Басов Пётр Сергеевич

Инвисъёс усьтӥсько мынӥсьлы

Басов П.С.

Пётр Сергеевич Басов — Кун Кенешысь Наукая, дышетонъя, культурая, нациосын но егитъёсын ужан политикая но спортъя ялан ужась комиссилэн кивалтӥсезлэн воштӥсез. Дышетскемезъя — физкультуралы дышетӥсь, юрист. Улонэз шӧдэмезъя — кылбурчи, философ. - Пётр Сергеевич, кинлэсь гинэ тӥ сярысь уд юаськы, ваньзы пусъё: солэн котькуд ужпумъя аслаз малпанэз вань. Пичи дырысеныды ик сыӵе вал-а?

- Мынам улонэ висэн-висэн ортче кадь потэ. Улӥськод-улӥськод, собере шуак кыӵе ке учыр яке кытысь ке лыктэм малпан усьтэ кадь выль инвисъёсты. Котькуд адямилэн аслаз улонэз бере, улон шоры учконэз но пӧртэм луыны быгатэ. Мон аслэсьтым малпанъёсме уг ватӥськы, мукетъёслэнэн со уг тупа ке но.

Вордӥськи Пичи Пурга ёросысь Пуныгуртын. Тодӥсько на, гуртамы бадӟым ульча но пичи ульча вал. Мыным, пичи ульчаын улӥсь пияшлы, бадӟым ульча воксё мукет дунне кадь потылӥз. Отчы нырысьсэ вуылэме бере дуннеез валанэ паськытаз. Улонын озьы луэ ни: адями будэмъяз аслаз коркаез дорысь ялан кыдёкегес кошке, соин валче дуннеез но воштӥське.

Гуртамы со вакытэ 25 Петыръёс вал. 1-2 коркаез куспатыса, одно ик кин ке Петыр нимын луоз. Мыным но та нимез сётӥллям, дун-чылкыт Павеллэн но Пётрлэн нуналзы бере, 13-тӥ июле, вордӥськи шуыса.

Атае лесникын ужаз, собере лэсьтӥськись вал, коркамес ачиз пуктӥз. Огвакытэ туж ёрмыса улӥллям, трос пудо вордыны тыршиллям. Мемее монэ дорын ик вордэм, пудоез утялтыны нокинлы луоз шуыса, больницае мынымтэ. Монэ ки вылаз пересь мемеймы кутэм.

Мемее Пуныгуртысь фермаын ужаз. Монэ, пичи макеез, сьӧраз нуллӥз. Паймисько: ферма кузя отчы-татчы бызьылыса, кызьы номыр луиськымтэ меда? Чаклась-марась ӧй вал, силос гуэ но усьыны луэ вал ук… Тодам на: дӧдьыосын кыед потто. Нош мон, со жоб вылэ ик пуксьыса, ворттылӥсько. Соку мыным 2-3 арес вал. Шуак асме ачим палэнысен адӟи кадь. Бертӥм пальтое копак курмемын. Сыӵе возьыт луиз! Лымы вылэ выдӥ, ну ӵушылыны вырисько. Со учыр аслам пичи улонэ шоры бадӟым синъёсын учкем кадь луиз.

- Малпан кылдэ, пичи дыръяды тӥ ас югдады, эрико будӥды. Нош школа туж ӵемысь со эрикез эгеса.

- Школаын удмурт кылъя урокъёс шуген сётӥськизы. «Кыкъёс» но басьяме вал. Оломалы причастной, деепричастной оборотъёсты удмурт сямен ӧй валалля. Бадӟымгес будэме бере ми улыны Уром гуртэ выжим. Отысь школаын ӟуч сямен гинэ дышетӥзы ни. Мукет удмурт гуртъёслэсь Уром трослы висъяськиз. Со чугун сюрес вылын станция луыса кылдэмын бере, калыкез но отын — лыктэмъёс. Гуртлэн аслаз пуштросэз, лулыз ӧзгес шӧдӥськы.

Уромысь школаын жугемзы но вань. Озьы ке но пумен асме пуктыны быгатӥ спортэз гажан пыр. Туж яратӥсько вал футболэн, хоккеен шудыны. Спорт пыр ик школаын данэ будӥз.

