Выль ар пумитан

Выль ар удмуртъёс понна герӟаськемын вылэм Быдӟынналэн. Нош улон азьлань вамыштэмъя сэбедъёс но выльмизы. Шаерысьтымы мукет калыкъёс сямен ик, асьмеос но пусйиськом та нуналэз, оскиськом: Выль ар ваёз выль малпанъёс, выль осконъёс, асьме калыклэн улоназ выль воштӥськонъёс.

Нош кыӵе Выль ар луоз вож кызтэк, чебермам шудонъёстэк, кузьымтэк, Тол бабайтэк, Лымы нылтэк? Ваньмы тодӥськом на меда, ку но кин вайиз та тунсыко сэбедэз асьме доры?

Пётр I эксэйлэн указэзъя 1700-тӥ арысен асьмеос пусйыны кутскимы Выль ар вуонэз. Со дырысен сэбед узырмиз пӧртэм тодметъёсын. Аръёс ортчемъя Европаысь асьме доры вуизы Тол бабай но Лымы ныл, кыз чеберман, кузьмаськон сям. Но котькыӵе сэбедэ калык аслэсьтыз йылолъёссэ пыӵатыны тырше. Котькуд удмурт коркан нырысь ик ӝӧк вылэ нянь колды понозы. Нянь – со улон, байлык. Кузё шуэ вылэм:

– Осто, вылысь Быдӟым Инмаре, Инэ-вуэ, Воршудэ! Вуоно ардэ капчи кар, котькуд коркан ӝӧк вылаз пыжем нянез милям сямен мед луоз! Нянь будэтыны, утялтыны чиданлыктэ, кужымдэ, тазалыктэ сёт, выль нянь удалтэмен, трос пумо кеносъёс лэсьтоно мед луомы. Осто, Инмаре, Инэ-вуэ, Воршудэ! Вӧсяськемме кабыл басьты. Мае кури, ваньзэ сёт! Осто, Инмаре!

Нянь колды вӧзы пуктозы на вӧй. Кылэмды вань, дыр: «Вӧй вылтӥ кадь мед ортчоз улонды».

Выль арлэн нырысетӥ нуналэзъя тодыны тыршизы арлэсь кыӵе луонозэ. Туж умоен лыдъяло, корка нырысь ик пиосмурт пыре ке. Озьыен, ар капчиен сётӥськоз. Кузё та нуналэ уксёзэ лыдӟе вылэм, быдэс ар уксёен мед улом шуыса. Выль ар уе ӝӧк но, гур но буш медаз кыле. Быдэс арзэ нянё-вӧё, сиыса-юыса улоно мед луоз шуыса, пичи нылпиослы котькудӥзлы кияз уксё сётылӥзы.

Выль ар уе гуртысь калык гурезьысь нискыла вылэм. Трос пол но кыдёке нискылтӥськод ке, озьыен, туэ гуртын пыш кузь будоз. Пышлэсь азьло дыре дэрем, штани куо вал.

Калыкын шуо: «Кызьы ортчытод Выль ар уез, озьы ик ортчоз быдэс аред». Нылкышноос тыршизы ӝӧк вылэз чебер карыны, ческыт сиён-юон пуктыны. Азьло дырысен Выль арез пумитан быдэс семьялэн сэбедэз вал бере, котькудӥзлэсь яратоно сиёнзэ ӝӧк вылэ пуктыны тыршизы. Одно ик ӟазег яке ӵӧж сӥль гурын пыжозы вал.

Пӧртэм пӧраськемъёс синмез ик мальдытыса гочатъязы: шаньги, перепеч, тоторо, мильым, шукисаль, шыд лым, курегпузлэсь, вароклэсь пӧртэм пумо сиён-юон, парсь сӥльлэсь ческыт пельнянь, ӝук. Одӥг кылын вераса, ӝӧк выл тыраз сиён-юонэн узырмыны кулэ. Выль арлы шуыса, кышноос ческыт вина нырйылзэ пуктозы вал. Нимаз сур пӧзьтозы. Пиналъёслы пӧртэм ческыт сиён пӧрало.

Туала улон ас сяменыз радъяське ини. Егитъёс, трос семьяосын огазе кариськыса, шулдыр пумитало та нуналэз. Ӝӧк вылын сыло шампанской, торт, котькуд коркан чузъясько шулдыр кырӟанъёс, эктон гуръёс. Кузёос, вань мылкыдзэс сётыса, куно каро люкаськем калыкез. Пумиськон дыръя ог-огзылы ӟеч кылъёс гинэ верало. Котькуд адями та уе кыӵе ке туж бадӟым малпанзэ быдэстыны куре, быдэс арлы быдэстоно ужъёссэ вера.

Ми палан шуо: «Выль ар уе верам кылъёс зэмало». Озьы мед луоз .