Мякишева Людмила Степановна

Сьӧдунэз кортнась

Республикаысьтымы сьӧдун (рахит) висён чигназ шуыса, тау карыны кулэ профессорлы, медицина наукаосъя докторлы, Удмуртиысь дано врачлы Людмила Степановна Мякишевалы. Ӵапак та кышномурт ас вакытаз кивалтӥз Ижысь мединститутысь нылпи висёнъёсъя кафедраен, нюръяськиз сьӧдун но со выллем черъёсын, наукая 200-лэсь уно ужъёс гожтӥз.

Чалмиз домра

Людмила Мякишева (ныл фамилиез Чиркова) вордӥськиз 1926-тӥ арын Ижын. Но татын будыны но юнманы солы ӧз сётэ. Атайзэ, химияя но биологияя дышетӥсез, ыстӥзы Глазовысь педтехникумен кивалтыны. Бадӟым семьяеныз кенешыса ик ӧз улы Степан Алексеевич. Библиотекаын ужась кышноез сярысь ӧз сюлмаськы — палэнын но ассэ шедьтоз. Нош куинь нылпиосызлы Глазовын котыр ласянь умойгес луоз: омыр отын чылкытгес, удмурт кылынызы но вольытгес вераськыны дышозы. Берлоез понна Степан Алексеевич уката зол сюлмаськиз. Ачиз уго таш-таш удмурт выжыысь.

Жаляса верано, Степан Чирковлы кема улыны кылдымтэ. Сое басьтӥзы Быдӟым оже. Фронтэ келякузы, быдэс семьяез шӧдӥз: доразы уз берытскы ни таид. Ма, кияз пыӵал тӥрлык ноку кутылымтэ. Пудоез вандонэ гинэ но пыриськылэмын ӧвӧл — сюлэмыз котьмае жалясь вал. Доразы кылдытӥз семья ансамбль — пичиез но, бадӟымез но ӝытъёсы киязы кутылӥзы крезьгуръя инструментъёс: гитара, домра, барабан, мандолина, баян. Мылкыдзы ӧръяськыса, ваньзы ӵошен кырӟаллязы. Степан Алексеевич котьку шуылӥз: тужгес секыт вакытэ сюлэмез небӟытоз но буйгатоз крезьгур гинэ.

Соин ик таӵе адямиез ыштэм сярысь фронтысь шимес ивор вуэм бере Люда воксё гуньдӥз: кызьы табере улозы? Со ӧз кышка, пичиысен колхозын ужано луоз шуыса. Солэсь ортчыт — семьязэс сюдон понна ачиз куриськылӥз турнаны но, картошка октыны но. Солы маза ӧз сётылы мукетыз — семьязэс бурдъясь но азьлань валтӥсь атайзы бордазы ноку уз кариськы ни. Госпитальын сое утьыны ӧз быгатэ. Глазов пала выжтыны курыса, анаез бызьылӥз ик — толыкез ӧйлась. Соку тӥни Люда малпаз эмъясь луыны. Ма, бубизлэн кулэмез гинэ та мылкыдзэ ӧз бугырты. Огпол Ижысь Красной ульчаысь нылпи больницае пыраны шедьтӥз. Куинь-ньыль аресъем пичиос выж вылтӥ кӧт вылазы нумыръёс кадь нюжтӥськыса ветло. Суйёссы но, пыдъёссы но пумемын. Йырзэс но чыртызы мырдэм возе. Ярам, одӥг-кык нылпи луысал ке! Ог куатьтон кузя! Куд-огез воксё уг султылы ни. Осто, мар таосын? Людмила Степановна бӧрысьгес тодӥз: полиомиелит. Кышкыт вирус, мугоре сюрыса, виымозь сузьтӥське, лулсэръёсты кырме но адями пыдъёссэ-киоссэ вырӟытъямысь дугдэ. Отӥяз вирус шокан ёзвиосты но ӵокта, сюлэмез дугдытэ. Соин ик ваньмыз сямен черламъёс куло. Красной урамысь больницае сюрем пичиос но быризы. Нош кӧняез эмъяськон юртэ вуытэк ик кылиз! Со вакытэ уго та черлэсь вакцина малпамын ӧй вал на.

