Чернова Лидия

Лидия Дмитриевна Чернова - нылпи кылбурчи, Удмурт Элькунысь писательёслэн огазеяськонзылэн ёзчиез.

Улон сюресэз

Чернова Лидия Дмитриевна вордӥськиз Эгра ёросысь Зура черкогуртын 1927-тӥ арын 1-тӥ оштолэзе. Лида вордӥськиз огшоры семьяын. Соос вал куинь нылъёс, Лида – шоретӥез. Анаез – Фёкла Кирилловна, атаез – Дмитрий Данилович Стрелковъёс туж сюлмаськизы нылъёссэс быдэ вуттыны. Анайзы ликбезэз гинэ йылпумъямын, ужаз колхоз ужын. Атаез туж визьмо, ужез яратӥсь вал. Кема аръёс ӵоже парсь вордон фермаен кивалтӥз, бератаз колхоз тӧро вал.

Зураын туж узыр библиотека вал. Пичи Лида ӵемысь отчы пыралляны яратылӥз. 5–6 классын дышетскыкуз, Жюль Вернлэсь вань гожъямъёссэ лыдӟиз. Со вакытэ ик быдэс улытозязлы сюлэмаз пыризы В. Каверинлэн «Два капитана» произведениысьтыз геройёсыз. Зураын ик Лида йылпумъяз сизьым классъем школаез. Школаын яратоно предметъёсыз история, география но литература вал. Ас доразы ик семилетней школаез йылпумъяз.

Нылыныз Татьяна Черноваен но нунокеныз Дарали Лелиен

«Ерпечка аресэ — кӧшкемыт ож вакыт», — одӥгаз кылбураз тазьы гожтэм Л. Чернова, 14-18 арессэ тодаз вайыса. Ма, кызьы со курадӟемъёсты вунэтод?!

Дырызлэсь вазь быдэ вуон. Юнманы вуымтэ пельпумад вормонтэмзэ но ӝутон. Бусыысь но кенос котырысь вань ужъёс киын быдэсъяськизы угось. Аран, етӥнан — вир потымон сюрмылэм киос. Собере — кутсаськон, ю шертон, ю тысез заготзерное вуттон но сое куинетӥ-ньылетӥ этаже мешокъёсын ӝутьян.

Шонергес ке, ож кутскемлэсь азьлогес ик быдэ вуымтэос секыт уже кыткемын ни вал. Зура ёросысь Мувыр гурт вадьсысь Лозо шурез тымыны малпаллям. Сое тымон понна, ой-ёй, мабыдӟа кужым кулэ! Пиналъёс — 13 аресъем «труженикъёс»! Лозо вылын та электростанция лэсьтӥськыса ӧз вуы, Быдӟым ож пуромиз. Нюлэс дасян. 13—14 аресъем мугорлы талэсь но секытэз ӧй ни вал кадь. Дауръем кызъёсты, пужымъёсты огшоры пилаен погыръязы, зӧкесь улвайёсты тӥрен коразы…

16 аресэз тырмыса ӧз вуы, 1943-тӥ арын южтолэзе Иже машзаводэ вербовать каризы. Ож тӥрлык дуронын шутэтскон нуналъёстэк 12 часэн ужазы. Чиньыос вир потытозь пӧсьтэмын, купырскемын. Эстымтэ цехын кезьыт. «Бадӟым бакъёсысь шунтэм вуэз станоке понӥськод но, смена куспын сыӵе кынме — чиньыос уг чидало. Кӧт сюман ноку но уз вуны. Сиён нерге — сьӧд кубиста куарен коллё ву. Нокыӵе вӧйыз но, картошез но ӧвӧл. Москваысь Козлов но Ворошилов вуылэм бере шыдамы сезьы пызь ватсаны ӧдъязы. Нуналаз 600 грамм нянь сётъязы», – со аръёсты тодаз вайыса, вера Лидия Дмитриевна. 1945-тӥ арын гудырикошконэ гинэ егит нылаш гуртаз бертыны быгатӥз. Собере ужаз леспромхозын.

