Лопатина Надежда Серафимовна

Одӥг вуэ кык пол пыро!

Лопатина С. Н.

Нырысь учкыса, Надежда Серафимовна Лопатина туж йӧнъяськись тусо потэ. Сьӧдкысъем чебер нылкышно вераськыкуз котькуд кылзэ мерта кожалод, ветлыкуз – котькуд вамышсэ учке. Но кӧня ке вераськем бере кит-кит серекъяны ӧдъя но, сыӵе малпанъёс тӧлӟо. Зэм, укыр шара сюлэмо но сое уд шуы. Оло соин Надежда Серафимовна пичи дырысеныз йыртӥян дуннеын улэ? Ӵап отысь басьтэ со аслыз буйган но шумпотон. Та дырозь солэн 6 книгаез потӥз: «Кызаузы оло узы», «Буква вӧзы буква», «Кылъёсын шудон», «Кылъёслэсь «тубат лёгетъёс», «Лыдъяса вуи дасозь», «Чимали букваос». Улонзэ озьы ик син азяз пуктыны уг быгаты нылпи газеттэк. Огдыре отысь кошкылӥз, ассэ пӧртэм интыосын утчаз. Нош 5 ар талэсь азьло Удмурт Правительстволэн аппаратаз ужась мурт кутскиз но яратоно газетаз берытскиз. Зэм, «Ӟечбур!»-лэн валтӥсь редакторез луыса.

- Надежда Серафимовна, Правительстволэн аппаратысьтыз редакцие берытскыкуды, тӥ сярысь азьтэмез гинэ ӧз вераськы, дыр. Кин ке ушъяз, кин ке серекъяз, нош валасез вал-а?

- Вал. Ачим. Улыса-вылыса мон дыши ваньзэ ас кожам лэсьтыны: нокинэн кенешытэк, визьнодзэс курытэк, валамзэс возьматэк. Тазьы каньылгес: сыӵе вамыш лэсьтонэ сярысь кинлы ке азьло верасал ке, оло, алысалзы. Мон малпаськыны, пушкам бугыръяськыны кутскысал но интыям ик кыльысал. Улонам сыӵе учыр вал ни уго. Но отын но пуксет ӧй шедьты. Тодӥ: Калыкез улон-вылонын утёнъя министерствое удмурт кылэз валась специалист кулэ. Конкурс – 15 адями! Бырйизы монэ. Мон шумпотэменым соку ик матысь адямиосылы ушъяськоно кожай, но уже потон нунал матэктэмъя малпанэ воштӥськиз, министерствое ӧй мыны.

- Но Правительствоын интыды шуныт вал кадь… Газетэ берытскондылэн кыӵе зэмос мугъёсыз?

- Берытскеме потӥз. Зэм. Нош Вылысь Кужым сое шӧдӥз, луоз. Аппаратын ужан интые урод ӧй вал, мон отчы куке-соку туж шедеме потыса мынӥ вал ук. Ужез секыт ӧй вал. Но мӧзмыт. Кӧня ке улыса, мон аслым пурысь шыр кадь потыны ӧдъяй. Пумен асме ыштыны кутски кадь: малы мон татын пукисько? Кинлы ке кулэ-а та уже? Газетын ужасал ке, оло, пе, маке тунсыкогес лэсьтыны быгатысал… Озьы мон асме ачим пуш ласянь быдтыны кутски ни вал. Ӵап со вие шуак ӧтё Печатья но иворъёсъя министерствое. Туж паймыса мынӥ. Меӵак номыр ӧз вералэ, ӧз ӵектэ, юалляськизы, кызьыгес, пе, нылпи газетлэсь тиражзэ будэтоно меда? Мар малпай, сое верай. Со учыр бере кӧня ке дыр ортчыса, Правительстволэн администрациезлэн кивалтӥсез доры ӧтизы. Отысен ини ӵектӥзы «Ӟечбур!»-е выжон сярысь малпаськыны. Мынам мылкыды сураськиз. Огласянь, тани кадь со – выльысь лопырскыны луонлык, мукет ласянь – пумтэм-йылтэм уж но кыл кутон. Шедьтэмлэсь трос уг ышты-а, уг жаля-а – юанъёс кӧлыны но маза ӧз сётъялэ. Но малпанэ кисьматозь, вылӥын чалмизы. Толэзь ортче, кык, куинь – номыр уг куарето. Асме лӧптылӥсь луэме понна тышкаськыса, нош ик пуксетски. Соку кытысь ке, чик алытэк-маратэк, дорам печатья но иворъёсъя министр пыриз но уж дурысьтым ик нуиз газетлэн редакцияз. Озьы син куспын «Ӟечбур!»-лы редакторе пуктӥзы.

- Азьвылэз редактор кошкем бере газетлэн кӧня ке толэзь кивалтӥсез ӧй вал, но со потытэк ӧз улы. Ужасьёсыз кызьы тӥледыз пумитазы, «асьме коже но быгатысалмы» яке «асьме пӧлысь но шедьтысалмы» кадь мылкыдъёс ӧй вал-а?

