Красильников Алексей Геннадьевич

Улонлэн читыр-чутыр сюресъёсыз

Красильников А. Г.

Алексей Геннадьевич Красильников – кылтодон наукаосъя кандидат, философия наукаосъя доктор. Удмурт Республикаысь Кун Кенешлэн депутатэз. Шаерысьтымы закон кылдытъясь ёзысь Наукая, дышетонъя, культурая но егитъёсын ужан политикая комиссилэн кивалтӥсез.

- Тӥледды ми умой тодӥськом Удмурт кун университетын кунсьӧр литературая лекциос лыдӟемдыя. Соин ик туж паймим вал политикае шуак выжемдылы. Малы, кыӵе муген сыӵе вамыш лэсьтӥды?

- Улон воштӥське ук. Мон уно аръёс ӵоже кылтодон удысэн выри. 1980-тӥ арын Ленинградын англи литературая кандидат диссертациме ути. Собере Удмурт университетын лекциос лыдӟи.

Дыр ортчемъя, литератураен вырыны мылкыды сӥяз. Бордазы кыскизы философия культуралэн историез. Озьы наукаосъя доктор но философия удысъя луи.

Мон малпамъя, адями, шонергес вераса, солэн улонэз, лиана кадь куасалъяськыны быгатӥсь луыны кулэ, англичанъёс таӵе тодметэз флексийной шуо. Кышкано ӧвӧл воштӥськон-выльдӥськонлэсь, вылӥегес ӝутскыны тыршоно.

Удмуртъёс шуо: инмар мае сётӥз, солэсь вылӥе уд тэтчы. Ӟучъёслэн но веранзы вань: где родился, там и пригодился. Мынам таӵе кылъёсын соглаш кариськеме уг поты. Дунне шоры дӥсьтысагес учконо, кышкано ӧвӧл выль уж борды басьтӥськыны.

Выльдӥськон вакытэ вуыса, улон воштӥськиз. Азьвыл адями трамвай выллем вал, рельса вылэ пукто но, со шонер сюрестӥ каллен мынэ но мынэ.

- Нош али сюрес читыр-чутыр луиз?

- Озьы. Адями но табере трамвай кадь ӧвӧл ни. Со автомобиль, самолёт выллем.

Учке ай, асьмеос куазь воштӥськемъя дӥсьмес вошъяськом: гужем дэремен ветлӥськом, тол ке вуэ, шуба дӥсяськом. Куддыръя зоре, куддыръя лымыя, куддыръя шунды пиштэ.

Улон но сыӵе ик. Басьтом ужъя рынокез. Отысь югдур нуналлы быдэ вошъяськыны быгатэ. Шуом, туннэ инженеръёс уг тырмо, нош ӵуказе соос кулэ ӧвӧл ни.

Америкаын адями ас даураз улон интызэ шорлыдын ньыль пол выльдэ.

- Соин ӵош ужан интызэ но воштоно луэ, дыр?

- Бен, улон инты но профессия куспазы юн герӟаськемын ук. Западысь адями вань улытозяз дышетске. Нош асьмеос школаез, институтэз йылпумъяськом но ужаны кутскиськом. Мынам улонэ озьы ӧзгес пӧрмы. Аслым ачим трамвай кадь ӧй поты, шӧдске. Выльдӥськон вакытэ уж быръён ласянь паськыт инвисъёс усьтӥськизы. Кин луэмед потэ, лу: коть предприниматель, коть банкир, коть ужаны кунгож сьӧры мын.

Собере мынам мылкыды но куашкамынгес вал: 80-тӥ аръёслэн пумазы доцентлэн уждунэз студент стипендилэсь но ӧжытгес люкаськылӥз. Аслым ачим шуи: улонме лэсьтоно. Тросэз преподавательёс ботинка, дэрем вузаса коньдон поттылӥзы. Нош мынам вузкарыны мылкыды чик но ӧй вал. Асме политикаын эскерыса чаклай. Валамон ини, нырысетӥ быръёнъёсын вормыны ӧй быгаты. Но чылкак пайми: Город Думае быръёнъёсын кыкетӥ инты басьтӥськем.

- Кин бен тӥледды азьпалтӥз?

- Уг тодӥськы ни. 1995-тӥ арын нош ик быръёнъёс вал. Таяз учыре – Кун Кенеше. Мон выльысь кужымме мертано кариськи. Быръёнъя Майской округ Ижевсклэн шораз интыяськемын вал.

- Ма, отын республикалэн элитаез улэ ук!

- Бен, округам уно тодмо, дано адямиос уло. Быръёнын ворми. Ужаны ӧтизы Кун Кенеше. Солаш луи. Туж тунсыко вал республика шоры вылӥысенгес учкыны.

