Романова Галина

Галина Васильевна Романова - удмурт кылбурчи но веросчи, Россиысь писательёслэн огазеяськонзылэн ёзчиез, Россия Федерациысь культура удысысь сӥё-дано ужась.

Улон сюресэз

Галина Романова вордскиз Ува ёросысь Булай Починка (Сухая Видзя) гуртын 1950-тӥ арын 22 гудырикошконэ.

"Советской Удмуртия" газетысь литература кружок, 1974

«Семьяын вить нылпиос будӥм, мон бадӟымез. Меми-дяди уй-нунал ужазы. Но няньтэк, вӧйтэк ӧм улэ».

Галина Романова но Владимир Романов, 1976

Мон асме «шӧтэм ӵӧжпиен» лыдъялляй. Висъяськылӥ, дыр, укыр ас поннам улэменым гинэ.

Тямыс классэз йылпумъямез бере одӥг арзэ колхозын скал кыскиз, собере каменщике дышетскиз но кык арзэ Ижкарын улон коркаос лэсьтӥз.

1968-тӥ арысен удмурт газетъёсын но журналъёсын ужа.

Ужан сяменыз ӝыт ужась школаын дасэтӥ классэз йылпумъяз, нош 1980-тӥ арын заочно Удмурт кун университетысь удмурт филология факультетэз.

Та арын ик «Молот» журналэ выжиз. Отын со машинисткалэсь но технической редакторлэсь, корректорлэсь ужзэ быдэсъяз. Татысен ик Галинаез синйылтӥз Володя Романов. «Советской Удмуртиын» ужасьёс монэ «Дась лу!» редакцие нуизы. Отын тонэн огкадь фамилиё адями вань, пе. Атай нимыз но тупа вылэм. Нош со мыным нырысь валысь шуш потӥз. «Мынам тулысэ» пичи, векчи книгазэ кузьмаз. Ураме потон ӧс дорозь келяз, кытын улэмме юаз… Озьы пинал семья кылдӥз.

1990-тӥ арысен «Вордскем кыл» но «Инвожо» журналъёс потыны кутскизы. Галина Романова кыказ но редакциосын кыл кутӥсь секретарь луыса ужаз. Кытӥяз вормонтэмзэ но возэз кысконо луэ. Туж ёрмон дыре, 1992-тӥ арын, бумагалы ветлон мон вылэ усиз. Кык сюрс иськем ке но – самолётэн. Калининград дорысь Неман городын бумага поттон комбинатын туж умой пумитазы. Одӥг документ понна – сокеме. Бертӥ но бӧрсям ик кык-куинь нунал ортчыса, быдэс вагон (54 тонна) вылӥ ӟечлыко бумага вуиз. Кемалы тырмиз.

1998–2002-тӥ аръёсы со «Инвожо» журналлэн валтӥсь редакторлэн воштӥсез вал, 2003-тӥ арын «Удмурт дунне» газетэ ужаны выжиз,2007-тӥ арын – «Кенеш» журналэ.

Ай пенсие потса, кияз ноку крезь кутылымтэ адями, Галина Васильевна аслыз крезь лэсьтытэ но соин шудыны дышетске. «Мынам пель сьӧрам ялан кин ке вера вал кадь: тыныд крезен шудоно, – шуэ Галина Васильевна». Та кышномуртлэн мылкыдыз зэмзэ но вормонтэм, лэся.

Гожъямъёсыз сярысь

Галина Васильевна Романовалэсь гожъяськон удыссэ эскерыку, син шоры йӧтэ авторлэн пӧртэм жанръёсын ужамез: со кылбурчи но, драматург но, веросчи но, озьы ик журналист.

Галина Романовалэн нырысетӥ кылбуръёсыз 1968-тӥ арын «Советской Удмуртия» газетын печатласькизы, собере – вань удмурт газет-журналъёсын, егит кылбурчиослэн «Пыд улын – музъем» сборниказы. Туннэ нуналлы авторлэн вить книгаез потэмын. Нырысетӥ кылбур книгазэ поттӥз 1982-тӥ арын – «Ӵош вамышъялом», кыкетӥзэ 1988-тӥ арын – «Шепасько юос». Нош 1991-тӥ арын лыдӟись кие вуиз веросъёсын, выжыкылъёсын, кырӟанъёсын, кылбуръёсын «Выль кен» книгаез. Тросэз кылбуръёсыз потэмын ӟуч кылын «Мир женской души» книгаын, эстон кылын – «Ньыль тылскем» бичетын. Озьы ик Г. Романовалэн кылбуръёсыз берыктэмын бигер, коми, чуваш, калмык но мукет кылъёсы.

