Васильев Константин

Кырӟанзэ воштӥз бызьылонэн

Спортысь амалъёс пӧлысь тужгес дунтэмез но вань калыклы сузьтӥськымонэз луэ капчи атлетика. Дунтэмезлы синмаськыса ик, пыдын бызьылыны кутскем спортъя мастер Константин Васильев.

Висёнъёслы пумит

- Дэри ёросысь Шор Постол гуртын вордски, отысь ик школаез йылпумъяй, - веранзэ мытӥз шаерысьтымы одӥгез кужмоез спортсмен Константин Васильев. - Пичи дыръям чиед мугоро вал, весь висьылӥ. Анае Светлана Александровна школаын ӟуч кылъя но литературая урокъёсты нуиз ке но, монэ солы дышетыны ӧз кылды. Атае Георгий Григорьевич мувӧй кыскон удысын ужаз. Анай-атаймылэн ми куинь пиналъёссы вал ке, будӥмы ньыль кузя. Матысь ӵыжы-выжыосмы шудтэм учыре шедизы, нылзы ми доры лыктӥз. Нылъёс пӧлын одӥгнам пи будӥ ке но, нуныясез сокем ӧз кылды. Юртъер котырын маке берганы выри, урод дышетскон сярысь веранэз ик ӧвӧл, соку ик ваньзэ анайлы вуттылӥзы.

Котьку синмаськыса учкылӥ анаелэн двоюродной агайёсыз шоры. Митрошинъёс ваньзы сямен спортэн эшъяськемын. Николай Павлович пыдын бызьылонъя спортъя мастер луэ, нош Михаил Павлович спортъя мастере кандидатлэсь куронзэ быдэстӥз. Соослэн чебер медальёссы шоры учкыса, мынам но бызьылэме потӥз. Озьы, 4-тӥ классын дышетскыкум, нырысьсэ вамыштӥ спортъя секцие. Вылаз ик, пыдын бызьылон понна номыр выльзэ басьтоно ӧй вал.

Нырысетӥ тренере Ольга Алексеевна Рогожникова (Малых) мылкыдме бурдъям бере нуналлы быдэ бызьылонъя секцие ветлыны кутски. Нош 5-тӥ классысен нырысетӥ вормонэ вал. Школаысьтымы 5-тӥ-7-тӥ классъёсын дышетскись пиналъёс куспын пыдын бызьылонъя ӵошатскон ортчиз, мон ваньзэс азьпалтӥ. Мукет арняяз Ожмос гуртэ мынӥмы, отын но аслэсьтым бадӟымгес куд-ог пиналъёсты азьпалтыны быгатӥ, 3-тӥ инты басьтӥ. Ӵошатсконысь бертыса, эшшо но бурдъяськи, кужмогес луэме потӥз. Со дырысен спортлы нимысьтыз саклык висъяны кутски.

Бадӟымгес классъёсын дышетскыкум, валай, кужмо лыдпус возьматон понна эшшо тросгес бызьылоно шуыса. Шаерысьтымы школаын дышетскись пиналъёс пӧлын арлы быдэ спортъя фестиваль ортче. 2002-тӥ арын мыным но отчы пыриськыны удалтӥз. Нырысетӥ араз ик 2 медален бертӥ, 1500 метрын ворми, 3 иськеме бызьылонын куинь кужмоез пӧлы шеди. Школаез йылпумъян вакытам шаерысьтымы одӥгез кужмоез спортсмен луи. Ӵапак со вормонъёс монэ бурдъязы выль стартъёслы дасяськыны, малпаськыны кутски кунгож сьӧрысь ӵошатсконъёс сярысь. Пыдын бызьылыны кутскемме адӟыса, анай-атае ӧз но оске вал, чиед мугоро пизы куке-соку Россиысь ӵошатсконъёсы пыриськоз, вормонъёс басьтоз шуыса.

Вордскем шаер дуногес.

- 2002-тӥ арын школаез йылпумъяса, малпасько вал пырыны Удмурт кун университетысь мувӧй поттонъя но газъя факультетэ. Ӧз кылды, конкурс пыр ӧй ортчы. Соку валай: мынам улонэ - спорт, солэсь кыдёке уд пегӟы. Вамыштӥ УдГУ-ысь мугор кыдатон культурая но спортъя факультетэ. Нырысетӥ нуналысеныз ик тренировкаос борды басьтӥськи. Мугорме кыдатыны но бадӟым спортозь ӝутскыны юрттӥзы Владислав Сулима но Анатолий Корепанов тренеръёс. Анатолий Всеволодовичен туннэ но огкылысь ужаськомы.

