Кубо кузьман

Кинлы кунян, кинлы ветыл

Туала арын егитъёс нимаз улыны туртто. Яна потӥсьёслы пилэн анай-атайёсыз но пирдан сёто: кунян яке ветыл, вал яке ыж. Азьло дыръя котькудӥз семья тыршиз пудо животэн улыны. Асьмелэн «ньыль пыдо эшъёсмы» кузёослэсь сямъёссэс шараяло. Сыӵе верамез но кылэме вань: пудо-живот, пе, кузёослэсь сямъёссэс шарая. Кылсярысь, лушкаськись кузёлэн, пе, пудо-животэз лушкаськись луэ, азьтэм муртлэн – азьтэм.

Киросагай-киросапай пуктон

Пирдан сётон йылол кутӥське нуны сюан ортчытыку но, киросагай-киросапай пуктон дыръя. Киросагай но киросапай кинэ сюрем уг пукто. Мылкыдъяськисьёс трос луэ ке но, анай-атайёс нырысь ик учко быръёно муртлэсь адямилыко луэмзэ: маин висъяське со гурт калыклэсь, гажало-а гуртоос? Пуктэмлэсь азьло озьы ик малпасько вылэм: будӥсь муртлы та адямиос маин ке юрттыны быгатозы-а? Ваньмыз та сярысь кенешыса, быръем муртъёслы ивор сёто. Нуны сюан ортчыку, соосты оброс пала висъям пукон сьӧры пукто. Та адямиос бадӟымгес кузьым но ваё, мукетъёсыныз ӵошатыса. Соос озьы ик нуны сюанэ лыктэм калыкез, ас доразы ӧтьыса, куно карыны кулэ на. Та дырысен киросагай но киросапай котьку син азязы возьыны кулэ будӥсь муртэ, кулэ дыръяз ӟечкыланы, визь-кенеш сётыны. Пичиысен ик пиналэз дышето «киросагай», «киросапай» шуыса вазьылыны. Вордскем нуналаз пинал мурт возьма ни соослэсь аспӧртэмлыко кузьым. Пичи пилы кузьмало вылэм солэсь яратоно шудонзэ, нош нылашлы – мунё. Пинал дыръя басьтэм кузьым быдэс улонлы вунонтэм кыле, пересьмыса но данъяськыса вералозы со сярысь. Тае пеляды поныса, тӥ но асьтэлэсь кирос нылпиостэс маин ке но шумпоттэ. Уд ке тодӥське ма кузьманы, кенеше анай-атаеныз. Кубо дасян дыр ортчыса, ныл быдэ вуэ. Котькуд ёросын сое асьсэ сямен пусъё. Кылсярысь, Алнаш ёросысь Кузебай гуртын вань «Эро» сэбед. Со сярысь тӥ лыдӟыны быгатоды Л. С. Христолюбова тодосчилэсь «Калык сямъёсты чакласа» книгаысьтыз.

Милям гуртамы вань туж аспӧртэмлыко сям – «Кубо кузьман». Кинлы но малы меда кузьмало кубоез, черсон тӥрлыкез? Сӥзьыл пал анай-атайёсмы ыжгонзэс чаклало: кинлы таяз аре пӧзь, пыдвыл керттоно? Кылем арын керттэмъёсыз кейёс сииллямтэ-а? Собере анайёс выль уж борды кутско, гужемлы ватэм кубозэс потто. Со кубоос туж аспӧртэмлыкоесь луо: котькудӥзлэн аслаз ӝуждалаез, чеберъям манерез. Кубоысь суредъёс вераны быгато асьме калыклэсь улон шоры учкемзэ но, кузёезлэсь кыӵе выжыысь луэмзэ но. Тросэзлэн кубо кузёослэн вань на асьсэлы гинэ тупась пусъёссы. Со пусъёсъя тодыны луоз, кинлэн тон нылыз-пиез. Вашкала кубоосысь котькуд гож маке но сярысь но вера вылэм. Сое лыдӟыны быгатоно. Вашкала дыръя киросагайёс-апайёс быдэ вуэм нылзылы кубо кузьмаллямзы. Ныллэсь ӝуждалазэ но сямзэ чакласа киросагай кубо лэсьтэ.

Кубо лэсьтонэ кутылӥзы кызьпуэз но, пипуэз но, беризез но. Берло дыре беризез кулэ каро. Беризьлэсь кубоез кутыны но, пӧртэм пужыосын чеберъяны но капчи. Кызьпулэсь лэсьтэмез камалы чида. Та аспӧртэмлыкъёсты тодыса ик, воргоронъёс кутско вылэм уж борды. Котькуд гуртын вань кибашлыос. Кубо лэсьтон пумысен но соос доры кенешыны мыно вылэм, собере уж борды кутско. Кубо лэсьтӥсь аслэсьтыз ужзэ нырысь ик адӟытэ семьяезлы. Таосыз ӟеч дунъет сётэм бере гинэ киросагай кылпум поттэ кубоез кироснылзылы кузьман сярысь.

Куяськод – сюресэд удалтоз

«Кубо кузьман» сэбед ортчытон понна нырысь ик ивор сёто быдэ вуэм ныллэн анай-атаезлы. Соглаш луыса, таосыз куно пумитаны дасясько. Кенешо, маин тырмытозы ӝӧк вылэз.

