Хазиахметова Валентина Серафимовна

Кызлэн ӵыжинэз выжыяз усе

Абросимова В.В.

Валентина Серафимовна Хазиахметова — история наукаосъя кандидат, ужамын Казаньысь кун университетын, вал Татарстанлэн президентэзлэн Минтимер Шаймиевлэн советникез, Социальной страхованиея фондлэн Татарстанысь отделениезлэн кивалтӥсезлэн воштӥсез. Пусъемын СССР-лэн, Россия Федерацилэн но Татарстанлэн данъетъёсынызы, «За доблестный труд» медален, «Народный просветитель» дано нимын. Ачиз верамъя, со луэ Вотской автономной областьлэн облисполкомезлэн кивалтӥсезлэн (1921-1925), РСФСР-ысь социальной обеспечениея калык комиссарлэн (1926-1937) Иосиф Наговицынлэн ӵыжы-выжыез.

Дано удмурт выжыысь

Трос аръёслы вунэтэмын вал асьмелэн геройёсмы, зэмос удмурт азьветлӥсьёсмы. Соосын данъяськем интые, курадӟоно луизы ӵыжы-выжыоссы, матысь адямиоссы. Озьы куд-огез ноку ӧз вераллялэ выжыоссы сярысь, нош палэнэ кошкыса, Удмурт шаерен кусыпъёссэс пыраклы ӵогизы. Табере соосты утчаса но шедьтыны уг луы ни.

Но инкуазь — визьмо, со уг сёты ӟеч выжыез чылкак быдтыны, кӧня ке аръёс ортчыса, со выльысь вордэ визьмо, яркыт адямизэ — кин уз сёт вунэтыны, кин азинтоз мытэм ужез, утёз дано выжылэсь нимзэ. Сыӵе адями луэ Иосиф Наговицынлэн выжыысьтыз Валентина Серафимовна Хазиахметова. Со Казаньын улэ.

Ачиз верамъя, со луэ Иосиф Алексеевичлэн Сергей вынызлэн (со 2 арлы пичигес вал) внучкаез. Сергей Алексеевичлэн вал одӥг гинэ нылыз — Зинаида. Быземез бере со Корепанова луиз. Зинаида Сергеевна Корепанова Удмурт АССР-ысь школалэн дано дышетӥсез вал, нырысь покчиосты визьнодаз, ӟуч кыллы но литературалы дышетӥз, вал школалэн директорез, ронолэн кивалтӥсез, бӧрысь нош ик выжиз покчиос доры. Солэсь дышетскыны ветлӥзы быдэс шаерысь дышетӥсьёс. 1965-тӥ арын Августа Конюхова «Мастера педагогического труда» серия улсын нимысьтыз Зинаида Сергеевна Корепановалы сӥзем книга поттӥз. Семья архивысьтызы одӥг гинэ векчи экземплярез синпелетэз кадь уте Валентина Серафимовна.

— Анае Иосиф Алексеевичез туж ӟечен гинэ вералляз, — шуэ В. Хазиахметова. — Со юрттылэм вань братъёсызлэн семьяоссылы, вылаз ик, Сергей 1915-тӥ арын, войнае кошкыса, чиптэм-чаптэм ышем, Зина атайтэк кылем. Иосиф Алексеевич котьку кузьымъёсын шумпоттылэм. Тани алигес гинэ Удмуртиысь музее мон вайи анаелэсь тӧдьы блузказэ — сое кузьмаллям Наговицынъёс, анае школаын завучын ужакуз. Ижевске совещаниосы ветлыкуз (азьло Глазовысь Иже Москва пыр ветло вал!), со котьку куноя вылэм Наговицынъёс дорын шоркарын. Иосиф Алексеевич кышнозэ мынам анаелы йӧно дӥськут басьтыны косылэм.

