Пушина-Благинина Серафима

Серафима Петровна Пушина-Благинина - удмурт гожъяськись, журналист, Россиысь журналистъёслэн огазеяськонзылэн ёзчиез, Удмуртиысь писательёслэн огазеяськонзылэн ёзчиез.

Улон сюресэз

Пушина Серафима Петровна вордӥськиз Дэри ёросысь Вуж Кенӥ гуртын 1950-тӥ арын 5-тӥ мае.

Анаез пичи Симаез дышетскыны Ижкаре ваиз. Пичиоклэн туж уг поты вал городэ лыктэмез, машинаослэсь, пе, кышкасько. Нош берло анаезлы туж тау кариз нылызлэсь кылзӥськымтэезлы. Городын дышетскиз бере, удмурт кылэз ӧз дышеты. Дышетскиз умой, «витьёслы» гинэ. Сима туж яратӥз ӟуч кылэз но литератураез, англи кылэз. Ӟуч кылын сочинениосыз умой пӧрмылӥзы. Школаязы 10-тӥ классъёс вить вал. Дышетӥсьсы ваньзы азьын Сималэсь сочиненизэ лыдӟылӥз. Со сяна, шумпотыса ветлӥз художественной самодеятельносте но спортэн герӟаськем ужрадъёсы. 1967-тӥ арын Серафима йылпумъяз 59-тӥ номеро школаез. Нырысетӥзэ редакцие пыриз 14 арес дыръяз, сизьыметӥ классын дышетскыкуз. Быдэс нуналъёсын Гайдар но Ленин нимо библиотекаосын книгаос, журналъёс пушкын бугыръяськылӥз.

Серафима семьяязы одӥг нылпи вал. Номыр сярысь малпаськытэк, анай-атаезлэн бурд улазы, шуныт карын гань-гань улыны быгатысал. Пичи дырысеныз ик со эрико, ас понназ луыны тыршылӥз. Школаын дышетскыкуз, анай-атаез мотороллер басьтӥзы. Нылаш соин синтэм-пельтэм ворттылӥз. Нош вылӥ дышетсконнизэ йылпумъямез бере машина руль сьӧры пуксиз. 1968-тӥ арын нылаш кӧня ке «Дась лу!»–ын ужаз. Отын соку валтӥсь редактор вал П. К. Чернов. Г. Симаков, В. Романов, Г. Ходырев вӧзын тодон-валан басьтӥз Сима но. Г. Ходыревез кирос атай шуэ вал. Со ик университетэ пырыны рекомендация но сётӥз.

Школазэ йылпумъяса, Серафима кошкиз Казане. Трос пӧртэм печатлам ужъёссэ, «витьёсыныз» аттестатсэ но журналистъёслэн Союззылэсь ӵектонзэс кутыса, мынӥз отысь кун университетэ журналистикая ёзэтаз. Бадӟым конкурслэсь ӧз кышка. Абитуриентъёс ӟучъёс, бигеръёс, поръёс вал, удмуртъёс пӧлысь со – огназ. Отын но умой дышетскиз. Собере Москваын кӧня ке артистэ но дышетскыса вуиз ай со.

1973-тӥ арын, университетсэ йылпумъяса, ужаз Удмурт телевидениын, удмурт но ӟуч кылын передачаосты нуиз. 1975-тӥ арын Серафима кошкиз Салехардэ. Туж ас шаераз ужамез потэ ке но вал, ӧз пӧрмы. «Сюлэмыя, быгатэмея, талантэя уж мыным ӧз дэмлалэ», – шуэ Серафима Петровна. Та вамыш лэсьтэмез сярысь берло ӧз жаля. Салехардын (1975–1979), Ижын (1980–1981), Владивостокын (1982–1987), Магаданын (1988–1993) ужаз пӧртэм СМИ-осын: газетъёсын, радиоын, телевидениын.

1993-тӥ арын Серафима берытскиз вордскем палъёсаз. Выльысь дышетскиз удмурт кылын вераськыны. Ас калыкезлэсь, ас шаерезлэсь мӧзмем мурт сюлмысь уж борды кутскиз. Огвакыт Серафима Петровна ассэ элькунмылы президентэ но дэмлаз. 1998-тӥ арын ачиз спонсор, валтӥсь редактор, корректор но шофёр луыса, «Газета Серафимы Благининой» кылдытӥз. Газетаз «Удмуртский язык – за 20 уроков», «Закон Божий» урокъёсты печатлаз, политика, литература но культура сярысь гожъяз, эротикаез но вал.

