Егорова Любовь Ивановна

Книга вылын – ӝужъе лул-визь

Егорова Л. И.

Любовь Ивановна Егорова – шаерысьтымы Национальной кун библиотекаысь валтӥсь библиограф, Удмуртиысь кун премилэн лауреатэз, Удмурт Республикаысь культура удысысь дано ужась, ветеран.

Челябинскысь культурая институтэз йылпумъямез бере со 37 ар пала тырше ни пӧртэм лыдӟетъёсты калыке вуттон бордын. Туннэ понна милям библиография удысамы со кадь золэз специалист ӧвӧл, тазьы дунъяло сое эшъёсыз.

Любовь Егоровалэн тыршеменыз но кивалтэменыз библиотека дасяз удмурт чеберлыко литературая, Удмурт шаермыя, удмуртъёслэн историзыя, этнографизыя, археологизыя бадӟымесь указательёс но юрттэт сётӥсь мукет книгаос. 1999-тӥ арын библиографъёс но программистъёс пусъемын Удмурт Республикалэн кун премиеныз. Таӵе дунъет– Россиысь библиотекаос понна нырысетӥез.

Кемалась синмаськыса учкисько ни та кышномурт шоры. Солэн пуш ласянь пиштӥсез вань кадь. Туж узыр солэн лул дуннеез, но кинлы ке сое усьтыны уг дырты. Ас понназ, асэныз но книгаосын, солы мӧзмыт ӧвӧл, шӧдске.

«Дышетӥсь мон уг луы»

Быдӟым ож бырем бере куинетӥ араз Кизнер ёросысь Вуж Кармыж (Бызара) гуртысь огаз семьяын вордскиз Люба нылзы. Улыса-вылыса югыт дуннеез адӟизы Тамара, Витя, Аля но Саша. Озьы, гуртын тросэзлэн сямен ик, Егоровъёслэн семьязы трос нылпиё лыдъяськиз. Но мукетъёсыныз ӵошатыса, та сузэр-вынъёс тус-тусэсь, чалмытэсь вал, мултэс юр-яр карыны ӧз яратылэ.

Выжызыя мынӥллям, шӧдске. Анайзы, Татьяна Алексеевна, 4 класс гинэ тодон-валанэн кышномурт, гуртысь лавкаын вуз кариз. Атайзы, Иван Егорович, кӧнялы ке тросгес дышетскем адями, счетоводын, учётчикын ветлӥз.

Шудонэн-шоккетонэн йырин ӧй вал. Нуналлы быдэ семья сюлмаськиз кӧттыр шедьтон сярысь. Анайзы 70 иськеме Киров улосысь Сосновка городэ няньлы кошке ке, нылпиос укное учкылэмысь уг дугдыло ни: ку бертоз ни мамазы, сюрес вылын маке ӧз луы-а...

Нодлыко будӥз Люба. Вить-куать аресын букваосыз тодэ ни вал. Соин ик арессэ возьмаса ӧз улы – школае куриськиз. Дышетскыны визьмыз тырме бере, малы пыд пуктод – кутӥзы.

Кармыжысь покчи классъёсысен ик пичи Люби туж ӟеч дышетскиз, Арвазь-Пельгае (Возьпуме) вамыштыса, ӵыжыт пиштӥсь отметкаосыз понна ӵыжектоно ӧз луылы. Котомкаяз «5»-ёс гинэ вайылӥз. Арифметика но алгебра яратоно предметъёсыз луизы.

Школаез ушъян грамотаен йылпумъям ныллы матысез сюрес одӥг: Можга педучилище.

Татын туж кельшизы дышетӥсьёсыз. Уката но Серафима Загребина, Григорий Данилов. Таизлэн литкружоказ ӧз ветлы, но хорын кырӟалляз, оркестрын домраен шудылӥз.

– Кылбурчи яке артист луыны ӧй малпа. Озьы ик – дышетӥсь но, – малпанзэ вера Любовь Ивановна. - 4-тӥ курсысен практика дыръя мон сое валай. Урокъёсын трос вераськыса «жадисько» вал. Классэн кивалтӥсьмылы Серафима Петровналы озьы ик шуи: дышетӥсь луон – мынам удысэ ӧвӧл.

