Ломагин Кирилл

Кирилл Егорович Ломагин (1933-тӥ ар 24-тӥ май, Пичи Пурга ёрос, Бӧдья Пуро гурт – 2012-тӥ ар 6-тӥ оштолэзь, Ижкар) – удмурт кылбурчи, веросчи но журналист, Удмурт Элькунысь лулчеберет удысысь дано ужась, Удмурт Элькунысь калык писатель, Россия Федерациысь писательёслэн огазеяськонзылэн ёзчиез.

Улон сюресэз

Кирилл Ломагин вордскиз Пичи Пурга ёросысь Бӧдья Пуро гуртын 1933-тӥ арын 24 мае.

Вуоно писательлэн анай-атаез узыр семьяысь вылӥллям. Пичи Кирлоез Бран гуртын черкын пыртӥллям.

Пичи дыръяз ик нырысьсэ букваосын тодматӥзы анай-атаез, апайёсыз, эшъёсыз. Каллен ас понназ дышиз лыдӟиськыны.

Ас вакытаз пияш начальной школаез йылпумъяз вордскем гуртаз, отын ик лыдӟиськыны туж яратӥз но библиотекаысьтызы ваньмыныз сямен книгаосын тодматскиз. Нырысетӥ дышетӥсез Василий Данилович Бегитов пияшлэсь мылкыдзэ ӝутӥз. Озьы ик туж яратӥз суредаськыны. Суредъёссэ школа коридорлэн борддоръёсаз ошылыса улӥзы. Дышетскон Кирлалы капчиен сётӥськиз. Гуртысьтызы покчи школаез кык ар куспын йылпумъяз.

Витетӥ классэ мынӥз вал Кечовое. Но туж секыт вал отын дышетскыны. Директорзылэн чарс сяменыз сэрен, пияш куштӥз дышетсконзэ. Сыӵе пичи мурт колхоз ужез быдэсъяны кутскиз. Быдӟым ож вакыт но, собере но улон туж секыт вал, пичиысен котькыӵе секыт ужез ужаса будӥз: усыяз но, гыриз но, кизиз но, чугун сюресэз тупатъянын но… Сиён уг тырмы вал, сютэм улонэз но адӟиз гинэ. Но дышетскыны мылкыдзэ шӧдыса, апаез сое Брангуртысь сизьым классъем школае нуиз. Татысь дышетӥсьёссэ Кирилл Егорович али ке но шуныт кылын тодаз вае. Сое со быдтӥз похвальной грамотаен.

Брангуртысь сизьым классэз йылпумъям бераз, 1949-тӥ арын Кирлоез экзаменъёстэк Ижкарысь педучилищее куто, но татын трос дышетскыны ӧз кылды – кыкетӥ курсысен армие басьто но Тихоокеанской флотэ келяло. Татысен шедиз Япон зарезьысь нимо-дано «Ӟуч шормуӵе». Старшой матрос луыса, дышетскон мылкыдзэ ӧз кушты но офицеръёслэн Ворошилов нимо юртысьтызы ӝыт ужась школаязы интыяськиз. Нырысь-валысь уг басьто вал, куриськыны юри адмирал доры ветлӥз. Мырдэм кутӥзы. Ӝытлы быдэ солань-талань 32 иськем ветлыса дышетскиз. Вакчи дыр куспын 9 но 10 классъёс понна экзаменъёссэ сётӥз но аттестат басьтӥз.

Службазэ йылпумъяса, Ижысь сельскохозяйственной институтлэн заочной отделенияз дышетскыны пыриз, сое йылпумъяса (1962), инженер-механик луиз. Секыт вал дышетскыны, сю мурт пӧлысь тямысэз гинэ пумаз вуиз. Но со удысъя ужаны ӧз кылды. Куинетӥ курсын дышетскыкуз, пырак институтэ жингыртыса, «Советской Удмуртия» газетлэн редакцияз ужаны ӧтизы.