Ог 50 кылбуръёсыз кырӟан луизы.

Галина Романова нылкышно кылбуретлэсь пӧртэмлыкъёссэ ас сяменыз азинтэ. Со ӵемысь курыт шӧмо яратонэз суреда. Та поэтессалэн лирической героиняез яратонлэсь вуэмзэ лулысь-сюлмысь возьма.

«Шунды-Мумы» легенда-пьесая Удмурт Йӧскалык театрын спектакль

Я, лыкты, лыкты со доры

Ваньзэ вормылӥсь,

Ваньмыныз жугиськись

Бадӟым тудвуэн

Паськыт ӧрен

Мед вӧлдӥськоз шудмы.

Я, ӟыгырты юнгес,

Юнгес!...

Кылсуред тупатон но радъян манерезъя Г. Романовалэн яратонлы сӥзем кылбуръёсыз калык кырӟанъёслы матын луо. Поэтессалэн чуръёсаз чеберлык пала кыстӥськон, чеберлыкез кылдытыны-вордыны тыршон мылкыдъёс юн шӧдӥсько.

Берло аръёсы Галина Романова ассэ возьматӥз проза но драматургия удысын, 2000-тӥ арын «Ӝужыт-ӝужыт гурезе» аспӧртэмлыко автобиографической повестен книга поттӥз. Та тодэ ваёнъёслы сӥзем произведение. Повестьысь веросъёс шуныт но ӝожмыт мылкыдоесь. Веросъёс сӥземын улонысь вазь кошкем анаезлы; котьку шуг-секытъёс кылдыку, толэзь сямен сюресэз югдытӥсь атаезлы; Волгоград палъёсысь вуэм пинал дыр эшезлы; школаын дышетскись пинал нылашлэн нырысетӥ яратонэзлы. Героинялэн улоназ трос гинэ шудо учыръёс вал: тодмо удмурт поэтэн В. Романовен ог-огзэс яратон, бызён но пизы вордскон, нырысетӥ печатлам кылбур, кудзэ синйылтӥз тодмо Ф. Васильев, дыр ортчемъя лыдӟисьёс пӧлын тодмо но яратоно автор луэмез. Со юрттэ (тужгес но егит калыклы) азьвылзэ, ортчемзэ син азязы ӟечгес пуктыны. Г. Романовалэн та книгаез нылкышнолэн секыт адӟонэз сярысь маде .

Солэн «Сьӧд ты но Улэп турын» выжыкыл-пьесаезъя пуктэмын крезьгуро радиоспектакль (1987), нош «Шунды-Мумы» легенда-пьесаезъя – Удмурт Йӧскалык театрын спектакль (2003), «Калмезъёс но Ваткаос» водевилез, «Уӵы чирдэм зэм меда но…», «Ватос» трагикомедиосыз «Кенеш» журналын но «Удмурт дунне» газетын печатламын.

«Шунды-Мумы» спектакль сярысь М. Гаврилова-Решитьколэн, В. Ванюшевлэн гожъямъёссы, критической статьяоссы потӥзы удмурт газет-журналын. Соос верало Г. Романовалэсь удмурт йылолъёсты тодэмез но соосты пьесаяз кутыны быгатэмез сярысь. Авторлэн пьесаяз огазеяськон сярысь малпан шарак чузъяське… Пьеса, выжыкыл кадь, шудо йылпумъяське. Спектакльын валтӥсь малпан воштӥськемынгес… Таяз вариантын валтӥсь веран – ас калыктэ котькыӵе вакытаз яратоно.

2006-тӥ арын писатель нылпиосты шумпоттӥз чебер буёло «Лобась валъёс» книгаеныз.

Галина Романова мукет удмурт писательёслэсь произведениоссэс калык доры вуттон сярысь но сюлмаське. Со люкаса но дасяса поттӥз тямыс книга: удмурт веросъёсын куинь антология «Выль дунне» (1989, 1991), «Быльырам синкылиос» (1997); Роман Валишинлэн веросъёсыныз, юморескаосыныз, критической ужъёсыныз но дневникеныз «Тодметъёс» (1990) но ӟуч кылын веросъёсыныз «Незамёрзшие цветы» (2004); улонысь вазь кошкем гожъяськисьлэн Борис Вахрушевлэн веросъёсыныз «Шокчиз кысэм кӧрык» (1988); серемес веросъёсын «Чипы лым» (1993); сценкаосын, сценарийёсын «Катанчи усьтӥське» (2001).