Озьы ке но... Дышетскемын бере, тодэмдэ уже кутоно. 17 аресъем дышетӥсь Любовь Ивановна ас школаяз ик берытскиз но куинь ар нуиз физика предметэз. Но сюлэмыз кыстаськиз, пуш куараез шуиз: та мынам ӧвӧл... Ог арзэ Крым-Слудкаын интернатын воспитатель вал, мукет арзэ Васильевоын покчи пиналъёсты дышетйз. Озьы, вить арлы тырмем чиданэз чигыса, культурая институтэ «пегӟоно» кариськиз.

Ижын, Культурая министерствоын, Любовь Егороваез умой пумитазы, Челябинскысь иститутэ направление сётӥзы. Кыӵе специальностез быръён сярысь малпаськонэз ик ӧй вал – библиотековедение но библиография.

Ньыль ар одӥг кузь нунал кадь ортчиз. Книгаос, гурезь ӝужда книгаос... Йырез ӝутъятэк пукон, лыдӟетъёсыз бугыръян...

Институтысь Егорова визь люк луыса потӥз. Ленин стипендиат вал. Горд дипломеныз – вылӥ квалификациен библиотекарь-библиограф – со вамыштӥз шаерысьтымы Ленин нимо кун библиотекае.

Син кышка, ки лэсьтэ, йырвизь пужнытэ

Любовь Егорова ужзэ мытӥз библиографияя но справкаосъя отделын. Татысен шаертодон борды басьтӥськиз. Но сое выжтӥзы гурт удысъя ёзэ, кивалтӥсе. Ӵем поталляз ёросъёсы, гуртъёсы – библиотекаослы юрттэт сётоно вал, соос лэсьтылӥзы асьсэ указательёссэс. Со сяна, гурт удысъя выль тодон-валан сётӥсь иворъёс бордын ужано луиз.

Шаертодонъя ёзын ужасьёс 1986-тӥ арын. Кивалтӥсьсы – М. Самсонова кыкетӥ радын паллянысен кыкетӥез.

1984-тӥ арысен выжыяськиз шаертодонъя отделэ. Мария Михайловна Самсонова кивалтэм улсын гижысь-пиньысь кутскизы удмурт литературая указатель дасян борды. Нырысетӥ «емышсы» пӧрмиз 1980-тӥ арын. Авторъёсыз – М. Самсонова, М. Килина но Л. Егорова. Со 367 бамен, татчы пыриз 1917-тӥ–1957-тӥ аръёсы пӧртэм удмурт изданиосын печатласькем ужъёс сярысь ваньмыз ивортон.

М. Самсонова но Л. Егорова саесъёссэс эшшо золгес пужалтӥзы. Кыкетӥ указатель дасязы. Со потӥз 1987-тӥ арын, 379 бамен. Таяз – 1958-тӥ арысен 1984-тӥ арозь печатлам ужъёс.

– Кыкетӥез указательмы ӟечгес пӧрмиз, – ӵужектэм бамо-выло книгаез, самой дуно арбериез сямен, кияз кутэ Любовь Ивановна. – Нырысетӥ книгаысь тырмымтэоссэ лыдэ басьтӥм. Тани учке ай, кӧня пӧртэм статья ним пыриз таяз указателямы –11 сюрс 774. Мар печатлазы (яке ӧтчамъёсын веразы) литературамы сярысь И. Наговицын якеТ. Борисов, К. Герд яке мукетыз, соку ик шедьтыны луэ статьялэн номерезъя. Тани ойдо ай, кылсярысь, учком...

Любовь Ивановна дано артисткамы Нина Бакишева вылэ чиньыеныз дугдӥз. 5 сюрс 640-тӥ номер. «Ӝужась талант» нимо статья. Потэмын «Советской Удмуртия» газетын 1958-тӥ арын 19-тӥ июне. Авторез – Аркадий Клабуков.

Тазьы та книгаысь ик шедьтыны луэ сюлэсь уно гожъясьёсмылэсь 25 ар куспын печатламъёссэс. Кудӥз соос нимаз книгаен потэмын, кудӥз – газет-журналъёсын, альманахъёсын.

«Литературная жизнь Удмуртии» указательёс – со удмурт гожъясьёсмылэн 65 ар люкам шыкысазы пырыны усьтон. Со туж дуно луэ критикъёс, литературоведъёс, студентъёс, дышетӥсьёс понна. Пусйыны кулэ на: Удмуртиысь авторъёсмылэн кыкетӥ указательзы Россиын ялэм конкурсын 3-тӥ интые потӥз.