Дышетски ӟеч. Но 8-тӥ классозь — марлы дышетскемме умой-умой валатэк. Йырам маке со пыӵалляз ик, но пуштросэз сярысь ӧй малпаськылы. 8-тӥ классын экзаменъёслы дасяськыны кутски но, нош ик выль инвисъёс усьтӥськизы. Геометрия, алгебра… Ваньмыз сыӵе тунсыко вылэм! Дышетсконме ӟеч йылпумъяй. Азьланезлы но тодон-валан люкан мылкыды бадӟым вал.

- Но малы ке физкультурая дышетӥсь луыны малпады…

- Спортэз туж гажалляй. Милям Пуныгуртамы Кузнецовъёслэн семьязы вал, спортэн туж выризы. (Одӥгез братсы, Виктор, берлогес «Сюрес» автошкола кылдытӥз.) Соослэсь адӟем карылӥ. Нюлэскы мыныса, ачим ик кор вайылӥ, турникъёс лэсьяй. Но дядяй физрук луо шуэмелы пумит луиз: мын, пе, юристэ. Егит дыръя анай-атайлэсь кылзэм уг поты ук, эшшо ке сыӵе ӝотрак верало ке. Соку аслэсьтымзэ куасалтӥ: физрук луо но тӥни! Малпалляй, нылпиосын зэмос профессионал сямен ужало, вань тодэм-быгатэмме сёто. Но гуртын спортзал ӧвӧл, школалэн липетэз вия, оборудование ӧвӧл, уксё ӧвӧл… Нуналлы быдэ сыӵе шуг-секытъёсын пумиськыса, нылпиосты зэмос спортэ кыскон понна луонлыкъёсы ӧвӧл шуыса, мылкыды пуксиз. Ӵапак со вакытэ монэ Уром ОПХ-ысь комсомоллэн комитетэзлэн секретарез каризы. Нош бӧрысьгес — комсомоллэн Пичи Пурга райкомезлэн орготделэныз кивалтӥсь. Ялан калыкен ужано. Огласянь, туж тунсыко, мукет ласянь, кыл кутонэз но ӧжыт ӧй вал.

Али Кун Кенешын уже туж матын азьвыл комсомолын ужелы. 30 ар ортчыса, мон нош ик вуи кадь азьвыл лёгам сюресъёсы вылэ, соку люкам тодон-валанэ, быгатонлыке али выльысь юрттэ.

- 1990-тӥ аръёсы партия куашкам бере тросэз солэсь палэнскыны тыршизы, малпанъёссэс чутрак воштӥзы. Нош тӥ али но коммунистъёслы дурбасьтӥськоды. Малы?

- Ваньмыз сыӵе огшоры луысал ке… Совето вакытъёсы тырмымтэосты адӟытэк мон ӧй улы. Шӧдӥське вал: партия улонлэсь бере кыле. Ваньмыз куашка, кунмы шуге-леке вуэмын, но югдурез тупатон сярысь партия уг сюлмаськы. Ваньзэ тае адӟыны мон ӧй ни чида, коммунистысь потоно кариськи. Озьы партия быремлэсь азьло ик ай партбилетме сётӥ.

Райкомын ужакум, Испание ветлӥ. Но кунсьӧры потам бере сюлэмам бугыръяськись малпанъёс туннэ но, оло, маза уг сёто. Шуом, совето вакытъёсы учкиськод тон телевизор. Отын — кино, чебер дунне. Учкиськод укно сьӧры — сюрес ӧвӧл, дэри. Испание вуи, самолётысь потӥ. Отчы учкисько — кино, татчы учкисько — кино. Ма, кызьы озьы, малпасько. Милемлы воксё мукет сямен вераллязы ук!

Кунсьӧрысь бертэме бере выльысь асьме улонлы дышыны секыт вал. Но асьмеос но озьы ик улыны быгатӥськом ук! Ог-огмы шоры учконмес гинэ воштоно, кунмес гажано, ог-огмес гажано. Семьяын гинэ но ваньмыз ог-огдэ гажан бордысь потэ ук. Гажанэд ӧвӧл ке, кусып тупатыны уд быгаты.