Бадӟым малпанъёс улонын быдэсмо вылэм. Удмурт кун университетысен нырысьсэ пыриськыны кылдӥз кунгож сьӧрын ортчем ӵошатсконъёсы. Италие вуылэмме туннэ но тодам вайисько. Европаысь юниоръёслэн пыдын бызьылонъя ӵошатсконазы пыриськыса, нимаз стартын медаль басьтыны ӧз удалты ке но, аслым трос тунсыкозэ басьтӥ. Одӥгаз стартын 4-тӥ интыозь ӝутскыны кылдӥз. Куинетӥ интылэсь трос ик ӧй кыльы бере, эшшо золгес тренировкаос ортчытоно шуыса, малпай. Со ӵошатскон бере монэ Удмуртиысь пыдын бызьылӥсьёслэн сборноязы кутӥзы, Россиын но кунгож сьӧрын ортчись вожвылъяськонъёсы ӵемысь пыриськылыны кутски.

Куд-ог спортсменъёс вакчи яке кузь сюресэз бызьылыны ярато ке, мон шоро-куспозэ: 1500 метре, 3 яке 5 иськеме. Тросэз спортсменъёс та дистанциосты, тужгес но 1500 метрез, воксё адӟемпотостэм каро, нош мынам - яратоно сюресэ. Угось тужгес чидасьёсыз гинэ сое ортчыны быгато. Вакчи сюресэз ортчон вылысь ӝоглык кулэ, марафонэз бызён понна - чидан, нош шоро-куспо сюресъёслы - кыкез ик. Россиысь сборное шедемлэсь азьло 4 ар быгатонлыкъёсме кыдатӥ Удмуртилэн сборнояз.

Спортын вормонъёс басьтыны кутскемме шӧдыса, Россиысь мукет улосъёсысь тренеръёс но синйылтӥзы. Одӥг вакытэ Екатеринбург но Удмуртия команда понна очкоос люкай. Соку ик нырысьсэ валай: вордскем шаер котьмалэсь дуно вылэм. Котькуд командировкаысь бызьыса кадь дорам бертылӥ. 2006-тӥ арысен монэ кутӥзы Россиысь пыдын бызьылӥсьёслэн сборноязы. Тӥни соку кутскиз Удмуртилэсь мӧзмон.

Мугор кыдатыны - гурезе

- Туннэ нуналлы Россиысь сборное 3 мурт шедемын: Елена Наговицына, Фёдор Шутов но мон. Кыкез эшъёсы кузь сюресэз бызьыло. Кӧня эскери ни, Удмуртиысь спортсменъёслы тросгес удалтэ кузь сюресъёс вылын: асьмелэнъёслэн чиданзы бадӟым. Мон но, соослэсь адӟем карыса, ӧжытак кузьгес сюресэз бызьылыны малпасько. Ма солэсь пӧрмоз - вераны шуг.

Россиысь сборное шедьыса, улонам бадӟым воштӥськонъёс ортчизы кадь. Толэзьлы быдэ сборъёсы ветлӥськомы. Кылем арез эскерыса потоно ке, 12 толэзь пӧлысь 1-зэ гинэ дорам пукыны кылдӥз. Ӵем дыръя 1-2 нуналлы гинэ гуртэ пырасько, сыӵе вакытэ сумкаысьтым дӥсьёсме но мултэссэ уг поттаськы.

Россиысь пыдын бызьылӥсьёс сярысь калыклэсь пӧртэм веранъёссэ кылоно луэ: ма юнме ӟигарзэс быдто, вань вормонъёссэс шуныт палъёсысь спортсменъёс басьто... Мугорез быгатыса кыдатӥд ке, вормон дорозь но сузьтӥськыны луоно. Кылсярысь, Москва улосысь Юрий Борзаковский Олимпиадаын зарни медаль утӥз, та вакытэ Россиысь сборнойлэн тренерез луыса тырше.

Россиысь сборное шедьыса, бадӟым вормонъёс мынам дорам но вуыны ӧдъязы. 2006-тӥ арын Сочиын ортчиз Кавказлэн кубокез понна вожвылъяськон. Со ӵошатсконын 1500 метре бызьылонын спортъя мастерлэсь куронзэ быдэстӥ но Удмурт кун университетлэсь рекордзэ выльдӥ. Мынам пуктэм рекордэ туннэ но возиське на. 2007-тӥ арын Европалэн ӵошатсконысьтыз туй медален бертӥ. 2008-тӥ арын пыриськи Япониын ортчем дуннелэн чемпионатаз. Экиден амалъя (марафон сюресэз бызьылонъя командаен эстафета) ӵошатсконын Россилэн командаеныз вормон басьтӥмы.

