина ӟамыръяны кутско. Чебер шат со? Адями трослы яркытгес усьтӥське ужын: сюлмо я азьтэм, визьмо я нодтэм… Атай котьку шуэ: ужлэсь кышкано ӧвӧл. Уг яраты со пӧяськемез но. Котьку шонерзэ вераны дӥсьтӥсь но гижысь-пиньысь ужась мурт гинэ чылкыт сюлэмо будэ, пе. Кызьы та кылъёслы пумит вазьыны дӥсьтод на? Быдэсак шонер ук со. Но аслам нылпиосы луизы ке, эктыны потыны алыны уг быгаты, дыр.

Атаймы лыдъя: котькуд пинал, быдэ вуытозяз, сюлмаськыны кулэ котыр ласянь азинскон сярысь. Школаын гинэ тодон-валан люкан тырмыт ӧвӧл. Быгатэмъя трос лыдӟиськоно, пе. Соин ик ваньмон вакытам киысьтым книга ӧй куялля – библиотекаын лыдӟымтэ бичетэ ӧй вал. Тужгес зол тунсыкъяськылӥ биологиен, ихтиологиен. Со сяна, пӧртэм кружокъёсы ветлӥ. Школаын кыӵе ке ужрад ортчоно ке, сое радъянэ-нуонэ пыриськылӥ. Соин ик мыным шулдыръяськон ӧз тырмылы ӧй шуысал.

- Ӝытъёсы кыре потась ёзъёстылы вожъяськон мылкыд ӧз кылдылы-а?

- Ӧз. Ми уго Сарапул ёросысь Мазунино черкогуртын йырмес ыштылӥмы, дискотекае потатэк но. Котькуд каникулэ милемыз отчы песянаймы доры ыстылӥзы. Дораз ик люкаськылӥзы ӵыжы-выжыосмылэн но нылпиоссы. Ас нылпиоссэ песянаймы ужен сэрен рос-прос визьнодаса ӧз вуы бере, милемыз со котьмалы дышетӥз, яратӥз. Али но со Крыловъёсын Пихтовкаын улэ. Картэным шутэтскон нуналъёсы со доры адӟиськыны бертаськомы. Тэшкылиос пӧлын мон самой бадӟымез вал. Инкуазь котыре ялан кыстӥськеменым, огпол ваньзэсты ӝутӥ бадӟым походэ. Сумка бичамы. Песянаймы ӧз оскы, лэся, кузь сюрес вылэ потыны дӥсьтомы шуыса. Нош ми малпамы Сарапулозь вуыны. Отчыозь 35 иськем. Сюрес кузя мынэм интые, нюлэсъёстӥ, бусыостӥ кошкимы. Тунсыко вал ук, кыӵе шуг-секытъёс пыр потыны быгатомы. Нош ӵыжы-выжыосмы куалектӥллям, милемыз утчаны кутскиллям. Ӝыны нунал бызьылӥллям. Соку кыл йӧтӥз ик. Тужгес зол сюлмаськиз песянаймы: солы милемыз оскизы вал угось. Озьы ке но арлыдо кышномурт ӧз тышкаськы. Ма, анаен атай но е огпол но киязы ӧз кутылэ. Соос лыдъяло: сюло адямиез уз визьма, аслад выросъёсыныд гинэ возьматыны быгатод, кызьы шонер улоно. Но монэ пушнерен «сюдэмзы» вань ик. Мулёвка шурамы чорыгаса пукыкумы, пыласькыны мылкыды ӝутӥськиз. Отын ик ӟазегъёс-ӵӧжъёс уяло, вуэз кырсь. Кылиськи но пыри. Мукет пичиос но мынэсьтым адӟем каризы. Дэри вуын кема ӧм жомбылляське – анаймы синйылтэм. Потэ, пе, али ик. Бадӟымысен пичиозь черодэ султэ – радэн-радэн сальыло. Монэ пушнераса вуттӥз ик. Пичиос кунэрес ымнырме адӟиллям, шӧдске – пытьызы но ӧз кыльы ни, пегӟизы. Но пушнер монэ ӧз визьма. Туннэ ке но олокытчы но пыриськисько.

Пичи дырме шумпотыса тодам вайисько, тужгес но – песянайме. Тамара Дмитриевна ваньзэ лэзе вал. Оло, соин но мон понна со огез адӟем карымонэз кышномурт луиз. Солэсь мытэм сюрессэ азьланьтон понна ик пичи дыръям шуылӥ: луо пудо эмъясь. Ма, со сяна но, ӵыжы-выжыосмы пӧлын эшшо 3 кузя пудо эмъясьёс. Но песянае малпанъёсме уретӥз: та ӧрез эн бырйы. Мугзэ но валэктӥз: гурт удыс куашка, озьыен, татын егит ныллы шудзэ утчаны шуг луоз.