Пушкам азьвыл но ваче пумит луись мылкыдъёс улӥзы. Дядяе, мемее Инмарлы туж оско вал. Дядяе ӵукна но, ӝыт но сиськон азьын молитва лыдӟылӥз. Школаын мынэсьтым юазы: Инмарлы оскиськод-а? Та юанлы валэктон сётыны туж секыт вал. Оскисьёс шоры соку кырыж учкылӥзы, серем карылӥзы. Мон шуи: уг оскиськы. Нош сюлэмам-лулам воксё мукетыз ук! Огшоры гинэ верай, но со дырысен пушкам асэным тупамысь дугдӥ.

90-тӥ аръёслэн пумазы «Единство» партия кылдэм бере солэн радъёсаз пыри. Но лэчыт вераськемысьтым, лэся, азьпал радъёсысь монэ палэнтӥзы. Собере ачиз но партия быриз. Туннэ нуналлы одӥгаз но партие уг пыриськы. Огвакытэ дурбасьтылӥ «Справедливой Россилэн» мылкыдъёсызлы, али дурбасьтӥсько КПРФ-лы. Угось туннэ нуналлы солэн малпанъёсыз мыным тужгес матын. Кызьы шуиз вал Виктор Черномырдин, кыӵе гинэ партия ум кылдытӥське, асьмелэн пӧрме КПСС.

Зэм, луэ милям ваньмыз умой шуыса улыны. Но тырмымтэосты, шуг-секытъёсты шара вераны, соосты тупатон бордын зэмзэ но ужаны ӧм ке кутске, кунмы куашканы быгатоз. Партиос вискын но зэмос конкуренция луыны кулэ. Властьлэн партиез медаз азгынмы шуыса, ялан пыдбераз лёгаськисьёс мед луозы. Комсомолын ужамме тодам вайисько ке, отын трос умоез вал. Кылсярысь, азьвыл собраниосын ӟечсэ гинэ ӧз вераллялэ, одно ик шекъёсты но шараяны тыршылӥзы. Интыяз критика туж кулэ луэ. Уродзэ ватыса улыны тыршид ке, вазь-а, бер-а — со шарае потоз, но бервылъёсыз эшшо уродэсьгес луозы ни.

- Тӥ Пичи Пурга райсоветын 3 ӧтчамзэ депутат вал, 1-тӥ ӧтчамзэ — Кун Кенешлэн депутатэз. Кыӵе сюлмаськонъёсын калык дорады ӵемгес вазиське?

- Тодэ лыктэ Пугачёвоын пуштонъёс бере луэм учыр. Ёрослы уксё сётӥзы пуштэм бервылъёсты тупатон понна. Соку ик отын-татын пӧртэм подрядчикъёс кылдӥзы. Куд-ог огазеяськонъёс одӥг нуналлы кылдо, коркаез ыльык-сальык тупатъяло, со понна коньдон басьто но ышо. Адямиос бугыръяськыны ӧдъязы, кытчы вазиськыны уг тодо. Ми КПРФ партиен ӵош кылдытӥм общественной комитет. Со комитетлэн нимыныз ни, адямиослэсь вазиськонъёссэс люкаса, герӟаським Следствиея комитетэн, кутскизы эскерон ужъёс. Трос умойтэмез шараямын вал.

Пусйысал на, со комитет кылдӥз аслаз калыклэн мылкыдызъя, ми юрттӥм гинэ. Солэн сюлмаськемезъя ик Пургалась коркаосты тупатъяны эшшо коньдон вуиз на.

Быдэстоно ужпумъёс пӧлын — Кияса ёросысь учыр. Отын трос квартираё юртын вылзэ гинэ капремонт лэсьтӥллям, нош пушкыз мырдэм века. Со коркан улӥсьёс капремонт понна толэзьлы быдэ коньдон тыро. Но малы сое тыронэз, корказэс быдэс куашкатыны чакламын ке? Та ужпумъя одно ик мыноно судэ, капремонт понна тыриськонлэн толыкез ӧвӧл ни.

