Парфёнов Геннадий Васильевич

Василич

Геннадий Парфёнов - «Удмурт дунне» газетлэн устоосыз пӧлысь устоез авторез. Гурт калыксэ, ужын азьветлӥсьёсты, войнаын ожмаськемъёсты, Ижевск-Балезино чугун сюрес лэсьтэмъёсты данъя. Геннадий Васильевич кема аръёс ӵоже ужамын вордскем Кияса ёросысьтыз «Знамя труда» газетын корреспондентын. Россиысь журналистъёслэн огазеяськонзылэн ёзчиез. Та дыре Пётр Кривоногов нимо музейын валтӥсь методист луэ.

- Геннадий Васильевич, нырысь ик ӟечкыласьком «Удмурт дунне» газетлэн 100 ар тырмонэзлы сӥзем конкурсын вормисе потэменыды. Котькыӵе удыслэн аслаз кебитэз вань. Кин тӥледлы гожъяськыны мылкыд пыӵатӥз?

- Вуж Салья школаысьтымы Семён Вахитов школаын ортчылӥсь пӧртэм ужрадъёс сярысь «Дась лу!» газетэ гожъяны кутскиз. Со понна газетчиос «Орлёнок» лагере шутэтскыны келязы. Мон со сярысь ӝутскем мылкыдме ёрос газетамы, ӟуч кылын гожтыса, келяй (удмурт газет Кияса ёросын соку ӧй вал). Иворе соку ик потӥз. Собере, бадӟым классъёсы выжыса, «Нырысетӥ вамышъёс» литературно-творческой кружоке ветлӥ ини. Соин кивалтӥз удмурт кылъя но литературая дышетӥсь Юлия Владимировна Григорьева. Мон солы весь тау карисько югыт сюрес вылэ султыны юрттэмез понна. Угось пичиосты лӧпкытъяны кулэ.

Ми дышетскон вакытэ школаямы шальтыр-шальтыр воргоронъёс ужазы. Коллективен кивалтӥз РСФСР-ысь дано дышетӥсь, фронтовик Пётр Иванович Баранов. Вератэк кельтэме уг поты химиен но географиен дышетӥсьме Алевтина Ивановна Ильинаез. Урокъёссэ со сыӵе тунсыко нуылӥз. Мон али ке но географиез туж яратӥсько.

Одӥг пол школаямы ветлӥз «Дась лу!» газетын ужась Николай Бигбашев. Али ке но со мынам син азям. Гожъялэ, пиналъёс, газет баме гожъялэ шуыса, мылкыдмес бурдъяса но ӝуткаса кельтӥз. Со дырысен тӥни газетлэсь люкиськеме уг луы ни, нунал потэм кыӵе ке но ивор гожтэме потэ.

- Иське, туж тунсыко ортчизы школаын дышетскон аръёсты?

- Туж куанык вал. Покчи классъёсын дышетскыкумы, переменаос дыръя нылъёс но пиос котырак султӥськом но ну! кырӟаськом ук. Пӧламы дышетӥсьмы но потэ вал. «Ой, шаль кышет», «Бусъёсын шобырскизы...», «Палэнын эн ветлы, гажанэ... » кырӟанъёсты кырӟаса будӥмы. Нылпиослы кырӟанъёс ӧй вал. Нырысетӥ дышетӥсе Федосья Алексеевна Раева Починка гуртын улӥз. Сонякемысь нуналлы быдэ велосипедэн ветлӥз. 3-тӥ но 4-тӥ классъёсын Нина Викторовна Эркишева тодон-валан сётӥз ини. Кыкназы ик дышетӥсьёсы улэпесь. Милемыз соос уг вунэто, школаын пумиськонъёс дыръя ваньмес нимын-тулын вераны быгато.

- Анай-атайёсты кин луыса ужазы?

- Дядяе Василий Иванович фронтэ ветлэмын. Со Кёнигсбергозь вуэмын. Вормон Нуналэз пумитакуз, солы 20 арес гинэ вылэм ай. Ожысь сӧсырмыса бертӥз: пельпумъёсыз берыкъяськемын вал. Сӧсыр интыез таки ӧз бурмы. Война бере 52 ар ортчыса, дядяйлы 3-тӥ степенё Слава орден сётӥзы. «Большевик» колхозын председательлэн юрттӥсез луыса ужаз. Отӥяз лэсьтӥськисьёслэн бригадирзы но вал, фермаен но кивалтӥз. Быдэс гурт сое гажаса Василий Иванович шуиз.