1999-тӥ арын Серафима Петровналы дэмлазы политика но сатирая эшшо одӥг газет кылдытыны, удмурт кылын. Нимзэ но дэмлазы – «Лӧпшо Педунь». Серафима туж яратэ пӧртэм дуннеосы вуылыны, тодматскыны выль адямиосын. Берло дыре гинэ вуылӥз Кипре, Израиле, Абхазие, Кабардино-Балкарие, Канарые…

С. П. Пушина-Благининалы - нырысетӥезлы удмурт журналистлы – 2000-тӥ арын сётэмын «Четвёртая власть. За заслуги перед прессой» вылӥ дунъян пус.

Гожъямъёсыз сярысь

Гожъяськыны Серафима кутскиз кык кылын, удмурт кылэз школаын ӧз дышеты ке но. 7-тӥ классын дышетскыкуз, со гожтӥз нырысетӥ кылбурзэ. Кӧня ке кылзэ гинэ тупатыса, сое «Советской Удмуртиын» поттӥзы. Нылашлэн шумпотонэзлэн пумыз ӧй вал. Собере редакцие арнялы быдэ ветлыны кутскиз, гожъямъёссэ вайылӥз. Редакциын соку Николай Васильев, Александр Вотяков, Семён Перевощиков ужало вал. Соос ик нылашез гожъяськыны но дышетӥзы.

Школаын дышетскыкуз ик Удмуртия сярысь кык кырӟан гожтӥз. Крезьгуръёссэ Н. М. Греховодов но Г. М. Корепанов-Камский гожтӥзы. Удмурт лыдӟисьлы Серафима Пушина-Благининалэн нимыз вунӥз ни кадь вал. Но, кыдёкысь Шунды ӝужан палась бертэмез бере, кык-куинь ар ортчыса, солэн нимыз котырын гуж вазе вал ини. Со олокытчы но вутскиськиз, мар малпамзэ адямилы шораз учкыса вералляз. Серафима гожъяськон уж борды ӟырдыт кутскиз. Удмурт шаераз берытскыса, ог кык толэзь куспын сю пала удмурт кылбуръёсыз вордскизы.

1996-тӥ арын, ужбергатӥсь луыса но ачиз коньдон шедьтыса, поттӥз «Исповедь грешницы, или Я – удмуртка» нырысетӥ книгазэ. Отчы пыризы документальной повесть, кылбуръёс, артистъёс, писательёс, журналистъёс сярысь очеркъёс но «Монахиня в чёрной «Волге»» пьеса. Вуись аре ик «Записки новой удмуртки» (1997) кыкетӥ книгаез потӥз ини. Та книгаосаз пӧртэм жанрен гожтэм ужъёсыз пыризы. С. Пушина-Благинина аслэсьтыз чеберлыко дуннезэ кылдытэ. Солэн героиняез – дауръёс воштӥськон, кусыпъёс тӥяськон вакытэ улӥсь адями. Солэсь сямъёссэ, выросъёссэ та вакытлэн аспӧртэмлыкеныз валэктыны луэ. Пӧртэм гожъямъёсаз автор одӥг адямилэсь ик улэм-вылэмзэ пӧртэм ласянь возьматэ, ӵемысь шуныт, чылкыт малпанъёсты киргатэм-ыштэм адямилэсь ӝожен тырмем улонзэ. Та авторлэн гожъяськон аспӧртэмлыкез – лыдӟисен шудыса, исаса сямен вераськон.