Галина Васильевна Романова гожъя аслаз огъёзъёсыз сярысь, асьме секыт вакытъёсы соослэн малпанъёссы но утчаськонъёссы сярысь. Нош пьесаосаз шӧдӥське туала улонлэн ӟеч но урод палъёсыз.

Наградаосыз но премиосыз

Галина Романова Россия Федерациысь культура удысысь сӥё-дано ужась ним басьтыкуз

СССР-ысь Госкомиздатлэн но культура удысын ужасьёслэн профсоюззылэн ЦК-езлэн Данъян грамотаенызы пусъемын.

УАССР-ысь Вылӥ Кенешлэн Президиумезлэн Данъян грамотаеныз.

Ашальчи Оки нимо йӧскалык премилэн лауреатэз, 1996.

Эрик Батуев нимо диплом но премиялэн лауреатэз, 2006.

Библиография

Книгаосыз

Выль кен : веросъёс, выжыкылъёс, кылбуръёс, кырӟанъёс. - Ижевск : Ижкар, 1991. - 218 с.

Ӵош вамышъялом : кылбуръёс. - Ижевск : Удмуртия, 1982. - 40 с.

Ӝужыт - ӝужыт гурезе... = Моя высокая гора... : верос сузьет, серемес веросъёс, выжыкылъёс, сценкаос. - Ижевск : Удмуртия, 2000. - 157 с. : ил.

Шепасько юос / Г. В. Романова. Альжан / В. В. Котков. Сюлэмам - шунды / В. Л. Шибанов. - Ижевск : Удмуртия, 1988. - 158 с.

Лобась валъёс : нылпиослы веросьёс но выжыкылъёс. - Ижевск : Удмуртия, 2006. - 44 с. : ил.

Статьяосыз

Анай : очерк // Удмурт дунне. – 2007. – 7 марта. – С. 6–7.

Бабасыр : серемес сценка // Удмурт дунне. – 2007. – 18 июля. – С. 7.

Беглой луи : серемес верос // Кенеш. – 2013. – № 8. – С. 106-107.

Бурдо валъёс : верос / иллюстрациез Василий Мустаевлэн // Кизили. – 2005. – N 4. – С. 4.

Буртчин турын : верос // Кизили. – 2005. – N 9. – С. 6-7.

Быръем кылбуръёс// Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 216–232.

Возь вылын : выжыкыл // Кизили. – 2010. – № 8. – С. 4.

Выль арен // Кенеш. – 2010. – № 9. – С. 13–15.

Вылэм, шуо, сыӵе калык : диптих // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 221–222.

Гора моя высокая : повесть в рассказах / пер. с удмурт. Надежды Кралиной и Галины Баженовой // Луч. – 2009. – № 1/2. – С. 13-22.

Девичья песня // Италмас. – 2009. – № 1. – С. 97.

Дӥго-дӥг! : серемес сценка // Кенеш. – 2008. – № 3. – С. 107–108.

Дорога в школу ; Лен ; Яблоко : рассказы // Италмас. – 2009. – № 1. – С. 76–79.

Зарни меда, азвесь меда : кык ёзэн трагикомедия // Кенеш. – 2009. – № 3. – С. 19–47.

Зорем тӧдьы // Зарни дэремен шунды : семьяын лыдӟон книга. – Ижевск, 2006. – С. 94–95.

Италмас сяськаос ; Тон ӧвӧл мынам : кылбуръёс / Галина Романова // Удмурт дунне. – 2013. – 31 мая. – С. 19.

Йыбырттӥсько тыныд // Даур (Ува). – 2009. – 17 апр.

"Камсьӧр батыр но Инсьӧр нылаш" // Выль даур : прил. к газ. "Можгин. вести". – 2007. – 22 сент.

Камсьӧр батыр но инсьӧр нылаш : выжыкыл // Кизили. – 2006. – № 10. – С. 4–5.

Катярова изба : рассказ / перевод с удмуртского Надежды Кралиной и Галины Баженовой // Италмас. - 2012. - № 4. - С. 102-105.

Клад // Луч. – 2008. – № 5/6. – С. 46–52.

Клад : рассказ // Италмас. – 2008. – № 1. – С. 83–90.

