Москвина Татьяна Никитична

Эмъя, бурдъя дэрем

Москвина Т. Н.

Татьяна Москвина - республикаысьтымы Суредан искусствоосъя музейысь нырысетӥ реставратор. Удмуртиысь суредасьёслэн ужъёсынызы, 18-тӥ даурысь картинаосын ӵош музейын утиське удмурт калык киужъёсын коллекция. Сое калыкысь бичан-улӟытонлы трос кужымзэ сётӥз Пичи Пурга районысь Гожня гуртын вордскем нылкышно Татьяна Москвина.

Татьяна Москвинаез калык тодманы кутскиз 1988-тӥ арын. Соку печатласькиз «Удмуртское народное искусство» буёло ӟеч альбом. Татын трос калык дӥсьёсты возьматэ Татьяна Москвина. Соку со аспӧртэм удмурт модель луиз. Книгаен тодматскыны быгатӥзы кунгож сьӧрын улӥсьёс но. Татысь текст берыктэмын ӟуч, англи но венгер кылъёсы. Бӧрысьгес удмурт калык киужъёсын бадӟым адӟытон кошкиз Венгрие. Мадьяр шаерысь городъёсын адӟытонэ ӧтись ялонъёсы пуктӥзы Татьяна Никитичналэсь фотозэ.

Отын кор, татын кор

Кин пыӵатӥз Микта Танялы балерина луон мылкыд, табере тодод на шат? Оло укыргес ушъязы эктэмзэ. Еж мугорыз сюсьтыл кадь куасалляськиз. Сьӧд-тӧдьы экранэн телевизорын балет возьмато ке; нылашез со дорысь номырин уд вырӟыты. Кытысь ке тодӥз: Казаньын эктыны дышето. Кузонэ нуэ Гожня пыр ортчись чугун сюрес.

- Мемей, балерина луэме потэ, - быз бӧрдэ Таня. Ачиз вала: быгыльскон вакытазы вуэм нылъёслы хореография училищее сюрес ворсамын ни.

Зояпай нылзэ буйгатэ:

- Ма, тон, нылы, художнике мын. Суредамед тӥни кыӵе чебер.

Танялэн суредъёсыз, зэм но, открытка кадь пӧрмо.

Куддыръя, карандаш интые, Микта агай нылызлы кияз бычкы яке струг сётэ. Таня шырчик уморто но, табурет но пӧрмытэ ни. Воргоронъёс коргид ӝуто ке; бубиз нылзэ дышетэ: уровенез учкы ай, сэрегмы кызьыгес пуксе.

- Папка, валэкты, - куре Таня. - Ма, кызьы уд вала: отын кор, татын кор, сэрегзэ шонер потты, - индылэ пиосмурт. Таӵе дышетэмзэ нылаш шаплы валаз но пумтэм синмаськиз черченилы.

Та урокын тодон-валан сётӥз Виталий Павлович Ожмегов. Таняез со туж ушъяз. Классысьтыз эшъёсыз дышетӥсьлэсь сётэм ужзэ син азязы пуктыны вырытозязы, Храмова кӧня ке заданиосты быдэстэ ни.

Гожнялась тямыс классъем школаез йылпумъякуз, кытчы ке дышетскыны пырон сярысь со уг сюлмаськы. Тодэ: Пурга школае вамыштоно, отӥяз - университетысь суреданъя факультетэ.

Кыӵе ке ужрадлы ялон гожтоно ке - Танялэн туж усто пӧрме. Суредъёсыз - ваньмызлэсь яркытэсь. Котькытчы вуэ: кырӟаны, эктыны, вань ужрадъёсын азьветлӥсь. Таӵе тэтчась сямызлы луыса эшъёсыз «чечег» ним лякизы. Нош Пурга школаысь дышетӥсез Тихон Васильевич Петров нылашез индылӥз: суредасе эн мыны, тынад ӧвӧл со, тани культпросветучилище ӵапак сямыдъя луысал. Кыӵе ай пе - Таня университетэ дасяське.

Но худграфе куриськисьёс со сяна но туж трос. Ярам, изложенизэ Таня вормиз. Живописьын мырдэм лякизы «куинь». Графикая экзаменэ пыриз но - бӧрдонэз ымпумаз. Кыӵе ке сьӧд куака пуктӥллям, вӧзаз - тӧдьы гипслэсь шар. Та, пе, гризайль амал нимаське. Табере сое графикаын возьматоно. Тон-полутон карыса, гожманы выриз ик – экзаменэз дунъясьёс «кык» пуктӥзы.