Война бере бухгалтере дышетскиз. Собере 14 ар пала лыдъян-чотан ужын вал. Кӧня ке МВД-ын ужаз. Улон сюрес сое Сибере но вуттылӥз, картсэ отчы ужаны лэзьязы. Собере ини улыны интыяськизы Можга ёросысь Пазял гуртэ. Татын 1963–1977-тӥ аръёсы Лидия Чернова библиотекаын ужаз. Со вакытэ книга лыдӟонни вал гуртлэн лулчеберетъя, политикая центрез. Туж пӧртэм ужъёсты быдэсъяно луиз.

Бӧрсьысь бӧрсе Лидия Дмитриевналэн быдэ вуизы куать нылпиосыз. Нылъёсыз ас удысъёстӥз ик мынӥзы: вуриськись, библиотекарь но кылбурчи (Чернова Татьяна Николаевна) луизы.

Со аръёсы Ижысь Ленин нимо библиотекае-а, бибколлекторе-а мынэ, одно ик газет-журналъёслэн редакциосазы вутскыны тыршылӥз. «Пыдъёсы асьсэос отчы кыскизы, выль эшъёсы доры», – шуэ кылбурчи. 1964-тӥ арын Удмуртиысь писательёслэн ӧтчамазы ӧтизы Лидия Черноваез но. Василий Широбоков киоссэ вӧлъяса ик пумитаз: «Лидӥ, вуид?». Соку ик куд-ог писательёсын тодматскиз.

Берло дыре солэн улон сэрегез Ижкарын, нылпиосыз но нунокоосыз вӧзын.

Гожъямъёсыз сярысь

1960-тӥ арын Лидия Черновалэн «Советской Удмуртия» газетын нылпиослы «Куатаськись» кылбурез печатламын вал. Кылбурчилэн мылкыдыз ӝутӥськиз. Гожъямъёссэ синйылтӥллям, шӧдске. Пумен кылбуръёсыз печатласькыны кутскизы «Дась лу!», «Советской Удмуртия» газетъёсын но «Молот» журналын. 1965-тӥ арын потэм «Ныл сюлэм» огъя кылбур бичетын Л. Черновалэн но чуръёсыз вань ини.

Нырысь-вылысь кылбуръёссэ Лидия Дмитриевна ас пиналъёсызлы гинэ лыдӟе ке вал, бӧрысьгес сое асьсэ школаязы но, ёросазы но ӧтьылыны ӧдъязы.

Удмурт элькунысь йӧскалык библиотекаын пумиськон

Лидия Чернова тросэзлы тодмо нылпиослы кылбуръёсыныз. Пиналлэсь сямъёссэ со, куать нылпиё анай, зэмос улонъя ӟеч тодэ. Соин сокем тунсыкоесь образъёс, югдуръёс но геройёс кузёясько кылбуръёсаз. Лыдӟись кие вуизы пиналъёслы ньыль кылбур бичетъёсыз: «Ӟеч уж» (1967), «Кин отын?» (1981), «Кин уг гажа чылкытэз» (1989), «Тубат бӧрсьы тубат» (1995). Кыкез нырысетӥ бичетъёсыз берыктэмын ӟуч кылэ. Кылысь кылэ берыктон бордын ужазы Олег Поскребышев но Владимир Емельянов.

Печатласькиз «Вордскем кыл» журналлэн буёло суредъёсын пичи книжкаяз: «Котьма сярысь ӧжытак» (1994), «Чырыен-пырыен» (1996), «Эмъяськон турын будос» (2003), «Нюлэс кушын ӵошатскон» (2007).

Кылбурчи быгатыса куараосын шудэ, нылпиослы яркытэсь, син азе пуктымон образъёс кылдытъя:

Пыштурын, пыӵтурын, Тэркыен пуктӥм узы.