"Кудӟом туннэ яратонэн..." : кылбур // Удмурт дунне. - 2014. - 16 сент. - С. 5. - (инГОЖ)

Кыткомы эрико лыз валэз : кылбур / Галина Романова // Кенеш. - 2014. - № 1. - С. 3.

Лек лулъёсты кышкатом, убиръёсты уллялом! : ымусьтонлы, вожояськонлы сӥзем ӝыт / дасязы Ж. Ермолаева, Г. Романова // Кенеш. – 2010. – № 9. – С. 80–85.

Лошади-лошадки : рассказ / пер. с удмурт. Надежды Кралиной // Италмас. - 2013. - № 3. - С. 86-88.

Малы силе кикы? : кылбур-кырӟан / кылъёсыз Галина Романовалэн ; крезьгурез Михаил Оськинлэн // Кенеш. - 2014. - № 5-6. - С. 77.

"Не мешай мне, осень, думать о любимом..." : стихи // Италмас. – 2009. – № 1. – С. 97–98.

Ныл кырӟан : кылбур-кырӟан / кылъёсыз Галина Романовалэн ; крезьгурез Михаил Оськинлэн но Надежда Уткиналэн // Кенеш. - 2014. - № 5-6. - С. 77.

Пачанушыос : сценка // Удмурт дунне. – 2008. – 25 марта. – С. 7.

Петыр-котыр : серемес сценкаос // Кенеш. - 2013. - № 9. - С. 30-44. - Пуштросэз : Тӧдьы луон понна ; "Погыллям" бизнес ; Мотор "Моторола" ; Дӥго-дӥг! ; Петыр-котыр

Пештыри // Кенеш. – 2006. – № 1. – С. 80–87.

Пи-пи! : сценка // Кенеш. – 2008. – № 7. – С. 107–110.

Погыллям бизнес : сценка // Удмурт дунне. – 2008. – 27 мая. – С. 7.

Поромытӥсь вӧтъёс : сценка // Удмурт дунне. – 2008. – 20 авг. – С. 7.

"Свадьба проплывает по улицам..." // Италмас. – 2009. – № 1. – С. 97.

"Свеча волнуется, горит..." ; Весь век ждала // Италмас. – 2009. – № 1. – С. 97–98.

"Сизьым мынам туганэ но..." : верос // Удмурт дунне. – 2006. – 14, 15, 21, 22, 28, 29 марта; 4 апр.

Семон агай // Эти строчки простые мои... / С. Перевощиков. – Ижевск, 2006. – С. 258.

Син уськытӥзы : серемес верос // Кенеш. – 2008. – № 10. – С. 102–105.

Сусыпу // Кенеш. – 2006. – № 4. – С. 52–56.

Сьӧд ты но Улэп турын : выжыкыл // Кенеш. – 2007. – № 4. – С. 74–84.

Сюлмы пыже, кӧты лыдэ : серемес верос / Галина Романова // Кенеш. - 2013. - № 9. - С. 68-69.

Тӧр шорам возисько : Оки апаймылы // Алнаш куара. – 2008. – 4 апр.

Тӧрӧ быръён // Удмурт дунне. – 2008. – 22 окт. – С. 7.

Тӧро но крезьчи : легенда // Кизили. – 2006. – № 1. – С. 6–7.

Троссэ тодӥ : кылбур // Удмурт дунне. - 2014. - 20 июня. - С. 21.

Тушмон уг кӧл ; Бабасыр : сценкаос // Кенеш. – 2011. – № 10. – С. 95-100.

Удмурт театрез данъян кырӟан (гимн) // Удмурт дунне. – 2006. – 15 марта. – С. 7.

Узьмаг : куинь суредэн сценка // Кенеш. – 2008. – № 10. – С. 105–109.

Чонари : верос // Кенеш. – 2012. – № 9, 10, 11/12. – С. 7-21.

Югыт нунал асьме доры лыктӥз : Быдӟым Вормонлы сӥзем ӝыт / подгот.: Я. Зайцева, Г. Романова // Кенеш. – 2011. – № 3. – С. 90–92.

Яратон сыӵе вылэм : кык ёзэн водевиль // Кенеш. – 2005. – N 2. – С. 3-23.

Берыктэмъёсыз

Козлов А. Вӧсь : верос // Кенеш. – 2007. – № 9. – С. 51–55.

Ломберский И. Зэмос ним : верос // Удмурт дунне. – 2006. – 27 июня. – С. 7.