Отӥяз ини 1966–1968-тӥ аръёсы Москваысь Вылӥ партийной школаын журналистикая ёзэтын дышетскиз но сое отличиен йылпумъяз. Егит муртэ соку ик «серметазы», Удмурт Элькунысь военкоматэ ужаны кутӥзы. Собере ини Кирилл Ломагин вань улонзэ сямен герӟаз газет ужен (1958–1996), редакциын пӧртэм должностьёсын вал, кема аръёс кивалтӥз гурт улонъя но культура ёзэтъёсын. Аслаз верамезъя, асьме республикаысь ваньмаз сямен, самой пыдлоосаз, гуртъёсы вуылӥз. «Улонэ сюрес вылын ортчиз», – серекъяса вера Кирилл Егорович.

Кирилл Егорович Ломагин уно аръёс ӵоже тыршемез понна пусъемын пӧртэм вылӥ наградаосын. Со гожъясьёсмы пӧлысь огназ данъямын туж вылӥ наградаен – Калыкъёслэн эшъяськонзы орденэн. Озьы ик пусъемын медальёсын, Удмурт Элькунысь Вылӥ Кенешлэн Президиумезлэн Почёт грамотаеныз, лулчеберет удысысь дано ужась, ВДНХ-лэн азвесь медаленыз, Кузебай Герд нимо премилэн лауреатэз но мукетъёсыз. Солы сётэмын Удмурт Элькунысь калык писатель дано ним...

Кема дыр ӵоже секыт висемез бере улонысь кошкиз 2012-тӥ арын 6-тӥ оштолэзе.

Гожъямъёсыз сярысь

Таиз писатель лыдӟисьлы тодмо луиз поэт но прозаик луэменыз. Тихоокеанской флотын служить карыкуз гожъяськыны кутскиз. Заметкаоссэ но кылбуръёссэ ёрос газетазы ыстылӥз, ӵемысь печатласькиз «Красный боец» газетын. 1956-тӥ арын нырысетӥ кылбурез «Советской Удмуртия» газетын Выль ар номераз потӥз … Нимаське но вал «Выль ар уе» шуыса. Кылбур печатласькиз Михаил Петровлэн юрттэменыз. Егит гожъяськисьлы солэсь но бадӟым шумпотон ӧй вал ни кадь соку. Собере ини егит писатель проза но поэзия удысын кужымзэ эскере. Трос командировкаосы ветлэмез ик юрттӥз писательлы умоесь статьяос, очеркъёс но веросъёс гожтыны. Проза сяна, кылбуръёс но кылдытэ. Соосты пӧртэм жанръёсын гожтэ, озьы кылдо солэн басняосыз, соос пӧлысь умойёсыз потӥзы «Тылсиос но вужеръёс» сборникен 1964-тӥ арын. Сое умой пумитаз удмурт басня гожъясь тодмо поэт А. Лужанин, егит эшезлэн басняосызлы сӥзем статьязэ ик со «Кутсконэз умой» шуыса нимаз.

Г. Архиповен ӵош

К. Ломагинлэн нырысетӥ печатлам книгаез вал "Лема дурын" (1963) очеркез. Отын автор котыр ласянь возьматыны сюлмаськем зэмос адямилэсь Ю. Н. Зямбахтин инженерлэсь, Пышкет гуртэ вуыса, умой-умой уж борды кутскемзэ. Огъя кыл со шедьтэ колхоз ужез ӟеч валась механизаторъёсын, нош ваче пумит вуэ колхоз председателен Ешмеметьевен, юлэсь вуэмзэ чаклатэк араны уллясь муртэн. Озьы татын кылдэ со вакытэ туж вӧлмем конфликт: одӥгез ужез валасьтэм, кузё лыдъяськись, нош мукетыз — вылез сярысь сюлмаськись, уродэныз нюръяськись мурт. Татын шӧдӥське писательлэн диалогез умой пӧрмытыны тыршемез.

Писательлэн капчи мылкыдын но ӵушкась чуръёсын тырмемын "Тылсиос но вужеръёс" (1964) но «Шӧкычен кенешыса» (1978) бичетъёсыз. Отчы люкамын пӧртэм кылбуръёсыз — вань отын гражданской, лирической, сатирической мылкыдын гожтэмъёсыз.

Со вакытэ поэзиын вӧлмемын вал пӧртэм декларативной кылбуръёс, соин ик сборникын но пумиськыло сыӵе гожтэмъёсыз. Озьы ке но, татын автор вера ини "Уг кожа тӧлъя" кылбураз аслаз улон сюресэз, ас сяменыз сюрес лёгемез сярысь:

Лыдъянтэм, ортчонтэм улонын сюресъёс,

Вань, вылды, котькинлэн ик отын пытьыез.