Ческыт зыныз корка тыр. Ӵыжыт кисьмам узыос

Самовармы ӝӧк вылын, Ыме пыро асьсэос!..

Чай юыны тон но пыр. Пӧсямы, ӵыжектӥмы –

Пыштурынэн чай вӧзы Тӥнь кыӵе милям чаймы!

Лидия Черновалэн книгаосаз лулъямын, шуыны луоз, котырысь дунне. Тазьы ик адӟиськод, кийыгыриеныд (на ощупь) шӧдӥськод кадь котькуд турын-куарез, нымы-кибыез, писпуэз, тылобурдоез но пӧйшурез. Та нылкышно ноку но соос сярысь гожъямысь ӧз дугдылы. Шумпоттытэ кылбургурезлэн пезьгыт луэмез но рифмаоссэ, кылсуредъёссэ ӟеч лэсьтэмез. Лидия Черновалэн гожъяськыны быгатонэз тужгес но яркыт усьтӥськиз берло бичетъёсаз пыртэм кузь кылбуръёсаз-выжыкылъёсаз: «Нюлэс школа», «Нюлэс кушын ӵошатскон». Пӧйшуръёсты быгатыса суредамез сяна, мадёнзэ тунсыко радъяны пӧрмытэмез но татын зол шӧдӥське.

Горд Коньы, шуо, толон

Кыз борды ошем ялон:

«Усьтӥське нюлэс школа,

Лыктэ, лыктэ куш пала!»

«Гожъяськыны кутскон вакытам ӵушкаллян дыръёссы но вал. Тужгес но трос меӵкытъяз А. Н. Клабуков. Но мон ваменэс адями. Маке борды мертчи ке, уг дугды ни, усьытозям ужало. Вал вазиськонъёсы В. Романовлы но. Адямиез со могак ӧз карылы. Г. Ходырев ялан мылкыдэз лӧпкытъяз, «Айбат!», «Умой!», «Туж кельшиз!» шуылӥз. Туннэ чакласько но, А. Клабуков шонер, интыяз вералоз-ӵушкалоз вылэм. Ӧвӧл вылэм дыртоно…», – шуэ улонэз адӟем кылбурчи.

Собере ик кыкетӥ шоканэз усьтӥськылӥз кадь. Пушказ тымиськыса улэм мылкыдъёссэ «Улон — йыромон» книгаяз ӧръяз. Со 2000-тӥ арын потӥз.

Быдӟым ож вакытысь вань сю¬лэм вӧсьёсыз кылбур чуръёсы кисьтӥськизы. Тросэз соос берло книгаяз пыртэмын. Берло вакытэ Афганистанын, Чечняын ожъёс пуромылӥзы. Со¬ос но кылбурчилэн сюлэм вылтӥз вӧсь тулкымен погыльскизы. Ас пал бырем ожгарчиосызлы сӥзьыса, балладаос но гожтӥз.

Туннэ, оло, кин ке шедёз алӥсь:

Ортчем ожез эн бугыръя ни тон.

Сюлмы мынам ӧвӧл уго кӧлӥсь:

Уг тоды, зэм но, ма со буйгатскон.

Бускель кышно али но кайгыре.

Вӧсез солэн палаз уго вылам.

Пиез солэн – сьӧрлон Кабул выре

Дуно вирзэ кистьтӥз дурен…

Войналы сӥзем кӧня ке ӟуч кырӟнъёсты уд¬мурт кылэ берыктӥз: «Мамай кур¬ган», «Тушмон ӵушказ-сутӥз юртсэс» но мукет.

Лидия Дмитриевналэн тросэз кылбуръёсызъя удмурт крезьгурчиосмы – Пантелей Кузнецов, Николай Уткин, Александр Перфилович Петров (Яр ёросысь Ворца гуртын улэ) но мукетъёсыз – кырӟан кылдытъязы.