Дораз бертӥз бӧрдыса – папкаез азьын сыӵе возьыт. Таиз ӧз жаля: кайта отчы ик мынод, пе. Но аред юнме медаз быры - профессилы дышетсконо. Микта агай Таняез вуттӥз Ижысь 19 номеро училищее. Татын нылашез шумпотыса кутизы - ар ортчыса, радиоаппаратура лэсьтонъя монтажник луод, пе.

Училищеын дышетскыны номыр шугез ӧвӧл. Арняяз куинь пол Таня ветлэ Ижысь егитъёслы чаклам искусствоосъя школае. Пиналъёс татын 4 ар ӵоже тодон-валан люкало. Нош худграфен «усыкмем» Танялы ваньзэ ар куспын ортчоно. Таӵе дыртӥд-вуттӥд улон вакытаз нылмуртлэн сюлмаз йыгаськиз яратон.

Яра яратыны

Гожнялась ӵыжы-выжызы Баграш-Биграла бызиз. - Ми сюанъёстӥ ветлыны мӧйы ни, -Танялы вераз мемеез. - Тонэ лэзём.

Выль удмурт дэрем вуризы, йырси пунэтаз азвесь манетъёсын лентаос думизы, мемеез аслэсьтыз чыртывесьсэ но сётӥз. 17 аресъем муспотон нылыз шоры учкыса, Зояпай дышетӥз:

- Астэ умой возь, сюанлыкез гажа.

Сюанчиос пӧлын пинал нылъёс вить кузя луизы. Гожняласен Биграла вуытозязы, Танялы эшъёсыз веразы: таиз сюан, пе; куинь нунал гинэ луоз. Нош вашкала сямъя куноос, арня ортчыса, выль кенлэн гуртаз бӧрысе лыкто. Таӵе дыртӥд-вуттӥд луонлэн мугез, пе, сыӵе: эмеспи палась огез ӵыжы-выжызы - егит пи - кӧня ке нуналлы гинэ бертэм. Со понна сюанэз вакчи дыр куспын ортчытоно кариськиллям.

Кин пияш со? Понназ малпаське Таня. Сюанын тодматӥсьёс сюризы. Москвин Вася, пе, со. Ижысь механической институтэз йылпумъямын. Табере Байконурын инженерын ужа. Танялы та ушъямон пизы туж кельшиз. Ӝужыт, чиль-чиль сьӧд йырсиё, ымнырын чылкыт. Монэ мед синиылтоз шуыса, ма кароно – сюлмаське нылмурт. Коркась корка юмшан висказы синйылтӥз: Вася гур сьӧрын дӥсяське ни. Шубазэ кутыса, Таня солэсь азьло кыре потӥз. Амало кариськемез ӵап иназ луиз: Вася нылашез келяны чортӥськиз.

Озьы егитъёс ог-огзэс ӵукнаозь келяса ветлӥзы. Таня кыллы кисыяз уг пыры: я ПТУ-аз дасяно курсовой ужзэ вера, резисторъёс-транзисторъёс сярысь юалляське. Озьы кезьыт тол шорын Танялэн сюлмаз яратон кенжиз. Кыдёке командировкае кошкись Москвинлэн но мылкыдыз лӧптӥз. Ужан интыяз вуытозь, туганэзлы куинь гожтэт келяз. Байконурын Москвин кема ӧз ни чида: толэзь но ӝыны ортчыса, Иже берытскиз. Татын Таняен Вася пумиськылӥзы, киное ветлӥзы. Май толэзь йырез кудӟытэ льӧмпу зыныныз, яратонэн пачыламын нылашлэн мылкыдыз. Но огполаз Вася пумиськонэ ӧз лыкты. Ӧз вуы мукетъят но. Пирсэкъясь мылкыдзэ буйгатон вылысь Таня туганэзлэн общежитияз мынӥз. Таизлы нокыӵе ик ӧвӧл - гань-гань кылле телевизор азьын.

- Малы пумиськонэ ӧд ву? – куараез дыректӥз нылашлэн.

- Ма, кино туж интересной, «Семнадцать мгновений весны», - нылмурт шоры йырзэ но ӧз берыкты Вася.

