Митрофанова Вероника Васильевна

Тӧлпери кадь шаплы, тыл кадь яркыт

Россиысь МЧС-лэн Удмурт Республикая валтӥсь управлениезлэн пресс-службаеныз та вакытэ кивалтэ шаркан нылкышно Вероника Митрофанова. Ас удысаз сюлмо тыршемез пусъемын «За пропаганду спасательного дела» медален, «Участнику ликвидации последствий ЧС» Россиысь МЧС-лэн гадьпусэныз но Россиысь МЧС-лэн Данъян грамотаосыныз.

Чидасьтэм сямылэсь курдаллязы воспитательёс но

— Анае Валентина Прокопьевна трос аръёс ӵоже Шаркан ёросысь Мувыр школаын покчи классъёсты дышетӥз, со сяна, крезьгуръя урокъёс нуиз. Атае Василий Артемьевич вань улытозяз совхозын тыршиз. Семьяямы куинь пинал будӥз. Мон — бадӟымез. Екатерина сузэре Ижысь К. Герд нимо гимназиын дышетэ, Владислав выны гуртысь школаын ужа.

Дышетӥсьлэн пиналыз ке но, пичи дыръям ик тӧлпери кадь вылӥськем: одӥг интыям пукыны чидасьтэм, котькытчы нырме чуртнась. Оло, соин но монэ нылпи садэ туж бер сётӥллям. Нош мукет ласянь учконо ке, кыкез ик песяйёсмы гуртамы улӥзы, лумбытэн соос дорын кунояй. Арлыдоос ма сярысь но ӧз вераське, пичиысен ик вань супыльтонъёсты тодыса будӥ. Нылпи садэ одӥг ар гинэ кылдӥз ветлыны. Отын туж тунсыко вылэм шуыса валай но, анай-атайме куаретӥ бер сётэмысьтызы.

Весь калык пӧлын вал бере, кыллы кисыям ӧй пыралля: я серекъятылӥ, я меӵкытъяй. Нош йыртэмамме тодыса, воспитательёс мынэсьтым курдаса гинэ улӥллям. Одӥг учырез туннэ но тодам возисько: нуназе изьыны кулэ вал, нош мон, ӝыны группаез люкаса, дорам нуиськем. Паймисько: сомында пичиослэсь ульчаетӥ мынэмзэс нокин синйылтымтэ. Мамае школаысь бертэм но чабкиськем, ӝӧк сьӧр тыр кунооссэ адӟыса. Ваньмес радэн султытӥз но берен садике нуиз. Отысь бертэме бере куаретӥз ук. Школаын дышетскон капчиен сётскиз. Пионер дружинаен кивалтӥ, комсомол огазеяськонлэн секретарез вал, пӧртэм предметъёсъя олимпиадаосы пыриськи. Со вакытэ классамы 27 мурт дышетскиз, куспамы одӥг пол но ӧм керетылэ. Дышетсконын сяна, спортын но бадӟымесь азинсконъёс басьтӥмы, ёросын ортчылӥсь ӵошатсконъёсы быдэс классэн ветлылӥмы. Мыным тужгес кельшылӥз вакчи яке кузь дистанциосы бызьылон, нош шоро-куспооссэ адӟемпотостэм карылӥ. Соин, дыр, сямы но сыӵегес ик: яке ваньзэ туж дыртыса лэсьтӥсько, яке лад-лад малпаськыса.

Улонэ удмурт кылэн герӟаськиз

Пичи дыръяз (шорысез).

Школаез йылпумъяса, анаелэн сюрестӥз вамыштыны малпай. Тунсыко потылӥз география. Но улонын мыным географ луыны ӧз кылды. УдГУ-э пырыкум, история предметэн «4» басьтӥ. Одӥг баллэ ӧз тырмы студентъёслэн радазы шедён понна. Со аре угось укыр трос медалистъёс вал. Вузэ пырыны быгатымтэме нырысь ик анае тодӥз. Малпай вал тышкаськоз шуыса, нош со ӝогак дӥсяськиз но монэ Дэбесэ нуиз. Педучилищее документъёсты уг куто ни ке но вал, шудэ вылэм на. Дэбесын улӥсь ӵыжы-выжые Галина Перевозчикова но юрттӥз. Озьы мон училищеысь покчи классъёсты дышетонъя факультетэ пыри.