Кылзӥськоно кожай. Но пудо эмъян удыслэсь туж ик палэнэ ӧй кошкы, бырйи Удмурт кун университетысь химия но биология факультетэз. Ӵыжы-выжыосмы пӧлын биологъёс 5 кузя. Нялтас вераса, атае но биолог. Анае Ольга Владимировна школаын биология урокъёсты нуиз. Озьы «вить» басьтон понна мыным, эшъёсы сярысь, кык поллы золгес пӧсяно луылӥз. Котькуд запятой борды гинэ но синмыз мертчылӥз.

- Тӥ туж вазь тунсыкъяськыны кутскиллямды наукаен…

- Талы кутскон сётӥз атае. Пичи дыръямы со огпол милемлы пичиесь карп чорыгъёс вайиз: таосты, пе, сюдоно но будэтоно, огез но медаз кулы – ваньзы понна кыл кутӥськоды. Сузэръёс пӧлысь оло самой бадӟымез луэменым, оло зэмен ик та удыс бордаз кыскемен, быжоосты утялтӥсь мон луи. Но чорыгъёсы одӥг арня сяна ӧз улэ – кулылӥзы. Нялтас вераса, аквариум возисько. Сузэръёсы нош экономистъёс луизы.

Пичи дыръям мон ялан олокыӵе но экспериментъёс ортчытъясько вал. Огпол Анфиса коӵышмы мушез ньылэм. Каньсыраз, ымдур котыръёсыз тӧрнаны ӧдъязы. Пудо эмъясь ӵыжы-выжыосылы жингыртӥ, югдурез верай. Соос кышкатӥзы: тӧрнамзэ быдтӥсь укол ӧд пукты ке, кулоз. Эмъюм но, шприц но шедьтӥ. Анае но сузэръёсы куарето: ми ум пуктэ. Атае ужын. Коӵышме, медаз ӵабъяськы шуыса, биньылӥ. Песянаелэсь кылӥ вал: скаллэн куэз туж зӧк, соин ик солы укол пуктон понна венез вань кужмысь донгоно. Писэйме скал кожаськем, лэся. Шоналтӥськи. Вене лыозяз вуиз кожай – капчиен пыриз. Но мяугетӥсе ӧз кулы ни.

- Котьма ке но чорыгъёс бордазы золгес кыскиллям. 8-тӥ классын дышетскыкуды ик, эскерыны вырылӥды ни вал, кызьы толъе карп, маин сое сюдоно. Гожъяды уно докладъёс, печатласькиды газетъёсын.

- О-о, Пихтовкаын ужась специалистъёсты нерад каремысь ӧй дугдылы. Кин но со мон шоры серекъяса но учкылӥз, вылды, тунсыкъяськонэ ортчоз, кожаз. Но мон пумен Россиысь конференциосы пыриськыны кутски. Ужме рос-прос азинтӥ ни, Удмурт кун университетын дышетскыкум. Соку ик шараяськем куд-ог лыдпусъёс маза ӧз сётэ ни.

Кылсярысь, тазалыкез эмъясьёс куро: адямилы араз ог 18 килограмм чорыг сиёно. Нош Удмуртиын улӥсьёс туннэ та лыдпусэз уг ик тодо кадь. Удмуртстат ивортэмъя, 1985-тӥ арын котькудмы ог 24 килограмм чорыг сииськомы вал. 1998-тӥ арын та лыдпус 6 килограммозь усиз. Али 12 килограммлэсь но ичи чорыг сииськомы. Та ласянь Удмурт шаер мукет улосъёслэсь туж бере кыле. Со вие ик асьме дорын кадь нокытын но сокем зол азинскемын ӧвӧл чорыг вордон. Сотэк-а Россиысь улосъёсысь та удысэн тунсыкъяськисьёс конференциосы ӵемысь курисько Пихтовкае? Туэ сентябрь кутсконын но сыӵе семинар ортчиз.

- Удмуртилы вань-а кыӵе улослэсь адӟем карыны?

- Туннэ чорыг вордонъя асьмемын ӵошатӥськыны быгатэ Ростов, Тула но Астрахань. Ростовын, карпез сяна, юшъёсты вордо на. Астраханьын карпъёсын ӵош одӥг вуын уяло ӟазегъёс. Отын уго гужемзы но кузьгес. Берлозэ адӟем карыны луоно. Тылобурдоослэн кыедзы уго – чорыгъёслы ӟеч сиён. Озьыен, быжоосты сюдыны ӧжытгес комбикорм кошкоз. Но кин тодэ, мар луоз карпъёсын, вылазы бурдоос уязы ке. Кыедэз веръяменызы сэрен шугомизы ке, рос-прос будэмысь дугдӥзы ке? Таӵе экспериментъёс ортчытыны кышкыт.