– Со гожъямъёс-печатламъёс луо мында люкаськемын ни ук, уката туала аръёсы. Кызьы тӥ ваньзэ вуттӥськоды? – библиографлэн уженыз тодматскемея юанъёсын ёртыны кутски.

– Ма, азьло капчигес ик вал, - валэктэ Любовь Ивановна. – Кӧня ке гинэ пумо газет-журнал потӥз ук. Али – сюлэсь но ортчемын. Нуналллы быдэ котькудмылы кӧня ке изданиез учконо луэ. Вакчияк аннотациын статьялэсь пуштроссэ усьтоно. Со понна «вирсэрзэ» – валтӥсь кылъёссэ, предложениоссэ – шедьтоно.

– Котькуд гожъямез, иське, сэстоно-сӥсъяно, йырвизь «пуж» пыр поттоно луэ. Тани «Удмурт дуннемес» ик басьтоно ке, кӧняезгес печатламъёс каталогады сюро?

– Ог 80 процентэз, шуыны луэ. Мон нуналмысь «Удмурт дуннеен» ужасько ке – учкисько ни: тунсыкоесь статьяосты потыло. Но чакласькод, кулэлыкез луоз на-а соизлэн яке таизлэн, аръёс ортчыса. Пичи заметкаосыз но каталоге пыртӥськом, таӵезэ мукет интыысь уд шедьты ни ке. Тани милям Иванова Елена Анатольевнамылэн пичи гинэ кин ке сярысь гожтэмез но пусйытэк кельтэмез уг поты. Шуом, Петров сярысь одӥг предложение сюриз. Но со эскерись-утчась муртлы кырмиськон сӥньыс кадь луэ.

– Псевдоним кутӥсьёсын йырин уд йыромиське-а?

– Ма, тодӥськом ни. Сараматова ке, со ик Фёдорова, Эграпи Микаль – Атаманов, Воръявай Василей – Ванюшев, Кучыран Юри – Лобанов, Анатолий Озёрный – Демьянов.

– Нош мукет интыосын, Удмуртилэн палэназ печатласькемъёсын, кызьы?

– Таиз ласянь авторъёс асьсэос милемлы юрттыны кулэ. Утчаськонмес капчиятон понна. Шуом, Сидоровалэн кылбуръёсыз Эстониын потӥзы – мед ивортоз.

Азьвыл книгаосъя, газет-журналъёсъя летописьёс печатласькыло вал, ми соосты учкылӥм. Али дорамы уг вуо ни. Собере «самиздат» пыр кӧня книгаос пото, библиотекае сюрес уг шедьто.

Шаертодонъя но фин-угор литературая ёзысь лыдӟиськон залын 275 каталог ящик люкаськемын ни. Паймод: со карточкаосы библиографъёслэн аръёсын-аръёсын кӧня визьзы тыремын. Та бордысен ик туала электрон вакытэ вамыштон кутскиз, указательёс но та бордысен кылдӥзы.

– Бен, указательмес та каталогъёсъя лэсьтылӥм, – вераськонмес азьланьтэ Любовь Ивановна. – Но трос вал ай тырмымтэез, соин ик УдНИИ-ысь библиотекаын уно бугыръяськоно луи.

Тани 1991-тӥ арын потэм «Удмуртия» указателез дасякум, карточкаосын 200 ящикез сэстоно вал. Асьме шаер сярысь ма гинэ гожъямын ӧвӧл, ваньзэ сое пыртод-а – указателе сюризы тужгес кулэ ивортонъёс гинэ, 270 бам тыр люкаськиз, со но утчаськись муртлы бадӟым юрттэт ини.

1995-тӥ арын национальной библиография отдел шаертодонъя ёзлэсь висъямын вал. Солы кивалтӥсе юнматӥзы Любовь Егороваез. Со аръёсы отдел туж бадӟым уж лэсьтӥз удмуртъёс сярысь тодытӥсь иворъёсты дасян ласянь. «Удмурты. История, этнография, археология» 717 бамъем книгае пыриз 4 сюрс 965 ужлэн нимыз. Соосты люкан-сузьён бордын кужымзэс ӧз жалялэ Елена Иванова но Людмила Кондратьева.

