Курка, ӵӧж но мукетъёс

Ӝыт шунды пуксён вакыт Курка сюры вылэ изьыны тубе вылэм.

Лопыръяськонъяз бурдыныз тэкит лагушкаез погыртэм. Тае адӟыса, Курег лыктэм.

— Эк-ке-ке-э-эк!.. Нош ик мон вылэ понозы ук ини, — шуэ, пе, Курег.

Куреглэсь куаразэ кылыса, тап-тап гинэ бызьыса, Ӵӧж лыктэм.

— Ватэ, ватэ, ватэ! — шуэ Ӵӧж.

Ӵӧжлэсь куаразэ кылыса, Писэй лыктэм.

— Мае, мае, мае? — шуэ Писэй.

Курка нош шуэ:

— Тетькез! Тетькез! Тетькез!

Куркалэсь куаразэ кылыса, Ӟазег лыктэм.

— Ага-га-гак!.. Мае тӥ кисьтӥды? — шуэ.

Курег нош ик сюлмаськыны кутскем:

— Эк-ке-ке-э-эк!.. Мон вылэ понозы ук ини.

Тае Пуны кылэм но бызьыса лыктэм:

— Уз! Уз! Уз! Курег уром, тон вылэ уз понэ. Уз! Уз!

Та ужез Атас кылзэм, кылзэм но сюры вылысен ик "Кокори-и-и-ко-о-ок!..

Сюриды-ы-ы ве-э-эдь!" шуыса кеськем.

— Эк-ма таосын!.. Изъянтыса гинэ уло, — шуэм кузё но буш лагушказэ ӝутэм.

Ыж нош гид капка вискытӥ йырзэ мычем но лар-лар кеськем:

— Берло ма-а-а-р-р!