- Монэ озьы пумитаны мугъёс ӧй вал кадь. Тросэз соос тодо на мынэсьтым ужамме. Собере газет зэмзэ но шуг югдуре шедемын вал. Мон валатскисько кадь, мар юамды потэ: ужасьёсмылы нырысь пал ӧз кельшылы дисциплина борды басьтӥськеме, но сотэк ужлэн радыз ыше.

- Табере дунъяло кадь потэ-а: тиражды нырысь аръёсаз будӥз, юбилейдэс туж ӟеч пусйиды, табере тани воксё центре ужаны выжиды, выль ӝӧкъёс сьӧрын пукиськоды…

- Алигес гинэ малпаськыса пуки: редакторын ужаме вить ар луэм ни. Нош редакциез центре выжтон мынам нырысетӥ ужпуме вал. Малпай: со уж кема уз кыстӥськы, Правительствоын ужаме но таӵе учыре ӵап юрттоз. Но кемагес ик луиз. Ужасьёсы шумпото-а, уг-а - уг тодӥськы, синмам уг верало.

- Кивалтон манерды кыӵе? Кин ке «лушкем» шуэ…

- (Серекъя). Ӧйтӧд, шӧдэмея кивалтӥсько кадь. Тыршисько, адямиез вӧсь карытэк. Маке веранды, ӵектонды, кӧт ӝожды вань ке, дорам пырыса, синмам вералэ шуисько. Но ужъя куронъёсы чурытэсь: тодӥсько ке, журналист ӟечгес гожтыны быгатэ шуыса, ляб материалзэ берен берыктӥсько. Командировкаосы ӵем ысъясько, быгатэмъям ачим но потасько.

- Туала коллективды кемалась ӧз вошъяськы ни, маин со герӟаськемын: ужасьёсты сокем нылпиосты ярато-а яке мукет интыосын асьсэды эскерыны уг дӥсьто-а?

- Мыным коллективе кельше (сое ачим ӧй люка ке но). Ужзэс туж ярато кадь потэ. Тани одӥг гинэ учырез тодам вайисько. Татарстанэ командировкае потакумы, туж тунсыко семья дораз кӧлтыны кельтӥз. Соосын нимысьтыз материал дасяны малпам. Но ӝыт вераськыны ӧм ваньме ни, лыдӟисьёсынымы пумиськон ортчытӥм. Нош ӵукна кузпалыз, гурт администрацилэн тӧроез, уж дураз дыртэ. Ӵок ни-а, мар-а шуыса изьыны выдӥм. Ӵукнапал вить часын сайкай но… корреспондентэ корка кузёен кенешыса пуке, бордаз диктофонэз ужа. Мынам кылы быриз: ужасе понна сыӵе шумпотӥ. Нош кытчы ке мукет интые выжон сярысь ке… Кытчы? Радиожурналистъёс но тани паймыса ветло. Зэмзэ вераса, мон но асме мукет интыысь уг но адӟиськы. Нылпиосты туж яратӥсько, командировкаосы потакумы, соос но бордам бинисько. Пумиськонъёс дыръя кудӥзлы ке пичилы одно синмаськисько.

- Яратоно газетты?

- «Комсомольская правда», «Удмурт дуннеез» но лыдӟисько. Котькуд ар дорам но, редакцие но басьтӥсько. Синмаськисько «Ӟечбур!» пыр потэм юнкоръёсмылэн гожъяськемзылы. Куд-ог материалъёсты авторезъя лыдӟисько, дӥсьтӥсь луэмдылы паймисько.

- Мон малпай вал, «Ӟечбур!» шуоды…

- Соку мукет сямен юано вал. «Ӟечбур!»-ез веранэз ӧвӧл, мон мукетъёссэ дунъяны косӥды кожай.

- Газетэ нырысьсэ кызьы шедиды?

- Пинал дыръям яратылӥ йыртӥянъёсын вырыны. Газетэ потэм ребуслы валэктонъёс ысъялляй. «Шонер тодӥзы» рубрика улысь Пичи Пурга ёросысь Гожня школаысь Надя Николаева шуыса гожтэмез адӟи но копак лӧптӥ. Озьы вылысьтыз вылаз заметка гожъяны, ачим йыртӥян малпаны ӧдъяй. Бӧрысьгес кылбуръёс но пӧраны кутски. Зэм, одӥгез учыр понна али ке но возьыт. Огпол маке гожъяськонам вис луиз. Йыре номыр уг лыкты, нош сюлэм шугектэ ни. Кутски но, А. Вотяковлэсь кылбурзэ ӧжыт вошъяса, улаз Н. Николаева гожтыса, «Дась лу!»-э ыстӥ. Возьмасько-возьмасько, кылбурме уг потто, гожтэт но уг ысто. Берло ини, куке-соку Герман Алексеевич Ходыревлэсь юасько. Со шуэ: а тон ӧд вала шат, малы ӧй гожты. Мон «лушкаськисьёсты» уг гажаськы. Тӥни сыӵе ӟеч урок сётӥз со мыным.