Семинаре вуизы 27 улосысь специалистъёс. Куинь нунал куспын соос шокчыны маза ӧз сётылэ мыным но Георгий Степановичлы – ялан согылӥзы юанъёсынызы. Уноез паймизы, лэся, кызьы одӥг ӵыпетын будэтыны луэ 1 сюрс 336 тонна карпъёсты. Но асьме республикалэн чорыг вордонэз азинтыны луонлыкъёсыз туж бадӟымесь. Удмуртиын 1 сюрс 900 ӵыпет. Ваньмыз со 16 сюрс 500 гектар. Пудем ӵыпетлэн ву синучконэз 380 гектар, Вотка водохранилищелэн – 5 сюрс гектар. Озьы ке но арлы быдэ вузаны дась луэ 150 тонна гинэ чорыг.

- Маин герӟаны луэ та пичи лыдпусэз?

- Шур чорыген тунсыкъяськисьёс арысь аре йыло. Чорыглы рос-прос будыны луонлыкъёс кылдытэмын ӧвӧл. Удмуртиысь чорыг вордонъя пичиесь предприятиосын («Рыбовод» ООО, «Горд Октябрь» СПК, «Чистые пруды» ЗАО) та удысэз азинто кадь. Но отын но арлы быдэ 1 гектарысь 5-6 центнер сяна быжоосты уг куто.

Ма, Удмуртиын чорыг будэтонъя рос-прос материалъёс но ӧй вал. Нырысетӥ йӧн-йӧн монография лэсьтэмын 2004-тӥ арын. Гожтӥз сое атае Георгий Крылов.

Кин но со шуоз: атае карпез будэтонъя монографиеныз ваньзэ вераз ни бере, кыӵе выль усьтон лэсьтӥз на меда нылыз? Мон биолог. Тросгес саклык висъяй асьме ӵыпетъёслы, макем соос дасесь карп вордонлы. Шараяй, маин умойгес луоз сюдыны карпъёсты. Кылсярысь, вордӥськемез бере 30-40 нунал ӵоже карплы мултэсэз номыр кулэ ӧвӧл – ӵыпетысь со ваньзэ, мар кулэ, аслыз шедьтэ. Бадӟым карп вордон понна сое тужгес зол сюдоно июнь толэзе. Комбикормез 30 процентлы йылтоно. Быжолэн кӧтыз тыр ӧз луы ке, кезьыт гужемлы сётӥськоз но лябӟоз. Озьы ик чакласьконо август пумын. Тодӥ, макем воштӥське карплэн пуштӥрлыкез будэмезъя. Кылсярысь, килограмм йылтэмезъя кулэсме шакасэз (жабры), сюлэмыз, йырвиымез, лупез. Та герӟаськемын вуын кислород тырмымтэен. Югдурез тупатыны луэ аэрация амалэн гинэ. Та дуно усе.

Удмуртиын чорыг вордон пайдаен мед берыктӥськоз шуыса, нимысьтыз дасям ӵыпетэ лэзёно 200 граммозь ке но будэтэм карпъёсты. Сыӵе чорыг сӥзьылозь юнманы вуэ ни 1 килограммозь. Таизлы ни басьтӥсьёс но сюрозы. Кык арозь будэтэм но ӵыпетэ лэзем карпъёс эшшо но пайдаенгес берытско. Та ласянь, монэн сяна, одӥг уж но туннэ гожтэмын ӧвӧл. Ӵапак со юрттэт сётэ чорыг будэтонъя огазеяськонъёслы азьланяз ужаны. Сыӵе эскеронъёстэк, предприятиос продукцизэс йылтыны но дунтэмгес карыны уз быгатэ. Туннэ уго чорыгез сюдыны туж трос уксё кошке. Соин ик карп дуно сылэ.

Со сяна, монэн шараям лыдпусъёс туннэ кутӥсько зооветеринаръёсты дышетонын. Диссертациысьтым материалъёсыным пыриськылӥ Россиысь пӧртэм конференциосы. Уфаын солы сётӥзы нырысетӥ степенё диплом, Москваын – Данъян грамота. Но та ваньмыз мынам огнамлэн гинэ вормонэ ӧвӧл. Вань сюлмысьтым тау кареме потэ Пихтовкаысь вань специалистъёслы: П. Варов, В. Докучаев но И. Зайцев бригадиръёслы, Л. Искандерова лаборантлы, В. Соромотиналы, С. Бердышевалы но Л. Докучаевалы. Йыбырттӥсько гурт удыс наукаосъя докторлы, наукая кивалтӥселы А. Любимовлы но атаелы. Та адямиостэк мон табыдӟа вормонъёс басьтыны ӧй пишмытысал.