Нэнэмы Ефимия Ефимовна колхозын пӧртэм ужъёсты быдэсъяз. Туж ческыт пыжиське вал. Пӧраськыкуз одно ик бускельёсмес дорамы ӧтёз вал: олле, олле пӧраськемме сиыны. Соос дядяен 4 пинал вордӥзы. Мон самой покчиез. 5-тӥзэ вайыны дӥсьтонзы ӧз тырмы, дыр, шуисько. Угось соку ваньмыз трудодень вылэ ужазы, уксё ӧз басьтылэ, калык начар улӥз.

Асме ке верано, мон 8 ар одӥг сумкаен школае ветлӥ. Выльзэ басьтон понна уксё кулэ вал. Со кирзовой сумкаме школае мынон азьын, шур дуре мыныса, миськылӥ. Юрмалай шор ёзо школае 9-тӥ классэ мыноно луиз но, шуисько: нэнэ, мыным сумка кулэ. Ма, мугоры бадӟым ини, нырулам мыйыке бычыра, нылъёс шоры учкон вакыт. Кызьы мон сыӵе сумкаен сьӧр гуртэ мыном на? Я, дипломатлы кельшисьсэ, цивильнойзэ, басьтӥзы. 8 иськемез нунал потэм Юрмалаёзь пыдын ветлӥмы. Толалтэзэ доре ӧм бертылэ ни, интернатын улӥмы. Сьӧрам 1 манет уксё келяло вал, мон сое ӝикытаса вози, тырмытыны тыршылӥ. Байгес улӥсьёс 5 манет но вайылӥзы. Туж яратӥсько вал кампет сиыны, ма, али но со сямылэсь ӧй куштӥськы.

Еросысьтымы «Знамя труда» газетэ ӟуч кылын адямиос сярысь зарисовкаос но заметкаос гожъяны кутски. Со понна уксё тыро вылэм. Одӥг пол 1 манет но 13 копейка басьтӥ. Воксё паймыса бырисько вал. Озьы монэ гонорар сюдыны кутскиз. Лавкачи 10 копейкалы 3 пряник сётылӥз. Киное пырыны копейкае вал ини. Нош солэсь азьвыл укно улын учкыса сылӥмы. Со милям эшъёсынымы «законной» интымы вал. «Дась лу!» газетын печатласькем материалъёсмы понна книгаос лэзьязы. Солы но туж шумпотылӥ.

Колхозын уксё ӧз сётъялэ бере, ми, покчи нылпиос, уксё поттыны, сое чотаны но шыръяны пичиысен дышимы. Милемыз эркияса ӧз будэтэ. Вал гонэз бичаса заготовительлы сдать карылӥмы. Гужемзэ но сӥзьылзэ губи ворттылӥмы. Ваньзэ сое государстволы сдать карылӥмы. Бадӟымгес будыса ини, 4-тӥ классэ выжыса, колхозэ ужаны потай ини. Мон кадь нылпиосты кушман урытылӥзы, пушнер но беризь куарез, вайёсыныз ӵош, кунянъёслы сюдон понна бичаллямы, зуродэ клевер ӝутылӥмы.

- Школаез йылпумъяса, кытчы ке но уксё поттыны интыяськиды, луоз?

- Гожъяськемме шӧдыса, дыр, 10 класс бере ик монэ ужаны ёрос редакцие ӧтизы. Пӧсьтолэзь пумын вал со, турнан йылпумъяськиз ке, лыкты ми доры, корректоре кутом, шуизы. Соку газетэн кивалтэ вал удмурт нылкышно Вера Сысоева. Янгышъёсты тупатъяны лыктэм адямиез бӧрысь гурт удысъя отделэ ужаны выжтӥзы. Мон отчы трос аръёслы выйи - 32 ар ӵоже гожъяськон удысын тырши. Еросысь одӥг гуртэз но гожъятэк ӧй кельты, дыр. Нош кӧня адямиосын пумиськылӥ, соос сярысь очеркъёс но зарисовкаос гожъяй. Со адямиосты али ке но тодмасько, улэм интыоссэс тодӥсько, урамысен пумиськыкум, шоразы вазьытэк, уг кошкиськы.

Монэ редакциысь ик армие келязы, службае Москваын ортчиз. Армиын но мон ручкалэсь ӧй люкиськылы. Гожъям ужъёсме ёрос газетамы, «Советской Удмуртия» но «Красный воин» газетъёсын печатлазы. Озьы ик куд-ог ужъёсы потылӥзы Ярысь «Сельская правда» газетын. Отын соку ужа вал кылбурчи Георгий Архипов. Георгий Архипович егитъёслэсь ужъёссэс шумпотыса печатлалляз, милесьтым, соку гинэ гожъяськыны кутскись маръёслэсь ке, мылкыдмес ӝутканы быгатылӥз.