Таня огшап ӧс куспын посӥськыса сылӥз но, зӥрак берытскыса, ӧсэз йыг! ворсаз. Яратоно муртэз тазьы дунъя бере...

Кырӟанэн сурасъкем синкыли

Ныл сюлэм чигиськемын, нош ныр улын - университетэ экзаменъёс. Танялы татын но пыд пуктӥсьёс вань. Приёмной комиссиын документъёссэ уг куто: тӥ, пе; училищеез йылпумъямын, табере кык ар заводын ужано. Мар адӟон та?! Таня йыгаськиз комиссилэн тӧроез доры.

- Кутэ документъёсме. Лэзе экзаменэ. Сёровно университетэ пырыны уг быгаты. - сюлворе нылмурт.

Кивалтӥсь пурт кадь ваменскиз: уг быгатӥськы, пе. Ярам, Танялэн юрттӥсез-кылчинэз вылэм. Училищеысь классэн кивалтӥсез Маргарита Леонидовна Красильникова нылашлы дурбасьтӥз. Соку гинэ Танялэсь документъёссэ кутӥзы. Таяз учыре солы шуд пиштӥз: экзаменъёсын умой дунъязы, нылаш студент луиз.

Гуртысь егитъёс худграфын чиньыен лыдъямон. Эшъёсыз - огезлэсь кужмо мукетыз. Соос пӧлын Таня бездыт адӟиське.

Огполаз дышетӥсьсы киужъёссэс вайыны куриз. Гуртысь нылашлэн пирданэз кемалась дасямын ни: сандык тыр пужъятэм миндэр пуйыос, ӝӧккышетъёс. Мукет нылъёслэсь ужъёссэс адӟиз но быриське вал. Городысь дыдыос владимирской амалэн, эксэй амалэн пужъятскемъёссэс возьмато. Нош Танялэн таш-таш яркыт сяськаё салфеткаос, айшетъёс. Эшъёсыз вӧзын Таня выльысь дышетскиз пужъятскыны.

Со понна курсаз солэсь зол кырӟась ӧй вал. Студентъёсты сӥзьыл картофка октыны гуртэ келязы - дор палъёсызлэсь мӧзмись нылаш удмурт гуръёсты нёжъя.

Эшъёсыз эшшо кырӟаны куро. Удмурт кырӟан Таняез вуттӥз «Чипчирганэ». Аспӧртэм нылмуртэ ансамбльлэн кивалтӥсез Розита Анкудинова туж дунъяз. Но репетициосты нылаш келля - Танялэн мылкыдыз нош ик пачылмемын яратонэн. Нырысетӥ курсын дышетскись 18 аресъем нылэз кураны лыктӥз йӧно Москвин. Вирсэртэм выременыз со нылашез азьлапал эскерем - возьмалоз-а, уз-а. Нод-нод эмеспизылэн верамез-валэктэмез улсын шуназы Танялэн мумиз-бубиз но - сюан шудӥзы.

Розита Анкудинова амал шедьтӥз: Таняен со нимаз репетициос радъялляз. Огполаз поттӥз бадӟым сцена вылэ. Ижын соку усьтӥськиз культурая выль юрт - Металлургъёслэн дворецсы. Татын городысь вузъёс вискын ӵошатскон ортчиз.

Татьяна Москвина сцена вылэ потӥз акапелла кырӟанэн. Ачиз удмурт дэремен-айшетэн дӥсяськемын. 1970-тӥ аръёслэн шоразы Ижын удмуртлыкез возьматӥсьёс, соин висисьёс туж ӧжыт на вал. Соин сцена вылэ потэм нылмурт ваньмызлы паймымон потӥз. Чылкыт куараез, борддоръёсы шуккиськыса, кошкиз:

- Убоен-убоен вож сугонэд, Вож сугон шашы кадь мугорыд...

Та армие келян гурез Гожня палъёсын ӵем кырӟаллязы. Таня син азяз пуктӥз, кызьы мемеен папкаез юмшанэ дасясько. Пудозэс чаляк утялто, собере Микта агай мычиськон арбериоссэ поттэ, одеколонэн зыраське. Со вискын Зояпай огезлэсь пӧртэм мукет кышетъёссэ вошъя. Коркась потэмзылэсь азьло репетиция ортчытыны кутско. Микта агай ненег тембрен мытэ, со борды векчи сопраноен итӥське кышноез. Кырӟанзы зыл-зыл чузъяське. Тае тодаз вайыса, сцена вылын кырӟаз Таня но.