Иосиф Алексеевич Наговицын кузпалэныз ӵош будэтӥзы Анна но Владимир нылпиоссэс. Соос улӥзы Москваын. Жаляса верано, Анна улонысь вазь кошкиз, со ноку бызьылэмын ӧй вал, пинал ӧз ворды. Нош Владимир пиезлэн вань Ольга нылыз. Со ноку вуылэмын ӧвӧл Удмуртие, уг тунсыкъяськы дано песятаезлэн выжыосыныз, дор палъёсыныз. Быземын немецлы, улэ Германиын. Мыным соин огпол гинэ пумиськылыны кылдӥз ай. Мырдэм сое шедьтӥ. Москвае архивын ужаны ветлыкум, таман гинэ пумиськылӥм, ӵектӥ вал книгаелы соавтор луыны, тодэ ваёнъёссэ пыртыны, но кӧня ке улыса, со мыным Германиысен гожтӥз ни. Жаль, солэн пиналъёсыз ӧвӧл, озьыен, Иосиф Алексеевичлэн меӵак наследникъёсыз нылыз вылын йылпумъясько…

Ачим сярысь ке, йылпумъяй Яр школаез, малпай Удмурт пединститутысь кунгожсьӧр кылъёсъя факультетысь немец кылъя отделение мыныны. Экзаменъёсме туж умой сётӥ, институтэ капчиен пыри. Кӧня ке улыса, монэ ӧтизы Министръёслэн Советазы — уг-а, пе, поты Казаньысь университетэ историяя факультетэ выжемед (со вакытэ устооссэ студентъёсты сьӧрло келяло вал вуоно партужасьёсты дасян вылысь). Мон шуисько, мыным нырысь доре бертылоно, анай-атаеным кенешоно. Ма, тани, пе, телефон, кенеше. Мон бадӟым кивалтӥсьлэн кабинетысеныз ик анайлы жингыртӥ, мар каром, шуисько. Со ӧз но паймы кадь, кема малпаськытэк, шуиз: Иже тон котьку берытскыны быгатод, мын. Озьы мон сюри Казане. Зэм, берытскыны ӧз кылды ни — отын бызи, отысь университетэ ужаны кыли. Улонэ туж ӟеч но тунсыко радъяськиз.

Дано бигер выжые…

— Ноку ӧй малпалля, бигерлы бызё шуыса. Жаль, 2016-тӥ арын картэ улонысь кошкиз. Инмарлы весь тау карисько, со монэ Фарид Гениатовичен герӟаз шуыса. Студент дыръям пиосын юмшан, бызён мынам малпанам но ӧй вал — ялан дышетскыны, котькытчы вутскыны тыршылӥ. 1968-тӥ арын Софиын (Болгария) ортчиз Дуннеысь егитъёслэн IX фестивальзы. Мон но, вуоно кузпалы но отчы пыриським. Фарид соку Казаньысь химико-технологической институтлэн аспирантэз вал. Софиын ваньмон дыръя ми одӥгаз городын выставкаез учкыны пырим. Одӥг суред вадьсы артэ укшам. Кельше-а, пе, суред дорын ӝегамме синйылтыса, юа Фарид. Туж, шуисько. Со монэ серем кариз: номыр тунсыкоез, пе, со суредын ӧвӧл, тон та искусствоын номыре уд валаськы! Фарид дышетскон висказы художник-оформитель луыса ужа вылэм. (Нялтас вераса солэн выныз тодмо художник вал, Тавиль Хазиахметов луэ Татарстанлэн туала флагезлэн авторез). ӝытазе ми Фаридэн нош пумиським — кинлэн ке вордскем нуналыз тупаз, ваньмы ӵош одӥг ӝӧк сьӧры люкаським. Укшаны но кулэ ук — артэ пуксьыны сюрим. Со монэ ялан донгыны, пышкылыны выре, мон кылме верасько. Вот озьы эчешонысен ваньмыз кутскиз, кин малпасал.

Пумиськылыны кутскеммы бере, малпаським, конешно, анай-атаез удмурт кен кулэ уз каре, дыр, шуыса. Нырысь-валысь сыӵегес ик вал мылкыдзы. Но атаез лэзиз мынам анай-атае дорын Ярын кунояськыны. Берен Казане мынэммы бере атаез юалляське, маин паймытӥзы, пе. Туганэ возьмамтэ шорысь шуэ: соослэн укно улазы ӟусъёссы ӧвӧл! Умой, шуэ атаез, иське, удмуртъёс уг ваньмо супыльтыса тэк пукыны. Эшшо мар? Атайзы тэль дасяны чортӥз, асьсэлэн ке пузы лапас улазы но, бакчаязы но лачак. Лапас улысез, пе, туэ тол вылтӥ эстыны, бакчаысез — кайталы, эшшо, пе, 2 арлы азьлапал кулэ на… Усто, шуэ бабай, озьыен, удмуртъёсын уд быры — запасэн уло. Кышнояськы! Уд оскелэ, но бӧрысь мон 5 кенъёс пӧлысь яратоноез луи, мукетъёсыз ваньмыз бигеръёс ке но. Шыд но ӝутыны мыным гинэ оске вал (бигер семьяын со бадӟым данэн лыдъяське). Зэм, ачим но тырши бен яраны — ӝыны ар ортчыса, семьяосыныз бигер кылын вераськисько ни вал.