- Пичи классъёсысен ик гожъяськись луоды шуыса тодӥськоды вал бере, малы педучилищее мынӥды?

- Баянэн шудыны дышетскеме потыса. Крезьгурез валаны туж бадӟым мылкыды вал.

Можга педучилищее шедьыса, малпанэ быдэсмиз кадь потэ ни вал. Но крезьгуръя урокын мон домраен шудӥсьёс пӧлы шеди. Ваньмыз со умой, но сюлэмъя ӧвӧл. Соку Ижын заводын ужась апайме баян басьтыны кури. Сое ачим, пичи мугорын, Можгала вайи, дышетӥселы возьматӥ. Озьы монэ баянэн шудӥсьёс радэ пыртӥзы. Али ке но со баянэ дорын сылэ. Али тодам вайисько ке, сыӵе бадӟым мылкыды вылэм, дыр, - сутӥ ук эшъёсме. Ваньмон дыры ӧжытак гинэ кылдэ ке, урокъёс бере кыльыса, шудыса пукисько вал. Бӧрысь практикаос дыръя баянэ туж юрттылӥз.

- Али кыскаськоды-а?

- Туж шер. Ӟеч шудыны уг быгатӥськы, ляб шудэмме возьматэме уг поты.

Педучилищеын ик суредаськыны дыши, устоосыз ужъёсы отчы кельтэмын. Эшъёсын ӵош тунсыко бордгазет поттылӥм. Со аръёс ӵоже гожъяськон мылкыды уката пуромиз, пыри университетэ дышетскыны. Отысен ини редакцие меӵак сюрес усьтӥськиз – практикаме уго газетын ортчытӥ, каникулъёс дыръя уже кыльылӥ.. Журналистикаез быръемысьтым одӥг пол но жаляме ӧвӧл. А кыӵе коллектив вал «Дась лу!»-ын: Герман Ходырев, Елена Глебова, Владимир Романов, Анастасия Гребина, Сергей Матвеев, Оля Бородина, Люза Бадретдинова… Ми сыӵе мылысь-кыдысь ужам, али тодам вайыкум но тани быдэс со вакытэ вуисько кадь. Куддыръя, ужысь кошкыны ӵыдытэк, быдэс ӝыт тема, рубрика малпаса пукылӥм.

- Нош уйёссэ книга гожъяды…

- Ӧй.

- Соку ку-о куать книга дасяды?

- Ачим но уг валаськы. Али верай ке, нокин уз оскы: мынам картэлэн но, нылъёсылэн но дорын гожъяськыса пукемме одӥг пол но (!) адӟемзы ӧвӧл..

- Арлыдлэсь кышкаськоды-а?

- Уг шӧдылӥськы. Уж вань дыръя со сярысь малпаськыны дыр ӧвӧл ук. Кызьы юбилейдэ пусйиськод шуэмысьтызы гинэ тани шуак луисько: куно пумитаны, дасяськыны дыр но, кужым но быре. Ваньмыз каньылак гинэ ортче ке, умойгес.

-Мон книгаостэс но, газетъёсысь азьвыл гожъямъёстэс но туж сак учки – малы яратон сярысь кылбуръёсты ӧвӧл? Мар-мар, но со сярысь быгатӥсьтэмез но гожъя кадь.

- Мыным тунсыкогес йыртӥян дунне: туж кельше пӧртэм мадиськонъёс (загадкаос) малпаны, нылпиослы кылбур чуръёс гожъяны, книгаос дасяны. Мон ялан соин гинэ вырысал кадь. Нош куке тыныд дышетӥсьёс верало на ке, урокын, кружокын тӥляд книгадыя ужаськом шуыса, мылкыд уката бурдъяське. Зэмзэ вераса, татчы берытскыкум малпай вал, творчествоен вырыны дыры луоз шуыса, но редакторлэн ужез тырме вылэм, уж дурын книга гожъятэк но. Газет дасян сяна, коньдон но утчатэк уг луы, сюрес вылэ потытэк но - тужгес но туала вакытэ.

- Асьтэ сярысь супыльтонъёсты кылылэмды вань-а?

- (Серекъя). Ва-ань. Нырысь пал туж куректӥсько, оломар луисько вал, собере ваньзэ серемпыр кылзыны ӧдъяй: иське, мон но маке тыр сылӥсько. Пурысь адямиос сярысь уг супыльто ук.

Источник:

Лопатина Н. С. Одӥг вуэ кык пол пыро! / Н. С. Лопатина ; записала Зинаида Рябинина // Удмурт дунне. - 2005. - 7 окт. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"