Таӵе шимес суредэз адӟыса, Людалэн синвуосыз ик пызьыразы. Соку со аслыз ачиз шуиз: югдурез тупатоно!

Комакъёсын артэ

Педиатр луиз шуыса, Людмила Степановна огпол но ӧз жаля. Зэм, Ижысь мединститутын дышетскыкуз, сютэм пукон вакытъёсаз, синвузэ огпол гинэ ӧз кисьты. 1944-тӥ-1945-тӥ аръёсы институтлэн юртэз но общежитиез ӧз шунтӥське. Чиньыоссы медаз кынме шуыса, пӧзьыоссэс куятэк ик визь люказы. Чернилазы но кынмылӥз, ява. Комакъёс, шуныт инты утчаса, уйёсы шобрет улазы ӵемысь лушкем интыяськыло вал. Студентъёс сайкало но, быжоос вӧзазы пырс-пырс шокаса изё. Озьы ке но нылмурт ӧз чигна. Дышетскиз туж усто. Соин ик Людмилаез аспирантурае но кыльыны куризы. Отӥяз Людмила Степановналы оскизы нылпи висёнъёсъя кафедраез валтыны. Азяз бадӟым курон пуктӥзы: дасяно кадръёс. Нялтас вераса, Людмила Мякишева наукаосъя 16 кандидат но 2 доктор дасяз. Котьма ке но ачиз азяз мукет ужпум пуктӥз: нылпи висёнъёсты кулэстоно, соосын нюръяськыны амалъёс утчано.

Ӵапак Людмила Степановна бызьылэмен-сюлмаськемен, Удмуртиын полиомиелит пумиськылэмысь дугдӥз. Кӧня пол со гуртъёсы поталляз валэктон ужен, та висёнлэсь одно ик вакцина пуктоно шуыса. Кӧня пол пичиосты учкылӥз. Ӵапак та нылкышнолэн сак синмызлы луыса сокугес гинэ черламъёсты ӝегатскытэк выдтылӥзы больницае. Уноез уго нырысь малпалляз: пиналзы кынманы шедьтӥз. Мугорзы шуак ӟырда, кизьнылыны кутско, ӟигарзы быре, бератаз кӧтсы чутыръяны ӧдъя, йырзы висе, сюрлызы вӧсь луэ, суй-пыдъёссы юскисько. Та нылкышно бералтыны быгатӥз полиомиелит шоры учконэз: эмъяны сое туж шуг, но луэ!

Ӟеч тыршемзэ адӟыса, Людмила Мякишевалы оскизы Ижысь 2 номеро нылпи больницаен кивалтыны. Солэн тыршеменыз, Удмуртиын сьӧдун висён но кулэсмиз. Анай-атайёс нылпиоссэс пичиысен чакланы кутскизы, та чер медаз лякиськы шуыса.

— 1970-тӥ аръёсы ваньмызлэн пичиослэн сьӧдун тодметъёссы вал, — тодаз вае кышномурт. — Йырзы квадрат выллем сэрего но бадӟым, киоссы купырмемын, пыд пыдэсъёссы табань кадесь, сюрлызы кырыжа. Анай-атайёс нырысь-валысь ӧз оскылэ, нылпиоссылы Д витамин уг тырмы шуыса. Чорыг вӧй сётъяны косэме шоры но кырыжгес учкылӥзы. Но бератаз ваньзы валазы. Лыдъясько: анай нылпизэ одно ик нонтыны кулэ ичизэ 1 аресозь. Пӧртэм сокъёс, пунемъёс но ӝукъёс сётъяны кутсконо 6 толэзьысен. Сьӧдун лякиськыны ӧдъя нырысь толэзьёсысен ик. Пичиослэн вылтырзы пӧся, мугорзы лыдыны кутске. Корманы уг быгато бере, йырзэс ялан солань-талань вырӟытъяны выро. Соин ик йырпыдэссы пилеш кыле, лыэз но небӟе. Та нырысетӥ тодметъёс шоры киын шонтӥд ке, тод: пиналыд весяклы инвалид кылёз.