Жаль, нырысетӥез пимы ар мында но ӧз улы. Со мон понна бадӟым шуккет луиз, но Инмар жаляз — кыкетӥ пи ыстӥз. Даниярлэн табере аслаз пиналъёсыз бадӟымесь ни. Со милям туж данъяськымон будӥз, медицина наукаосъя кандидат луиз, Казаньысь медициная университетын дышетэ, сюлэм висёнъёсты эмъянъя клиникаын кафедраен кивалтэ, Татарстанысь одӥгез валтӥсез кардиохирург луэ. Кунгож сьӧры но ӧтчазы ни ужезлы дышетыны. Наговицын выжыос сярысь тодэ — анаез историк ук. Собере дорамы вань Бадӟым Советской Энциклопедия, но Удмуртие вуылэмез ӧвӧл.

Сямызъя со, конешно, чылк-чылк бигер, атаезлэн вирыз вормиз. Куддыр ӟуч кенме жалясько но — кызьы тон сое чидаськод, шуисько. Но куспазы керетэмзэс огпол но кылэме-адӟеме ӧвӧл, син медам усь. Кенмы пиналъёсызлы бигер ним сётонлы но, бигер кылэз дышетытонлы но ӧз пумитъяськы. Огшоры школае сётэм гинэ ӧвӧл, ми соосты пичи дырысенызы таш-таш бигер садэ сётӥм — отын нокин ӟуч кылын пал кыл но уг поттылы, вала-а тынад пиналыд, уг-а. Озьы бигер кыллы туж ӝог дышизы, умой верасько но, гожъясько но. Бадӟымез внучкае Москваын вузын — Экономикая вылӥ школаын — дышетске ни, внуке школаын на.

Кемалась ӧвӧл Татарстанэз пыкылыны кутскизы, ӟуч кыллэсь тросгес бигерзэ дышетыто шуыса. Мон 50 ар улӥсько ни Казаньын, бигер кыл мыным ӧз люкеты, солы пумит, сое тодэме юрттӥз ужея ӝутскыны. Азьвыл президент Минтимер Шаймиев дораз советнике ужаны ӧтиз но, мон ӝегатскытэк гожтӥськи бигер кылэз дышетонъя курсъёсы, малы ке шуоно шӧдӥ: тодон-валанэ дорын вераськымон гинэ. Нош Татарстанын бигер фамилиез нуллыса вылысь кылэз уд ке тодӥськы, сыӵе должностьёс сярысь эн но малпаськы. Монэ паймытэ, куке мукет улосъёсын улӥсьёс дышетыны кутско бигеръёсты. Бигеръёс асьсэос тодозы, мар карыны. Котькытын гажасалзы ке озьы асьсэды! Тани удмурт кылэз мон уг тодӥськы, малы ке шуоно анае, дышетӥсь ке но, шуиз: улонад со тыныд уз яра… Со вакытэ кивалтӥсьёс ласянь сыӵе учкон вал уго.