- Наукая уж гожтытозяды, кӧня чорыгез виёно луиды? Киды пыриз-а улэп мае ке быдтыны?

- Мыным та юанэз туж ӵем сётъяло. Наукаен вырись мурт вир кисьтыны курдаз ке, со одӥг уж но уз дася. Улытозям мон 5 сюрс чорыгез быдтӥ ини, дыр. Туж бадӟым лыдпус кадь. Но солэсь но уноез кулоз на, доктор ужме гожтыкум. Со борды кутскеме потэ ни. Тодӥсько созэ: макем тросгес чорыгез эскерид, наука понна быдтӥд, сомындалы ик ӟечгес но устогес усьтонъёсыд луозы. Дышетскисьёсылы но ӵемысь шуисько: дышетскыны эн курдалэ.

- Тӥ чебер, егит нылмурт. Студентъёс пӧлын тӥледлы синмаськемъёс уно, дыр?

- Дышетонын мон атае кадь чурыт. Студентъёс азьын уг чеберъяськиськы. «Кыкъёс» но пуктылӥсько. Азям синвузэс кисьтыны кутскем нылъёслы но соку ик шуисько: эн бӧрдэ. Синкылиосты адӟыса, ачим оломар луисько уго. Нош синмаськемзэс верась пиос вань ик. Но соос шоры мон мыняса кадь учкисько: ӟеч отметка кулэ?

- Студент вакытэ синмаськыны луэ шуыса, уд оскиське шат?

- Оскисько. Ас вакытаз синмаськи вал одӥг студентлы. Но тунсыкъяськонъёсмы пӧртэмесь луэмен, ог-огмес валамысь дугдӥмы. Сутӥськи, шуыны луоз. Оло, соин но нырысь-валысь нокинэн но тодматскыны ӧй дӥсьтылы ни. Гиви нимо картэным но загсэ мынэмлэсь азьвыл вить ар пумиськылӥ. Зооинженер со. Ма, ӵош кариськон понна дыр но кулэ вал: нырысь аспирантураме йылпумъяме потӥз. Бызид ке, саклыктэ семьялы висъяны кулэ ук. Нош дышетскись адямилэн, книгаослы сяна, дырыз малы ке тырме шат? Уг.

Ма, мон туннэ но дышетскись мурт кадь – ялан гурт удысъя академиын ышылӥсько. Дышетӥсьлэн ужез сыӵе ни. Но картэ талы дышемын.

- Кузпалды кызьы чидаз, фамилидэс асьтэлэсьсэ ик кельтӥллямды?

- Загсэ мынэммылэсь азьвыл рос-прос кенешимы. Со вакытэ мон биология наукаосъя кандидат вал ни. Фамилие воштӥське ке, вань документъёсме воштоно – наука удысын бергась муртлы та капчи ӧвӧл. Собере куспамы валамтэос, тьфу-тьфу, уг кылдыло на. Кин но со бызем-басьтэммылэсь азьвыл куаретӥз вал: пӧртэм выжыысь луэменыды ӵош улыны уд пӧрмытэ. Песянае буйгатӥз: асьмеос интернационал семья, но куке урод улӥмы шат? Тодӥ: Гиви Ижын вордӥськемын. Выжыезъя грузин ке но, ӟуч анай вӧзын кыдамын. Соин ик ог-огмылэсь пӧртэмлыкмес мон туж ик уг шӧдӥськы. Со, ӝӧк вылэ мыжгыса, аслэсьтыззэ ноку уз кары – мынэсьтым кылзӥське.

Зэм, одӥг ласянь Гиви монэ тупатскыны курылэ ик. Калык сиёнзылэсь мӧзме. Соин ик со монэ кафеостӥ нуллэ. Мыным сиёнзы яра. Пӧраськыны рос-прос дышетски ке, отчы сюрес пытсаськоз. Но мынам быдэс улонэ азьпалам. Декрет отпуске потӥ ке, дышетскыны дыры тросгес луоз.

- Эшшо кыӵе пиртэшъёсты вань?

- Одӥг «висёнэ» вань ик – куалялюльы туж яратӥсько. Мынам соос 60 пумо ни. Оломаинызы бордазы кыско. Эшъёсы, кытчы ке палэнэ мыныкузы, тодо ни мар мыным кузьманы. Табере матысь дырлы льӧль малпанэ но вань ини: со ракушкаослы пиялалэсь витраж лэсьтоно.

Источник:

Крылова Т. Г. Пушнер уг визьма / Т. Г. Крылова ; записала Е. Сараматова // Удмурт дунне. - 2012. - 21 сент. - С. 6,11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"