Туннэ педиатръёс нылпи ваем кышномуртъёсты дышето ни: пиналыныды ӵемгес урамын юмшалэ, Д витамин сётъялэ. Беромиды ке, тэшкылилэн плоскостопиез но, бадӟымам йырыз но уз быре ни.

Сӥзёнъёслы уг оскы

Нылкышно гань-гань пуконэз ӧз тодылы. Огзэ секыт юанэз сэрттэ-пертче но соку ик мукетыз борды басьтӥське. Кылсярысь, со туж кема йырзэ тӥяз: малы Удмуртиын тросэз адямиос зобенызы (щитовидка) курадӟо? Эскеронъёс ортчытыны нимысьтыз группа кылдытӥз. Шараяськиз: Удмурт шаерын йод уг тырмы музъемын но, вуын но, сиёнын но. Таин валче зоб бадӟыма. Пичиос умой будэмысь дугдо, лябесь луо визь ласянь но. Кӧня пол куаретылӥз со кивалтӥсьёслы: йодэн пыӵатэм сылал гинэ тырмыт ӧвӧл. Мугоре йодлэсь сетка лэсьтэмлэн но толыкез ӧвӧл. Соосыз оскытӥзы: нянез но йодэн пыӵатэм тысьлэсь пыжиськомы. Нырысь-валысь калыклэсь тазалыксэ озьы юнматыны выризы ик. Но бератаз эскеронъёссы возьматӥзы: колдые номыр но сыӵе-таӵезэ уг поно. Соин ик Людмила Степановна уг оскы сӥзёнъёслы. Кыл вылын оломар но вераны луэ, нош наукаез уд алда. Огзэ ӵектэ: арлы огпол ке но больницаын быдэсак эскериськоно.

Уг оскы Людмила Степановна Инмарлы но, сое ас вакытаз чукынӥзы ке но. Туж секыт висисьёсыз одӥг-ог син куспын юнмаллязы ке но, талы но со медицина ласянь валэктон котьку шедьтылэ. Кылсярысь, тани мае тодаз вае:

— Огпол больницае вуттӥзы ревматизмен курадӟись нылашез. Та чер сюлэмез «кортна». Республикаысьтымы 3 процентэз нылпиос та черен ваче син пумисько стрептококк инфекциен нюръяськемзы бере. Ревматизм сюлэмлы гань-гань жугиськыны уг сёты: я тромб, я аритмия, я астма кылдэ. Кырмиз ке, шонертӥськемед но уз луы ни. Сыӵеен ик вуттӥзы пичи дыдыез. Антибиотикъёсын эмъямлэн пайдаез уг шӧдӥськы. Тӧрна ни. Мар кароно? Кӧня бышкод на сое? Оло, лэзёно дораз? Оло, уз чида ни нюръяськыны? Озьы ке, берпум нуналъёссэ ӵыжы-выжыосыз пӧлын мед ортчытоз. Лэзим. Кӧня ке дыр улыса, вуэ, ачиз вамышъя. Пыдъёсысьтыз тӧрнамез но ортчем. Анай-атайёсыз но, куд-ог мукетъёсыз но вераны выризы: Инмар юрттӥз. Но мон тодӥсько ук: ревматизмлэн котькыӵе вакытэз луэ — я золгес кырме, я лэзе. Ӵапак сюлэмзэ «лэзем» вакытаз ик вуиз нылаш. Тужгес секыт вакытсэ чидаз, ӧз сётскы. Висён лябӟем дыръяз калык амалъёсын эмъяськем на. Соин ик бурмиз.

Вӧсь бурме

Та но трос мукет усьтонъёсыз понна Людмила Мякишеваез вань эмъясьёс но, висисьёс но ки йылазы нуллыны дасесь вал. Ӵапак со уго кыткыны быгатӥз ревматизмез. Ӝушенызы но сюлэнызы курадӟисьёс сярысь но юн сюлмаськиз. Шараяз: Уваысь минеральной вуэз ӵемгес юоно, гастрит выллем черъёс бордэ медаз биниське шуыса. Ӵапак отысь вуын гинэ сыӵе висёнъёсын нюръяськись минералъёсыз вань. Та усьтонэз понна со луиз Удмуртиысь Кун премилэн лауреатэз.