Выль удысме мытыны огшоры ӧй йӧты. Котьма ке но, кун кивалтон но наука огкадесь ӧвӧл ук. Но кивалтон ужен мон азьвылгес но кӧня ке выри ни вал: университетысь кылтодонъя факультетлэн деканэзлэн воштӥсез вал. Та уж кельшылӥз.

Ужамъя опыт люкаськиз, дыши кадь. Кун Кенешын выри социальной ужпумъёсын.

1999-тӥ арын нош ик Кун Кенеше быръёнъёс ортчизы. Мон отчы азьвыл округея ик депутатэ кандидат луыса пыриськи. Нош ик удалтӥз.

Туала уже секыт шуыны уг быгатӥськы, табере ваньзэ умой тодӥсько ни.

- Та вакытэ политикаысь мукет удысэ выжыны дӥсьтонды тырмысал-а?

- Со сярысь куд-ог дыръя малпаськылӥсько. Мон бизнесэ кошкысал. Тыршемелэн емышъёсыз син шоры мед йӧтозы. Валамон, вылез вапчиен уз сётскы. Дышыны ар но ӝыны пала кулэ луоз ик.

Эшшо одӥг пол пусйисько на, адями воштӥськонъёслы дась луыны кулэ. 1996-тӥ-1997-тӥ аръёсы Канадае вуылӥ, отысь вылӥ образованилэсь радлыксэ эскери. Мыным верасьёс вал: Россиысь лыктэмъёс, пе, профессизэс воштыны чутрак пумит луо, соосты лӧпкытыны ик уг луы. Шуом, инженерлы ӵекто квалификацизэ воштыны, валэкто, коньдон но тросгес басьтоз шуыса. Нош со ваменске, дӥсьтонэз уг тырмы. Кин кышкан мылкыдзэ вормыны быгатэ, солы ик удалтэ.

Мон верало на таӵе учырез: Канадае Россиысь нылкышно, профессиезъя суредась но музыкант, лыктэм. Оттаваын солы ӵектӥллям нылпи сад усьтыны. Кышномурт малпам нимысьтыз удысъя – покчиослы эстетической тодон-валан сётонъя – ужаны. Мар шуоды, ужез синмаськымон радъяськем. Тӥни озьы, адями ассэ вормыны кужым шедьтыны кулэ. Ойдолэ Музъем вылысь эволюциез но чаклаломе: нырысь ик ваньмыз ву улын вал, собере муос усьтӥськизы. Пӧйшуръёс но кыре потӥзы, ветлыны-бызьылыны кутскизы. Кин пыд вылаз султыны ӧз дышы, со быриз.

- Асьмелэн, удмуртъёслэн, менталитетмы сыӵе, дыр, ини, мултэс вамыш лэсьтыны ум дӥсьтӥське.

- Озьы, дыр, пушкамы стереотипъёс каръяськемын. Оскисько, выль поколение соосты вормыны быгатоз ни.

Нош али асьмеос кайгыриськом, малы удмуртъёс пӧлын ӧвӧл политикъёс, ужбергатӥсьёс, промышленникъёс. Одӥгзэ гинэ мугзэ верало: мултэс буйгатскыса улӥськом. Али ужано партиос пыр. Соос угось огазеяны быгато калыкысь вань социальной группаосты. Западысь кунъёсын, кылсярысь, Великобританиын, партиос дауръёсын юнмазы но азинскизы. Юнме шорысь шат ӵапак та кунын нырысетӥез парламент но кылдӥз.

Россилэн Президентэз Владимир Путин партиос пыр ужанэз кужмоятыны тырше, соин валче быръён правоен герӟаськем законъёсы воштонъёс но ватсанъёс пыртыны ӵектэ.

- Политика удысъя пыр-поч вераським ини. Табере кӧня ке маде вал пинал дырды сярысь. Тӥ Алнашын вордскемын, шуо…

- Вань сыӵе легенда. Но шонерзэ верано ке, мон вордски Кез ёросысь Сюрзи гуртын. Атае, Геннадий Дмитриевич, со вакытэ дышетске вылэм, соин ик анае, Зинаида Степановна, нылпи вайыны дор палъёсаз бертэм. Собере 2-3 толэзь ортчыса, монэ Алнаше вуттӥллям.

Зэм, Алнашын дунне шоры синмы усьтӥськиз, татын нырысетӥ кылъёсме верай, татын школае мынӥ.

Атай ӵыж-ӵыж выль корка пуктӥз. Отын 2-3 ар гинэ улыса вуттӥм. Собере атаез Ижевске басьтӥзы. Соку мон удмурт сямен гинэ вераськисько вал, ӟуч кылэз чик ӧй тодылы. Городэ вуыса, сое дышетытэк ӧйлась.