Кубо нуисьёс асьсэ понна гинэ уг мыно, сьӧразы одно ик басьто вылэм бӧлякысьтызы кинэ ке, ӵемгес – кышноен картэз.

Кироснылзы асьсэ гуртын ке улэ, ӝыт пал вымышто дораз. Со понна кӧмеч яке бискыли пыжо, колды нянь но бутылка вина басьто сьӧразы. Таос урам кузя васькыку ик, гуртоос валало ини кубо кузьманы мынэмзэс, шуо: «Сюресты мед удалтоз!»

Кироснылзы мукет гуртын улэ ке, пудозэс сюдыса, дӧдьы дасяло, валзэс кытко. Сюрес вылэ потон азязы пересь пиосмурт куалае потыса вӧсяське. Инмарлэсь куре тазалык но ӟеч сюрес – ӟечкын ветлыса, ӟечкын бертыны мед кылдоз, пе. Собере пичиен ваньзы веръяло ӝӧк вылэ пуктэм вӧен нянез.

Гуртмылэн пумаз интыяськемын вуж шай. Сюрес вылэ потэм мурт отчы куяськыса кельтэ но пересьёслэсь шудо сюрес куре. Та сям али но возиське Сальялан. Котькытчы мед мынозы гуртоос, одно ик шай пала дугдо но сюрес урдсы нянь, пӧраськем куяло, асьсэлэсь кулэм ӵыжы-выжыоссэс тодазы ваё. Куяськем няньзэс но пӧрамзэс асьсэос но пичиен веръяло, собере азьлань вамышто. Шуо, палэнэ потыку ӧд ке куяськы, сюресэд уз удалты.

Кузьмаськон

Куноосты ныллэн дораз шуныт пумитало. Пыремез бере ик, ӟеч кылъёс вераса, киросагай аслэсьтыз лэсьтэм кубозэ кироснылзылы кузьма:

– Вашкала дырысен кылдэмын та сям асьме гуртын. Соин ик мон но кузьмасько тыныд аслэсьтым кубоме. Та кубо дышетоз тонэ нылмуртъёслэн радазы султыны но улонын зэмос анай луыны. Туала арын тросэз нылъёс уг но тодо ни, малы кулэ кубо, кыӵе со луэ, ма ужано соин. Оскисько, мынам кузьмам кубое тон понна дуно кузьым гинэ уз луы, анаед сямен черсыны кутскод. Киыд мед волялоз!

Тон быдэ вуид, нылы. Кӧня ке дыр ортчыса, дорады ныл курасьёс но вуозы. Озьыен, быдэ вуэм ныл – со анай-атайлэн гинэ шумпотонэз ӧвӧл, со быдэс бӧляклэн но, будэс гуртлэн но. Сӥземе потэ тыныд, кироснылы, юн тазалык, улонын трос пӧртэм вормонъёс. Со вормонъёс инмысь уг лыкто. Сое котькуд адями ачиз дурыны кулэ. Со понна ик вордске дунне вылэ адями! Ужаса поттэм коньдонэд аслыд дуно луоз. Аслад киыныд керттэм носкиед но пӧзьыед сюлэмдэ мед шунтозы. Дышетскы улонын ваньзэ ачид лэсьтыны, йылаз-пумаз вуттыны. Тыршись но ужась муртэ котькытын гажало но дунъяло. Та югыт дуннее аслэсьтыд пытьыдэ кельтоно. Со пытьы туж яркыт но сюлэме пыӵамон мед луоз. Уждэ яратэм сяна, кулэ на яратыны вуоно кузпалдэ, ӵыжы-выжыостэ, гурт калыкез. Озьы шуыса кузьмаськом тыныд удмурт дэрем. Учкы ай, макем чебер адско удмурт дэремен кышномуртъёс. Асьме калыкын кышномурт улонэз бергатэ, радъя. Соин ик сэзь но визьмо лу! Верам кылмес пеляд пон!

Та выллем ӟеч кылъёс вераса, киросагай сётэ кубозэ но кузьымзэ. Собере ныллэн анай-атаез куноосты ӝӧк сьӧры пукто. Быдэ вуэм ныллы вань лыктэмъёс сюлэм шунытсэс верало.

Котькудӥз анай-атай будӥсь нылпиосыз понна улэ, маин юрттэмзы луэ – юртто: кин коньдонэн, кин визь-кенешен. Соос но та нуналэ асьсэлэсь кузьымзэс сётозы. Собере ӝӧк сьӧрын чузъясько сюлмысь потэм кырӟанъёс.

Ми доры но лыктылӥллям

Ӟеч, дыр, гинэ куноос.

Мар ӟеч кылмес вералляса

Али ке но секталом.

Секталом но погыртылом

Шуылыса ӧм ӧте.

Одӥг чарка винаосмес

Валче юом ми шуим.

Кыӵе потӥз, кыӵе потӥз,

Эмезен чай юэме.

Эшшо потӥз, эшшо потӥз,

Тӥ туганме адӟеме.

Юом меда, ой, ум меда,

Та кашамер винаез.

Юисько ке, туж кудӟисько,

Уг ке юиськы, жаль кыле.

Тӥ понна бон уд юылы,

Кин понна бон юылод?

Тӥ ӧвӧл шат, тӥ ӧвӧл шат,

Чын яратон туганъёс.

Улом валче, эшъёсы, но,

Юом валче, эшъёсы,

Одӥг анай-атай нылпи,

Асьмеос бон ӧвӧл шат?

.