Одӥг пыремен, дышетскы ни вылэм каньылля. Нош мон 3-тӥ курсысен визьмояськыны кутски. Удмурт кылъя экзаменлы дасяськоно, нош мыным но куд-ог эшъёсылы со мултэс потӥз. Анай кылын сотэк но вераськыны быгатӥськомы шуыса, удмуртлэсь куштӥськыны малпамы. Кӧтмы угось ӝожомылӥз: ми парта сьӧрын пукиськомы, нош ӟуч эшъёсмы ас уженызы вырылӥзы яке вазь доразы бертылӥзы. Кӧня ке кузя люкаським но директор доры заявление гожтыны вамыштӥмы. Приёмнойын пукыкумы, математикаен дышетӥсьмы Серафима Загребина пыриз. Ма дауртэммес валамез бере милемыз отысь туздыртыса лэзиз. Ар но ӝыны дышетсконды, пе, кылемын, оло, вань улонды удмурт кылэн герӟаськемын луоз, нош тӥ тодон-валан люкамдылы кирос пуктыны турттӥськоды. Уд но оске, Серафима Никитичналэн кылъёсыз улонын быдэсак зэмазы.

Педучилищеез йылпумъяме бере вордскем палъёсам бертӥ. Роное вамыштӥ но монэ пыдлось гуртэ ыстыны дасяськиллям. 15 иськем пыдын ветлонзэ тодэме бере Шаркан ёросысь ик пегӟи. Кытчы кариськыны паймемысьтым Якшур-Бӧдья ёросэ вамыштӥ. Удалтӥз: Селычка школае удмурт кылэз тодӥсь дышетӥсь кулэ вылэм.

Артистъёслэн семьяязы пумитазы ас нылзэс сямен

Дышетӥсьын ужан аръёсме ялан тодам вайисько: туж шулдыр улӥмы! Селычка школаын 4 ар гинэ ужай, нош дышетэм пиналъёсыным туннэ но пумиськылӥськомы. Гуртысь егитъёсын огкылысь улӥмы. Со аръёсы Селычкаысь клублэн ӧсъёсыз ӧз ик ворсаськылэ кадь. Дышетӥсьёслы пумит егитъёслэн командазы КВН-эн шудӥз. Та ужрадэз учкыны сьӧр гуртъёсын улӥсьёс но ветлылӥзы. Отӥяз тэшкылиос но, песянай-песятайёс но отчы пыриськылӥзы. Котькуд праздниклы бадӟым программа дасяськомы вал.

Селычка школае ми кык егит дышетӥсьёс вуимы. Гурт администрация улон инты висъяз. Ваньмыз радъяськиз, шуыны луоз. Мамаелэн но сюлмыз буйгаз кадь: уже интыяськи, Глазысь пединститутэ заочно амалэн дышетскыны пыри. Но бӧрысь анае индылыны кутскиз: одӥг арзэ ке но бызьытэк чида, пе, вал. Я, я шуыса буйгатыны выри ке но, улонын ваньмыз ӧчкарем кадь луыса кошкиз: сентябрь толэзе сессиысь бертӥ гинэ — эшме кураны лыктӥзы. Сюан шудӥзы, нош мон келясь ныл вал. Ӵапак со сюан ваньзэ сураз-пожаз — мон но туган кутӥ. Уд но оске: табере со эшеным кык кенъёс луимы.

Ижысь пияшелэн выжыосыз Шарканысь вылэм. Ӝыны ар но ӧз ортчы — монэ но куразы. Озьы 7-тӥ мартэ сюан шудӥмы, со аре ик Антонмы вордскиз. Озьы шеди мон шаерысьтымы нимо-дано артистъёслэн Июлия Васильевна но Анатолий Андреевич Митрофановъёслэн семьяязы. Та артистъёс сярысь кылэме-адӟеме гинэ вал. Школаын дышетскыкумы, удмурт спектакльёс учкыны ветлӥськом вал. Артистъёслэн улэм-вылэменызы соку ӧйгес тунсыкъяськылы. Кин тодэ, оло, тросгес тодысал ке соос сярысь, йӧно семьяе вамыштыны кепырасал но, дыр. Митрофановъёс монэ туж капчи пумитазы — асьсэ нылзэс сямен. Табере 15-тӥ арзэ валче улӥськомы.