2002-тӥ арын толшоре Лидия Черноваез кутӥзы Удмуртиысь писательёслэн огазеяськоназы. Со нылкышно гожъяськисьлы вылӥ дунъет но, пыкъет но луэ.

Туэ тулыслэн пумаз Лидия Дмитриевналэн (Татьяна Николаевна Черновалэн, нылызлэн юрттэменыз) «Шурдыт выж» ӵушкась но серем пуштросо кылбуръёсын бичетэз лыдӟисьёс кие вуиз.

Та быдӟа арлыдэ вуыса вань ини маин данъяськыны. Устоосыз нылпи кылбуръёсыз но веросъёсыз учебникъёсы, хрестоматиосы пыремын.

Премиосыз

Удмурт Элькунысь лулчеберетъя министерстволэн почётной грамотаез, 1997.

Удмурт Элькунысь писательёслэн огазеяськонзылэн ёзчиез, 2002.

Удмурт Элькунысь ветеранъёслэн огазеяськонзылэн почётной грамотаез, 2007.

Библиография

Книгаосыз

Доброе дело : стихи для младшего школьного возраста / пер. с удмурт. О. А. Поскребышева. – Ижевск : Удмуртия, 1968. – 13 с.

Ӟеч уж. – Ижевск : Удмуртия, 1967. – 14 с.

Кин отын? : пичиослы кылбуръёс. – Ижевск : Удмуртия, 1981. – 16 с.

Кин уг гажа чылкытэз? : кылбуръёс, поэма-выжыкылъёс. – Ижевск : Удмуртия, 1989. – 32 с.

Кто там? : стихи. – Ижевск : Удмуртия, 1981. – 10 с.

Тубат бӧрсьы тубат : нылпиослы кылбуръёс, выжыкыл-мадёс. – Ижевск : Удмуртия, 1995. – 39 с.

Улон - йыромон : кылбуръёс. – Ижевск : Удмуртия, 2000. – 103 с.

Статьяосыз

"Берыктын уг лу вылэм..." ; "Вунэм кырӟанме вуттӥз капчи тӧл..." : кылбуръёс // Выль даур : прил. к газ. "Можгин. вести". – 2007. – 14 апр.

Вӧязы но... колӟазы : кылбуръёс // Кенеш. – 2013. – № 2. – С. 102-104. – (Оло зэм, оло даур)

Гочан ; Эх! Улӥськом! : кылбуръёс // Удмурт дунне. – 2007. – 30 марта. – С. 15. – (Шӧкыч).

Дун вулэсь эн кӧшкема ; "Шаерын тулыс шока..." ; "Ӵук-ӵукна" ; "Корказь урдсын – тёп-тёп-тёп!." ; "Шур валлин тӧлэд ортчиз..." : кылбуръёс // Вордскем кыл. – 2007. – № 4. – С. 34.

Дуно усиз ; "Алӥзы" ; Буш ; "Патриот" ; Лэсьтэ изъян ; "Жаляз" : вакчи басняос // Удмурт дунне. – 2010. – 2 апр. – С. 15. – (Шӧкыч).

Дуринчи ; Олокин ; Вожъяськи ; Муспотон ; Коньы ; Эх, ширтӥ! ; Алдаськись ; Маин сюдом? ; Осьминог ; Малы лекъяське? ; Тыршеммылэн емышез ; Узьыгумы эктытэ ; Губи дыр : кылбуръёс / Лидия Чернова // Вордскем кыл = Родное слово. – 2012. – № 4. – С. 36-38.

"Ӟеч уж" бичетысь ; "Кин уг гажа чылкытэз" бичетысь ; "Тубат бӧрсьы тубат" бичетысь : кылбуръёс // Удмурт нылкышно кылбуретлэн тулкымъёсыз / Л. П. Федорова. – Ижевск, 2007. – С. 92–108.

Ӟоз : кылбур // Кизили. – 2008. – № 8. – С. 9.