Со сяна но указательёс быдэсмизы: удмурт кылтодонъя, кырӟанъёсъя, Мултан ужъя, Кузебай Гердъя, Ашальчи Окия... Удмуртия сярысь библиография ужъёсъя указатель но лэсьтӥзы – библиография пушкын библиография, шуыны луэ. Огъя вераса, ог 25 сюрс карточка описание нылкышно ки но визь пыртӥ олокӧня пол потылэмын.

Зарни юбилейзэ пусъён вакытаз Любовь Егорова уж пӧлы выемын вал. Со бӧрсьы но валаса ӧз вутты кадь сӥ-дан каремзэс: 1999-тӥ арын эшъёсыныз басьтӥзы кун премия, та аре ик солы сётӥзы Удмурт Элькунысь культура удысысь дано ужась ним.

Азинскон дыг-могъёстэм ӧвӧл

Нырысетӥ ужан аръёс. 1976-тӥ ар. Шоразы Г. Калинина, библиотекалэн али директорез.

Ӟуч выжыкылын шуо: мадён чаляк вераське, нош уж ӝог уг лэсьтӥськы.

– Малпанъёсмы милям уката но бадӟымесь вал, – сюлмаськемзэ вера Любовь Ивановна. – Библиотекамы Национальной луэм бере 1990-тӥ арысен паськыт шонтӥськыны малпамы, но озьы гинэ ӧз пӧрмы ай. Удмурт театрлы сӥзем указатель, кылсярысь, быдэсмытэк кылиз. Туж потэ на вылэм удмурт литератураез 1990-тӥ-2000-тӥ аръёсы син азе пуктэм. Таизлы дыр ӧз тырмы на. Но ми тыршим удмурт кылэ чеберлыко берыктэмъёсты люкан бордын. Озьы электрон изданимы но пӧрмиз. Таиныз тросгес ужаз Ангелина Захарова.

– Табере лыдӟисьёс, библиотекае лыктыса, компьютерысь утчаськыны быгато ни. Луэ-а ваньзэ кулэ литератураез шедьтэмзы?

– Бен. 1993-тӥ арысен кутскыса, электрон амалэ выжонъя туж бадӟым уж лэсьтэмын. Киын гожъям карточкаосын мар гинэ вал, ваньмыз со электрон каталоге сюриз.

– Туж ӝегыт уж ӧвӧл-а со?

– Милемлы юрттӥз сканер – компьютерен бичанмес со капчиятӥз. Озьы ке но редактор сямен учкон, эскерон, тупатъян ужез туж уно ай. Компьютер но адями кадь, лэся. Тани Арекеева фамилиез тодмамтэ – Алексеева пуктэм. Соин сак эскероно луэ: кытын ке авторез вунэтэмын, кытын ке – статьялэн нимыз яке эшшо мукет. Кытын ке сканер милемыз «алда».

– Иське, шумпотонды палдурес ай.

– Компьютер – со умой вылэм, но юри библиотекалы дасям выль программа (IRВIS) керӟегъяськытэ. Шуг потэ, букваосыз но векчиесь. Ми тани 8 кузя ужаськом ке, ваньмы дышыны выриськом ай. Но маиныз таиз программа умойгес? Интернетлы тупамон, оскымонгес.

Бен, эли-кеби, турк-парк вырон та кышномуртлы уг тупа. Котькуд текстэз со мур малпаськыса, пыр-поч эскере но со ивортонэз методикалэн куронъёсызъя, шонер, ӝикыт вуттыны тырше каталоге. Ужаськод ке ужа, вань тодэмдэ сёт, вань кужымдэ пызьырты – таӵе малпан пыӵамын лулаз-вираз.

–Тазьы ик янгышъёстэк, чылкыт ужаны со дышетэ егитъёсмес но, – дунъяса вера шаертодонъя но фин-угор литературая ёзэн кивалтӥсь Надежда Лимонова. – Егитъёсты со шӧдымтэ улсын кадь чакла. Маке умойтэм ке, озьы вера, нокинлэн кӧтыз ӝож уг луы, ас янгышсэ валамез, тупатэмез гинэ потэ. Котькудӥз тодэ: Любовь Ивановналэн киыз вутскемын ке, отчы нырдэ уд чуртна ни.