- Али тӥ Кун Кенешысь Наукая, дышетонъя, культурая, нациосын но егитъёсын ужан политикая но спортъя ялан ужась комиссилэн кивалтӥсезлэн воштӥсез луиськоды. Нырысьсэ, дыр, властьлэн партиезлы ӧвӧл, мукет партилы дурбасьтӥсь адями таӵе интые быръемын… - Туэ 10-тӥ сентябре ортчем быръёнъёс бере «Огъя Россия» партилэн Кун Думаысь фракциеныз кивалтӥсь Сергей Неверов улосъёсысь однопартиецъёсызлы вазиськиз: законодательной собраниосысь кивалтон интыосты мукет партиосысь адямиослы но сётоно. Малпасько, соин ик комиссилэн кивалтӥсезлэн воштӥсез луыны мыным ӵектӥзы. Тау карисько, Кун Кенешысь депутатъёс мон понна куаразэс сётӥзы шуыса.

Наукая, дышетонъя, культурая, нациосын но егитъёсын ужан политикая но спортъя ялан ужась комиссилэн кивалтӥсез Татьяна Ишматова туж йӧно, мыло-кыдо, тэк пукыны чидасьтэм. Со удмуртлыкез но, удмурт калыклэсь сюлмаськонъёссэ но ӟеч шӧдэ. Ужа, эсэпсэ валаса.

- Кыкетӥ дышетскемдыя тӥ юрист. Дядяйдылэсь малпанзэ быдэстӥды ик. Кызьы малпаськоды, калык али аслэсьтыз правооссэ тодэ-а?

- Азьвылэн ӵошатыса, тодэгес ни. Но туж тросэз шуге-леке вуонъёс кылдо коррупциен сэрен. Асьмелэсь кунмес со туж зол ӝокатэ. Паймытэ, одӥгъёссэ пытсэт сьӧры пукто, мукетъёсызлы со визь луыны кулэ кадь, но визь уг пыры. Зэм, адями котыр ласянь ӟеч луыны уг быгаты, котькинлэн кыӵе ке шекъёсыз вань. Но тыршоно ук зэмос дунлыкъёсъя улыны, аслэсьтыд уждэ валаса, чылкыт мылкыдын лэсьтыны, кунмес но калыкмес гажаны. Аслад кисыед сярысь гинэ малпаськоно ӧвӧл, зэмлыко луоно!

- Тросэз тае валало, но сыӵе дуннеын улыны ноку уз кылды, вылды…

- Кемалась ӧвӧл Кун Кенешысь депутатэн, Пичи Пургалась ужбергатӥсен Павел Чушъяловен вераським. Со шуэ: асьмеос, пе, азьвыл ӧм валалэ коммунизмын улэммес. Дышетскон — дунтэк, эмъяськон — дунтэк, котькуд адямилэн ужез вань, колхозъёс, заводъёс ужало, клубъёс, фермаос пуктӥсько, квартира дась сёто… Коммунизм!

Адями котьку оске, улон ӟечгес луоз шуыса…

- Нош тӥ асьтэос тыршиськоды сое тунсыкогес карыны. Спорт удысэз гинэ но басьтоно ке…

- Спорт адямиез кыдатэ. Соин нылпиослэн пичи дырысенызы ик спортэн вырыны луонлыксы мед кылдоз. Али мон Пичи Пурга черкогуртысь хоккей командалэн капитанэз луисько. Кун Кенешлэн хоккеен шудонъя командаяз пырисько. Пичи дыръям шуысалзы ке, зэмос хоккей площадкаосын шудод ай шуыса, ӧй оскысал.

Али Павел Чушъяловен ӵош Пичи Пурга ёросысь Кабыста гуртэ хоккей площадка лэсьтыны юрттӥськом.

- Тӥ книга лыдӟыны яратӥськоды, шуо. С. Есенинлэсь кылбуръёссэ, пе, учкытэк вераны быгатӥськоды…

- Лыдӟиськыны яратӥсь-ко, но туж ик уг ваньмиськы. Дыр сюре ке, али политикаен герӟаськем аналитикаез лыдӟыны кельше. Огвакытэ 1917-тӥ арын ортчем революция сярысь трос лыдӟылӥ. Огпол ки улам статья шедиз. 1913-тӥ арын, пе, кунгож сьӧрысь аналитикъёс Россилэсь азинскемзэ чаклаллям. Ма, тазьы ик азинскиз ке, пе, укыр ӝутскоз ук со, быдэс Европа со понна «сырьевой придаток» интыын луоз. Маке но кароно Россиез дугдытон, ӝокатон понна. Озьы кунмес нырысь воксё кулэтэм войнае кыско. Собере Россиын революция ортчыто.