Ӟольгыри : кылбур // Покчи эше : 1–2-тӥ классъёсын ватсаса лыдӟон книга / М. П. Лаврентьева, Е. Н. Дмитриева, В. Н. Ившин. – Ижевск, 2006. – С. 28.

Керӟег ӟазег : верос // Ӟечбур! – 2012. – 5 апр. – С. 7.

Колыс ; "Ӟольгыри, ӟольгыри..." ; "Кече, кече..." ; "Кенӟали, кенӟали..." ; Пыштурынэн чай ; "Чон-на, чон-на, чонари..." ; "Чукырна, чукырна..." ; "Кучыран, кучыран..." ; "Туливить, туливить..." : кылбуръёс // Удмурт дунне. – 2010. – 23 апр. – С. 12. – (Ерпечкаос).

Кӧл, солдат ; Ӝегатом акшанэз... ; Тӥледлы йыбырттом : кылбуръёс // Удмурт дунне. – 2005. – 6 дек. – С. 5.

Кӧл, солдат ; Ӧтьымтэ уйвӧтъёс : кылбуръёс // Удмурт дунне. – 2006. – 23 мая. – С. 7.

Кӧлон гур ; Порпи : кылбуръёс // Ӟечбур! – 2012. – 5 апр. – С. 7.

Куараме сётӥськем тудвуо вакытэ : кылбуръёс // Кенеш. – 2012. – № 4. – С. 38–43.

Куинь вамыш ; "Бертон" : балладаос // Кенеш. – 2007. – № 3. – С. 19–24.

Лӧбычи ; Сусыпуос ; Катэм кион : выжыкылъёс // Удмурт дунне. – 2010. – 23 апр. – С. 12. – (Ерпечкаос).

Мадиськонъёс : загадки в стихах // Кизили. – 2008. – № 4. – С. 5.

Маскаръяськон : кылбур // Удмурт дунне. – 2005. – 21 янв.

Мурт бӧрсьы ; Йӧндыре ; Ньӧмыз понна ; Дыртэ... : вакчиесь кылбуръёс // Удмурт дунне. – 2005. – 27 мая. – С. 15. – (Шӧкыч).

Ньыль чурен : серемес тэчыраос // Удмурт дунне. – 2009. – 10 апр. – С. 15. – Пуштросэз: Колхоз сиськонниын ; "Пусйиз" ; Кузь кыл ; Ветлӥз кузяз ; Потэ, лэся, бурд ; Кузё шӧм.

Нюлэс кушын ӵошатскон : выжыкыл // Вордскем кыл. – 2007. – № 7. – Вкл. л. – ("Вордскем кыллэн" книжкаез).

Ой, шудэ-улмое... ; Макмыр ; Янгышаськем ; Сюлэмзэ чигиллям : кылбуръёс // Удмурт дунне. – 2006. – 30 июня. – С. 15.

Осень ; Зайчата и фотограф ; Муравьи. Я рисую / пер. Вл. Емельянова // Удмурты. – М., 2005. – С. 335–336.

Ошмес ; Ко-ко-рик ; Кот-котак ; Маймылъяськи... : кылбуръёс // Кизили. – 2012. – № 4. – С. 13.

Пислы мыкырсконо ; Сёт коньдон ; Йырыз уг вись : кылбуръёс // Удмурт дунне. – 2011. – 8 июля. – С. 15. – (Бышкись чуръёс).

Пышкылонъёс : В. Котковлы // Удмурт дунне. – 2005. – 18 янв. ; На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 253.

Сьӧд кырныж : поэма // Вордскем кыл. – 2006. – № 3. – Вкл. л. – ("Вордскем кыллэн" книжкаез).