Но котькӵе секыт азьпалан мед луоз,

Мон уг кожа тӧлъя — весь лёго ӟеч сюрес!

Тужгес но тунсыкоосыз басняосыз печатламын «Крокодил» журналын но «Удмуртский юмор» бичетын.

Собере кылдӥзы на «Кошкиськом революцие» (1969), «Мон ке пӧсь шокчи» (2002) кылбур бичетъёсыз. К. Ломагин удмурт лыдӟисьлы тужгес тодмо луиз проза удысэ пыриськеменыз. Нырысь кӧня ке веросъёс но очеркъёс со кылдытӥз, собере бадӟымесь жанръёс борды басьтӥськиз, тунсыкоесь повестьёс пӧрмытӥз. Нимаз книгаен 1976-тӥ арын печатламын вал К. Ломагинлэн "Сӥзьыл гудыри" произведениез, отын вераськон мынэ удмурт гуртлэн революция азьын улэмез сярысь. Автор возьматыны тырше Шыкысгуртын ортчись учыръёсты, куанеръёслэсь но узыръёслэсь ваче пумит вуэмзэс (со вакытэ вӧлмем сямен ик). Уката ик трос сьӧд буёлэн возьматэмын гурткузё. Нюлыш Илля — ӟичы кадь кескич, кион кадь сьӧсь, сьӧраз ортчем узыр мурт.

1979-тӥ арын К. Ломагин Н. Куликовен ӵош поттӥзы "Шудоез сюрес одӥг" нимо повесть. Нош отӥяз автор ас понназ тросгес ужаны кутскиз но 1983-тӥ арын печатлаз "Котьку возь сюлэмад" повестьсэ. Та книгаез лыдӟисьёс шуныт пумитазы, авторлы соос юанъёс сётылӥзы, соин К. Ломагин та произведенизэ азьланьтыса, дас ар ортчыса, романлы пӧрмытӥз но сое "Котьку сюлэмын" нимын печатлаз 1993-тӥ арын. Та романлэн героез луэ Рево Конюхов: удмурт гуртын будэм адями, Быдӟым Отечественной война дыръя секыт ож сюресэз ортчем мурт. Войналэн йылпумъяськон вакытаз вуыса но, Берлинэз басьтонэ Револы пыриськыны ӧз кылды — сое ыстӥзы чылкак война дыръя тупасьтэм уже — немец музъем вылын немец калык понна ю-нянь кизьыны, соку ик сӧсырме.

Солэн тодмо «Сьӧд тэльын пушъем яратон» (2002), «Ӟыгыръя, киосыд вань дыръя» (2004) но «Гырлыё чиган» (2008) повестьёсын книгаосыз.

Кирилл Егоровичлэн ваньмыз сямен произведениосыз улон вылэ пыкиськыса, улонысь учыръёс вылын гожтэмын. Писатель малпаське адямилэн музъем вылын интыез, калыкъёслэн кусыпъёссы, яратэмзы, куректэмзы но шумпотэмзы сярысь. Но ваньзэ сое гожтыны тырше. Вань произведениосаз солэсь чакланы луэ интернационализм, патриотизм, ужез яратон но чылкытлык, ог-огдэ яратон но гажан мылкыд.

К. Ломагинлэн произведениосыз берыктэмын ӟуч, пор, бигер, молдаван кылъёсы.

Наградаосыз но премиосыз

Удмурт Элькунысь Вылӥ Кенешлэн Президиумезлэн Данъян кагазэз, 1977.

Калык эшъяськон орден (Орден «Дружбы народов»), 1989.

Удмуртиысь Кузебай Герд нимо премилэн лауреатэз, 1999.

ВДНХ-лэн азвесь медалез.

«Устоесь кичӧлтонъёс понна» нимысьтыз диплом.

Библиография

Книгаосыз

Гырлыё чиган : повесть. – Ижкар : Инвожо, 2008. – 117 с.

Котьку возь сюлэмад = На всю жизнь : повесть. – Ижевск : Удмуртия, 1983. – 228 с.

Котьку сюлэмын : роман. – Ижевск : Удмуртия, 1993. – 386 с.