Вутскылӥз мукет удысъёсы но. Людмила Мякишева ас вакытаз горсоветлэн депутатэз вал, КПСС-лэн горкомезлэн ёзчиез луылӥз, республикаысьтымы нылкышно кенешен кивалтӥз, Удмуртиысь Педиатръёслэсь огазеяськонзэс валтӥз. Шумпотыны кулэ кадь: дунъяло. Но котькуд нылкышно понна семья но матысь адямиосыд сярысь сюлмаськон котьку нырысетӥ интыын сылэ. Нош Людмила Степановналы та ласянь нырысь-валысь ӧзгес удалты.

— Шорам синмаськыса учкылӥсьёсыз вал, школаын дышетскыкум ик, — лулӟе Мякишева. — Быдӟым ож дыръя Ленинградысь но Москваысь пиналъёсты Глазове вайизы. Зэм, москваос гуртоосты отӥгес карылӥзы. Милемын вераськемзы но ӧз потылы. Асьсэос уго чебер дӥсяськемын, визьмоесь, шаплыесь. Нош Ленинградысь вуэмъёс шоры асьмеос жаляса учкылӥмы. Тышкам пуныос кадь: синъёссэс ӝутъяны уг дӥсьто, дӥсьсы кесяськыса быремын… Но таос тужгес мур валаллязы гуртоослэсь улонзэс. Огназы кылем кышноослы но юртъер котыразы юрттӥськыны вуылӥзы. Ӵапак соос пӧлысь одӥгез ик синмаськыны шедьтэм мыным. Но мон аслым «яратон» бырйи ни вал — Ижысь мединститут. Со кошкиз Пермьысь механикая институтэ. Монэ но сьӧраз ӧте вал. Ӧй чигна. Оло, ӵапак сое вӧсь кареме ик берытскиз аслым но.

Институтын 200 студент пӧлысь 9-эз гинэ пиос вал. Таос но костыльёсын. Нош егит мылкыд яратэмзэс но синмаськемез вите. Оло, соин но Людмила Степановна, егит дышетӥсен тодматскыса, малпаз: татэк улыны уг быгаты. Сюан шудӥзы. Нылзы вордӥськиз гинэ, картсэ ыстӥзы уйпал ёросэ колхозэн кивалтыны.

— Мон соку аспирантураын дышетскисько на вал, — тодаз вае Мякишева. — Кузпалы мынэсьтым юаса ик ӧз улы — ӝутӥськиз но кошкиз. Малпаз, вылды: сыӵе ик капчиен ишкалскыса, сьӧраз мон но мыно. Нош мон ӧй быгаты ваньзэ шуак куштыны. Ма, кызьы аспирантураез аналтом? Атаелэсь фронтын быремзэ малпаса, кыл сётӥ ук зэмос эмъясь луыны! Наукаен вырыны, пичиосты эмъяны — льӧль малпанэ ук! Пумозяз дышетско но картэ борды итӥсько, кожай. Кожась валэз сюлоен шукко, шуо. Шуккизы монэ но. Кӧня ке ар нимаз улытозямы, картэ мукет семья шедьтӥз. Пиосмурт огназ улыны дышемын ӧвӧл уго: сое мед сюдозы, мед дӥсялозы, мед мусоялозы. Бӧрдыса ик шузимо ни кожасько вал. Ӵогем курег кадь йырме но ӝутъяны ӟигары ӧй вал. Но анае буйгатӥз: вӧсед бурмоз ай, нылыд сярысь малпаськы.