Азьланяз гуртысь школаын ужаны ӧз кылды ни, городэ выжимы. Пимес садике сётэммы бере уже интыяськыны малпай. Ижысь 97-тӥ школае вамыштӥ, но нырысь аттестация, пе, ортчоно, 800 манет пала уждун сӥзизы. Кема малпаськеме бере ужаны ӧтизы «Нефтемаш» заводэ. Мон котькинэн вераськыны яратӥсько бере, асме секретарь удысын эскероно кариськи. Куинь ар заводын ужай, тырмыт уждун басьтӥ, нош сюлмы ялан калык пӧлы куриськылӥз. Таӵе мылкыдме шӧдыса ик, лэся, верасьёс шедизы — МЧС-ын, пе, пресс-служба усьтӥське, удмурт кылэз тодӥсьёсты куто. Буш киын мынонтэм вылысь «Нефтемашын» тылпулэсь утиськон амалъёс» статья гожтыса нуи.

Йырсиелэсь лыдзэ гинэ но эскеризы

Уже интыяськон понна военно-врачебной комиссиез ортчоно луоз, шуизы. Малпай вал — огшоры медосмотр, нош татын мугор вылысь котькуд пусэз, йырсилэсь лыдзэ гинэ но эскеризы кадь. Собере нимысьтыз комиссия визьме сыназ — удмурт но ӟуч кылъёсын вольыт вераськыны но гожъяськыны быгатэмме эскериз. Ярано коть, ваньмыз умой радъяськиз. Монэ уже кутӥзы. Таин валче пичи дыр малпанэ но ӝыныё быдэсмиз, шуыны луоз. Туж потэ вал военнойлы быземе, синмаськыса учкылӥ погон нуллӥсьёс шоры. Нош улонын чылкак мукет луыса кошкиз: кузпалы — водитель, нош мон — военной.

Пиосмуртъёс пӧлын ужано луоз шуыса, шумпотӥ но, сюлмаськи но. Котькинэн огкыл шедьтыны быгатӥсько бере, уже капчиен радъяськыны кулэ вал. Машина яке телефон номеръёсты капчиен вераны быгатылӥ, адямиослэсь тусбуйзэс но син азям возьылӥ, нош нимтулъёс ласянь шугъяськонъёсы кылдылӥзы. Нош пресс-службаын ужасьлы кивалтӥсьёслы нимын-тулын вазиськыны кулэ. Выль удысэ ужаны лыктэмме тодам вайисько ке, йырсиосы ик пештырско кадь. Управлениын 200 адями тырше, Ижын сяна, ёросъёсысь ёзъёсын ужасьёс вань на. Туж тунсыко потылӥз, быръем уже сюлмыя луиз. Одӥгзэ жалясько: школаез йылпумъяме бере ик тылпу кысӥсьёс доры вуоно вылэм, нош соку та удыс сярысь кылэме-адӟеме ик ӧй вал. Соин но, дыр, тылпу кысӥсьёс сярысь нырысетӥ иворме туж секытэн дасяй. Юрттӥз Анатолий Митрофанов. Ярано коть, ужан интыосмы кыдёкын ӧй вал. Нуназеян вискын удмурт текстме солы возьматъяны нуллӥ. Со куд-ог валамтэ интыоссэ чебергес берыктыны юрттылӥз, нош нуназе бере ӵошен «пӧраммес» эфирын лыдӟылӥ. Та понна атаймылы туж бадӟым тау кареме потэ, со ик юрттӥз кылме золгес волятыны.

Ышылэмме семьяосы уг шӧдо

М. Калашниковен артэ.