Кошкиськом революцие : кылбуръёс. – Ижевск : Удмуртия, 1969. – 35 с.

Лема дурын : очерк. – Ижевск : Удмурт. кн. изд-во, 1963. – 32 с.

Мон ке пӧсь шокчи... : кылбуръёс. – Ижевск : Удмурт. ун–т, 2002. – 78 с.

Сӥзьыл гудыри : повесть. – Ижевск : Удмуртия, 1976. – 108 с.

Сьӧд тэльын пушъем яратон : повесть. – Ижевск : Тип. Удмурт. гос. ун-та, 2002. – 103 с.

Тылсиос но вужеръёс : кылбуръёс. – Ижевск : Удмуртия, 1964. – 60 с.

Шекычен кенешыса : серемес кылбуръёс, басняос, фельетонъёс / худож. Р. К. Тагиров. – Ижевск : Удмуртия, 1978. – 68 с. : ил.

Куликов Н. В. Шудоез сюрес одӥг : повесть / Н. В. Куликов, К. Е. Ломагин. – Ижевск : Удмуртия, 1979. – 92 с.

Статьяосыз

Ӟыгыръя киосыд вань дыръя : повесть / К. Ломагин // Кенеш. - 1993. - N 1. - С. 6-24 ; № 2. - С. 7-20 ; № 3. - С. 5-12.

Инбаме тубат ӧвӧл : мадёс // Удмурт дунне. – 2006. – 24, 30, 31 мая, 6, 14, 20, 21 июня.

Лялюк : повесть // Кенеш. – 2006. – № 10. – С. 7–49 : фот. ; № 11/12. – С. 11–39 ; 2007. – № 1. – С. 47–67.

Не та мозоль : стихотворение / пер. с удмурт. И. Законова // На переломе эпох : Союзу писателей Удмуртии 70 лет, 1934-2004 : ст., стихотворения, прозаич. произведения, док. – Ижевск, 2006. – С. 251.

Нимъёсын шудон : верос // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 74–75.

Сыръясь нюр : повесть // Кенеш. – 2008. – № 8. – С. 14–38.

Ӧтё синъёс : кылбур // Удмурт дунне. – 2008. – 22 окт. – С. 6. – (Шудэлэ тӥ, серектэ).

Кырӟанъёсыз

Корепанов Г. Мукетыз кулэ ӧвӧл // Кенеш. – 2008. – № 5/6. – С. 44.

Кузнецов П. Н. Тонтэк кин-о мон? // Ашальчи. – 2009. – № 1. – С. 24 ; Байгурезь (Дебесы). – 2005. – 18 марта.

Кузнецов П. Н. Тон но мон : "Мынам сюресэ, тынад сюресэд..." // Удмурт дунне. – 2005. – 8 июля. – С. 14.

Кузнецов П. Н. Мынам сюлмам : "Мынам сюлмам пыдлон-пыдлон..." // Удмурт дунне. – 2008. – 22 окт. – С. 6.

Кузнецов П. Н. Эн дыртэ, куаръёс... : "Эн усе на, эн усе на, куаръёс..." // Удмурт дунне. – 2008. – 27 мая ; Кенеш. – 2008. – № 5/6. – С. 24 ; Инвис (Шаркан). – 2005. – 23 сент.

Кузьмина Ю. И. Кызьы тынад нимыд? : "Мон нырысьсэ эктӥ вальсэз тонэн..." // Удмурт дунне. – 2008. – 20 авг. – С. 6. – (Шудэлэ тӥ, серектэ).

Оськин М. Мынам сюлмам : "Мынам сюлмам пыдлон-пыдлон..." // Кенеш. – 2008. – № 5/6. – С. 18 ; Удмурт дунне. – 2010. – 9 июня. – С. 7.

Постников Н. Е. Кылзэ ай, мусо нылъёс! : "Кылзэ ай, мусо нылъёс!." // Малпасько тонэ : кырӟанъёс = А мне бы увидеть тебя : песни / Н. Постников. – Ижевск, 2010. – С. 107–108 ; Удмурт дунне. – 2009. – 3 марта. – С. 8 ; Кенеш. – 2010. – № 1. – С. 102–103.

Соснов С. Улонлэн гердъёсыз // Ашальчи. – 2005. – № 5. – С. 25.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.