Анкудинова дышетскисьсэ весь индылӥз: кырӟаськод ке, залысь адями шоры учкы, инбаме эн вӧсяськы. Таӵе визьмамзэ пеляз поныса, Таня нырысетӥ радысь пиосты синйылтӥз. Таосызлэн - клёш штанъёсын пӧрмытскем кузь йырсиё ослопъёслэн - кукъёссы кечат-вамат урдылэмын. Нылмурт шоры учко, ымныр тусазы ик гожтэмын кадь: ку сцена вылысь лобатоз ни. Сыӵе вирсэртэмъёсты адӟыса, Танялэн кырӟанэз синкылиосын сураськиз. Металлург дворецлэн сцена вылаз нырысьсэ шӧдӥз: со мукет, со удмурт.

Школа интые музей

Котьмае сюлэм пыртӥз поттон сямыз солы трос куректон вайылӥз на. Практиказэ ортчыны учыраз Ижысь 11 номеро школае. Татын дышетско вылӥ кивалтӥсьёслэн пиналъёссы. Доразы йыгмыт вамышен пыриз пинал педагог. Крепдешин дэремен, кузь йырси пунэтэн. Со туж сюлмаське: суреданэз но черчениез нылпиос котькыӵе уроклэсь золгес мед гажалозы. Но пиналъёс лекесь:

- Милям вотяночкамы лыктӥз, - пумитало соос дышетӥсьсэс.

Татьяна Никитична классысь синкылияськыса потэ. Кызьы таӵе небыт сямын школаын ужалод, сюлмаське картэз. Но шудэз вылэм. 30 ар талэсь азьло 29-тӥ октябре Ижын усьтӥськиз Суредан искусствоосъя музей. Таня татчы ужаны интыяськиз. Специалистъёссы уг тырмо. Матэктэ республикалэн кылдэмез дырысен 60 ар. Таня музейын ковёр куыны дышетскиз. Мемеез юрттэмъя кык вашкалазэ дасяз, кык туалазэ кылдытӥз. Озьы диплом ужез но быдэсмиз - со калык киужъёс борды басьтӥськиз.

Музейын егит ужасьсы ӵап интыяз луиз - удмурт шӧмо адӟытон дасяно ке, Москвина сяна, кылэз но сямъёсты тодӥсь-валась ӧвӧл. Нош гуртын будэм нылмуртлы со кӧкыысен пыӵатэмын ни. Азьланяз мукет ужпум кылдӥз - музей пыд йылаз султэ гинэ, нокыӵе фондъёсыз ӧвӧл на. Музейысь наукая ужасьёсын ӵош арлы быдэ потано луиз экспедициосы. Удмурт дӥсьёслэн кузёосынызы трос вераськиз но юалляськиз Татьяна Никитична. Гожъяса но суредаса, со валаны тыршиз вурем-куэм киужъёслэсь пуштроссэс. Син шораз йӧтӥзы аспӧртэм суредъёсыз, чильпетъёсыз, пужыосыз. Музейысь коллекция арысь аре узырмиз. Но экспедициысь вуттэм дэремъёсты адӟытонэ уд потты - я кесяськемын, я курмемын, я кей сиемын. Озьыен, кинлы ке но соосты выльдоно. Музейлэн соку директорез В. В. Яковлева, азьланяз учкыса, Татьяналы ӵектӥз реставрациен вырыны - со понна Москваын дышетскыны кулэ. Нылкышно анай ини - кык нылпиез. Пичи но малпаськытэк директорезлы «я» шуиз. Бертыса картэзлы вераз - соглаш-а, пе. Василий Москвин партилэн Удмуртиысь обкомаз отделэн кивалтэ. Нылпиосын пукыны солэн дырыз ӧвӧл. Векчи пиналъёссэ гуртэ мемеез доры кельтыса, Москвина кошкиз Москвае.