Азьвыл картэлэн выль семьяяз но вордӥськизы на нылпиосыз. Улонзэс тарканы огпол но ӧй вырылы. Пумиськон но соин ӧй утча ни. Лэзи картме сюлмысьтым. Ачиз но оло возьдаськеменыз, оло ассэ янгышен шӧдэменыз син азям ӧз возьматъяськылы. Ӧй но быгатысал, дыр, соин ваче кымес пумиськыны — куалекъяса бӧрдыны кутскысал. Зэм, вал асме карган вакытъёс, малы колхозэ сьӧраз соку ик ӧй мыны шуыса. Мынысал ке, оло, семьяме утьыны пӧрмытысал. Но гуртэ сюрыса, мон ноку ӧй быгатысал тамында ужпумез пертчыны. Наука сярысь, оло, воксё вунэтоно луысалыз. Гуртын уго нылкышно ужзэ кыкетӥ интые выжтыны кулэ семьязэ но юртъер котырзэ чылкытын возён понна. Но туннэ мон уг жаляськы ни, сьӧраз ӧй дырты шуыса. Огез гинэ сюлэмме али ке но вандэ: азьвыл картэ юыны но кыскыны кутскем. Монэн улыкуз, та урод сямъёсын ӧз кушласькылы огпол но.

Тэк пуконэз уг тоды

Людмила Степановна картсэ сюлмысьтыз лэзи шуэ ке но, нырысь-валысь дораз но бертэмез уг поты вал. Уж пӧлы выйыса, кайгуэзлэсь пегӟылӥз. Шудзэ со шедьтӥз 1962-тӥ арын гинэ, картэныз люкиськемез бере 7 ар ортчыса. Эшез дораз ӧтиз Выль арез пумитаны. Картэз военной, парашютэн тэтчыкуз, бырыны шедиз. Нылкышноез бурдъян понна ик Людмила Степановна куное дыртӥз. Ӵапак отчы ик пыриз со бырем военнойлэн агаез. Таиз но офицер — запасысь капитан. Чебер, ӝужыт. Ог-огзы борды кыстӥськемзэс валатэк ик кылизы. Людмила Степановна огпол сутскиз ни ке но вал, выль семья кылдытыны ӧз курда. Дыдыез но, воргорон но ог-огзэс ӝог валазы. Людмилаен Виктор эшшо ныл вайизы на. Зэм, нылкышно фамилизэ азьвыл картэзлэсь ик кельтӥз — Мякишева. Но Виктор Николаевич кӧтсэ ӝож ӧз кары.

Зол-зол керетэмзы но кузпалъёслэн ӧвӧл. Картэз кык ареслы егитгес шуыса, Людмила Степановна улытозязы огпол но ӧз шӧдылы. Солэсь ортчыт — Виктор, пе, мынэсьтым вазьгес пересьме кадь. Герӟа нылкышно тае дунне шоры учконэн но сое вань сюлмысь шӧдыны быгатонэн. Людмила Степановна уго котьку капчи мылкыдо, кырӟаны-вераны быгатӥсь. Нош Виктор Степанович та ласянь кӧсытгес адями.

Бадӟымез нылзы инженер. Улэ Москваын. Пичиез — терапевт, медицина наукаосъя кандидат. Людмилалэн но Викторлэн туннэ кык внуксы но 1 правнуксы. Ӵапак таослэн улонэнызы улэ туннэ Людмила Степановна. 79 аресозь тыршиз со кафедраын. Отчыозь тазалыкез вылэ ӧз ӝожтӥськылы. Ма, висьыны дырыз но ӧй вал. Уж адямиез кужмо, чидась каре, шуэ со. Тани 7-тӥ арзэ наукаен уг выры, нылпиосты уг эмъя ни но, пыдъёсыз но кылзӥськемысь дугдӥзыгес. Озьы ке но сад-бакчаяз берганы дыр шедьтэ на. Воксё номыр но ӧй ужа ни ке, гань-гань кариськи ке, тазалыке ӝоггес куашкалоз. Мон, пе, дышемын ӧвӧл тэк пукыны.

Источник:

Мякишева Л. С. Сьӧдунэз кортнась / Л. С. Мякишева ; беседовала Е. Сараматова // Удмурт дунне. - 2012. - 10 авг. - С. 6, 11 : фот. - (Удмурт кизилиос)

За предоставление материала выражаем огромную благодарность редакции газеты "Удмурт дунне"