Архивъёсысь — югыт дуннее

— Улонысьтым одӥг нуналэ но мӧзмыт ӧй вал — мон котьку вал визьмо, тунсыко адямиос котырын. Ачим но тырши, нуналъёсы пайдатэм медаз ортче шуыса. Котьку огдыре кӧня ке ужез нуи. Трос аръёсме сӥзи историлы, университетын дышетонлы. Собере улон вуттӥз соцобеспечение удысэ. Тӥни кытын мон уката шӧдӥ Наговицынлэсь котьку вадьсам луэмзэ. Иосиф Алексеевич уго та удысын бадӟым профессионал вал. Мон лыдӟи солэсь вань ужъёссэ, выступлениоссэ. Уд оскелэ, но данакез ӵектонъёсыз али но улонэ пыӵало, уже кутӥсько. Алигес син шорам йӧтӥз Удмуртиын потӥсь газетысь материал — отын гожтэмын А. Бречаловлэн покчи ужбергатонэз азинтон сярысь мыдкыдъёсыз-малпанъёсыз. Мон сое лыдӟи но выльысен тодам вайи Наговицынэз — Иосиф Алексеевич ӵапак таӵе ӵектонъёс сётӥз вал 100 ар талэсь азьло! Государство юрттыны кулэ ӧвӧл «кустарьёслы», но люкетыны но уг яра — мед вырозы, асьсэлы но, калыклы но пайда поттозы, шуылӥз со. Ваньмыз со пусъемын статьяосын. Ӵапак Иосиф Алексеевич ик Удмуртиын кылдытӥз нырысетӥ банк но. Уг тодӥськы, татын тодазы вайыло-а солэсь ужан амалъёссэ, уг-а, нош Татарстанысь калыкез улон-вылонын утён удысын туж дунъяло солэсь опытсэ, котькудаз кенешонын али ке но солэсь нимзэ поттыло. 2017-тӥ арын мон мукет авторъёсын ӵош (ваньмы 5 кузя) Татарстанысь калыкез улон-вылонын утён ёзъёслы 100 ар тырмонлы сӥзьыса, «Адресная социальная защита в Республике Татарстан: истоки и становление» книга поттӥм. Ӝыныез книга пӧрмиз Иосиф Наговицын сярысь: солэн 1926-тӥ-1937-тӥ аръёсы РСФСР-ысь социальной обеспечениея народной комиссар луыса ужамзэ сяна, мон пыртӥ со сярысь Н. Павловлэсь документальной очерксэ но, Иосиф Наговицынэн герӟаськем вань тодмо-дано интыосты но.

Туэ удмуртъёс понна туж тодмо-дано ар. Июне 100 ар тырме удмуртъёслэн нырысетӥ съездзы ортчем дырысен, нош сентябре 130 ар — Иосиф Наговицынлэн вордскемез дырысен. Съездлэн юбилеезлы сӥзьыса, мон поттыны дасяй «Три комиссара: архивные документы повествуют…» книга. Отын вераськон мынэ 3 тужгес яркыт удмурт общественной деятельёс Максим Прокопьев, Иосиф Наговицын но Трофим Борисов сярысь. 1917-тӥ арын революция бере соос асьсэды сӥзизы удмурт кунлыкез кылдытонлы, калыкмылэсь асваланзэ ӝутонлы, югдытонлы.

Сӥзьыл, туж оскисько, дуннеез адӟоз 3-тӥ книгае: таиз быдэсак сӥземын Иосиф Наговицынлы. Солэн улэмез но ужамез сярысь очеркен книга «Удмурт книга» издательствоын 1964-тӥ арын поттӥз Никифор Павлов. Солэсь ӟеч, мон малпамъя, нокин но уз лэсьты ни. Соку малы кулэ кыкетӥез? Нырысь ик, Н. Павловлэсь ужзэ егитъёс уг тодо ни, библиотекае лыдӟиськыны ветлӥсьёс али ӧжыт. Та адямиосъя кӧня материал архивъёсын вань, ваньзэ бугыръяй — 1884-тӥ арысен кутскыса. Али ик шӧдӥсько, книгаосме учкыса, оло, куд-ог удмурт азьветлӥсьёс пумысен малпанъёсты но чутрак воштӥськозы — асьмелэн ӵемысь озьы луэ уго: одӥгезлэсь ужзэ но, данзэ но мукетызлы ляко. Адямиосыз улэпесь ӧвӧл ни ук, кинлэсь юалод? Жаляса верано, туж ӧжыт паньсаськымтэ историкъёс. Ӵемысь соос тӧлъя уло, туннэ курлано ке — курлало, ӵуказе кыӵе ке югдур яке адями шоры учкон воштӥське ке — ӝогак малпанзэс вошто. Совето вакытэ ваньмы асьмеос оскылӥм одӥг гинэ кыӵе ке источниклы, нош сое лэсьтылӥз (историез гожъяз) ук кин ке улэп адями. Кин тодэ, кыӵеесь вал солэн малпанъёсыз, соин мон ноку уг оскиськы одӥг пӧртэм гинэ источниклы (книгалы, статьялы). Сыӵе дыръя вань одӥг гинэ зэмлык — документъёс!