Дуннеен тодматскон

- Ӵошатсконъёсы я сборъёсы потаса, пӧртэм кунъёсын тодматскыны кылдэ. Быдэс Европаез ортчыса, чебер интыослы синмаськылӥ ни вал, нош Японие вуылыса, ваньмызлы пайми. Отысь адямиослэн культура шоры учконзы мукет. Кылэм-адӟемез кылын вераны луонтэм. Кунгож сьӧры потонме азьвыл ик тодӥсько ке, книгаосын но Интернет вотэсын бугыръяськыса, отысь калыклэн улэм-вылэмез сярысь гожъямъёсын тодматскыны тыршисько. Бӧрысь кылэм-адӟемме но лыдӟемме ӵошатыны вырисько.

Школаын дышетскыкум, англи кылэз дышетон шоры чиньы пыр учкылӥ, шуыны луоз. Спортсменъёслы но пӧртэм кылэз тодэм уг люкеты вылэм. Кылысь кылэ берыктӥсьтэк вераськыны йӧндырисько ке но, сое мургес дышетон сярысь но малпанъёсы йырам бергало.

Сюрес вылын ворттылон сямен куд-ог дыръя уй-нуналэз но сураны кутсконо. Кылсярысь, Япониын 12 нунал улӥмы. Часъёслэн пӧртэмлыксы бадӟымен, нунал воштӥськемъёсты но шӧдытэк кылиськиз кадь. Португалие ветлыку, серемес учыре вуиськиз. Февраль толэзе Удмуртиын кезьыт вал, нош отын 30 градус пӧсь. Уен нунал воштӥськем гинэ ӧвӧл, толысь гужеме вуиськиз, вылаз ик, самолётэн лобыку, мынэсьтым багажме ыштӥзы. Сумкае ньылетӥ нуналаз гинэ мон доры вуиз, нош со вакытэ «пӧсь» странаын вениктэк мунчое пыроно луиз. Ульчаетӥ тол ботинкаосын, шуныт штанэн ветлӥськиз. Эшъёсы маин быгатӥзы юрттӥзы ке но, со пӧсез ноку уг вунэты. Португалиын 40 нунал улӥмы. Арнялы одӥг пол шутэтскон нуналмы вал, соку странаен тодматскимы.

Олимп гурезёзь ӝутскыны ӧз кылды ке но, дуннеысь студентъёслэн 2009-тӥ арын Сербиысь Белград городын ортчем Универсиадаязы пыриськи. Нимаз стартын 8-тӥ интыозь ӝутскыны удалтӥз. Дуннеысь дас кужмо спортсменъёс пӧлы шедемысьтым туж шумпотӥ.

Вормон но вожпотон, чидан но ӧпкелён

- Бадӟым ӵошатсконъёс дыръя котькуд спортсмен аслэсьтыз тужгес ӟеч лыдпуссэ возьматыны тырше. Жаляса верано, улонын малпамъя гинэ уг луы. Рекордэз выльдон понна тӧл, зор я азьвыл басьтэм шуккиськемъёс люкето. Куд-ог дыръя спортсменъёс, нырысетӥ кругез бызьыкузы ик, вылӥ ӝоглыкен ортчо, нош куд-ог дыръя - шутэтскыса выллем, финиш азьын гинэ шаплыгес карисько. Спортын удалтэ кужмоезлы. Вормисьёслы пичи шапык келяме но вань. 2009-тӥ арын Россилэн чемпионатэз дыръя 5 иськеме бызьылонын 3-тӥ инты басьтӥ. 2-тӥ интылэсь 0,02 секундлы кыли. Кӧты ӝож луиз ке но, чидано луиз. Ӵапак сыӵе учыръёс ик спортсменъёсыз кыдато, озьыен, эшшо золгес бызёно.

Бадӟым спортэ ӝутскон понна троссэ чидано луиз. Школаын дышетскыкум, арняяз 6 нунал быдэн 2-3 часэн пыдын бызьылӥ. Эшъёсы ӝыт шулдыръяськонъёсы потазы, нош мон дорын пуки. Тренировкаос бере тырмыт шутэтскытэк, спортын вормон дорозь сузьтӥськыны уд быгаты. Сиськон ласянь но чакласьконо. Кӧё-вӧё но коньыт сиёнъёслэсь, газ вуослэсь но мороженойлэсь возиськисько. Студент аръёсам ик монэ кутӥзы Удмурт Республикая МВД-лэн командаяз. Шонерзэ верано ке, патрулья но постъя службаын инспектор луыса ужаны ӧз кылды на, ялан ӵошатсконъёсы пыриськоно луэ. Кӧня ке арня талэсь азьло Россиысь МВД-лэн гужем биатлонъя чемпионатэз Ижын ортчиз. Удмуртилэн командаез огъя зачётын 2-тӥ инты басьтӥз.