Монэ интыязы 25 номеро школае. Отын английской кылэз муромытыса дышето вал. Собере кунсьӧр кылъёсъя тодон-валанъёс институтын люкай на. Туннэ английской кылэз умой тодӥсько. Кунгож сьӧры мынӥсько ке, кылысь кылэ беркытӥсь кулэ уг луылы. Француз кылэз но кӧня ке дышетӥ.

Трос кыл тодэм пыӵатэ аспӧртэм мылкыд. Мон дуннеез 90 процентаз учыръёсы ӟуч кыл пыр адӟисько, кылемаз учыръёсы – удмурт но англи кыл пыр. Тани али но син азям возисько пичи дырме: эшъёсыным ӵош курыт гумы бичаны ветлылӥм. Уд но оске, но мон курыт гумылэсь удмурт нимзэ гинэ тодӥсько, кызьы со чузъяське ӟуч кылын, вераны шугъяськисько.

- Англи кылэз туж умой тодӥськоды. Нош кунгож сьӧрын ужан сярысь ӧд малпаськылэ-а?

- 1994-тӥ арын, Удмурт университетын ужакум ай, американской грант утӥ. Соя чакламын вал Америкае ӝыны арлы стажировкае мыныны. Университет но быръемын, темае но пусъемын вал ини.

Ӵапак соку мон Кун Кенеше документъёсты быръён кампание пыриськи. Америкае мынонэн ӝегай, кури стажировкаме 1-тӥ сентябрёзь кельтыны. Быръёнъёс март толэзе ортчизы. Малпай: келяло ке но, кандидат ужме пумозяз нуо ни. Чакламея ӧз луы, вормисе потӥ. Соберегес ик Кун Кенеше ужаны ӧтизы. Стажировкае мыныны ӧй быгаты ни. Али чик но уг жаляськы, ваньмыз озьы радъяськиз шуыса.

- Атайдылэн тодмо нимыз, дано писатель луэмез улонады зол-а шӧдӥськизы?

- Шӧдӥськизы ик. Нырысь ик, генъёс ласянь. Кыкетӥез, астэ ачид дунъян ласянь. Куинетӥез, атаелэн данэзлэн салкымысьтыз потыны-мозмытскыны тыршон ласянь. Школаын но, институтын но ялан кылоно вал, мынам атае тодмо адями шуыса. Мон ялан возьматыны вырылӥ, ачим но маке со лэсьтыны быгатӥсько шуыса.

Мар шуод, атае депутат вал, мон но табере депутат луи ни, озьы ке но атайме быдэсак ӧй сутылы на, художественной произведение ӧй гожты на.

- Нош книгаоссэ лыдӟылӥды-а?

- Лыдӟылӥ.

Али ини ортчемзэ чакласько но шӧдӥсько: милям семьямы аспӧртэмгес вал. Гуртысь городэ выжон мон понна пичи будосэз мукет интые мерттэм кадь луиз. Сямъёс, традициос чигиськизы. Тани гуртын сям вань ӵыжы-выжыослэн шайгуоссы вылэ ветлыны. Городын дыръямы анай-атайёсы мыным сыӵе мылкыд ӧз пыӵатэ. Нош уноез сямъёс адямилы пичи дыръяз юнмало вылэм. Семьямы сярысь верано ке, анае врач, терапевт, гастроэнтеролог вал. Кылем арын улонысь кошкиз.

Сузэре Марина, со мынэсьтым 4 ареслы пичигес, анаелэн сюрестӥз ик вамыштӥз, врач луиз. Ужа нырысетӥ республиканской больницаын, «Искусственная почка» отделениын. Висисьёс сое мактало.

Аслам улэм-вылэмелы кыӵе ке йылпумъян лэсьтыны вазь на. Мыным ведь 48 арес гинэ ай.

- Иське, асьтэлы ялан пинал потӥськоды?

- Адями вань улытозяз дунне шоры нылпилэн синмыныз учке. Тани мон пичи дыръям малпалляй: вот, бадӟым будо но мукетгес луо, шуом, чылкак уз возьдаськы ни.

Мар шуоды, али но азьвыл кадь ик возьдаськисько.

- Марлэсь возьдаськиськоды?

- Возьдаськисько кинлы ке мар ке уродзэ лэсьтыны. Возьдаськисько, сётэм кылме уг быдэстӥськы ке. Шуом, пумиськон сярысь вераськемын ке, 5 минутлы но ӝегатскытэк, одно ик лыктыны тыршисько.

Мӧйымыса 70-80 аресаз но воргорон улон шоры учке пияшлэн синмыныз, нош нылкышно, малпасько, - нылашлэн синъёсыныз.

Источник:

Красильников А. Г. Улонлэн читыр-чутыр сюресъёсыз / А. Г. Красильников ; записала Юлия Александрова // Удмурт дунне. - 2002. - 31 мая. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"