Ӵемысь луылэ: книгаын сётэм библиография бордын тыршиз Л. Егорова, но фамилиез пуктэмын уг луы. Таиз ярам вылэм. Но вал ини сыӵе учыръёс но. Ӵыжектэм гинэ ӧвӧл, тӧдьыектод. Одӥг справочникез дасяку, Любовь Ивановна ӝытъёсы дораз пукылӥз, кулэезъя тупатонъёсын вырыса. Авторез ялан вуттылӥз ватсанъёс. Ужазы, ог-огзылы оскыса, нокыӵе огкыл гожтытэк, дун пуктытэк... Я, книга потӥз. Но сомында янгышен! Библиографлэсь тупатъямзэ пуктылытэк кельтӥллям.

Тазьы учкыса, мар кадь со, библиографлэн ужез – ас нырулдэ тодыса, пук но пук. Эсьма, библиотекарь калыкен ужа, книгаос сётъя. Нош мае со утчалоз-шедьтоз, кытын, ма пусъемын ке ӧз луы. Библиограф уго вань та книга возён-люкан-сётъян ужлы инъет кылдытэ.

Лыдтэм иворез йырын возёно. Любовь Ивановналэн ваньмыз ас интызэ шедьтэ. Та ласянь со математик но. Кызьы шуэ Надежда Лимонова, коть али ик пукты бухгалтерие – отын но быгатоз.

Вылтусыз но лулыз тупамын

Надежда Петровна синмаськемзэ вера:

– Та кышномуртлэн ваньмыз ог-огеныз тупамын, А. Чеховлэн верамаз выллем: вылтусыз но, пуш малпанъёсыз но. Уждурын гинэ зол профессионал ӧвӧл, улонын но со вылӥ куронъёс аслыз пуктэ. Пӧра ке, пӧра, ас дор палъёсыз кадь. Вуриське ке, уйзэ но уг кӧлы, быдэстыны тырше. Усто керттӥське. Нош кыӵе визьмо будэтӥз нылзэ... Огъя вераса, со мыным сыӵе потэ, кыӵе луыны кулэ зэмос адями, кышномурт.

Та вӧзы вераны кулэ одӥг-кык учыр сярысь. Библиотекарьёс чакламтэ ужез лэсьтоно луизы. Толэзь ини возьмало – ватсаса уждун уг тыро. Соку Любовь Ивановна кивалтӥсь доры мынэ: кыл сётӥды бере – быдэстэ.

Огшоры ортчыны уг быгаты городысь кырсь-пож вӧзтӥ. Тани Национальной библиотека вадьсысь сквер нокызьы уг утялтӥськы – гужем но ортче ни. «Альфа-Банклы» но, мукетызлы но со кулэ ӧвӧл – кузётэм инты. Любовь Ивановна олокӧня пол жингыръя Октябрь ёрос администрациысь техникая инспекцие. Соку гинэ уж кӧня ке вырӟе.

Любовь Егорова Карлуд шур дурын улэ. «Стримъёс» но «Диван ТВ»-ос та улыгысь вуж коркаосыз «вотэсаны» уг дырто. Бадӟым экранэн телевизорез куинь программа гинэ возьматэ. Трамвай дыбыртэм та чалмытэз ӧй сӧрысал ке, коркан шим-шимгес луысал, дыр. Пуныосыз но коӵышъёсыз пересьмыса-висьыса кельтылӥзы кузёзэс. Яшка, Жулька, Ляля... Ваньзы соос та пичи семьялы шунытсэс сётӥзы. Нылызлэн киыныз суредам патрет гинэ кылиз – Жулялэн тусбуез. Чорыгъёссы но ӧвӧл ни. Котырес аквариум,чылкытэз яратӥсь киосысь вольтчыса, пазьгиськиз...

Книгаос гинэ ас интызэс-ӝажызэс юн возё. Кузё кышно изьыны выдон азяз одӥгзэ одно ик кияз кутэ. Али солэн эшез Жорж Санд, мукет дыръя - Агата Кристи, Конан Дойль... «Мир книги» каталог пыр лыдӟымтэ писательёссэ куриз. Туж яратэ детективъёсыз – соос огсыр мынӥсь улонзэ зуркато кадь. Нош Паустовский – таиз яратоно писателез – нош ик берыктэ дор палысьтыз шыпыт инкуазе, куке но усьтэм чеберлыке...

<...>

– Кызьы тон монэ вордӥд-будэтӥд – сыӵе ӟеч, шонер? – эшъёсыз пӧлын висъяськемзэ шӧдыса, юаз Таня.