Федаренко А. Нюркуд : верос // Кенеш. – 2007. – № 9. – С. 46–50.

Кырӟанъёсыз

Шкляев Н. Асьметэк тӧлӟиз льӧмпу // Кенеш. – 2008. – № 5/6. – С. 50. ; Кенеш. – 2010. – № 5/6. – С. 107.

Трубачев Н. Валаса но ӧй ву / крезьгурез Н. Трубачевлэн но Ю. Кузьминалэн // Кенеш. – 2008. – № 5/6. – С. 66.

Уткина Н. Выль ар вальс // Ашальчи. – 2008. – № 5. – С. 37 ; Кенеш. – 2010. – № 5/6. – С. 110.

Оськин М. Герберсяська усьтӥськыку : "Герберсяська усьтӥськыку..." // Кенеш. – 2008. – № 5/6. – С. 19–20.

Сабреков П. В. Девичья песня "Если б облаком кудрявым я была..." // Ашальчи. – 2008. – № 1. – С. 94 ; Пою тебя, мой край родной : сб. песен композиторов-любителей Удмуртии. – Ижевск, 2008. – С. 53–54.

Италмас сяська : кылбур-кырӟан / кылъёсыз Галина Романовалэн ; крезьгурез Виталий Шоркинлэн // Кенеш. - 2014. - № 5-6. - С. 67.

Оськин М. Мӧзмем сюлэм / крезьгурез М. Оськинлэн но Н. Уткиналэн // Ашальчи. – 2011. – № 1. – С. 38.

Шоркин В. Нюлэскын но, ой, узыед // Ашальчи. – 2011. – № 1. – С. 38.

Бекманов Г. Ой, мар карод? / крезьгурез Г. Бекмановлэн но В. Карповлэн // Кенеш. – 2008. – № 5/6. – С. 54–55.

Бекманов Г. Ой, шудо егит дыр! // Ашальчи. – 2007. – № 5. – С. 36 ; Кенеш. – 2008. – № 5/6. – С. 54.

Сабреков П. В. Опьянеем от любви : "Опьянеем от любви..." // Ашальчи. – 2008. – № 1. – С. 94.

Кузнецов П. Пичи дыры : "Тани вуи вордскем гуртам..." // Кенеш. – 2010. – № 5/6. – С. 108–109.

Пумиськон вальс // Ашальчи. – 2008. – № 6. – С. 26.

Карпов В. С. Сюлэмы кырӟа : "Мон уӵы ӧвӧл..." // Вакыт (Игра). – 2007. – 13 июля.

Сюресъёс "Шаерамы сюресъёс. .." // Кенеш. – 2007. – № 5/6. – С. 111.

Зорина О. Сюсьтыл ӝуа // Кенеш. – 2008. – № 5/6. – С. 56.

Антонова З. В. Ӧтёзы яратӥсь синъёсыд : "Сюлэмме куректон ке зӥбиз..." // Ашальчи. – 2009. – № 1. – С. 20 ; Удмурт дунне. – 2006. – 10 нояб. – С. 14.

Тон ӧвӧл мынам : кылбур-кырӟан / кылъёсыз Галина Романовалэн ; крезьгурез Виталий Шоркинлэн но Геннадий Бекмановлэн // Кенеш. - 2014. - № 5-6. - С. 70.

Диева А. Тон – мынам шумпотонэ // Ашальчи. – 2008. – № 5. – С. 37 ; Кенеш. – 2008. – № 5/6. – С. 68.

Кузнецов П. Н. Удмурт театр : "Ӧстэ вӧл-вӧл усьтэм дырысь, театрмы..." // Удмурт дунне. – 2006. – 28 нояб. – С. 8.

Горлов А. Удмурт театр : "Ӧстэ вӧл-вӧл усьтэм дырысь, театрмы..." // Удмурт дунне. – 2006. – 28 нояб. – С. 8

Горлов А. Удмурт театрез данъян : "Нош ӧсъёстэ ке усьтӥськод, театрмы..." // Кенеш. – 2010. – № 5/6. – С. 106.

Баталов А. Учко яратӥсь синъёсад : "Сюлэмме куректон ке зӥбиз..." // Кенеш. – 2010. – № 5/6. – С. 109.

Крестьянинов В. Ӟыгырты юнгес : "Пичи пинал сямен..." // Кенеш. – 2011. – № 3. – С. 107.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.