МЧС-ын ужасьёс ас тодэмзыя шутэтскыны, шаермылэн палэназ потаны уг быгато. Угось кышкыт учыръёс кылдыку, вакчи дыр куспын чаклам интые вуоно. Кылем арын Удмуртиез зуркатӥзы Пугачёвоын пуштылонъёс. Вань службаос тревогая султытэмын вал. Палэнэ ӧз кыле пресс-службаын ужасьёс но. Уйшоре 1 час котырын ми Пичи Пурга ёросын вал ни. Кӧшкемыт уй вал соку, мар адӟонэз чидамын отын улӥсьёс, син азе пуктыны ик кышкыт: музъем зурка, пуштылэм куара пелез вандэ, тани-тани йыр вылэ снарядъёс усёзы кадь. Со уе вань улонэ син азьтӥм ортчиз: семьяе, гуртэ, пичи дыры…

Ужмыя милемлы но ӵемысь тылпу кысонэ потано луэ. Адями сутскон учыр вань ке, уй-нунал шоры учкытэк, уже потӥськомы. Одӥг учыр туннэ ке но тодам лыктэ. Ноябрь толэзь вал соку, Ижысь одӥгаз ёросын, пе, «горд атас» кузёяське, быремъёс но вань. Огназ улӥсь воргорон юрт пуктэ вылэм, нош ачиз мунчояз улэм. Ӵапак мунчоез бордысен ик тылпу потэм. Милемлы шедьтоно вал кузёлэсь шӧйзэ. Вань сэрегпумъёсты пыр-поч эскеримы. Ӵын пушкын быдэс уй пала бугыръяськимы — пайдатэк. Ӵукна пал дорамы юртлэн кузёез вуиз но паймыса ик юа, мазэ сокем утчаськомы шуыса. Тонэ, шуиськомы. Соиз бакомиз: тӥ вуиды но мон бускельёсы доры кӧлыны кошки, шуэ. Ваньмы могӟимы: оло серекъялод, оло куаретод. Но шумпотӥмы: адями улэп кылем. Со ӵукна ваньмы капчи мылкыдын дорамы бертӥмы, нош ӵуказеяз шутэтскон нунал вал. 10 час котырын монэ сайкатӥз телефон. Эше вылэм, ма, пе, такудняла кӧлӥськод? Быдэс уй тылпу кысонын ужано луиз, шуисько. Вераськеммес кузпалы кылзӥз но пӧяськисько кожаз. Озьы куд-ог дыръя уже кошкылэмме уг но шӧдо ни семьяосы. Солдат сямен ӝогак но шыпытак дӥсяськыны дыши. Шукрес учыр луыку, милемлы пӧсь интые мыныны 40 минут, нош шутэтскон нуналъёсы 1 час сётӥське.

Удмуртиысь спасательёсты вылӥ дунъяло

Туннэ шаерамы пожарнойёс 2 сюрс 500 пала. Со тырмыт ӧвӧл. Котькуд гуртын тылпу кысонъя частьёс ӧвӧл бере, соослы юртто ини доброволецъёс. Шумпотоно, берло дыре таослэн лыдзы йылэ. Тылпу кысӥсьёс «атасэз» буйгатыны городын 10 минут, ёросъёсын 20 минут ӵоже вуыны кулэ. Машинаен ворттылӥсьёслэн лыдзы йылэмен, соослы шуггес луэ пӧсь интыосы вуыны. Гуртъёсын улӥсьёсты но сюресъёс ик сюлмаськыто: толалтэ лымызы уг сузяськы, нош сӥзьыл-тулыс зоръёс люкето. Кемалась ик ӧвӧл Якшур-Бӧдья ёросысь Угловая станциын тылпу вал. Уг ваты: ёросысь тылпу кысӥсьёс 40 минутсэс сюрес вылэ быдтӥзы. Та дыр ӵоже одӥг юрт гинэ ӧвӧл, быдэс ульча, гурт пеньлы пӧрмыны быгатысал. Тылпу кысӥсьёслы юрттӥзы доброволецъёс. Соос татын куинь кузя, мотопомпазы вань. Юртэз утизы. Бен, гуртъёсысь ас мылкыд карыса ужасьёслы коньдон уг тыриськы, но со понна куд-ог льготаос вань.