И. Грабарь академик нимо наукая но реставрацияя центр Россиын кылдэмын ай Октябрь революцилэсь азьвыл. Татын дэра но графика суредъёсты, корт но пу арбериосты - ваньзэ выльдыны луэ. Удмурт нылкышнолэн удысэз - небыт фондъёс. Татьяналы валано, кызьы улӟытыны луэ куиськемез но пужъятскемез. Уката трос шугъяськонъёс виштыосын валче. Адями сиське – мылазьзэ нашта. Виштыоссэ соку ик миськыны тодаз уг лыкты. Озьы саптаськем дӥсь аръёсын кылле. Маин быдтоно виштыосты – огшоры хозяйственной майталэн. Мукет туала химия вашкала дӥсьёсты «сиёз» гинэ.

Куддыръя одӥг вашкала арбериез улӟытонлы ар мында дыр быре. Со понна маль-маль, вуаль но мукет векчи басмаосты сӥньысэн-сӥньысэн кесяно. Соосты тупась буёлэ котоно. Кылдэ йырсилэсь векчи сӥньыс. Собере ини, лупа пыручкыса, арбериез выльдыны луэ.

Яке дэремлэн оглюкетэз ӧвӧл. Татчы куыса кышъет пуктыны луэ. Со пичи кесэг понна тупась сӥньысъёс утчано, соосты буяно. Собере выль ватсам кышъетэз «вужмытоно» - дӥсь вылын со медаз висъяськы. Реставрацилэн мукет тунсыко палыз но вылэм - ужлэсь котькуд вамышсэ гожъяно но туспуктылоно. Вашкала дӥсез улӟытон - со огвакытэ ик вуриськон, куиськон, суредан но химия.

Ижысь Москвае, Москваысь Иже ветлыса, ортчиз 3 ар. Вакчи дыр куспын Татьяна Никитична нырысетӥ степенен реставратор луиз. Со куспын кузпалзэ Василий Ермолаевичез ужаны выжтӥзы Пичи Пурга райкоме. Но нылкышно яратоно ужзэ ӧз ышты. Табере со киужъёсты выльдыны кутскиз дораз - Пургалан.

Выль шокчон

Озьы ачиз улон Татьяналы выль сюрес возьматӥз. Пургалан со адӟиз: удмуртлык, сцена вылын но музей фондын сяна, калык пӧлын но улэ на. Ёросысь гуртъёсын али но удмурт дэремез нулло. Сое вурисьёс но вань на. Соку уката мургес шӧдӥз лэсьтоно ужезлэсь пуштроссэ: удмурт дӥсез но сямъёсты вазьгес на музейысь гинэ утчаны. Соос калык вылын уло на!

Удмурт дэрем - визьмо, вань сюлэмез сётыса дасям маке. Удмурт дӥсь эсэпсэ чакласа кылдытэмын, одӥг вурысэз но мултэс ӧвӧл, одӥг кесэгез но юнме понэмын ӧвӧл. Москвина сяськаяськиз кадь, аслыз тупась усьтон - стиль - шедьтӥз. Уго студент вакытаз валаз: мода сьӧры уйиськыса, со калык пӧлы ыше, номырин уг висъяськы. Нош удмурт дэремен туж умой: со уг пачкаты, уг пӧсяты. Но сюлмаськытэ калыклэн дӥсь шоры учкемез. Вань ке вань, ӧвӧл ке ӧвӧл выллем. Нош калык дӥсьлэн пушказ мамында ватосъёсыз. Отын ваньмыз чакламын: сӧзул, айшет, кышет. Вашкала вакытэ дэремен эмъязы но: нылпи вайыны быгатӥсьтэм нылкышнолы нуллыны сётъязы трос пинало анайлэсь дэремзэ.

Москвина кутскиз ачиз бордысен - солэн гардеробаз удмурт дэремъёс пыризы. Возьдаськытэк дӥсяз но тазьы калыке потӥз Татьяна Никитична. Тани пинал дыръяз удмурт дэремен со туж кельышлы адскиз Москваын - Егитъёслэн калыккуспо фестивалязы. Финляндие «Зарни шеп» коллективен вуылыкуз, макем синмаськизы учкисьёс удмурт дэремлы. Аслэсьтыз мылкыдзэ палаз нылызлы. Удмурт шӧмо гардеробеныз Москваысь эшъёссэ паймытъяны кутскиз Настя но. Пумен тодмоосызлы, мукет курисьёслы дэрем вурылӥз.