Таӵе ӵошатсконъёс одӥг ласянь спортсменлы кыданы юртто кадь, нош мукет ласянь люкето но. Ӵапак та вожвылъяськонын сӥныре кыстӥськиз, ӝоггес йӧнатӥськыса, выль стартъёслы дасяськоно. Та нуналъёсы ортче пыдын бызьылонъя Россилэн чемпионатэз. Отын вормисе потэмъёслы сюрес усьтӥськоз дуннелэн чемпионатаз пыриськыны. Мынам но потэ вал отчы пыриськеме, но кылиз на ӧпкельыны гинэ. Туэ сӥзьыл Ульяновскын ортчыны кулэ Россиысь МВД-лэн пыдын бызьылонъя чемпионатэз. Отчы пыриськытэк уз луы.

Кыдаськом, будӥськом но пегӟиськом

- Шаерысьтымы тросэз дано спортсменъёс Гурт шудонъёсын кыдамын. Мон но арлы быдэ отчы пыриськисько, ёросысь командалы вормонъёс басьтыны юрттӥсько. Уг ваты, ёрос но спортсменъёссэ данъя. Ӵошатсконын вормисе потэмъёслы ватсаса 5, 4 но 3 сюрс манет (интыосты лыдэ басьтыса) сётэ. Гуртын улӥсько бере, аслам юрт пуктэме потэ. Ярано коть, ӵошатсконъёсы Дэри ёрос команда понна трос аръёс ӵоже пыриськем спортсменъёслы ёрос администрация Пыӵанка гурт котыре музъем висъяз. Табере кылиз на, коньдон люкаса, юрт пуктон сярысь малпаськыны.

Шӧдӥсько: пыдбере лёгасько ни егитъёс. Мынам сётскеме уг поты ке но, аслым ачим куд-ог йылпумъянъёс лэсьтӥ ни. Ачим сьӧры егит спортсменъёсты кыскисько, кыкетӥ арзэ Ижысь капчи атлетикая школаын тренер луыса ужасько.

Одӥг ласянь учконо ке, спортсмен но тренер одӥг удысын тыршо: бызьыло, выль вормонъёс сярысь сюлмасько. Но тренерлэсь ужзэ быдэсъяса гинэ, капчи атлетикаын кылдэм шуг-секытъёсты валаны кутски. Удмурт шаермы инкубатор выллем луэ, кужмо нылпиосыз шедьтӥськомы, будэтӥськомы, но Россиысь ӵошатсконъёсын вормонъёс вайыны кутско гинэ, мукет улосъёсы тӧлӟо. Кошконзылэн пӧртэм мугъёсыз: уждун пичи, командировкаосы потаны луонлыкъёс ӧвӧл...

Шаерысьтымы пыдын бызьылӥсьёсмы тросэз Чувашие кошко. Россиысь сборной командалэн шор-сюлмыз отын луэмен, лэся, республика спортлы бадӟым саклык висъя. Кемалась ик ӧвӧл Дэбес ёросысь Мария Пономарёва отчы кошкиз, нош кылем толэзе - Шаркан ёросысь Сергей Широбоков.

Шумпотонэ – семья

- Ӵошатсконъёсы ялан ветлӥсько бере, аслым кузпал но спортсменъёс пӧлысь ик шедьтӥ. Якшур-Бӧдья ёрос команда понна трос аръёс бызьылӥз Кристина Мартыненко. Со но Удмуртилэн сборнояз кутэмын, кылем арын спортъя мастерлэсь куронзэ быдэстӥз. Ми соин 6 ар эшъяськимы, кылем арын гинэ сюан шудыны луонлыкмы кылдӥз. Жаляса верано, сюанмы бере 4-тӥ нуналаз мыным сборъёсы кошконо луиз.

Та вакытэ улӥськомы Ижысь мурт квартираын. Нылмы будэ. Вань ӵыжы-выжыосмы пи возьмало вал, угось мон ласянь но, Кристина ласянь но котыр - нылъёс, нош мон понна ныл но туж мусо. Спортсменъёслэн ваньмон дырзы сокем трос ик уг луы ке но, яратӥсько лыдӟиськыны, чорыганы но пӧйшураны. Кам шурысь 1 килограмм быдӟа чорыг кутыны, ӵыжы-выжыосынымы ӵош кырпарсез погыртыны удалтӥз. Крезьгуро инструментъёсын уг шудӥськы, покчи классын дышетскыкум, кырӟась вылӥськем ке но. Такмакъёсты быдэстыса, ёросысь конкурсъёсын вормонъёс басьтылӥ вал. Соин, лэся, пичи дырме тодам вайыса, куд-ог тодмоосы туннэ но спортсмен луэмысьтым паймемын.

Источник:

Васильев К. Кырӟанзэ воштӥз бызьылонэн/ К. Васильев; записала Валентина Емельянова // Удмурт дунне. - 2015. - 7 авг. - С. 10,15. - (Тӧр шорын).

За предоставление материала выражаем огромную благодарность редакции газеты "Удмурт дунне"