Соин мон книгаям юромо трос комментарий но уг сётӥськы — лыдӟись ачиз мед ваньзэ учкыса потоз, йылпумъянъёс лэсьтоз. Книга потыны кулэ туэ 18-тӥ майлы — соку «Удмурт Кенеш» огазеяськон Елабугаын ортчытэ нырысетӥ удмурт съездлы 100 ар тырмонлы сӥзем конференция. Туж тау кареме потэ Татарстанысь Архив ужъёсъя комитетлы — ӵапак со ас вылаз басьтӥз та книгаез поттонэз.

Мынэсьтым юалляло, малы та ужен Татарстан выре. Мар мон шуом — малы ке шуоно мон Татарстанын улӥсько. Зэмзэ вераса, мынам вань кӧтӝоже — Иосиф Наговицын Удмуртиын вунэмын, шуыны луоз: тросэз уг тоды, кыӵе Наговицынлэсь нимзэ нуллэ ульча, нокин уг утялты памятниксэ, уг ортчыло сое буре ваён яке данъян нуналъёс… Тани 130 аръем юбилеезлы но ужрадъёс чакламын ӧвӧл. Со дыре ик ӵапак Иосиф Наговицын вал удмурт кунлыкез кылдытонын одӥгез валтӥсез адями — книгае потӥз ке, адӟоды документъёсты…

Кемалась чакласа улӥ историклэсь Алексей Загребинлэсь ужъёссэ. Мыным потэ, со зэмлыко тодосчи. Соин, куке тодӥ, со Кун Думаысь депутат луиз шуыса, туж шумпотӥ. Интернет пыр тодӥ, ку солэн адямиосты пумитан нуналыз луоз, Казаньысь Иже лыктӥ. Черодын мон нырысетӥосыз пӧлын вал, ӵапак соку возьматӥ та книгаосылы материалъёсме. Отын, конешно, йӧскадь вераськыны ӧз пӧрмы, журналистъёс одолизы, но бӧрысьгес пыр-поч кенешим — табере со мынам научной кивалтӥсе луэ!

Утчаськисько-гожъяськисько котькуд нунал — дыртоно, мон уго 70 аресме ортчемын ни, кин тодэ, мар луоз ӵуказе. 2 толэзь пенсиме люкасько но, ноутбукен рюкзакме ныпъяса, пӧртэм городъёсы интыяськем архивъёсы кошкисько. Ужано луиз Москваын, Санкт-Петербургын. Берло арзэ ӵем ужасько Ижысь архивъёсын. Туала вакытэ туж юрттэ, конешно, Интернет. Со пыр кусыпъёс тупатӥсько, гожтэтъёс-запросъёс ысъясько, юалляськисько. Со пыр шедьто монэ асме но. Озьы туэ вазиськизы Глазов библиотекаысь ужасьёс, соослэн Иосиф Наговицынлэн юбилеезлы сӥзьыса экспозиция усьтэмзы но ролик лэсьтэмзы потэ. Октябре Глазовын конференция радъяны медо, со вакытлы выжы писпумес (родословноймес) суредано. Мон шумпотӥсько, коть кинлы ке но со тунсыко шуыса.

Огкутскемен вуылӥм Туктым гуртэ. Улэм коркаез, конешно, ӧвӧл ни, но отысь клубын азьло интыяськемын вал школа, кытын дышетскиз пинал Иосиф! Мон ӵектӥ отчы пул юнматыны, клубын кыӵе ке буре ваён сэрег усьтыны. Зэм, нырысь ремонт лэсьтоно вылэм. Табере мынам юрттӥсе но вань, шуыны луоз — Интернет пыр вазиськиз Яр ёросысь Биграгуртысь (Дизьмино) историен дышетӥсь Олег Евгеньевич Сысоев. Шуэ, со Иосиф Наговицынлэн анаезъя ӵыжы-выжыез луэ. Кенешиськом сӥзьыл уйпал ёросъёсысь школаосын, музейёсын, библиотекаосын валче урокъёс нуыны. Соос сӥземын луозы Иосиф Алексеевичлэн удмуртъёслэн улоназы интыезлы. Оло нош, Ижын но книгалы презентация радъялозы ай.

Источник:

Хазиахметова В. С. Кызлэн ӵыжинэз выжыяз усе / Валентина Хазиахметова ; вераськиз Зинаида Рябинина // Удмурт дунне. - 2018. - 17 мая. - С. 10, 15 : фот. - (Тӧр шорын)

За предоставление материала выражаем огромную благодарность редакции газеты "Удмурт дунне"