Арысь аре МЧС-лэн Удмурт Республикая валтӥсь управлениез выль вормонъёс басьтэ. Кылем арын Приволжск улосын тужгес устоез управление луимы. Кемалась ик ӧвӧл Москваын ортчем адӟытонысь зарни медален бертӥмы. Удмуртиысь спасательёс возьматӥзы «Редуктор» заводын лэсьтэм роботэз. Пультэн ужась машина тылэ но пыроз, огнетушитель но кияз кутоз. Озьы ик возьматэмын вал пилоттэк лобась самолётъёсмы.

Шаерысьтымы тылпу кысӥсьёс но спасательёс Россиысь мукет улосъёсы но вуыло. 2010-тӥ арын тылпу кысӥсьёс ужазы Нижний Новгород палъёсын, 2011-тӥ арын водолазъёс пыриськизы «Булгария» теплоходысь выем адямиосты утчанэ. Удмуртиысь спасательёслэсь ужамзэс котькытын вылӥ дунъяло.

Погонэн адямиос вӧзын йӧногес луэм потэ

Ужлэсь шутэтскисько инкуазьын.

Воргоронъёс пӧлын ужасько бере, асме утялтон сярысь но уг вунэтӥськы. Ма, кыӵе кышномуртлэн чебергес но йӧногес адскемез уз поты погонэн адямиос вӧзын?! Пичи дыръям ик чебер дӥсяськыны яратылӥ. Мынам анае ас вакытаз котьмалы усточи вал: пужъятӥськиз, керттӥськиз, чильпаськиз, вуриськиз. Милемыз со котьку но чебер дӥсяса нуллӥз. Анаймылэн быгатонлыкъёсыз милемлы но паласькизы, шӧдске. Пичиысен ик киужлы дышимы. Ми понна тужгес секытэз вал модалэн куронъёсызлы тупась журнал шедьтыны. Шарканэ мынӥсьёсты тодӥськомы ке вал, одно ик выль журнал басьтыны косылӥмы. Табере анаймылы тау карисько вылтуслы бадӟым саклык висъяны дышетэмез понна. Калык пӧлы потэмлэсь азьло синучкон шоры учкыны косэ вал.

Воргорон коллективын ужасько, ма, дорам но тросгес воргоронъёс уло. Соин ик ужан нуналъёс дыръя часлы вазьгес султӥсько. Со дыр куспын йырсиме тупатӥсько, буяськисько, сиён пӧрасько. Мынам малпамея, кышномурт ноку но кӧлэме кыли шуыса вераны кулэ ӧвӧл. Котькыӵе учырын солы ялан формаын луоно. Бере кылисьёсты уг яратӥськы. Нош марысь-мар кӧлэме кыли ке, погмаськем ымнырын но лусьтро йырсиосын ураме уг поты — возьыт. Сыӵе дыръя 5-10 минутлы уже беромо, но калык пӧлы пиштӥсь тусын возьматско.

Со сяна, бадӟым саклык висъясько дӥсьлы но пыдкуклы. Одӥг дӥсен кык нунал ветло ке, сыӵе дыръя французъёслэн, пе, валэктонзы одӥг — куноын кӧлӥм. Соин ик мон но дӥськутме вошъяны тыршисько. Со юрттэ котьку чылкыт луыны. Ваньмон дыръям сад-бакчаямы дыртӥсько, ужлэсь палэнэгес пегӟисько. Уг яратӥськы телефон пыр кема вераськыны. Отпускме котьку но кузпалэным ӵош ортчытӥсько. Куд-ог нылкышноос паймо: быдэс ар, пе, валче улӥськоды, эшшо ке ӵошен шутэтскыны? Таӵе вераськонъёс мыным валантэм пото. Угось семьяе мынам улонам бадӟым инты басьтэ.

Источник:

Митрофанова, В. В. Тӧлпери кадь шаплы, тыл кадь яркыт / В. В. Митрофанова ; вераськиз Валентина Емельянова // Удмурт дунне. - 2012. - 20 июля. - С. 6, 7 : фот. - (Удмурт кизилиос)

За предоставление материала выражаем огромную благодарность редакции газеты "Удмурт дунне"