С. Пушина-Благинина туала удмурт литератураын мемуарно-биографической прозаен гожъяськисьёс пӧлы пыре. Со туннэ нунал сярысь гожъя, туннэ нуналлэсь тырмымтэоссэ шарая. 2008-тӥ арын Серафима Пушина-Благининалэн «Удмуртка. Обнажённый портрет с израненной душой» книгаез потӥз. Та книгаяз дневникысьтыз трос чуръёсыз пыризы, татын автор сьӧлык но сьӧлык понна кыл кутон сярысь туж шара вераськыны дӥсьтэ. Аслэсьтыз улон сюрессэ чакласа, со али кылдэм югдурлэсь мугъёссэ кутсконысьтыз – пичи дырысьтыз утча. Героиня таӵе малпанэ вуэ: адями улонзэ Инмарен солы гинэ сётэм сюресэтӥ ортче, солы гинэ быдэстыны чаклам ужъёсты даур ӵожаз лэсьтэ. Инмарез утчаса, сое тодыны-валаны тыршыса, Серафима ассэ но пушласянь адӟыны, валаны сюлмаське, ассэ судъяны Инмарез гинэ лэзе.

Серафима Пушина-Благинина – публицист, прозаик но поэтесса, печатласькиз шаерысьтымы ваньмаз сямен периодической изданиосын ӟуч но удмурт кылын. Тодмо солэн «Еще раз об удмуртах», «Есть такой народ - угрофинны», «Мы коренной народ, а не национальное меньшинство» но мукет ужъёсыз. Со сярысь кылдытэмын «Сьӧлыко Серафима сярысь», «Незнакомка» телефильмъёс.

Премиосыз

«Четвёртая власть. За заслуги перед прессой», вылӥ дунъян пус, 2000

Библиография

Книгаосыз

Записки новой удмуртки. – Ижевск : Тодон, 1997. – 112 с.

Исповедь грешницы : сборник. – Ижевск : Тодон, 1996. – 151 с.

Удмуртка. Обнаженный портрет с израненной душой. – Ижевск : Ижев. полиграф. комб., 2008. – 695 с.

Статьяосыз

"Аспирант". Доцент. Этнофутурист // Иднакар. – 2011. – 21 июля. – С. 7.

В мире – кризис, а где-то – рай! // Долг. – 2011. – 24 нояб. – С. 8. – (Из дальних странствий возвратясь...).

Знакомьтесь : Эрик Батуев. Поэт. Журналист. Музыкант. Дворник. Ветеринар // Ребристые берега души / Эрик Батуев. – Ижевск, 2009. – С. 320–323.

Из дневника грешной удмуртки, покрестившейся в реке Иордан // Герд. – 2005. – № 5 (май). – С. 4.

Израиле но Кипре ветлэм журналистлэн дневникысьтыз // Ӟечбур! – 2005. – 9 июня. – С. 1, 4–5.

Иордан шурын пыласьки // Ашальчи. – 2005. – № 3. – С. 20–21.

КБР-ын шутэтски, ЧР-е куное ветлӥ / Серафима Пушина-Благинина // Ӟечбур! – 2011. – 13 янв. – С. 8 : фот. цв. – (Дуннеез котыръяса).

Кык сюрестӥ мон ветлӥсько : кылбуръёс // Кенеш. – 2005. – № 3. – С. 44–47.

Мое открытие Абхазии // Долг. – 2008. – 4 сент. – С. 5 : фот.

Синмаськи Абхазилы // Кенеш. – 2008. – № 10. – С. 57–61 : фот.

Таяз арын шутэтски Канарын // Ӟечбур! – 2011. – 22 дек. – С. 4 : фот. цв. – (Дуннеез котыръяса).

Удмурт шунды ӝужалоз : кылбур // Удмурт дунне. – 2011. – 22 марта. – С. 7.

Флору Васильеву – 75 // МК в Ижевске. – 2009. – 18–25 февр. (№ 8). – С. 13 : фот.

Кырӟанъёсыз

Кузнецов П. Яратэ туннэ : "Кулэ ӧвол чебер кылъёс кулэм берам..." // Кенеш. – 2005. – № 3. – С. 109.

Кузнецов П. Сюлэмам ке инкуазь жобаське : "Сюлэмам ке инкуазь жобаське..." / // Даур (Ува). – 2005. – 27 мая.

Шкляева Р. И. Огнам дыръя : "Ой, кинлы сюлэмме усьтоно..." // Ашальчи. – 2009. – № 1. – С. 18.

Вормон марш : "Быдӟым ож, быдӟым война..." / гурзэ тупатъяз Марина Ходырева ; крезьгурез но кылъёсыз Серафима Пушина-Благининалэн // Кенеш. – 2010. – № 4. – С. 106.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.