Адями но вумурт

Одӥг адями туж куанер улэм, нош ачиз амаллы маке вылэм. Вумуртлэсь со коньдон куроно кариськем. Басьтэм быдэс мешок начар куж, мынэм Вумурт улон ты дуре, пуксем но гозы пуныны кутскем. Потэм со доры Вумурт.

— Ма тон озьы лэсьтӥськод?

Адями солы шуэм:

— Тани ук, гозы пунӥсько.

— Нош малы тыныд гозы кулэ луиз? — юам Вумурт.

— Та тыэз кычласа кӧс мувыре поттыны малпасько — тыэз куасьто но пыдэсаз нянь кизё, лудэ-бусые мынам ӧжыт, мон куанер.

Адямиен озьы егит Вумурт вераськем, пересь Вумурттэк со номыр вераны дӥсьтымтэ. Соин ик шуэм адямилы:

— Сыл ай, мон бубиным верасько.

Нош ик тыэ лэзькем, кӧня ке улыса потэм:

— Ойдо, асьмеос эчешом: кин кинэ бызьыса ортчоз? Тон ке монэ — тыысь вуэз кыскод, мон ке тонэ — ӟечкыд вань дыръя берт.

— Тонэн бызьылыны мон ачим уг ваньмиськы, — шуэм адями, — гозы пунонэ трос вань на. Тон мынам выныным ӵошатскыса оскалты, со али пичи кыз улын кӧлэ. Тон со доры мын но "ать!" гинэ кеськы, мылысь-кыдысь тонэн ӵошатскоз.

Адями соку шӧдэм уга отын луд кечлэсь кыллемзэ. Адями косэмъя ик лэсьтэм Вумурт. Луд кеч огпумысь чилям ук — солэсь берзэ-азьзэ но Вумурт ӧз адӟы ни, пе. Жуммыса вуэм Вумурт адями доры:

— Ну, выныд шаплы бызьылэ. Со монэ чылкак жуммытӥз. Озьы ке но, тон марым... вить ай: мон нош ик пересеным верасько.

Тыэ лэзькылэм но, ӧжыт улыса, отысь потэм:

— Давай асьмеос нюръяськом. Тон монэ вормид ке — тыэз куасьты, мон ке тонэ — ӟечкыд вань дыръя берт гуртад.

Нош адями сокугес шӧдэм: ты дуре юыны гондыр васькиз. Соин ик шуэм Вумуртлы:

— Кытын, пе, тыныд монэ вормыны?! Ма тон гозы пуныны люкыт кариськод? Тон мынэсьтым пересь бубыме но уд вормы ук! Тӥни со монэ эскерыны лыктэм но ву юэ. Я, кин кинэ вормоз?

Мынэм Вумурт гондыр доры. Гондыр адӟем Вумуртэз но кык пыд йылаз ӝутскем, Вумуртэз огпумысь кырмыса кекатӥське вылэм. Мырдэм лулыз кылем на соизлэн. Лыктэм со адями доры но шуэ, пе:

— Ну, тынад пересед ортчыт кужмо. Мырдэм улэпен мозми мон со ки улысь. Озьы ке но, тон тымес куасьтэмлэсь возькы на, мон пересеным верасько на.

Нош ик тыэ зымем но отысь корт бодыен потэм. Та бодыын Вумуртлэн вань кужымез люкамын вылэм.

— Ойдо, та бодыез вылэ зӥртом. Тон ке вылэгес лэзид — куасьты тымес, нош мон ке — гуртад берт,— шуэм Вумурт.

— Я, иське,— шуэм адями.

Лэзем со бодызэ Вумурт туж вылэ — син сузёнтэме. Нош адями адӟе, пе, ини, сокем вылэ лэзьыны уз быгаты шуыса. Котырак учкем но — инбамысь пичи пилемез адӟем, вырӟылытэк, пе, сылэ. Вумурт юаны кутскем:

— Малы бен уд лэзиськы?

— Сыл ай,— шуэ, пе, солы адями,— тӥни отӥ мынам полате лыктэ. Та бодыдэ отчы зӥрто — малы ке но, оло, яралоз берло.

Кышкам Вумурт. Адями зэмысь ик тае отчы сэрпалтоз но, утча на соку шуыса, адями киысь берен басьтэм, ӝоггес тыэ зымем — бубиз доры. Ӧжыт улыса, отысь потэм но сюлворе, пе:

— Эн куашкаты коркамес! Тон куанер ке улӥськод, ми тыныд коньдон сётом, кӧня кулэ — сомында.

Нош адями сое гинэ вите вылэм:

— Ма бен тынэсьтыд трос куронэз. Та шляпаме гинэ тырмыты но — ярам!

Вумурт шумпотэм, сокем ӧжыт коньдон куре шуыса. Усьтыр-табыр тыэ лэзькем коньдонлы, нош адями со куспын туж мур но сюбег гу копаны вуэм, сое шляпаеныз ӵоктам, шляпа йылэ пась карем.

Поттэм Вумурт коньдонзэ пичигес пуйыен, ваньзэ ӝоктэм шляпае — одӥгез но шляпа пыдсы кыльымтэ ни. Нош ик ваем Вумурт одӥг мешок — коньдонэз нош ик ӧжыт. Куиньметӥ мешоксэ ваем бере гинэ, быдэс шляпазэ тырмытэм.

— Ну,— шуэм Вумурт,— тынад шляпаед сокем ик бадӟым вылэм, макем кужымед но кынарыд бадӟым.

Нош адями ас понназ серекъя гинэ, пе. Вумурт кошкем бере, со вань коньдонзэ огазе люкам но бертэм. Озьы узырмем адями.