Со вакытэ ик кылбуръёс но ӵабъяны кутски. Соос мынэсьтым мылкыдме лӧпкыто вал. Али ке но со кылбуръёсме утьыса возисько, соос мыным дуноесь. Армиысь бертыса, берен редакцие ик йыгаськи. Тодон-валанме будэтыны Удмурт кун университетысь филологияя факультетэ пыри. Уже сюлэмыя, ачим егит, перое мынэ. Ёросамы пӧртэм выжы калыкъёс уло. Соос пӧлысь удмуртэз 30 процент гинэ. Со вакытэ, 1990-тӥ аръёсы, редактор луыса ужаз ӟуч воргорон Валентин Колесников. Ӵапак со кивалтон вакытэ малпамы удмуртъёслы «Италмас» газет поттыны. Валентин Иванович пумит ӧз луы. Мукет выжы калыкез но палэнэ ӧз кельты: поръёслы «Семык», бигеръёслы «Чулпан» газетъёс потыны кутскизы. Армянъёс понна но нимысьтыз бам потылӥз. Мактаськыса вераны быгатӥсько: «Италмас» газетэз поттон бордын 14 ар тырши, вань мылкыдме поныса ужай. Отчыозь ёросамы удмурт кылын потӥсь газетмы ӧй вал. Газет потыны потоз, но сое тӥ асьтэос бичано луоды, шуиз вал кивалтӥсь.

Но ми со секытлэсь ӧм кышкалэ. Линотипмы ӟуч, верстать карисьмы украин нылкышно, печатласез удмурт вал. Ваньмы пӧртэм выжыысь ке но, туж умой, тупаса ужамы. Соиз понна но шумпотӥсько: ёросысьтымы нылпиослы гожъяськыны мылкыд сётыны быгатӥ, мынам ки пыртӥм потӥзы но журналистика удысэ кыстӥськизы Выль Тӥгырменысь Алёна Никонова (жаляса верано, со улонысь туж вазь кошкиз), Вуж Сальяысь Коля Моряков но Уддядиысь Лена Королёва. Но бӧрысь «Италмасмы» быриз, со потэмысь дугдӥз. Мон редакциысь кошкем бере тросэзлэсь «Василич «Италмассэ» сьӧраз нуиз» шуэмзэс кылылӥ.

- Кузпалдэс но, командировкаосы потакуды ик, шедьтӥды, луоз?

- Кияса черкогуртэ, газетэ, ужаны ӧтизы но, улыны скал выдымон сэрег сётӥзы. Дорам егит пиос но нылъёс куное вуыло вал. Огнам йырам улон интые вань вылысь узыр лыдъяськисько, лэся, вылэм. «Кыӵе шулдыр азьын улӥськод», - шуылӥзы соос. Пичи дырысеным ӵуш-паш улонэз уг яратӥськы, котьку ик чылкытлыкез но ӝикытлыкез гажалляй. Кузпалме Кияса черкогуртысь шедьтӥ. Культура юртысен мон сое нырысьсэ пумитай. Адӟеме бере ик малпай: та мынам луоз. Антонина Анатольевна вордскемын Дэри ёросысь Выль Казмас гуртын. Глазовысь В. Короленко нимо пединститутэз йылпумъяса, ужаны лыктэм Кияса шор ёзо школае. Вуоно араз март толэзе кышнояським. Туж шулдыр ортчиз сюан сэбедмы. Нырысь ик Сальяын, гужемзэ Казмасын.

- Газетэз воштӥды музеен, ужаны воксёлы отчы интыяськиды.

- Редакциысь кошкеме дырысен 11 ар тырмиз ини. Ужлы ӟудыса, калтыртыса но йыромыса ветлон сяменым одӥг нуналэ монэ «Киясовский» совхозлэн директорез Владимир Семёнов пумитаз но шуэ, ойдо, пе, «Райцентр» газет дасялом.