Тӥледлы, ожгар пыр потэмъёс : кылбуръёс // Удмурт дунне. – 2009. – 8 мая. – С. 13. – Пуштросэз: "Тӥ утиды фашизмлэсь странамес..." ; "Лапкамын шай-выръёс..." ; "Нимтэм шай-выръёс..." ; "Кызьпуэ, кызьпуэ...".

Тол суред : кылбур // Удмурт дунне. – 2011. – 19 янв. – С. 8.

Тол суред ; Будэтӥ ачим ; Палэзьпу ; Вукуар вылын ; Шу ческыт, пе ; Тодӥз : кылбуръёс // Зарни дэремен шунды : семьяын лыдӟон книга. – Ижевск, 2006. – С. 112–113.

Тол суредъёс : кылбур // Удмурт дунне. – 2009. – 15 дек. – С. 7. – (Шудэлэ тӥ, серектэ).

"Тон вордскид вал, пие, кылчин такъяен" : поэма // Кенеш. – 2005. – № 5/6. – С. 89–92.

Туж курыт ук тодэ ваёнмы : кылбуръёс // Кенеш. – 2006. – № 8. – С. 51–53. – (Поэзия). Улытозь вунэтод-а тае? : кылбуръёс // Кенеш. – 2010. – № 4. – С. 50–51. – Пуштросэз: Быдэ вуонэд ; Улытозям уг вунэты ; Вунэм кырӟанэ ; Ӧвӧл чакласез ; Сак луэ! ; Вылын возь йырдэ!.

Эшлыко шаржъёс // Кенеш. – 2005. – № 1. – С. 102–104. – Пуштросэз: Петр Поздеевлы ; Фома Ермаковлы ; Петр Кубашевлы ; Александр Белоноговлы ; Кирилл Ломагинлы ; Анатолий Перевозчиковлы ; Вениамин Ившинлы ; Анатолий Уваровлы.

Юатэк малы пырид? ; Чуляби кадь ; Гудыри люкем ; Курдатэк ; "Тупи-тапи, тупи-тап..." ; Кионлэн ; Вожъясько ; Кинлы меда ; Куалялюльы ; Мар маде пипу? ; "Дырттӥд-вуттӥд..." : кылбуръёс // Вордскем кыл. – 2006. – № 2. – С. 41.

Юбилейлэн сурымез : эшлыко чуръёс // Удмурт дунне. – 2005. – 25 февр. – Пуштросэз: Алексей Шкляевлы ; Владимир Возняковлы ; Рашит Хайдарлы ; Зинаида Рябининалы ; Галина Романовалы ; Татьяна Черновалы.

Ялон, ялон... : ӵушкась чуръёс // Удмурт дунне. – 2006. – 19 мая. – С. 15. – (Шӧкыч).

Янгышсэ валаз : верос // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 111.

Кырӟанъёсыз

Антонова З. Толон гинэ : "Толон гинэ, толон гинэ..." / кылъёссэ гожтӥз Л. Д. Чернова // Удмурт дунне. – 2006. – 19 сент. – С. 7 ; Кенеш. – 2012. – № 2. – С. 108. – (Жингырты, удмурт кырӟан).

Шкляева Р. Нимтэм солдатъёс : "Огинын ӝӧк котыр..." / кылъёссэ гожтӥз Л. Д. Чернова // Кенеш. – 2005. – № 5/6. – С. 110.

Шкляева Р. Сюлэмы бӧрдэ : "Улӥсько но, шокасько но..." / кылъёссэ гожтӥз Л. Чернова // Ашальчи. – 2006. – № 5. – С. 37.

Берыктэмъёсыз

Шаврин Ю. Партизанка ; Тонэ малпай : кылбуръёс // Удмурт дунне. – 2012. – 16 мая. – С. 5. – (ИнГОЖ).

Исаковский М. Тушмон сутӥз юртсэ : кылбур // Удмурт дунне. – 2011. – 22 июня. – С. 8.

Боков В. Мамай вырйылын : кылбур-кырӟан // Удмурт дунне. – 2005. – 30 марта.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.