Анай шуак вераны ӧз тоды, шуиз гинэ:

– Ӧйтӧд, ачимъя, дыр... Таня анаез вӧзын библиотекаын тыршиз, университетын дышетскыкуз ик. Нош одӥг пол Германие гувернантка луыса ужаны мынӥз но тодматскиз Саша нимо пиен. Солэн атаез – немец, нош анаез украинка вылэм.

– Казахстанын быдэсмем эмеспие лул-сюлэмыныз ӟуч вылэм, – шуэ Любовь Ивановна. – Алина нылзы вордскем бере Таня, пе, шуисько: тон сое немец кыллы дышеты, нош мон – ӟуч кыллы. Саша пумит луэм: дорамы немец сямен медам, пе, вераське...

Таня Эстерле фамилия кутӥз. Кузпалъёс Мюнхен дорын уло, кыксы ик аэропортын ужало. Саша сюресчиослэсь котырзэс эскере, Таня – документъёссэс. Удмурт университетэз горд дипломен йылпумъям ныллы шуг ӧз луы немец улонлы дышыны. Англи кылэз но со вить чиньызэ кадь тодэ, итальян сямен но кӧня ке быгатэ ни. Кылъёсты тодэмез туж юрттэ куноосты пумитанын-келянын. Туэ феврале Мюнхен аэропортысен асьме Президентэз А. Волковез пумитаны кылдӥз.

Улыса-вылыса ас выжыяд ик тупанъёс но, мынтӥт луонъёс но пумисько. Любовь Ивановна тодэ на: Нырысетӥ дунне оже пыриськем песятайзэ гуртын немец шуо вал, та кылэз со ӧз ке но тодылы. Нош али немец ныллы пӧрмытыны луоз-а меда Алина внучказэ? Тани туэ сӥзьыл садике мыноз ни со. Апреле уго нуныкайзылы кык арес тырмиз. Визь пог. Телефон пыр ӵужанаеныз вераське ке, аресыз школае дасяськыны вуэмын, кожалод. Любовь Ивановна арлы огпол, отпуск но шутэтскон нуналъёссэ люкаса, ог кык толэзьлы кунгож сьӧры нылыз доры шонтылэ. Сотэк чидантэм луысал, дыр.

Квартираысьтыз одӥгаз ӝажыын нимазъяськыса кыллё горд выло кагазъёс – СССР вакытэ Москваысь вуэм кык Данъян грамота. «10-тӥ пятилеткалэн ударникез», «Усто ужам понна» пусъёс (знакъёс). Соос пӧлысь огез гинэ но Россилэн ветеранэз ним басьтыны луонлык сётэ ни.

Совето власть ӧз обидьы аслыз шутэтскыны вис сётытэк ужам кышномуртэ. Беромысагес ке но, наградаос вуылӥзы, улон воштӥськем бере но...

Со куспын ик, вылӥысь ыстэм «кузьым» сямен, ымныре пуксизы векчи-векчи гожъёс. Озьы луэ пырыен-пырыен лул кужымез кыскись ужлэсь. Инкуазь уго Любовь Ивановналы сётэм туж юн чидан, тыршон мылкыд. Пуконо, пуконо – ваньзэ вуттоно шорсюлэмозяз. Алгебраын задачаез быдэстэм сямен: сайкыт но валамон мед луоз.

Но улон аслэсьтыз «сюръёссэ» пуктылэ.

– 2007-тӥ арын феврале Кавказысь Краснокумское черкогуртын улӥсь Аля сузэрелэсь ӧтён вуиз: мамамылы секыт, пе, туннэ-ӵуказе гинэ чидась... Ижын улӥсь Саша выныным отчы кошким – 27-тӥ феврале, 60 арес тырмон нуналам. Озьы возьмаса кадь улӥм анаймылэсь улонэн люкиськонзэ. Берытским. Та бӧрсьы толэзь гинэ улӥз на со.

Киын пӧлы-чиньыос пӧртэмесь. Егоровъёслэн семьяязы но озьы ик. Вить нылпи пӧлысь котькудӥзлэн адӟонэз аслаз: кинлэн вольытгес улонэз, кинлэн чукин-бекингес. Люба, Любовь Ивановна, ваньмызлэн азьпалазы, аслаз сайкем сюрестӥз мынэ.

Источник:

Чернова, Т. Н. Книга вылын ӝужъе лул-визь // Удмурт дунне. - 2010. - 4 июня. - С. 6, 11. - (Удмурт кизилиос)..

За предоставление материала выражаем огромную благодарность редакции газеты "Удмурт дунне"