Малпам ужмы быдэсмиз, ми газетэз 2 ар пала поттӥмы. Секыт учырысь поттыны юрттэмез понна Владимир Анатольевичлы али ке но тау карисько. Озьы пӧрмиз: служить карыкум, Москваысь армилы сӥзем музее ӵемысь пыралляй. Шӧдтэк шорысь Пётр Кривоногов художниклэн «Победа» суредэз син азям йӧтӥз. Пайми мон солы, туж бадӟым бӧз вылэ суредамын - кузьдалаез 4 метр, ӝуждалаез 2 метр но 40 сантиметр. Та суред учебникъёсы но пыртэмын вал бере, сюлэмме ик вырӟытӥз. Кривоногов фамилиез адӟыса, эшшо малпаськонэ уси: та ведь кияса фамилия, художниклэн вордскем интыез ми палась ӧвӧл меда? Тӥни озьы мон армиын улосчиеным «тодматски». Кривоногов сярысь ми вазен номыр ӧм тодылэ. Табере призывникъёслы котьку ик шуисько, служить карыны Москвае сюриды ке, одно ик пыралэ Вооружённой Дунне вылын Пётр Кривоногов художниклы сӥзем музей одӥг гинэ - Кияса черкогуртын. Солэн ми дорын 105 картинаосыз, война вакытэ лэсьтэм уно суредъёсыз, ог 200 пала туспуктэмъёсыз. Ми доры нылпиос ӵемысь экскурсиосы вуыло. Со сяна но пӧртэм ужрадъёс ортчытъяськом. Ёросысьтымы кибашлыослэсь адӟытонъёссэс усьтылӥськом, нылкышноосын пумиськон ӝытъёс ортчытъяськом.

Кылем арын целинаез ӝутыны кутскон вакыт дырысен 60 ар тырмиз. Ми палась тросэз адямиос отчы ужаны ветлэмын. Городлэсь палэнын бере, адями уксёлы ӟудыса улэмын, паспорт но соку ӧз сётъялэ. Али но сыӵегес ик улон. Малы ке шуоно колхозъёс куашказы, адямиос ужтэк кылизы. Со вакытэ но егитъёс амалтэк целинае кошкылоно луизы, дыр.

Алигес Починка гуртысь Куликовъёслэн выжыенызы пумиськон ӝыт ортчытӥмы. Туж тунсыко вал со, трос выжы-кумызэс люканы быгатӥмы. 8 пиналъёс пӧлысь 6-ез вылӥ тодон-валан басьтӥллям. Пётр Васильевич писатель луиз, со «Кенеш» журналэн кивалтэ. Семёнзы колхозэз валтӥз. Пӧлазы прокурорзы но, эмчиоссы но, дышетӥсьёссы но вань.

- Кӧня кузя музеяды ужаськоды?

- Казыр 2 кузя гинэ тыршиськом. Вазен научной сотрудник лыдъяськисько вал. Табере ставкаез мукет сямен нимазы, валтӥсь методист каризы. 9 ар ӵоже ужатозям, 6 директоръёс воштӥськизы ини. Уже сюлэмыя, шыпак, кыштыр гинэ, куаныса тыршисько. Туэ 21-тӥ сентябре Пётр Кривоноговлэн вордскемез дырысен 105 ар тырмоз. Солы сӥзьыса, одно ик бадӟым ужрад ортчытом. Со пумысен кенешон-вераськонъёс мыно ини.

- Асьтэлэн семьяды сярысь но тодэм потэ вылэм. Гожъяськись муртэ кузпалды вала-а?

- Верай ни вал, кузпалы дышетӥсь. Со казыр шутэтскыны потӥз ини, озьы ке но ужа на. Кык пинал будэтӥм. Сергеймы но, Аннамы но Удмурт кун университетэз йылпумъязы. Сергеймылэн 2 пиналъёсыз будо ини, со Ижын улэ. Нылмы быземын ӧвӧл на, солэн ваньмыз азьпалан ай.

Анай-атай улэпесь дыръя котькуд гужем юри турнаны шуыса отпуск басьтылӥ. Табере атай юртмы сисьмиз, быриз. Сальялан Илья агае семьяеныз улэ. Табере мыным Кияса черкогурт аслам кадь потэ, татын улэмелы 43 ар тырмиз ини. Дядяелы сямен ик, мон шоры вань Кияса калык атай нимыным «Василич» шуыса вазиське.

- Тӥляд гожъямъёсты трос томъем книга мында луизы, дыр, ини. Мар сётэ гожъяськон?

Гожъяськон сюлэм пушкам туж муре пыӵаса кылемын. Гожъяськон ӧвӧл ке, мылкыд пуксе, нош вань ке - бурдъяське, эшшо гожъяськем потыны кутске. «Дась лу!» газетлэн юнкоръёсыныз али ке но ӟеч кусып возиськом, школаын дышетскыкумы, ог-огмылы гожтэтъёс лэзьяськом вал Валерий Нуриахметовен (Дэбесысь «Байгурезь» газетэн кивалтэ), Ульфат Бадретдиновен («Кизили» журналэн кивалтэ), Рашит Хайдаровен («Удмурт дуннеын» ужаз) но трос мукетъёсыныз.

Источник:

Парфёнов Г. В. Василич / Г. В. Парфёнов; записала Любовь Тихонова // Удмурт дунне. - 2015. - 19 июня - С. 10,15. - (Тӧр шорын).

За предоставление материала выражаем огромную благодарность редакции газеты "Удмурт дунне"