Со вакытъёсты малпаса, куддыръя пушкы ик тыре: со ожъёс, революция ӧй ке луысалзы, кытын меда али луысал ни кунмы?

Али лыдӟисько Михаил Атамановлэсь «Происхождение удмуртского народа» книгазэ. Удмурт кылэз, литератураез школаын ӧй дышеты бере, удмурт калыке сярысь трос выльзэ тодӥсько.

- Тӥ — 3 йыг-йыг пиослэн атайзы. Соос ужды шоры кызьы учко? Малпанъёсты тупало-а?

- Бадӟымезлы пиелы 26 арес. Аслэсьтыз улонзэ со творчествоен герӟаз, туспуктонэн выре. Шоретӥез пие — спортсмен, профессиональной футболист, «Зенит» школаез йылпумъяз. Нош 3-тӥез 8-тӥ классын дышетске. Куддыръя мон ачим но пиосылэсь дышетскисько. Кылсярысь, бадӟымез пӧртэм визьмо адямиосты, психологъёсты кылзыны яратэ. Машинаын соин ӵош ветлон вискын мон но кылзӥсько. Пайдаё.

Кузпалы Пермьысь культурая институтэз йылпумъямын, культурая юртын ужаз. Али Пургалась нылпи садын ватсаса тодон-валан сётонъя педагог луыса тырше. Мынам со ӟуч, городын будэмын. Озьы ке но бадӟымъёсыз пиосы удмурт кылэз тодо, пичиез но дышетэ.

Коркамес ачим ик пуктӥ, ваньзэ ас киосыным лэсьтыны тыршисько. Кузпалы корка котырмес чеберъян сярысь сюлмаське, сяськаос, пӧртэм будосъёс мерттэ, мон солы юрттӥсько. Туж потэ, Пурга черкогуртмы чебер, сяськаё мед луоз.

- Та нуналъёсы гинэ тодӥ: Пичи Пурга ёросысь Ильинск гуртысь самодеятельной композиторлэн Леонид Душниковлэн «Возь вылын намер уг буды…» тодмо кырӟанэзлы кылъёс тӥ гожтӥллямды. 30 ар ӵоже ини Пурга палан та кырӟанэз яратыса быдэсъяло. Уноез малпа, кылъёсыз калыкысь басьтэмын шуыса…

- Зэм но, со мынам кылъёсы. Егит дыръям, мылкыды сюлэмам тэрымтэ дыръя, яратон вакытъёсам, кылбуръёс гожъясько вал. Соосты ноку шарае ӧй поттылы, умой ӧз потылы-а, мар-а. Шумпотӥсько, та кырӟанэз калык яратэ. Нош кин сое гожтӥз, аръёс ортчыса, оло, сокем дан поттонэз но ӧвӧл ни.

Берло дыре туж шӧдӥсько: улонэз тросгес дунъяны кутски сюлмыным. Азьвыл йырыным гинэ учкыны тырши, кытӥяз лек но, туж юн но кариськоно луылӥз. Али тросгес тыршисько валаны. Озьы улонам нош ик выль вакыт усьтӥськиз кадь…

- Ойдолэ вераськонмес кырӟанэныды ик йылпумъялом.

- Бусыын намер уг буды,

Намер будэ куак пӧлын.

Кыл йылын кырӟан уг кылды,

Кырӟан вордске сюлэмын...

Ваньмызлы синзэ усьтэ со —

Синмолы но синтэмлы.

Вай, эше, монэн ӵош кырӟа,

Дан сӥзьыса кырӟанлы.

Мӧзмонэн, куректонэн но

Герӟаське солэн гурез.

Ӵем дыръя шунды сямен со

Югдытэ пеймыт уез.

Вай, эше, ӵошен пуксём но

Вай кырӟаломы ӟечгес.

Ваче син огпол учком но

Куштомы урод сяммес.

Источник:

[http://udmdunne.ru/2017/12/28604 Басов, Петр Сергеевич. Инвисъёс усьтӥсько мынӥсьлы] / Петр Басов ; записала Елена Миннигараева // Удмурт дунне. - 2017. - 14 дек. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"