Ёрос бадӟым ик ӧвӧл кадь, нош кӧня пумо дэремъёс. Шуом, брангуртъёслэн аспӧртэм - паськыт сӧзултэк, ӟуч дэрем порма. Татьяна Никитична сое улӟытӥз. Тунсыкъяськемзэ паськытатӥз картэз Василий Ермолаевич. Со компьютер технологиосын ужась, малпанзэ ӵектӥз: ойдо удмурт дэремез модае поттом. Малы асьмелэн калыкмы Китайысь ваем вузъёсты октэ. Нош аслэсьтыз сямъёссэ утьыны уг вала. Озьы усьтӥськиз удмурт дэрем вуронъя салон.

Москвинъёслэн ӵош мытэм ужзы азинскыны ӧдъяз. Тани магазинысь ӝажыос вылын кыӵе но тузӥ басмаос ӧвӧл. Соин удмурт дэремъёс но туала шӧмо луыны быгато. ТуннэТатьяна Никитичналы юрттӥсько гуртъёсысь вуриськисьёс.

Итэшысь Татьяна Григорьева, вань сюлэмзэ поныса, тырше котькуд вурысэз бордын. Салонын огвыллем дэрем уг вуро - котькуд нылкышнолы пӧртэмез кулэ. Озьы усточи кыдёкысен тодма аслэсьтыз ужзэ - та мынам вурем дэреме, шуэ. Айшетъёсты туж чебер пужъятэ Гожнялась егит нылмурт Лидия Хромоева. Нылкышноослэн киужъёссылы синмасько котькытын. Соослэн кылдытэм дэремъёсынызы ветло Ижысь кырӟан-эктон коллективысь усточиос, Калык эшъяськон юртын ужасьёс, дышетӥсьёс, журналистъёс.

Семья - котьмалэсъ дуно

Дас витё ар талэсь азьло Татьяна Москвина доры лыктӥзы журналистъёс. Тунсыкъяськизы: мар бордын та вие ужаськоды? Татьяна Никитична шумпотонзэ вераз: куинетӥ пинал вайи. Тодмозэс телевизор пыр адӟыса, тросэз паймизы: ма, пияменыд данъяськоно шат? Нош нылкышно понна семьяез но нылпиосыз котькыӵе наука ужлэсь вылӥын.

Чидась, картсэ валась но дунъясь, нылпиоссэ визьмась - таӵе солэн бурдъёсыз. Табере пиналъёсыз адӟем карымонэсь. Алексей Пичи Пурга школаез зарни медален йылпумъяз. Тодон-валан люказ МГИМО-ын, калыккуспо экономика факультетын. Дышетсконзэ йылпумъяса, ужаз «Русгидро» компаниын. Москваын со бергатэ инвестициосъя проектъёсты, коньдон ужпумъёсъя аналитик. Туэ гужем сюан шудӥз.

Анастасия школаысь потӥз азвесь медален. Йылпумъяз Ижысь техникая университетысь прибор лэсьтонъя факультетэз. Карьераез удалтӥз Москваын. Нылмурт ужа связь удысын. «Евровидение» ӵошатскон, Москваысь Бадӟым театрлэсь юртъёссэ огазеян - та проектъёслэн ивор но связь люкетэнызы кивалтэ удмурт нылмурт.

16 аресъем Никита азьланяз кыӵе сюрес бырйыны шугъяське на.

Кемалась ӧвӧл нылпиосыз Татьяна Никитичналы кузьым лэсьтӥзы: кунгож сьӧры путёвка кузьмазы. Озьы нылкышно Скандинавиысь вань странаосты адӟиз. Син шораз йӧтӥз Австриысь паймымон уж. Венаысь ООН-лэн юртэз азьын сылэ скульптура - нылкышно ки вылаз ӝутэм воргоронэз. Ӵапак удмурт кышномурт кадь, малпаз Москвина. Таӵе луыны кулэ удмурт нылкышно: ӝутӥсь, бурдъясь, оскытӥсь. Соку со понна удмурт воргорон гурезьёсты берыктоз.

Источник:

Ионина, Елена Васильевна. Эмъя, бурдъя дэрем [Текст] / Алёна Ионина // Удмурт дунне. - 2010. - 29 окт. - С. 6, 11 : фот. - (Удмурт кизилиос)..

За предоставление материала выражаем огромную благодарность редакции газеты "Удмурт дунне"